2 Samuel 23

23 ¹Hibing hi Davidwui khanaowa tuibingna. Jessewui naomayara Davidwui khamarān, atungshong thānkai mi, Jacobwui Vare ithumwui Avāna thao neomi kahai, Israelwui leikashe laa kathema chiwui khamarān: ^a a v1 Khamarān hiya Manglā eina samphang marānwui tuina; hili David hiya Varewui Manglāna zangmi kahai mi thāda hānga. ²Ithumwui Avāwui Manglāna iwui mangā eina hānga; awui tui iwui maleli leisai.

³Ithumwui Avā, Israelwui Varena hānga; Israelwui Lunghārna ili hānga: "Kachikathāna Vareli khangachee eina miwuitungli khamashung khangarong eina mungakha,

⁴A ngathorwui kahor thaina, tangkhamang maleila reikasangli zimik kashok atamli, zingrot kupkahaiwui thili kahān, ngaleiwui eina khawo phor ngasak chiwui thaina.

⁵Iwui shim hi ithumwui Avāli chithā maningmala? Kaja ana ili katang makhavai tuingashit akha sai; chi ot saikorali ngarānsanga kala nganantāp kahaina. Iwui huikhami saikora kala iwui ningkachāng saikora ana ungshung ngasakmara maningmala? ⁶Kha makānkhanā mibing kachiva hi horsang kahai ka̱shāt kathāna; kaja athum pāng eina khuirai ngasakmana. ⁷Athumli sing khavai mina mari kala zeipa̱ eina akhalatta shaksāda, kala athum apam chilila mei eina chuitāhaora."

Davidwui Kapingabing

⁸Hibing hi Davidwui kapingabingwui amingna: kapingabing kathumwui akhavā Tahkemonpa Josheb-basshebethna mi shāchishatwuitungli awui kazei muikhuilaga, atam khalattali shaothata. ⁹Awui thili David eina ngasoda kapingabing kathumwui kakhane chi Ahohpa Dodowui nao Eleazarna. Athumna rai khavai apam chili kazip kahai Philistinenaobingli kasi tharan, Israelwui mibingna ngalanhaowa. ¹⁰Ana ngakarthuida, apāng khananglākhaowa kala raighaili ngavaptit ngasakwui eina tangda Philistinenaobingli sāthata. Chithang ithumwui Avāna kahaka khayui rai khuirāmi, kala raimibingna kathibingli ot khangapon khavai maningla awui thi shurda latunga. ¹¹Awui thili Hararpa Ageewui nao Shammahna. Philistinenaobingna theireitheiyur pemtinghai lui akhali, Lehili athumwui raimi kazipkhui, kala mibing chi athumwui eina yāmhaowa. ¹²Kha Shammahna lui chiwui alungthungli nganingda, chi pheinganin khuida, Philistinenaobingli shaothata. Kala ithumwui Avāna kahaka khayui rai khuirāmi.

¹³Māhā atamli, thumrā akhavābingwui alungli kathumva Adullamwui lungkhurli Davidwuili vai; chitharan Philistinewui raimibing akhana Rephaim tampākli rairum asāpama. ¹⁴Chitharan Davidna raipanlungwui alungli pamsai, kala Philistinewui raimina Bethlehemli pamsai. ¹⁵Davidna tara̱ mangngailak eina hānga, "Khipānakha Bethlehemwui ngaveiwui ayarli khalei ra̱khong chiwui eina tara̱ ili mangkhavai miranu!"

¹⁶Chieina kapingabing kathumva china Philistinewui rairum chi phuta zangvāhaida, Bethlehemwui ngaveiwui ayarli khalei ra̱khongwui eina tara̱ sokkhuilaga, chi Davidli khuirāmi. Kha ana chi mangkhavai mamayāmana; ana chi ithumwui Avāli heishoka. ¹⁷Ana hānga, "O iwui Avā, ina hi kachangkhata masāmara! Hi athumwui mirin chigat kahai mibingwui asheena maningmala?" Chieina ana chi mangkhavai mamayāmana. Kapingabing kathumna hikathā ot sai.

¹⁸Joabwui achinā Zeruiahwui nao Abishaina thumrāwui alungli kathā sai. Kazei ngava̱laga ana mi shākathumli sāthata, kala kapinga kathumwui alungli masot samphanga. ¹⁹Thumrāwui alungli ana aming zatmeikap maningmala? Athumwui kathā ana sai, kha kapinga kathumwui kaping chi makashungmana.

²⁰Jehoiadawui nao Benaiah chi Kabzeelli khalei, hakkhamahā ot kasā rai khamarāka mi akha sai. Moabwui ariel khani ana sāthata. Thangkha horam thakmahungwui atamli leikhur lung akhali leilakha, chili kazingkha̱ akha zangsathatkhui. ²¹Kala ana Egyptnao kahakva akhala shaothata. Egyptpa chiwui pāngli kazei akha singsai; kha Benaiahna khāmshui maningla singlaga, awui pāngwui eina kazei chi angapaikhui, kala akhalattawui kazei chieina mipa chili sāthata. ²²Hibing hi Jehoiadawui nao Benaiahwui ot sābingna; ana kapinga rai khamarāka kathumwui alungli masot samphanga. ²³Thumrāwui alungli ana aming zat kasā sai, kha kapinga kathumwui alungli makashungmana. Davidna ali awui ngakkhame kathā sāngasaka.

²⁴Thumrā chiwui ngachaili chiya: Joabwui achinā Asahel, Bethlehempa Dodowui nao Elhanan; ²⁵Harodwui Shammah, Harodwui Elika; ²⁶Paltwui Helez, Tekoipa Ikkeshwui nao Ira; ²⁷Anathotwui Abi-ezer, Hushathpa Mebunnai; ²⁸Ahohpa Zalmon, Netophahwui Maharai; ²⁹Netophahpa Baanahwui nao Heleb, Benjaminwui Gibeahli khalei Ribaiwui nao Ittai; ³⁰Pirathonwui Benaiah, Gaash tampākli khalei Hiddai; ³¹Arbathpa Abi-albon, Barhumpa Azmaveth; ³²Sha-albonwui Eliahba, Jashenwui naomayarabing, Jonathan; ³³Hararpa Shammah, Hararpa Shararwui nao Ahiam; ³⁴Maacathpa Ahasbaiwui nao Eliphelet, Gilonwui Ahithophelwui nao Eliam; ³⁵Carmelpa Hezro; Arbapa Paarai; ³⁶Nathanwui naomayara Zobahli khalei Igal; Gadpa Bani; ³⁷Ammonpa Zelek; Be-erothpa Naharai, Zeruiahwui nao Joabwui raisāri phungme; ³⁸Ithriwui Ira; Ithriwui Gareb; ³⁹kala Hitpa Uriah; saikora thumrāda shinina.