Koit Daudi Piik
Koit Daudi murenikyik che yoei lugeet, ak yeityo kowiiri ineendet muguleldanyi ineegei. Ye kigoochi iyanatosyek somok, kochoor kobut eng' eunegap Kwanda ko ma eunegap piik, amu oo rireenennyi. Komong'ji iyanatet eng' rwanyutap Arauna, ne machei Daudi koal ineendet ko ma konam puch.
Ng'alaali Kwandanyo eng' mustarisyek 1, 12, 16
24 1Ki week kolaany angeet Kwandanyo agobo Israel, ak ki get Daudi koigaige icheek, kole, “Ui, iit piigap Israel ak Judah.”
2Ki leenji anyun laitoryat Joab, ne ki kiptaiyatap lugeennyi ne ki mi kobooto ineendet, “Ui nguno eng' ortinwegap Israel tugul, kobooch Dan agoi Beer-sheba, ak iit piik, si ang'en koitetap piik.”
3Ago ki leenji Joab laitoryat, “Ingotes Kwandang'ung' piik kot koek pogol oldo ko uu ye mi icheek, ak ingeer konyegap kiptaiyandennyu laitoryat. Ago amune machei kiptaiyandennyu laitoryat koyai kiit ni?”
4Ago ki siir ng'atuutyetap laitoryat Joab ak kiptainigap lugeet. Ki ng'eetyo anyun Joab ak kiptainigap lugeet eng' taitap laitoryat koba koit piigap Israel. 5Ki siir Jordan ak kotebyei neegit Aroer, murot taitap nganaseet ne mi kwenutap atebweet, kotokyigei Gad ak koba agoi Jaser. 6Yeityo ki pwa Gilead ak komostap Tatim-hodshi, ak ki pwa Dan-jan ak koriingei Sidon, 7ak ki pwa irimeetap Tyro ak nganasook tugul che po Hibik ak Kanaanik, ak ki ng'etyo koba murot taitap Judah Beer-sheba. 8Ki pata anyun emet komugul, kobwa Jerusalem eng' let arawek sogool ak peetuusyek tiptem. 9Ki ng'alaalji Joab laitoryat koitetap piik: ki mi Israel murenik che nyigoonen eliphuusyek pogol sisiit, che namei rotwetap chok, ak ki tinyei Judah eliphuusyek pogol muut.
10Ago ki birchi muguleldap Daudi ineendet amu ki kigoit piik. Ak ki leenji Daudi Kwandanyo, “Ka atengekto miising' eng' ne kayai. Nguno, Kwandanyo, asoomin ale, isto tengegutyetap otwogindeng'ung', amu ka ayai miising' eng' perberyo.”
11Ye ki ng'eetyo Daudi mornet, ki nyoonji ng'olyootap Kwandanyo maotyot Gad, keerindetap Daudi:
12“Ui ak imwachi Daudi, ‘Kamwa ko uu ni Kwandanyo: Anam tuguuk somok eng' barak ung'. Ilewen agenge eng' icheek, ak ayachini eng' inyee.’”
13Ki nyo anyun Gad kap Daudi ak komwachi, koteebee, “Nyoonjin rubeet ne po kenyiisyek somok emeng'ung'? Anan imwee arawek somok eng' taitap puunik, kota oonei icheek? Anan komi kipkeeyet eng' emeng'ung' peetuusyek somok? Bwaat anyun nguno ak ilewen ng'olyoot ne awolchin ineendet ne ki iyookwo.”
14Ki leenji anyun Daudi Gad, “A eng' nyalilda ne oo. Kebut eunegap Kwandanyo, amu eechen rireenosyekyik miising'; ago mat abute eutap chii.”
15Ki iyookto anyun Kwandanyo kipkeeyet Israel kobooch mornet agoi sait ne ki kiriip, ak ki pek piik eliphuusyek tisom kobooch Dan agoi Beer-sheba. a a v15 “Sait ne ki kirib” ko simomwa agobo sait ne ki kigeiten ne po tolochindap koleny.
16Ago ye ki chuul angeet eunnyi kotokyi Jerusalem si kobet, ki wol Kwandanyo kabwaatutikyik agobo yaityet, ak koleenji angeet ne betei piik, “Kagoyaten! Nguno iteren eung'ung'.” Ki mi anyun angeet Kwandanyo neegit ole mi rwanyutap Arauna Jebusindet.
17Ye ki keer Daudi angeet ne birei piik, ki ng'alaalji Kwandanyo koleenji, “Keero, anee ne ka atengekto; anee ne ka ayai ne ya. Ago keechiirechu, nee ne ki koyai? Asoomin ale, ingobut eung'ung' eng' anee ak eng' kootap kwandanyu.”
Ki Teech Daudi Koroito
18Eng' peetuunooto ki nyo Gad kap Daudi ak koleenji, “Togoste ak iteech koroito ne po Kwandanyo eng' ole mi rwanyutap Arauna Jebusindet.” 19Ki togosta anyun Daudi, ko uu ng'olyootap Gad, ko uu ye ki ng'at Kwandanyo. 20Ye ki ng'ulmeng' Arauna ak koger laitoryat ak otwogikyik kobwonji ineendet, ki ng'etyo ak kong'uruukso eng' taitap laitoryat koteksei tainnyi ng'wony. 21Ak ki le Arauna, “Amune ka konyo kiptaiyandennyu laitoryat kap otwogindennyi?” Kowol Daudi kole, “Si aal rwanyut eng' inyee, ateech koroito ne po Kwandanyo, si koteren kipkeeyet komang'une piik.”
22Ki leenji Arauna Daudi, “Ingonam kiptaiyandennyu laitoryat ak kotoloch kiit ne keerei kole myee. Keero, chu eiik che po kaatoretap maat, ak ole kityage rwanyut ak kurubuugap eiik koek kweenik. 23Chu tugul, ee laitoryat, kagoochi Arauna laitoryat.” Ak ki leenji Arauna laitoryat, “Ingochamin Kamuktaindet ne Toroor Kamuktaindeng'ung'.”
24Ago ki leenji laitoryat Arauna, “Aach, ayan ale aal eng' inyee eng' alyet. Ma atolochini Kwandanyo kaatoretap maat che matolosyewa kiy.” Ki al anyun Daudi rwanyut ak eiik eng' olo po paunisyek aeng' che po fedha. 25Ak ki teech Daudi koroito eng' olooto ne po Kwandanyo ak kotoloch kaatoretap maat ak kaatorennwegap kaalyeet. Ki wolu anyun Kwandanyo soomet ne po emet, ak koteren kipkeeyet komang'une Israel.