2 Samuel 24

24 ¹Latluida ithumwui Avāwui malungkhavāt Israelwuitungli leiluishita, kala ana Davidli athumwuitungli rāsuda hānga, "Vaulu, Israel kala Judahwui mi mashing shānkhuilu."

²Chieina awungana ali zangkasā raimi kathāna Joabli hānga, "Ara Israelwui shang saikorali, Dan eina thuida Beer-sheba vāshungda ngara̱thuilu, kala mibingli mashing shānkhuilu, chieina ina mibingwui mashing theira."

³Kha Joabna awungali hānga, "Nawui Avāna mibingli athum leikasāwui shākha ngazan mataisangmiranu, kala iwui amei awungawui mik eina theimiranu. Kha khisāda iwui amei awungana ot hi sākhangaikhala?"

⁴Kha awungawui kakasona Joab kala rai kathānabingli pangshapa. Chieina Joab kala rai kathānabing Israelwui mibingli mashing shānkhavai awungawui mangā eina shokhaowa. ⁵Athumna Jordan makānhailaga, tampāk zangli khalei keinungwui azingshong khalei Aroerli rairum vasāpama, kala Gadli kala Jazer vāshungda vai. ⁶Chiwui thili athumna Gileadli kala Tahtim-hodshi ngaleili vai, kala athumna Dan-jaanli vāda kuimareida Sidonli vai, ⁷kala Tyrewui raipanli kala Hivnaobing eina Canaannaobingwui keinung saikorali vai, kala athumna Beer-shebali khalei Judahwui Negebshong shokhaowa. ⁸Chieina athumna ngalei saikorali ngara̱thuihailaga, kachāng chiko kala thang maga̱ kāshunghaiwui thili Jerusalemli vai. ⁹Joabna mibing shānkakhui mashing chi awungali khuiungmi: Israelwui alungli raighai singkathei rai kapinga mi lakh chishatna; kala Judahwui alungli lakh phangāna.

¹⁰Kha Davidna mibingli mashing shānkakhui thili awui wuklungna ali sāza̱haowa. Kala Davidna ithumwui Avāli hānga, "Iwui sākahai hili ina morei haklak eina sāhaira. Kha ara, iwui Avā, naraowui khayonkhamāng hi kakhuithuimihaolu; kaja ina mangma̱ haklak eina sāhaira."

¹¹Davidna ngathor ngakarthui tharan, ithumwui Avāwui tui china Davidwui khanong marān Gadli rāhānga:

¹²"Vālaga Davidli hānglu, 'Ithumwui Avāna hithāda hānga: Ina nawuitungli ot kathum haichinga. Chibingwui alung eina akha pangkhuilu, kala ina chi nawuitungli sāra.'"

¹³Chieina Gadna Davidli vālaga ngahānda hānga, "Nawui ngaleili zingkum kathum zāt marātāra? Lah nawui yangkashebingna nali kharomlakha, kachāng kathum athumwui mangā eina nana yāmra? Lah nawui ngaleili zimiksho kathum kazātkashi leira? Ara phaningkhaunglaga, ili kashirāt chili ina khi ngahānkā latungluira da khangarān sāmilu."

¹⁴Chieina Davidna Gadli hānga, "Ina ningkachot haklak eina lei. Ithum ithumwui Avāwui pāngli pitāsa, kaja awui lukhamashan pemting hi khareina; kha ili miwui pāngli pitā ngasakmialu."

¹⁵Chieina ngathor eina thuida kapangsang kahai atam vāshungda ithumwui Avāna Israelwuitungli kazātkashi chihoi, kala Dan eina thuida Beer-sheba vāshungda mi thing hangshini thihaowa. ^a a v15 "Kapangsang kahai atam" da kahāng hi kazing khayingwui khayangawui atam pangsang chili hāngna theira.

¹⁶Kha kazingraona Jerusalemli sāshimān khavai apāng katinga tharan, ithumwui Avāna kalākashiwui vang ning ngacheihaowa, kala mibingli sāshimāna kazingrao chili hānga, "Shapa! Ara nawui pāng phāhainaolu." Chitharan ithumwui Avāwui kazingrao chi Jebuspa Araunahwui lanpumwui pheili leisai.

¹⁷Davidna mibingli kashao kazingrao chi kathei tharan, ana ithumwui Avāli hānga, "Yanglu, ina morei sāhaira; kala ina khangui ot sāhaira. Kha yao hibingna khi sāhao? Ina kapona, nawui pāng iwuitungli kala iwui avāwui shimkhurli leiranu."

Davidna Hanphut Akha Sākhui

¹⁸Chithang Gadna Davidli rāhānga, "Kālaga Jebuspa Araunahwui lanpumli ithumwui Avā wui vang hanphut akha sākhuilu." ¹⁹Chieina Davidna Gadwui tui athishurda ithumwui Avāna kaso kahai thāda kāhaowa. ²⁰Araunahna ngashāntāda awunga eina awui raobing awuishong rāda leilak theilaga, ana shoklaga awungawui mangāli kui ngaleili mashunzangda khoruma. ²¹Kala Araunahna hānga, "Khisāda ishāmei awunga narao iwuili khavākhala?" Davidna ngahānkai, "Nawui eina lanpum hi lokhuilaga ithumwui Avā wui vang hanphut akha sākhavaina; chieina kazātkashi chi mibingwui eina hanthuihaora."

²²Araunahna Davidli hānga, "Ishāmei awungana phāra kaji chi khuilaga chigatlu. Yanglu, rikkatā kachigatwui vang mukkā hili lei, kala thingwui vang okkaithing eina mukkāwui thingphān lei. ²³Hi saikora, O awunga, Araunahna awungali mikahaina." Kala Araunahna awungali hānga, "Nawui PROHO Varena nali khuisangmiranu."

²⁴Kha awungana Araunahli hānga, "Chi maningmana; ina aman peida nawui eina lokhuira. Aman makazanga ot chi rikkatā kachigat iwui Avāli ina machigatmara." Chieina Davidna lanpum eina mukkā chi lupāsā hangphangārip mida lokhuihaira. ²⁵Kala Davidna apam chili ithumwui Avā wui vang hanphut akha sākhuida rikkatā kachigat eina ningyatchigat chigata. Chieina ithumwui Avāna ngalei chiwui vang kapo chi ngahānkai, kala kazātkashi chi Israelwui eina hanthuihaowa.