David pora manuh ginti kore
David pora tar lorai kora manuh khan ke gonti korise, aru pichete tar nijor mon pora taike maarise. Tin ta saja laga basi diya te, tai manuh laga haath te nohoi, amar Pitri laga haath te giribole basise, kilemane Tai laga doya bisi dangor ase. Araunah laga dhan pita jaga te mohamari rukise, aru David pora etu mana te loi nalobo koi kene, kini loise.
24 1Aru ekbar amar Pitri laga khong Israel uporte julise, aru Tar pora David ke tarkhan bhirodh te uksai dise, koi kene, “Jabi, Israel aru Judah laga manuh ginti koribi.”
2Titia raja pora tar logote thaka sipahi khan laga senapati Joab ke koise, “Etiya Dan pora Beersheba tak, Israel laga sob jati majote jabi, aru manuh khan ke ginti koribi, titia moi manuh khan laga ginti janibo paribo.”
3Kintu Joab pora raja ke koise, “Tumar Pitri pora manuh khan ke etiya thaka pora eksoh guna bisi bonai dibi, aru moi laga probhu raja laga suku pora eitu dekhibi. Kintu kile moi laga probhu raja eitu kaam koribole mon ase?”
4Kintu raja laga hukum pora Joab aru sipahi khan laga senapati khan ke harai dise. Titia Joab aru sipahi khan laga senapati khan Israel laga manuh ginti koribole raja laga usor pora ulai jaise. 5Tarkhan Jordan nodi paar korise aru haba majote thaka sohor laga dakshin phale, Aroer usorte tombu lagaise, Gad phale aru age Jazer tak. 6Titia tarkhan Gilead aru Tahtim-hodshi laga desh te ahise, aru tarkhan Dan-jaan te ahise aru ghuri kene Sidon tak, 7aru Tyre laga kila te aru Hivite khan aru Canaan khan laga sob sohor te ahise, aru tarkhan Beersheba te, Judah laga Negev te ulai jaise. 8Titia tarkhan pora sob desh te ghuri kene, nou mohina aru bees din pichete Jerusalem te ahise. 9Joab pora raja ke ginti laga hisab janai dise: Israel te talwar uthua bahadur manuh aath lakh thakise, aru Judah te pans lakh thakise.
10Kintu manuh khan ke ginti kora pichete David laga mon pora tar ke marise. Aru David pora amar Pitri ke koise, “Moi ki korise, etu te moi bisi paap korise. Etiya, moi laga Pitri, Apuni laga noukar laga dhos hatai dibi, kilemane moi bisi murkho kaam korise.”
11David phojur te uthise, titia amar Pitri laga kotha David laga drishtikari, bhabobadi Gad ke ahise:
12“Jabi aru David ke kobi, ‘Amar Pitri eneka koi ase: Moi tumar uporte tinta jinis dhori ase. Eitu majote ekta basi lobi, aru Moi tumar bhirodh te eitu kori dibo.’”
13Titia Gad David logote ahise aru tar ke koise, hudi kene, “Tumar desh te tin bosor laga akal ahibo naki? Nahole tumar dushman khan pora tumi ke khedi thaka homoite tumi tin mohina polabo naki? Nahole tumar desh te tin din laga bemari ahibo naki? Etiya bhabi kene sabi, aru moi ke pathai diya ekjon ke ki jawab loi jabo lage, eitu thik koribi.”
14Titia David pora Gad ke koise, “Moi bisi dukhte ase. Ami amar Pitri laga hathte giribo, kilemane Tar morom bisi dangor ase; kintu moi ke manuh laga hathte giribo nadibi.”
15Titia amar Pitri pora Israel uporte phojur pora thik kora homoi tak bemari pathai dise, aru Dan pora Beersheba tak manuh khan majote sottor hajar mori jaise. a a v15 “Thik kora homoi” eitu bikal laga bolidan laga thik kora somoi ke bujhai ase.
16Kintu Jerusalem ke khotom koribole sorgodoot pora tai laga hath Jerusalem phale lamba korise jitia, amar Pitri hei dukh pora mon ghurai loise aru manuh khan ke khotom kori thaka sorgodoot ke koise, “Khisise! Etiya tumar hath rukhabi.” Hei somoite amar Pitri laga sorgodoot Jebusi manuh Araunah laga dhaan kuta jagah usorte thakise.
17Manuh khan ke mari thaka sorgodoot ke David dekhise jitia, tai amar Pitri logote koise aru koise, “Sabi, paap kora ekjon moi ase; golti kora ekjon moi ase. Kintu etu mer khan, tarkhan ki korise? Moi uporte aru moi laga baba laga ghor uporte Apuni laga hath giribo dibi.”
David pora bedi ekta bonai
18Hei dinte Gad David logote ahise aru tar ke koise, “Uthi jabi aru Jebusi manuh Araunah laga dhaan kuta jagah te amar Pitri nimite bedi ekta bonabi.” 19Titia David, amar Pitri pora hukum diya nisina, Gad laga kotha hisab te uthi jaise. 20Araunah nichete sai kene raja aru tar noukar khan tai phale ahi thaka dekhise jitia, tai ulai ahise aru matite tai laga mukh rakhi kene raja usorte matha jhukaise. 21Aru Araunah koise, “Kile moi laga probhu raja tai laga noukar logote ahise?” David jawab dise, “Tumar pora dhaan kuta jagah kinibole, amar Pitri nimite bedi ekta bonabole, titia manuh khan pora bemari rukhi jabo.”
22Araunah pora David ke koise, “Moi laga probhu raja ke bhal lagikena, tai loi kene bolidan dibi. Sabi, jola bolidan nimite goru khan yate ase, aru khuri nimite dhaan kuta jukti aru goru laga juwali khan. 23He raja, eitu sob, Araunah pora raja ke di ase.” Aru Araunah pora raja ke koise, “Prabhu tumar Isor pora apuni ke grohon koribi.”
24Kintu raja pora Araunah ke koise, “Nai, moi tumar pora dam di kene eitu kinibo. Moi eku daam nathaka jola bolidan moi laga Pitri ke nadibo.” Titia David pora dhaan kuta jagah aru goru khan prai ek.Dui pound chandi te kinise. 25Aru David pora ta te amar Pitri nimite bedi ekta bonaise aru jola bolidan aru shanti bolidan dise. Titia amar Pitri pora desh nimite kora binti ke jawab dise, aru Israel pora bemari rukhi jaise.