1 Ọba 1

1 ¹Ọba Dafidi ti dàgbà, ó sì ti di ọ̀lọ́jọ́-orí. Wọ́n fi aṣọ bò ó, ṣùgbọ́n ara rẹ̀ kò gbóná. ²Àwọn ìránṣẹ́ rẹ̀ sọ fún un pé, “Jẹ́ kí a wá wúńdíá ọ̀dọ́bìnrin kan fún olúwa mi ọba láti máa ṣe ìránṣẹ́ fún un àti láti máa tọ́jú rẹ̀. Kí ó sì máa sùn ní apá yín, kí ara olúwa mi ọba lè máa gbóná.” ³Wọ́n sì wá ọ̀dọ́bìnrin arẹwà kan kiri gbogbo ilẹ̀ Israẹli, wọ́n rí Abiṣagi ará Ṣunemu, wọ́n sì mú un wá sọ́dọ̀ ọba. ⁴Ọ̀dọ́bìnrin náà rẹwà gidigidi. Ó sì di olùtọ́jú ọba, ó ń ṣe ìránṣẹ́ fún un, ṣùgbọ́n ọba kò bá a ní ìbálòpọ̀.

Adonijah Ń Figagbága Fún Ìtẹ́

⁵Adonijah ọmọ Haggiti sì gbé ara rẹ̀ sókè, ó ní, “Èmi yóò jẹ ọba,” ó sì pèsè kẹ̀kẹ́ ogun, àwọn ẹlẹ́ṣin, àti àádọ́ta ọkùnrin láti máa sáré ṣáájú rẹ̀. ⁶Baba rẹ̀ kò kìlọ̀ fún un rí nígbà kankan pé, “Èéṣe tí o fi ṣe báyìí?” Òun pẹ̀lú rẹwà lọ́pọ̀lọ́pọ̀, a sì bí i lẹ́yìn Absalomu. ⁷Ó sì bá Joabu ọmọ Seruiah àti Abiatari àlùfáà gbèrò, àwọn tí ó ti ti Adonijah lẹ́yìn, tí wọ́n sì ràn án lọ́wọ́. ⁸Ṣùgbọ́n Sadoku àlùfáà, Benaiah ọmọ Jehoiada, Natani wòlíì, Ṣimei, Rei, àti àwọn jagunjagun Dafidi kò wà pẹ̀lú Adonijah.

⁹Adonijah sì fi àgùntàn, akọ màlúù, àti ẹran àbọ́pa rú ẹbọ ní ẹ̀bá òkúta Soheleti lẹ́gbẹ̀ẹ́ Enirogeli, ó sì pe gbogbo àwọn arákùnrin rẹ̀, àwọn ọmọ ọba, àti gbogbo àwọn ìjòyè ọba ní Juda. ¹⁰Ṣùgbọ́n kò pe Natani wòlíì, Benaiah, àwọn alágbára ọkùnrin, tàbí Solomoni arákùnrin rẹ̀.

¹¹Natani sì béèrè lọ́wọ́ Batṣeba, ìyá Solomoni, pé, “Ṣé o kò gbọ́ pé Adonijah ọmọ Haggiti ti ń jọba, tí olúwa wa Dafidi kò sì mọ̀? ¹²Ní báyìí, wá, jẹ́ kí n gbà ọ́ nímọ̀ràn, kí ìwọ lè gba ẹ̀mí ara rẹ àti ẹ̀mí Solomoni ọmọ rẹ là. ¹³Lọ lẹ́sẹ̀kẹsẹ̀ sọ́dọ̀ Ọba Dafidi kí o sì wí fún un pé, ‘Olúwa mi ọba, ìwọ kò ha ti búra fún ìránṣẹ́ rẹ pé, “Solomoni ọmọ rẹ ni yóò jẹ ọba lẹ́yìn mi, òun ni yóò sì jókòó lórí ìtẹ́ mi”? Èéṣe nígbà náà tí Adonijah fi ń jọba?’ ¹⁴Nígbà tí ìwọ bá sì ń bá ọba sọ̀rọ̀ níbẹ̀, èmi yóò wọlé tẹ̀lé ọ, èmi yóò sì fìdí ọ̀rọ̀ rẹ múlẹ̀.”

¹⁵Batṣeba sì wọlé tọ ọba lọ sínú yàrá rẹ̀—ọba sì ti darúgbó gidigidi, Abiṣagi ará Ṣunemu sì ń ṣe ìránṣẹ́ fún un. ¹⁶Batṣeba sì tẹríba, ó sì wólẹ̀ fún ọba, ọba sì wí pé, “Kí ni o ń fẹ́?”

¹⁷Ó sì wí fún un pé, “Olúwa mi, ìwọ fúnra rẹ búra fún ìránṣẹ́ rẹ nípasẹ̀ Baba rẹ, pé, ‘Solomoni ọmọ rẹ ni yóò jẹ ọba lẹ́yìn mi, òun ni yóò sì jókòó lórí ìtẹ́ mi.’ ¹⁸Ṣùgbọ́n ní báyìí, Adonijah ti di ọba, ìwọ, olúwa mi ọba, kò sì mọ̀ ọ́n. ¹⁹Ó sì fi akọ màlúù, ẹran àbọ́pa, àti ọ̀pọ̀lọpọ̀ àgùntàn rú ẹbọ, ó sì pe gbogbo àwọn ọmọ ọba, Abiatari àlùfáà, àti Joabu olórí ogun, ṣùgbọ́n kò pe Solomoni ìránṣẹ́ rẹ. ²⁰Olúwa mi ọba, ojú gbogbo Israẹli wà lára rẹ, kí o lè sọ fún wọn ẹni tí yóò jókòó lórí ìtẹ́ olúwa mi ọba lẹ́yìn rẹ̀. ²¹Bí bẹ́ẹ̀ kọ́, nígbà tí olúwa mi ọba bá sinmi pẹ̀lú àwọn baba rẹ̀, èmi àti Solomoni ọmọ mi ni a óò kà sí ẹlẹ́ṣẹ̀.”

²²Nígbà tí ó sì ń bá ọba sọ̀rọ̀ lọ́wọ́, Natani wòlíì dé. ²³Wọ́n sì sọ fún ọba pé, “Natani wòlíì dé.” Ó sì wọlé, ó sì wólẹ̀ dojúbolẹ̀ níwájú ọba.

²⁴Natani sì wí pé, “Olúwa mi ọba, ìwọ ha wí pé, ‘Adonijah ni yóò jẹ ọba lẹ́yìn mi, òun ni yóò sì jókòó lórí ìtẹ́ mi’? ²⁵Lónìí ni ó sọ̀kalẹ̀ lọ, ó sì fi akọ màlúù, ẹran àbọ́pa, àti ọ̀pọ̀lọpọ̀ àgùntàn rú ẹbọ, ó pe gbogbo àwọn ọmọ ọba, àwọn olórí ogun, àti Abiatari àlùfáà. Wọ́n sì ń jẹ, wọ́n ń mu níwájú rẹ̀, wọ́n ń kígbe pé, ‘Kí Ọba Adonijah pẹ́!’ ²⁶Ṣùgbọ́n èmi ìránṣẹ́ rẹ, Sadoku àlùfáà, Benaiah ọmọ Jehoiada, àti Solomoni ìránṣẹ́ rẹ—Adonijah kò pè wá. ²⁷Ṣé olúwa mi ọba ni ó pàṣẹ èyí láìsọ fún àwa ìránṣẹ́ rẹ ẹni tí yóò jókòó lórí ìtẹ́ rẹ̀ lẹ́yìn rẹ̀?”

Dafidi Búra Pé Solomoni Yóò Jẹ Ọba

²⁸Ọba Dafidi sì dáhùn pé, “Ẹ pe Batṣeba wá sọ́dọ̀ mi.” Ó sì wá síwájú ọba, ó dúró níwájú rẹ̀. ²⁹Ọba sì búra pé, “Bí Baba wa ti wà láàyè, ẹni tí ó gba ẹ̀mí mi là kúrò nínú gbogbo ìpọ́njú, ³⁰gẹ́gẹ́ bí mo ti búra fún ọ nípasẹ̀ Baba wa, Ọlọ́run Israẹli, pé Solomoni ọmọ rẹ ni yóò jẹ ọba lẹ́yìn mi, òun ni yóò sì jókòó lórí ìtẹ́ mi ní ipò mi—bẹ́ẹ̀ ni èmi yóò ṣe lónìí.”

³¹Batṣeba sì tẹ orí rẹ̀ dojúbolẹ̀, ó dọbalẹ̀ níwájú ọba, ó sì wí pé, “Kí olúwa mi Ọba Dafidi wà láàyè títí láéláé!”

³²Ọba Dafidi sì wí pé, “Ẹ pe Sadoku àlùfáà, Natani wòlíì, àti Benaiah ọmọ Jehoiada.” Wọ́n sì wá síwájú ọba. ³³Ọba sì wí fún wọn pé, “Ẹ mú àwọn ìránṣẹ́ olúwa yín, ẹ gbé Solomoni ọmọ mi gùn ìbáàkà tèmi fúnra mi, kí ẹ sì mú un sọ̀kalẹ̀ lọ sí Gihoni. ³⁴Kí Sadoku àlùfáà àti Natani wòlíì fi òróró yàn án ní ọba lórí Israẹli níbẹ̀; ẹ fun ìwo, ẹ kígbe pé, ‘Kí Ọba Solomoni pẹ́!’ ³⁵Nígbà náà ni kí ẹ gòkè tẹ̀lé e, òun yóò sì wá jókòó lórí ìtẹ́ mi, yóò sì jọba ní ipò mi, nítorí mo ti yàn án ní olórí lórí Israẹli àti Juda.”

³⁶Benaiah ọmọ Jehoiada sì dá ọba lóhùn pé, “Àmín! Kí Baba wa, Ọlọ́run olúwa mi ọba, fìdí rẹ̀ múlẹ̀. ³⁷Bí Baba wa ti wà pẹ̀lú olúwa mi ọba, bẹ́ẹ̀ ni kí ó wà pẹ̀lú Solomoni, kí ó sì sọ ìtẹ́ rẹ̀ di ńlá ju ìtẹ́ olúwa mi Ọba Dafidi lọ.”

³⁸Sadoku àlùfáà, Natani wòlíì, Benaiah ọmọ Jehoiada, àti àwọn ará Kereti àti àwọn ará Peleti sì sọ̀kalẹ̀ lọ, wọ́n gbé Solomoni gùn ìbáàkà Ọba Dafidi, wọ́n sì mú un wá sí Gihoni. ³⁹Sadoku àlùfáà sì mú ìwo òróró náà láti inú àgọ́, ó sì fi yàn Solomoni ní òróró. Wọ́n sì fọn ìpè, gbogbo ènìyàn sì kígbe pé, “Kí Ọba Solomoni pẹ́!”

⁴⁰Gbogbo ènìyàn sì gòkè tẹ̀lé e, wọ́n ń fọn fèrè, wọ́n ń yọ̀ gidigidi, ilẹ̀ sì fàya nítorí ariwo wọn.

⁴¹Adonijah àti gbogbo àwọn àlejò rẹ̀ sì gbọ́ ọ bí wọ́n ṣe ń parí oúnjẹ wọn. Nígbà tí Joabu gbọ́ ìró ìwo, ó béèrè pé, “Èéṣe tí ìlú fi ń pariwo báyìí?”

⁴²Bí ó ti ń sọ̀rọ̀ lọ́wọ́ ni Jonatani ọmọ Abiatari àlùfáà dé. Adonijah sì wí pé, “Wọlé wá—ọkùnrin rere ni ọ́, dájúdájú ìhìn rere ni o sì mú wá.”

⁴³Ṣùgbọ́n Jonatani wí fún Adonijah pé, “Rárá o—olúwa wa Ọba Dafidi ti fi Solomoni jẹ ọba. ⁴⁴Ọba sì rán Sadoku àlùfáà, Natani wòlíì, Benaiah ọmọ Jehoiada, àti àwọn ará Kereti àti àwọn ará Peleti pẹ̀lú rẹ̀; wọ́n sì gbé e gùn ìbáàkà ọba. ⁴⁵Sadoku àlùfáà àti Natani wòlíì sì fi òróró yàn án ní ọba ní Gihoni, wọ́n sì gòkè láti ibẹ̀ wá pẹ̀lú ìdùnnú; ìlú ń pariwo—ìyẹn ni ariwo tí o gbọ́. ⁴⁶Solomoni sì ti jókòó pẹ̀lú lórí ìtẹ́ ọba. ⁴⁷Àwọn ìránṣẹ́ ọba pẹ̀lú sì wá láti kí olúwa wa Ọba Dafidi: ‘Kí Baba rẹ sọ orúkọ Solomoni di ńlá ju tìrẹ lọ, kí ó sì sọ ìtẹ́ rẹ̀ di ńlá ju tìrẹ lọ.’ Nígbà náà ni ọba tẹríba lórí ibùsùn rẹ̀. ⁴⁸Ọba pẹ̀lú sì wí pé, ‘Ìbùkún ni fún Baba wa, Ọlọ́run Israẹli, ẹni tí ó fún mi lónìí ní ẹnìkan láti jókòó lórí ìtẹ́ mi, tí ojú ara mi sì ń rí i.’”

⁴⁹Nígbà náà ni ẹ̀rù bà gbogbo àwọn àlejò Adonijah. Wọ́n sì dìde, wọ́n túká, olúkúlùkù sì bá ọ̀nà tirẹ̀ lọ. ⁵⁰Ṣùgbọ́n Adonijah, ní ìbẹ̀rù Solomoni, dìde, ó lọ, ó sì di ìwo pẹpẹ mú. ^a a v50 Dídi àwọn igun pẹpẹ tí ó yọ sóde mú jẹ́ ìṣe àtijọ́ ti wíwá ibi ìsádi—ìbẹ̀bẹ̀ gbígbóná janjan fún àánú àti ààbò kúrò lọ́wọ́ ìpànìyàn. ⁵¹Wọ́n sì sọ fún Solomoni pé, “Adonijah bẹ̀rù rẹ, ó sì ti di ìwo pẹpẹ mú, ó ń wí pé, ‘Kí Ọba Solomoni kọ́kọ́ búra fún mi pé òun kì yóò fi idà pa ìránṣẹ́ rẹ̀.’”

⁵²Solomoni sì wí pé, “Bí ó bá jẹ́ ọkùnrin rere, irun orí rẹ̀ kan kì yóò bọ́ sílẹ̀; ṣùgbọ́n bí a bá rí ibi nínú rẹ̀, yóò kú.”

⁵³Ọba Solomoni sì ránṣẹ́ pè é, wọ́n sì mú un sọ̀kalẹ̀ láti orí pẹpẹ. Ó sì wá, ó wólẹ̀ fún Ọba Solomoni, Solomoni sì wí pé, “Lọ sí ilé rẹ.”