2 சாமுவேல் 23

23 ¹இப்பொழுது தாவீதின் கடைசி வார்த்தைகள் இவைகளே. ஈசாயின் குமாரனாகிய தாவீதின் வாக்கு, உன்னதத்தில் உயர்த்தப்பட்ட மனிதனும், யாக்கோபின் தேவனாகிய எங்கள் பிதாவால் அபிஷேகம் பண்ணப்பட்டவனும், இஸ்ரவேலின் அன்பான பாடகனுமாகிய அவனுடைய வாக்கு: ^a a v1 வாக்கு என்பது தேவ ஆவியால் ஏவப்பட்ட தீர்க்கதரிசன வார்த்தை; இங்கே தாவீது தேவனுடைய ஆவியால் ஏவப்பட்டவனாகப் பேசுகிறான். ²எங்கள் பிதாவின் ஆவி என்னைக்கொண்டு பேசினார்; அவருடைய வார்த்தை என் நாவின்மேல் இருந்தது.

³இஸ்ரவேலின் தேவனாகிய எங்கள் பிதா பேசினார்; இஸ்ரவேலின் கன்மலை என்னிடத்தில் சொன்னது: “ஒருவன் நீதியாய் மக்களை ஆளும்போது, தேவபயத்தோடே ஆளும்போது,

⁴அவன் காலை வெளிச்சத்தைப்போல் இருக்கிறான் மேகமில்லாத விடியற்காலத்தில் சூரியன் உதிக்கும்போது, மழைக்குப் பின்பு உண்டாகும் பிரகாசத்தைப்போல், அது பூமியிலிருந்து புல்லை முளைக்கச்செய்கிறது.

⁵என் வீடு எங்கள் பிதாவினிடத்தில் இப்படியிருக்கவில்லையோ? அவர் என்னோடே நித்திய உடன்படிக்கையை, எல்லாவற்றிலும் ஒழுங்குபடுத்தப்பட்டதும் உறுதியானதுமாய், பண்ணியிருக்கிறாரே. அவர் என் இரட்சிப்பு அனைத்தையும் என் விருப்பம் அனைத்தையும் நிறைவேற்றமாட்டாரோ? ⁶ஆனால் நீசர் அனைவரும் எறியப்பட்ட முள்ளுகளைப்போல் இருக்கிறார்கள், ஏனெனில் அவைகளை வெறுங்கையால் எடுக்கமுடியாது. ⁷அவைகளைத் தொடவேண்டியவன் இரும்பையும் ஈட்டியின் தாங்குகோலையும் தரித்துக்கொள்கிறான், அவைகள் அந்த இடத்திலேயே அக்கினியால் சுட்டெரிக்கப்படும்.”

தாவீதின் பராக்கிரமசாலிகள்

⁸தாவீதின் பராக்கிரமசாலிகளின் பெயர்கள் இவைகளே: தக்மோனியனாகிய யோசேப்பாஷெபேத் மூன்றுபேரில் தலைவனாயிருந்தான்; அவன் தன் ஈட்டியை 800 பேருக்கு விரோதமாய் ஓங்கி அவர்களை ஒரேயடியாய்க் கொன்றுபோட்டான். ⁹அவனுக்கு அடுத்தவன் அகோகியனாகிய தோதோவின் குமாரன் எலெயாசார்; இவன் யுத்தத்திற்குக் கூடிவந்த பெலிஸ்தரை எதிர்த்து நின்றபோது தாவீதோடிருந்த மூன்று பராக்கிரமசாலிகளில் ஒருவன்; அப்பொழுது இஸ்ரவேலின் மனுஷர் பின்வாங்கிப்போனார்கள். ¹⁰இவன் எழும்பி, தன் கை இளைத்து பட்டயத்தோடே ஒட்டிக்கொள்ளும்வரை பெலிஸ்தரை வெட்டினான். அந்நாளில் எங்கள் பிதா பெரிய ஜெயத்தை உண்டாக்கினார்; ஜனங்கள் கொள்ளையிடுவதற்குமாத்திரம் அவனுக்குப் பின்னாகத் திரும்பிவந்தார்கள். ¹¹அவனுக்கு அடுத்தவன் ஆராரியனாகிய ஆகேயின் குமாரன் சம்மா. பெலிஸ்தர் பயறு நிறைந்த ஒரு வயல்நிலம் இருந்த லேகியிலே கூடிவந்தார்கள்; ஜனங்கள் அவர்களுக்கு முன்பாக ஓடிப்போனார்கள். ¹²ஆனால் சம்மா அந்த வயலின் நடுவிலே நின்று, அதைக் காப்பாற்றி, பெலிஸ்தரை வெட்டிப்போட்டான். எங்கள் பிதா பெரிய ஜெயத்தை உண்டாக்கினார்.

¹³அறுவடைக்காலத்தில் முப்பது தலைவரில் மூன்றுபேர் அதுல்லாம் என்னும் கெபியிலிருந்த தாவீதினிடத்தில் இறங்கிப்போனார்கள்; பெலிஸ்தரின் ஒரு படை ரெப்பாயீம் பள்ளத்தாக்கில் பாளயமிறங்கியிருந்தது. ¹⁴அப்பொழுது தாவீது அரணான ஸ்தலத்தில் இருந்தான்; பெலிஸ்தரின் தாணையம் பெத்லகேமில் இருந்தது. ¹⁵தாவீது தண்ணீருக்கு ஆசைப்பட்டு, “பெத்லகேமின் ஒலிமுகவாசலண்டையிலிருக்கிற கிணற்றின் தண்ணீரை யாராவது எனக்குக் குடிக்கக் கொடுத்தால் நலமாயிருக்குமே!” என்றான்.

¹⁶அப்பொழுது அந்த மூன்று பராக்கிரமசாலிகளும் பெலிஸ்தரின் பாளயத்தை ஊடுருவிக்கடந்து, பெத்லகேமின் ஒலிமுகவாசலண்டையிலிருந்த கிணற்றிலிருந்து தண்ணீர் மொண்டு, தாவீதினிடத்தில் கொண்டுவந்தார்கள். ஆனால் அவன் அதைக் குடிக்க மனதில்லாமல், அதை எங்கள் பிதாவுக்கென்று ஊற்றிப்போட்டான். ¹⁷அவன், “என் பிதாவே, நான் இப்படிச் செய்வது எனக்குத் தூரமாயிருப்பதாக! தங்கள் பிராணனை ஆபத்திற்குட்படுத்திப் போனவர்களின் இரத்தம் அல்லவா இது?” என்று சொல்லி, அதைக் குடிக்க மனதில்லாதிருந்தான். இந்தக் காரியங்களை அந்த மூன்று பராக்கிரமசாலிகளும் செய்தார்கள்.

¹⁸செருயாவின் குமாரனும் யோவாபின் சகோதரனுமாகிய அபிசாய் முப்பதுபேரில் தலைவனாயிருந்தான். அவன் தன் ஈட்டியை 300 பேருக்கு விரோதமாய் ஓங்கி அவர்களைக் கொன்றுபோட்டு, அந்த மூன்றுபேரில் புகழ்பெற்றான். ¹⁹அவன் அந்த முப்பதுபேரில் மிகவும் கனமுள்ளவனல்லவா? அவன் அவர்களுக்குத் தலைவனானான்; ஆனாலும் அந்த மூன்றுபேரில் ஒருவனாக அவன் இல்லை.

²⁰யோய்தாவின் குமாரன் பெனாயா கப்செயேல் ஊரானாகிய பராக்கிரமசாலி; இவன் பெரிய செய்கைகளைச் செய்தவன். இவன் மோவாபின் இரண்டு பராக்கிரமசாலிகளை வெட்டிப்போட்டான். இவன் உறைந்த மழைபெய்த நாளிலே ஒரு குழிக்குள் இறங்கி, அங்கே ஒரு சிங்கத்தைக் கொன்றுபோட்டான். ²¹அவன் அழகான ஒரு எகிப்தியனையும் வெட்டிப்போட்டான். அந்த எகிப்தியன் கையில் ஒரு ஈட்டியைப் பிடித்திருந்தான்; ஆனாலும் பெனாயா ஒரு தடியைமாத்திரம் பிடித்துக்கொண்டு அவனிடத்திற்குப் போய், எகிப்தியனுடைய கையிலிருந்த ஈட்டியைப் பறித்துக்கொண்டு, அவனுடைய சொந்த ஈட்டியினாலேயே அவனைக் கொன்றுபோட்டான். ²²இவைகளை யோய்தாவின் குமாரன் பெனாயா செய்து, அந்த மூன்று பராக்கிரமசாலிகளுக்குள்ளே புகழ்பெற்றான். ²³அவன் முப்பதுபேரைப்பார்க்கிலும் கனமுள்ளவனாயிருந்தான்; ஆனாலும் அந்த மூன்றுபேரில் ஒருவனாக இருக்கவில்லை. தாவீது அவனைத் தன் மெய்க்காவலர்மேல் அதிகாரியாக வைத்தான்.

²⁴அந்த முப்பதுபேரில் இருந்தவர்கள்: யோவாபின் சகோதரன் ஆசகேல்; பெத்லகேம் ஊரானாகிய தோதோவின் குமாரன் எல்க்கானான்; ²⁵ஆரோதியனாகிய சம்மா; ஆரோதியனாகிய எலிக்கா; ²⁶பல்தியனாகிய ஏலெஸ்; தெக்கோவா ஊரானாகிய இக்கேசின் குமாரன் ஈரா; ²⁷ஆனதோத்தியனாகிய அபியேசர்; ஊஷாத்தியனாகிய மெபுன்னாயி; ²⁸அகோகியனாகிய சல்மோன்; நெத்தோப்பாத்தியனாகிய மகராயி; ²⁹நெத்தோப்பாத்தியனாகிய பானாவின் குமாரன் ஏலேப்; பென்யமீன் புத்திரரின் கிபியா ஊரானாகிய ரிபாயின் குமாரன் இத்தாயி; ³⁰பிரத்தோனியனாகிய பெனாயா; காயாஸ் என்னும் ஆற்றுப்பள்ளத்தாக்குகளிலிருந்து வந்த இத்தாயி; ³¹அர்பாத்தியனாகிய அபியல்போன்; பர்கூமியனாகிய அஸ்மாவேத்; ³²சால்போனியனாகிய எலியாபா; யாசேனின் குமாரர்; யோனத்தான்; ³³ஆராரியனாகிய சம்மா; ஆராரியனாகிய சாராரின் குமாரன் அகியாம்; ³⁴மாகாத்தியனாகிய அகஸ்பாயின் குமாரன் எலிப்பேலேத்; கீலோனியனாகிய அகித்தோப்பேலின் குமாரன் எலீயாம்; ³⁵கர்மேலியனாகிய எஸ்ராயி; அர்பியனாகிய பாராயி; ³⁶சோபா ஊரானாகிய நாத்தானின் குமாரன் ஈகால்; காத்தியனாகிய பானி; ³⁷அம்மோனியனாகிய சேலேக்; செருயாவின் குமாரன் யோவாபின் ஆயுததாரியாகிய பேரோத்தியனாகிய நகராயி; ³⁸இத்திரியனாகிய ஈரா; இத்திரியனாகிய காரேப்; ³⁹ஏத்தியனாகிய உரியா; ஆக எல்லாரும் முப்பத்தேழுபேர்.