Dawidei Mütshuong Weanchühbü
Dawidei haoeibü sepai mütshuong weanchühkei, hoba phaia haoeibü maangponei hao shuokkei. Matbü sem kula khübü phaia, aishanga seneibü Bouei saongao yaangbü ki dogo, haoei müteibü ikto aylen seneibü Bou ikto baula pienkei. Haibü deilo Araunaeibü amshanga lamleakei, kho Dawidei teibü tegü akula munamei ong jekkei.
24 1Tou seneibü Bou Israel khulimbo khauangkei, hoba haoei Dawid to haoen khulimbo susijakei, laukei, “Hauashi, Israel hoba Jihuda weanchühashi.”
2Kheijinei Chobaei hao yoa kibü sepai tan leiyeibü Joab to laukei, “Tou Israel phang pendoua, Dan ka Beersheba sühko hauan, ngei mütshuong lühbak angela shanga mütshuong weanchühashi.”
3Lausikei Joabei Choba to laukei, “Kaibü Bouei mütshuong la, haoen tou kibü tegü saongao nei jinkubüma, hoba ngeibü bunyubou Chobaeibü thenyek kho chühbüma. Lausikei ngeibü bunyubou Chobaei ho thinei kümla aila mangsühda?”
4Lausikei Chobaeibü ngühei Joab hoba sepai tan leiyeibü shuong to kaangtikei. Kheijinei Joab hoba sepai tan leiyeibü shuong Israel mütshuong weanchühla shanga Choba jungka bangkei. 5Haoenei Jordan dankei, hoba pholi maanga kibü sangnyu yungkük aenei kibü Aroer khulimbo shaikei, kheijinei Gad aeto hoba Jazer sühko haukei. 6Kheijinei haoen Gilead to hoba Tahtim-hodshi kaonyek to loukei, hoba haoen Dan-jaan to hoba kaijembo Sidon to loukei, 7hoba Tair lapheishon to, hoba Hivbü hoba Kananbü sangnyu pendou to loukei, hoba haoen Jihuda Negeba, Beersheba to bangkei. 8Kheijinei haoenei kaodak pendou paithüng paijinei, lit ikküm hoba chalou saoche kian phaia Jerusalem to loukei. 9Joabei weanchühbü lühbak Choba to lenkei; Israela in jungbü laakbü müt hajar 800,000 kikei, hoba Jihudaa hajar 500,000 kikei.
10Lausikei Dawidei mütshuong weanchühbü phaia, haoeibü maangponei hao ngümbei. Hoba Dawidei seneibü Bou to laukei, “Ngei kümbü ka ngo aeibou shabü shona. Tou, O kü Bou, kaibü khangenbou shedbü apbushi, aishanga ngo aeibou ngoualoua küma.”
11Dawid ngeyang meimeijinei, seneibü Bou ngüh, Dawideibü hapbou thuseibou Gad to loukei;
12“Hauan Dawid to lenshi, ‘seneibü Bouei hai lauda: Ngei ka thüka thinei sem phoda. Khüka che pienashi, hoba ngei ka khulimbo kho kümlabü.’”
13Kheijinei Gad Dawid jungto loukei hoba hao to laukei, “Kaibü kaonyek to po sem mühsinou loulabü lo? Ayingsi kaibü dangbou shuongei ka shijung haujinei, no haoen thedang ka lit sem satenlabü lo? Ayingsi kaibü kaonyeka chalou sem limei kilabü lo? Tou kho damanchühan, ngo hautibou to ngei ai jongaibü leian loulaje damanchühashi.”
14Kheijinei Dawidei Gad to laukei, “Ngo aeibou khonsaktida. Senei seneibü Bou ika tuongshi, aishanga haoeibü sanoudambü yaang ki; lausikei müt ika ngo tetuongtijan.”
15Kheijinei seneibü Bouei Israel to ngeyang ka jih tükde sühko limei hautikei, hoba Dan ka Beersheba sühko kibü mütshuong ka hajar 70,000 haikei. a a v15 “Jih tükde” dogo laubü kho chasem lembü shanga tükdebü jih to lauda dogo yinglabü.
16Lausikei hangangbüei Jerusalem kho mautila shanga haoeibü ik shingjinei, seneibü Bou thushed ka haoeibü maangpon sepeikei, hoba mütshuong mautiko kibü hangangbü to laukei, “Souko! Tou kaibü ik senetashi.” Kho chaloua seneibü Bou hangangbü Jebusbü Araunaeibü amshang nyangko kikei.
17Dawidei mütshuong ngümbü hangangbü hapjinei, haoei seneibü Bou to laukei, “Chühashi, shabü shonbou kho ngo ki; amaibü kümbou kho ngo ki; lausikei habü sanshuongei ai kümbei? Ngo sudajada, kaibü ik ngo thüka hoba kü boueibü chem thüka tuongtishi.”
Dawidei Lemshang Che Kümbei
18Khünyet chaloua Gadei Dawid jungto louan hao to laukei, “Angan Jebusbü Arauna amshanga seneibü Bou to lemshang che kümashi.” 19Hibü Dawidei Gad ngüh tegü, seneibü Bouei sakkubü tegü angkei. 20Ladang Araunaei seman chühan Choba si hao khangenbü shuong hao jungto louko hapbei, haoei longan Choba thedanga haoeibü thenyek kao ae khüpetkei. 21Hobaje Araunaei laukei, “Ngeibü bunyubou Choba aila hao khangenbou jungto loukei?” Dawidei jongaikei, “Ka ka amshang jekan, seneibü Bou to lemshang kümla, kheijinei mütshuong ka limei thonlabü.”
22Araunaei Dawid to laukei, “Ngeibü bunyubou Chobaei hao thedanga maiakei dogo laubü ai ong sungan lemshima. Chühashi, hanei juokbü lembü shanga masu pongsu, hoba bu shanga amshangeibü peisilei hoba masu pongsueibü peisilei kia. 23Ho pendou, O Choba, Araunaei Choba la kuda.” Hoba Araunaei Choba to laukei, “Bunyubou kaibü Mühghaüei ka sungletshima.”
24Lausikei Chobaei Arauna to laukei, “Aying, ngei ka la munam kuan jekla insiaubu. Ngei ngo to munam akibü juokbü lembü kü Bou to akulabü.” Hibü Dawidei amshang si masu pongsu chandinam bang che phejan atbü jekkei. 25Hobaje Dawidei khünei seneibü Bou to lemshang che kümbei hoba juokbü lembü hoba sangmai lembü kukei. Kheijinei seneibü Bouei kaodak shanga welaubü ditkukei, hoba Israel thükto limei thonkei.
