Koosit Daudi ak Komengeechen
Koweeksei toroornatetap hekaluutap Solomon laitornatet ne kagipchei ak maotik che tononjin. Eng' nyalilda ne let kipchurchuryet, iboorgei Kwandanyo ma eng' usoonet anan maat ago eng' tuugeet ne ming'in ne kitwegu mutyo.
1 1Ki koosit Laitoryat Daudi, ak kiga koit kenyiisyek che chaang'. Ki kutlenchi icheek ineendet ngoroik, ago ma komuuch kolalei. 2Ki leenji otwogikyik, “Icheeng'echi kiptaiyandennyu laitoryat tiipta ne mureno, kotononji ak koriibei ineendet. Ingorue eng' eunekuuk, si kolalei kiptaiyandennyu laitoryat.” 3Ki cheeng'ate tiipta ne karaaran eng' Israel komugul, ak ki konyoor Abishag Chepsunamindet, ak koibu kaplaitoryat. 4Ki karaaran miising' tiipchooto. Ki egu riibindetap laitoryat ak kotononji, ago ma kongen ineendet laitoryat.
Toorchigei Adonijah Kaplaitoryat
5Ki ng'etunchigei Adonijah weeriitap Haggith, kole, “Alaitorani anee,” ak ki tinyei charunee, ak piik che laanyei paraisisyek, ak murenik artam che rwai kondoe ineendet. 6Ma ki kong'alaalsechi kwandanyi ineendet eng' sait age tugul, koleenji, “Amu nee si iyai niito?” Ki chii ne karaaran miising' agine, ak ki kisich ineendet let eng' Absalom. 7Ki ng'alaal ak Joab weeriitap Zeruiah ak Abiathar tisiindet, che ki isubu Adonijah ak kotoret ineendet. 8Ago ma ki mi Zadok tisiindet, ak Benaiah weeriitap Jehoiada, ak Nathan maotindet, ak Shimei, ak Rei, ak murenigap Daudi che nyigoonen, kobooto Adonijah.
9Ki eng'ji Adonijah keechiirek, ak eiik, ak tuuga che neraat, eng' ole mi koitap Zoheleth ne neegitee En-rogelo, ak ki kiguur tupchosyekyik tugul, weeriigap laitoryat, ak poisyegap laitoryat tugul che po Judah. 10Ago ma ki kiguur Nathan maotindet, ak Benaiah, ak murenik che nyigoonen, ak Solomon tupchennyi.
11Ki ng'alaalji Nathan Bathsheba kametap Solomon, kole, “Tos ma ki igas kole laitorani Adonijah weeriitap Haggith, ak ma kongen kiptaiyandennyo Daudi? 12Nguno bwa, aboorun kiit ne iyae, si isaru saboondang'ung' inyee, ak saboondap weeriing'ung' Solomon. 13Wendi ak sait kaplaitoryat Daudi, imwachi, ‘Kiptaiyandennyu laitoryat, tos ma ki iyarorchi otwogindeng'ung', kiile, “Laitorani Solomon weeriing'ung' let eng' anee, ak kotebee eng' kaplaitoryandennyu”? Amu nee anyun si laitorani Adonijah?’ 14Ye ta king'alaali inyee olooto ak laitoryat, anyonu anee let eng' inyee ak agimiit ng'aleeguk.”
15Ki wo Bathsheba kaplaitoryat eng' kaatinnyi—ki koosit miising' laitoryat, ak ki tononji Abishag Chepsunamindet ineendet. 16Ki ng'uruukyi Bathsheba ak kogutung'ji laitoryat, ak ki le laitoryat, “Nee ne imache?”
17Ki leenji ineendet, “Kiptaiyandennyu, inyee ineegei ki iyarorchi otwogindeng'ung' eng' Kwandang'ung', kiile, ‘Laitorani Solomon weeriing'ung' let eng' anee ak kotebee eng' kaplaitoryandennyu.’ 18Ago nguno ko laitorani Adonijah, ak inyee, kiptaiyandennyu laitoryat, ma ingen niito. 19Ki eng'ji eiik, ak tuuga che neraat, ak keechiirek che chaang', ak ki kiguur weeriigap laitoryat tugul, ak Abiathar tisiindet, ak Joab pounindetap lugeet, ago ma kiguur Solomon otwogindeng'ung'. 20Kiptaiyandennyu laitoryat, mi konyegap Israel tugul eng' inyee, si imwachi icheek ng'o ne tebee eng' kaplaitoryatap kiptaiyandennyu laitoryat let eng' ineendet. 21Ago ye rue kiptaiyandennyu laitoryat kobooto kwanik, kegeer anee ak weeriinnyu Solomon koek piik che tengekyin.”
22Ye ta king'alaali ineendet ak laitoryat, ki nyo Nathan maotindet. 23Ki mwachi laitoryat, kole, “Mi Nathan maotindet.” Ki chut ko ak kogutung'ji laitoryat ak togeennyi ng'wony.
24Ki le Nathan, “Kiptaiyandennyu laitoryat, tos ki imwa, ‘Laitorani Adonijah let eng' anee ak kotebee eng' kaplaitoryandennyu’? 25Ki choortagei raini ak koeng'ji eiik, ak tuuga che neraat, ak keechiirek che chaang', ak ki kiguur weeriigap laitoryat tugul, ak kiptainigap lugeet, ak Abiathar tisiindet. Amisyei ak koeisei eng' tainnyi, ak kowaakyo kole, ‘Ingomeng'iisyei laitoryat Adonijah!’ 26Ago anee otwogindeng'ung', ak Zadok tisiindet, ak Benaiah weeriitap Jehoiada, ak Solomon otwogindeng'ung'—ma ki kiguur Adonijah. 27Tos ki ng'at kiptaiyandennyu laitoryat niito, ago ma ki imwaiwech otwogiguk ng'o ne tebee eng' kaplaitoryandennyi let eng' ineendet?”
Iyaror Daudi kole Laitorani Solomon
28Ki wol laitoryat Daudi, kole, “Oguurwa Bathsheba.” Ki nyo taitap laitoryat ak kotonon eng' tainnyi. 29Ki yaror laitoryat, kole, “Ko uu ye sabei Kwandanyo, ne ki isaru saboondanyu eng' chaat tugul, 30ko uu ye ki ayarorchin eng' Kwandanyo, Kamuktaindetap Israel, kiale, Laitorani Solomon weeriing'ung' let eng' anee ak kotebee eng' kaplaitoryandennyu eng' komostanyu—ayae ko uu nooto raini.”
31Ki ng'uruukyi Bathsheba ak togeennyi ng'wony, ak kogutung'ji laitoryat, ak ki le, “Ingotep koigeny kiptaiyandennyu laitoryat Daudi!”
32Ki le laitoryat Daudi, “Oguur Zadok tisiindet, ak Nathan maotindet, ak Benaiah weeriitap Jehoiada.” Ki nyo icheek taitap laitoryat. 33Ki leenji laitoryat, “Onam otwogigap kiptaiyandeng'wong', olaanyi weeriinnyu Solomon nyumbunnyu anee, ak oibu kochoortagei Gihon. 34Ingotisisye Zadok tisiindet ak Nathan maotindet olooto koek laitoryatap Israel; okuut iryageet, owaakyo, ‘Ingomeng'iisyei laitoryat Solomon!’ 35Yeityo otogoste let eng' ineendet, ak konyo kotebee eng' kaplaitoryandennyu ak kolaitorani eng' komostanyu, amu ki ayai ineendet koek kiptaiyatap Israel ak Judah.”
36Ki wolji Benaiah weeriitap Jehoiada laitoryat, kole, “Amen! Ingogimiit Kwandanyo, Kamuktaindetap kiptaiyandennyu laitoryat, niito. 37Ingotep Kwandanyo kobooto Solomon agine, ko uu ye ki mi kobooto kiptaiyandennyu laitoryat; ak ingoyai kaplaitoryatnyi koek ne oo kosiir kaplaitoryatap kiptaiyandennyu Laitoryat Daudi.”
38Ki choortagei Zadok tisiindet, ak Nathan maotindet, ak Benaiah weeriitap Jehoiada, kobooto Keretik ak Peletik, ak kilaanyi Solomon eng' nyumbut ne po Laitoryat Daudi, ak koibu Gihon. 39Ki inam Zadok tisiindet iryagetap mwanik eng' kooita, ak koisisye Solomon. Ki kuut igondeet, ak kowaakyo piik tugul, kole, “Ingomeng'iisyei laitoryat Solomon!”
40Ki togoste piik tugul let eng' ineendet, ak koputei suumeek, ak koboiboitu miising', ak ki boldos ng'wony amu polatennywa.
41Kingo kagobata koamis Adonijah ak piik tugul che kiga kiguur, ko kas icheek polateet. Ye kingo kas Joab kutitap iryageet, koteep kole, “Amu nee si ng'eet polateet eng' nganaseet?”
42Ye kita kong'alaali, konyo Jonathan weeriitap Abiathar tisiindet. Ki le Adonijah, “Nyoo, amu inyee ko chii ne karaaran, ak imuti logoiywek che myee.”
43Ago ki wolji Jonathan Adonijah, “Achicha! Kagoyai kiptaiyandennyo Laitoryat Daudi koek laitoryat Solomon. 44Ki iyookto laitoryat Zadok tisiindet, ak Nathan maotindet, ak Benaiah weeriitap Jehoiada, ak Keretik ak Peletik kobooto ineendet; ak ki kilaany icheek ineendet nyumbutap laitoryat. 45Ki tisis Zadok tisiindet ak Nathan maotindet ineendet koek laitoryat eng' Gihon, ak ki pa kobunu yooto koboiboitu; koeet polateet eng' nganaseet, nooto polateet ne kagas okweek. 46Ak kagotebee Solomon koboritap laitornatet. 47Ak kobwa agine otwogigap laitoryat koberuur kiptaiyandennyo Laitoryat Daudi, koleenji, ‘Ingoyai Kwandang'ung' kainetap Solomon koek ne oo kosiir neng'ung', ak koboritanyi koek ne oo kosiir koboritang'ung'.’ Yeityo kogutung'ji laitoryat eng' ruiyoinnyi. 48Ak ki le laitoryat agine, ‘Ingoberuuret Kwandanyo, Kamuktaindetap Israel, ne kagoono peetuuni chiito ne tebee koboritanyu, ko kerei konyeguk che po anee.’”
49Ki toptobenso piik tugul che ki kiguur Adonijah, ak koiyweis. Ki ng'eetyo ak kowe chii tugul ooreennyi. 50Ago ki iywei Adonijah Solomon, ak ki ng'eet kowe konam tunuguutap kaptisisyet. a a v50 Konam tunuguutap kaptisisyet ko ki kiyetaet ne po kisiisyo ye kicheeng'e chii ole uunonen; soomet ne oo ne po rireenet ak riipset si ma kipar. 51Ki kimwachi Solomon, keleenji, “Iywein Adonijah, ak kagonam tunuguutap kaptisisyet, kole, ‘Ingosartaiwo tai Laitoryat Solomon, ale ma par otwogindennyi eng' rotweet.’”
52Ki le Solomon, “Ngot imanat, koma but agenge suumeek ne po metinnyi ng'wony; ago ngot kinyoor yaityet eng' ineendet, komet.”
53Ki iyookto Laitoryat Solomon koguur ineendet, ak ki kichoorune kaptisisyet. Ki nyo ak kogutung'ji Laitoryat Solomon, ak ki le Solomon, “We gaa.”