Abụ Ikpeazụ Devid

Okwu ikpeazụ Devid: Nna anyị na ụlọ ya gbara ndụ ebighị ebi, onye na-achị n'ezi omume dịkwa ka ìhè ụtụtụ mgbe mmiri zochara. E mesịa, ndepụta aha ndị dike ya — mmadụ atọ ahụ ndị gbawara ahịrị ndị Filistia gafere maka mmiri ọṅụṅụ Betlehem nke Devid wụsiri n'ala kama ịṅụ ya.

Isi 23.

Ugbu a, ndị a bụ okwu ikpeazụ Devid. Nke a bụ okwu amụma Devid nwa Jesi, okwu amụma nwoke ahụ e buliri elu, onye Chineke Jekọb, bụ Nna anyị, tere mmanụ, ọbụ abụ Izrel a hụrụ nʼanya: ^a Mmụọ nke Nna anyị kwuru okwu site nʼaka m; okwu ya dịkwa nʼire m.

Nna anyị, bụ Chineke Izrel, ekwuola; Oké Nkume Izrel gwara m, sị: “Mgbe mmadụ ji ezi omume na-achị ndị mmadụ, na-achị nʼịtụ egwu Chineke,

ọ dị ka ìhè ụtụtụ mgbe anwụ na-awa nʼụtụtụ enweghị igwe ojii, dị ka ọcha nke na-eso mmiri ozuzo nke na-eme ka ahịhịa si nʼala pupụta.

Ọ bụ na ụlọ m adịghị otú a nʼebe Nna anyị nọ? Nʼihi na ya na m agbaala ọgbụgba ndụ ebighị ebi, nke e doziri nʼihe niile ma mee ka o guzosie ike. Ọ gaghị eme ka nzọpụta m niile na ọchịchọ m niile zuo oke? Ma ndị na-abaghị uru niile dị ka ogwu a tụfuru, nʼihi na mmadụ apụghị iji aka efu tụtụrụ ha. Onye ọbụla chọrọ imetụ ha aka na-eji ígwè na osisi ùbè kwadebe onwe ya, a na-erekwa ha ọkụ nʼebe ahụ kpamkpam.”

Ndị Dike Agha Devid

Ndị a bụ aha ndị dike agha Devid: Josheb-Basebet onye Takemon, onyeisi ndị atọ ahụ; o weliri ùbè ya megide narị mmadụ asatọ, gbuo ha nʼotu mgbe. Onye so ya bụ Eliaza nwa Dodo onye Aho, otu nʼime ndị dike atọ ahụ so Devid mgbe ha gbara ndị Filistia aghara, bụ ndị zukọtara ibu agha nʼebe ahụ, mgbe ndị Izrel laghachiri azụ. O biliri, tigbuo ndị Filistia ruo mgbe aka ya gwụrụ ike, rapara na mma agha. Nna anyị wetara nnukwu mmeri nʼụbọchị ahụ, ndị agha lọghachitere nʼazụ ya naanị iji yipụ ihe ndị nwụrụ anwụ. Onye so ya bụ Shama nwa Agi onye Harar. Ndị Filistia zukọtara na Lehai, nʼime ubi jupụtara na akịdị, ndị agha sikwara nʼihu ha gbaa ọsọ. Ma Shama guzoro nʼetiti ubi ahụ, chebe ya, tigbuo ndị Filistia. Nna anyị wetakwara nnukwu mmeri.

Nʼoge owuwe ihe ubi, mmadụ atọ nʼime iri ndịisi atọ ahụ gbadakwuru Devid nʼọgba nkume Adulam, mgbe otu ìgwè ndị Filistia mara ụlọikwuu na Ndagwurugwu Refaim. Nʼoge ahụ, Devid nọ nʼebe ewusiri ike, ndị agha Filistia nọkwa na Betlehem. Agụụ mmiri gụrụ Devid, o wee sị, “A sị na mmadụ ga-enye m mmiri ka m ṅụọ site nʼolulu mmiri dị nʼakụkụ ọnụ ụzọ ama na Betlehem!”

Ya mere, ndị dike atọ ahụ tiwara ọmụma ụlọikwuu ndị Filistia, kuo mmiri site nʼolulu mmiri Betlehem nke dị nʼakụkụ ọnụ ụzọ ama, bute ya nye Devid. Ma ọ jụrụ ịṅụ ya; ọ wụpụrụ ya nye Nna anyị. Ọ sịrị, “Ya adịla m anya, Nna m, na m ga-eme ihe dị otú a! Nke a ọ bụghị ọbara ndị ikom ahụ tinyere ndụ ha nʼihe ize ndụ?” Ya mere, ọ jụrụ ịṅụ ya. Otú a ka ọrụ ndị dike atọ ahụ dị.

Abishai, nwanne Joab, nwa Zeruaya, bụ onyeisi ndị iri atọ ahụ. O weliri ùbè ya megide narị mmadụ atọ, gbuo ha, nweta aha nʼetiti ndị atọ ahụ. Ọ bụ na a naghị asọpụrụ ya karịa ndị iri atọ ahụ? Ọ ghọọrọ ọchịagha ha, ọ bụ ezie na ya abụghị otu nʼime ndị atọ ahụ.

Benaya nwa Jehoiada bụ dike si na Kabzeel, nwoke rụrụ ọtụtụ ọrụ dị ukwuu. O tigburu dike agha abụọ nke Moab. Ọ gbadara nʼime olulu nʼụbọchị snoo na-ada wee gbuo ọdụm nʼebe ahụ. O tigburukwa otu onye Ijipt mara mma ile anya. Onye Ijipt ahụ ji ùbè nʼaka, ma Benaya ji naanị mkpanaka bịakwute ya, napụ ùbè ahụ nʼaka ya, wee jiri ùbè ya gbuo ya. Ndị a bụ ọrụ Benaya nwa Jehoiada rụrụ, onye nwetara aha nʼetiti ndị dike atọ ahụ. A na-asọpụrụ ya karịa ndị iri atọ ahụ, ma ọ bụghị otu nʼime ndị atọ ahụ. Devid mere ya onyeisi ndị nche ya.

Nʼetiti ndị iri atọ ahụ bụ: Asahel nwanne Joab; Elhanan nwa Dodo onye Betlehem; Shama onye Harod; Elika onye Harod; Helez onye Palti; Aịra nwa Ikesh onye Tekoa; Abieza onye Anatot; Mebunai onye Husha; Zalmon onye Aho; Maharai onye Netofa; Heleb nwa Baana onye Netofa; Itai nwa Ribai onye Gibea nke ndị Benjamin; Benaya onye Piraton; Hidai onye si na ndagwurugwu Gaash; Abi-albon onye Araba; Azmavet onye Barhum; Eliahba onye Shaalbon; ụmụ Jashen; Jonatan; Shama onye Harar; Ahiam nwa Sharar onye Harar; Elifelet nwa Ahasbai onye Maaka; Eliam nwa Ahitofel onye Gilon; Hezro onye Kamel; Paarai onye Arab; Igal nwa Netan onye Zoba; Bani onye Gad; Zelek onye Amọn; Naharai onye Beerot, onye na-ebu ngwa agha Joab nwa Zeruaya; Aịra onye Itra; Gareb onye Itra; na Yuraya onye Het—ha niile dị iri atọ na asaa.