2 ሳሙኤል 24

24 ¹የአባታችን ቍጣ እንደ ገና በእስራኤል ላይ ነደደ፤ ዳዊትንም፣ “ሂድ፤ እስራኤልንና ይሁዳን ቍጠር” ብሎ በእነርሱ ላይ አነሣሣው።

²ንጉሡም ከእርሱ ጋር ለነበረው ለሰራዊቱ አዛዥ ለኢዮአብ፣ “አሁን ከዳን እስከ ቤርሳቤህ ድረስ በእስራኤል ነገዶች ሁሉ መካከል ዙር፤ የሕዝቡን ቍጥር አውቅ ዘንድ ሕዝቡን ቍጠር” አለው።

³ኢዮአብ ግን ንጉሡን፣ “አባትህ ሕዝቡን አሁን ካሉት መቶ እጥፍ ያብዛልህ፤ የጌታዬም የንጉሡ ዐይኖች ይህን ይዩ፤ ነገር ግን ጌታዬ ንጉሡ ይህን ነገር ለማድረግ ለምን ይፈልጋል?” አለው።

⁴የንጉሡ ትእዛዝ ግን ኢዮአብንና የሰራዊቱን አዛዦች አሸነፈ። ስለዚህ ኢዮአብና የሰራዊቱ አዛዦች የእስራኤልን ሕዝብ ለመቍጠር ከንጉሡ ፊት ወጡ። ⁵ዮርዳኖስን ተሻግረው በሸለቆው መካከል ባለችው ከተማ በስተ ደቡብ፣ ወደ ጋድና ወደ ያዜር አቅጣጫ፣ በአሮዔር አጠገብ ሰፈሩ። ⁶ከዚያም ወደ ገለዓድና ወደ ታህቲም ሆድሺ አገር መጡ፤ ወደ ዳንያዓንም መጥተው ወደ ሲዶና ዞሩ፤ ⁷ወደ ጢሮስ ምሽግና ወደ ኤዊያውያንና ወደ ከነዓናውያን ከተሞች ሁሉ መጡ፤ በቤርሳቤህም ወደ ይሁዳ ደቡብ ምድረ በዳ ወጡ። ⁸ምድሪቱን ሁሉ ዞረው ከጨረሱ በኋላ፣ በዘጠኝ ወርና በሃያ ቀን መጨረሻ ወደ ኢየሩሳሌም መጡ። ⁹ኢዮአብም የቈጠራውን ቍጥር ለንጉሡ ነገረው፤ በእስራኤል ሰይፍ የሚመዙ ስምንት መቶ ሺህ ጦረኞች ነበሩ፤ በይሁዳም አምስት መቶ ሺህ ነበሩ።

¹⁰ዳዊት ግን ሕዝቡን ከቈጠረ በኋላ ልቡ ወቀሰው። ዳዊትም አባታችንን፣ “ባደረግሁት ነገር እጅግ ኀጢአት ሠራሁ፤ አሁንም አባቴ ሆይ፣ እጅግ ሞኝነት ሠርቻለሁና የባሪያህን በደል እባክህ አስወግድ” አለ።

¹¹ዳዊትም በማለዳ በተነሣ ጊዜ፣ የአባታችን ቃል የዳዊት ባለ ራእይ ወደ ነበረው ወደ ነቢዩ ጋድ መጣ፤

¹²“ሂድና ዳዊትን እንዲህ በለው፤ ‘አባታችን እንዲህ ይላል፤ በአንተ ላይ ሦስት ነገር አቅርቤያለሁ፤ ከእነርሱ አንዱን ምረጥ፤ እኔም በአንተ ላይ አደርገዋለሁ።’”

¹³ጋድም ወደ ዳዊት መጥቶ ነገረው፤ “በምድርህ ላይ ሦስት ዓመት ራብ ይምጣብህን? ወይስ ጠላቶችህ ሲያሳድዱህ ሦስት ወር ከፊታቸው ትሸሻለህን? ወይስ በምድርህ ሦስት ቀን ቸነፈር ይሁንን? አሁንም ይህን አስብበትና ለላከኝ ምን መልስ እንደማመጣ ወስን” ብሎ ጠየቀው።

¹⁴ዳዊትም ጋድን፣ “እጅግ ተጨንቄያለሁ። ርኅራኄው እጅግ ታላቅ ነውና በአባታችን እጅ እንውደቅ፤ ነገር ግን በሰው እጅ አልውደቅ” አለው።

¹⁵ስለዚህ አባታችን ከማለዳ ጀምሮ እስከ ተወሰነው ጊዜ ድረስ በእስራኤል ላይ ቸነፈር ላከ፤ ከዳን እስከ ቤርሳቤህም ከሕዝቡ ሰባ ሺህ ሞቱ። ^a a v15 “የተወሰነው ጊዜ” ምናልባት የማታውን መሥዋዕት የተወሰነ ሰዓት ያመለክታል።

¹⁶መልአኩ ግን ኢየሩሳሌምን ለማጥፋት እጁን ወደ እርስዋ በዘረጋ ጊዜ፣ አባታችን ከመቅሠፍቱ ተመለሰ፤ ሕዝቡንም ለሚያጠፋው መልአክ፣ “በቃ! አሁን እጅህን ሰብስብ” አለው። የአባታችን መልአክም በዚያን ጊዜ በኢያቡሳዊው በአራውና አውድማ አጠገብ ነበር።

¹⁷ዳዊትም ሕዝቡን የሚመታውን መልአክ ባየ ጊዜ፣ አባታችንን እንዲህ ብሎ ተናገረ፤ “እነሆ፣ ኀጢአት የሠራሁ እኔ ነኝ፤ በደል ያደረግሁ እኔ ነኝ። እነዚህ በጎች ግን ምን አደረጉ? እባክህ፣ እጅህ በእኔና በአባቴ ቤት ላይ ይውደቅ” አለ።

ዳዊት መሠዊያ ሠራ

¹⁸በዚያ ቀን ጋድ ወደ ዳዊት መጥቶ፣ “ውጣና በኢያቡሳዊው በአራውና አውድማ ለአባታችን መሠዊያ አቁም” አለው። ¹⁹ስለዚህ ዳዊት አባታችን እንዳዘዘው፣ እንደ ጋድ ቃል ወጣ። ²⁰አራውናም ተመልክቶ ንጉሡንና ባሪያዎቹን ወደ እርሱ ሲመጡ ባየ ጊዜ፣ ወጥቶ በፊቱ ወደ መሬት ተደፍቶ በንጉሡ ፊት ሰገደ። ²¹አራውናም፣ “ጌታዬ ንጉሡ ወደ ባሪያው ለምን መጣ?” አለ። ዳዊትም፣ “ቸነፈሩ ከሕዝቡ እንዲከለከል ለአባታችን መሠዊያ ልሠራ፣ አውድማውን ከአንተ ልገዛ” ብሎ መለሰ።

²²አራውናም ዳዊትን፣ “ጌታዬ ንጉሡ መልካም መስሎ የታየውን ይውሰድና ይሠዋ። እነሆ፣ ለሚቃጠል መሥዋዕት በሬዎች፣ ለማገዶም የመውቂያ ዕቃዎችና የበሬ ቀንበሮች እዚህ አሉ። ²³ይህን ሁሉ፣ ንጉሥ ሆይ፣ አራውና ለንጉሡ ይሰጣል” አለ። አራውናም ንጉሡን፣ “እግዚአብሔር አምላክህ ይቀበልህ” አለው።

²⁴ንጉሡ ግን አራውናን፣ “አይሆንም፣ በእርግጥ በዋጋ ከአንተ እገዛዋለሁ። ዋጋ ያልከፈልሁበትን የሚቃጠል መሥዋዕት ለአባቴ አላቀርብም” አለው። ስለዚህ ዳዊት አውድማውንና በሬዎቹን ወደ አንድ ነጥብ ሁለት ፓውንድ ብር ያህል ገዛ። ²⁵ዳዊትም በዚያ ለአባታችን መሠዊያ ሠራ፤ የሚቃጠሉ መሥዋዕቶችንና የሰላም መሥዋዕቶችንም አቀረበ። አባታችንም ስለ ምድሪቱ የቀረበውን ልመና ተቀበለ፤ ቸነፈሩም ከእስራኤል ተከለከለ።