ናይ ዳዊት ናይ መወዳእታ መዝሙር

ናይ መወዳእታ ቃላት ዳዊት፦ ኣቦና ምስ ቤቱ ናይ ዘለኣለም ኪዳን ኣተወ፤ ብፅድቂ ዝገዝእ ገዛኢ ድማ ከም ብርሃን ንግሆ፥ ድሕሪ ዝናም ከም ዘሎ ነፀብራቕ እዩ። ድሕሪኡ ዝርዝር ሓያላት ጀጋኑኡ፦ እቶም ሰለስተ ንሰፈር ፍልስጥኤማውያን ሰንጢቖም ማይ ቤት ልሄም ዘምፅኡ፥ ዳዊት ግና ኣብ ክንዲ ዝሰቲ ኣፍሰሶ።

ምዕራፍ 23።

እዚኣቶም ከዓ ናይ መወዳእታ ቃላት ዳዊት እዮም። ምስላ ዳዊት ወዲ እሴይ፥ ምስላ እቲ ኣብ ላዕሊ ዝተልዓለ ሰብኣይ፥ ብኣምላኽ ያእቆብ፥ ብኣቦና ዝተቐብአ፥ እቲ ፍቁር ዘማሪ መዝሙር እስራኤል፦ ^a መንፈስ ኣቦና ብኣይ ተዛረበ፤ ቃሉ ኸዓ ኣብ ልሳነይ ነበረ።

ኣቦና፥ ኣምላኽ እስራኤል፥ ተዛረበ፤ ከውሒ እስራኤል ከዓ በለኒ፦ “ኣብ ልዕሊ ህዝቢ ብፅድቂ ዝገዝእ፥ ብፍርሓት እግዚኣብሄር ዝገዝእ፥

ንሱ ከም ብርሃን ንግሆ፥ ፀሓይ ኣብ ዘይደመነ ወጋሕታ ከተብርቕ ከላ፥ ከምቲ ድሕሪ ዝናም ዘሎ ነፀብራቕ፥ ካብ ምድሪ ሳዕሪ ዘብቍል እዩ።

ቤተይ ምስ ኣቦና ከምዙይ ኣይኮነትን ድዩ? ናይ ዘለኣለም ኪዳን ምሳይ ኣትዩ እዩ እሞ፥ ብዅሉ ነገር ዝተሰርዐን ዝተረጋገፀን እዩ። ንዅሉ ምድሓነይን ንዅሉ ባህገይን ኣይፍፅሞን ድዩ? ከንቱ ሰባት ግና ኵሎም ከም እተደርበዩ እሾዅ እዮም፥ ብኢድ ክእከቡ ኣይኽእሉን እዮም እሞ። እቲ ዝትንክፎም ሰብ ብሓፂንን ብዛቢያ ዅናትን ይዓጥቕ፥ ኣብ ቦታኡ ኸዓ ብሓዊ ይቃፀሉ።”

ጀጋኑ ሰባት ዳዊት

ኣስማት ሓያላት ጀጋኑ ዳዊት እዚኣቶም እዮም፦ ዮሴብ-ባሰበት ታሕከሞናዊ፥ ሓለቓ እቶም ሰለስተ፥ ኣብ ልዕሊ ሸሞንተ ሚእቲ ሰብኣይ ኵናቱ ኣልዒሉ፥ ብሓደ ጊዜ ቀተሎም። ድሕሪኡ ድማ ኤልኣዛር ወዲ ዱዲ ኣሖሃዊ ነበረ። ንሱ ኻብቶም ምስ ዳዊት ዝነበሩ ሰለስተ ሓያላት ሓደ ኾይኑ፥ ነቶም ኣብኡ ንውግእ እተኣከቡ ፍልስጥኤማውያን ምስ ኣባጨዉ፥ ሰብ እስራኤል ከዓ ሃደሙ። ንሱ ተሲኡ ኢዱ ክሳዕ እትደክምን ኣብ ሰይፊ ኽሳዕ እትጠብቕን ንፍልስጥኤማውያን ወቕዖም። ኣቦና ድማ በታ መዓልቲ እቲኣ ዓብዪ ዓወት ገበረ፤ እቶም ሰራዊት ከዓ ነቶም ምዉታት ንምግፋፍ ጥራሕ ደድሕሪኡ ተመለሱ። ድሕሪኡ ድማ ሳማ ወዲ ኣጌ ሓራራዊ ነበረ። ፍልስጥኤማውያን ኣብ ሌሒ፥ ብርስን ኣብ ዝመልአ ግራት ተኣከቡ፤ እቶም ሰራዊት ከዓ ካብኣቶም ሃደሙ። ሳማ ግና ኣብ ማእኸል እቲ ግራት ደው ኢሉ ተኸላኸለሉ፤ ንፍልስጥኤማውያን ድማ ወቕዖም። ኣቦና ኸዓ ዓብዪ ዓወት ገበረ።

ኣብ ወቕቲ ዓፂድ ድማ ካብቶም ሰላሳ ሓለቕቲ ሰለስተ ናብ ዳዊት ናብታ ኣብ ኣዱላም ዘላ በዓቲ ወረዱ፤ ጭፍራ ፍልስጥኤማውያን ድማ ኣብ ለሰ ራፋይም ሰፊሮም ነበሩ። ዳዊት ሽዑ ኣብ እምባ ነበረ፤ ጭፍራ ፍልስጥኤማውያን ድማ ኣብ ቤተ ልሔም ነበረ። ዳዊት ድማ ማይ ናፈቐ፤ ከምዙይ ከዓ በለ፦ “መን ኮን ካብታ ኣብ ቤተ ልሔም ኣብ ጥቓ ደገ ዘላ ዒላ ማይ መስተ ምሃበኒ!”

ሽዑ እቶም ሰለስተ ጀጋኑ ነቲ ሰፈር ፍልስጥኤማውያን ሰንጢቖም፥ ካብታ ኣብ ቤተ ልሔም ኣብ ጥቓ ደገ ዘላ ዒላ ማይ ቀድሑ፤ ናብ ዳዊት ድማ ኣምፅእዎ። ንሱ ግና ክሰትዮ ኣበየ፤ ንኣቦና ኸዓ ኣፍሰሶ። ከምዙይ ድማ በለ፦ “ኦ ኣቦይ፥ እዙይ ምግባር ካባይ ይርሓቕ! እዙይ ደም እቶም ነፍሶም ንሞት ዝወፈዩ ሰባት ደይኮነን?” ስለዙይ ክሰትዮ ኣበየ። ናይ እቶም ሰለስተ ጀጋኑ ግብርታት ከምዙይ ነበረ።

ኣቢሳ ሓው ኢዮኣብ ወዲ ፅሩያ ድማ ሓለቓ እቶም ሰላሳ ነበረ። ኣብ ልዕሊ ሰለስተ ሚእቲ ኵናቱ ኣልዒሉ ቀተሎም፤ ኣብ መንጎ እቶም ሰለስተ ኸዓ ዝና ረኸበ። ካብቶም ሰላሳ ዝበለፀ ኽቡር ደይኮነን? ሓለቓኦም ኮነ፤ ካብቶም ሰለስተ ግና ሓደ ኣይነበረን።

በናያስ ወዲ ዮዳሄ ድማ ካብ ቀብስኤል ዝመፀ ጅግና ሰብኣይ፥ ብዙሕ ዓበይቲ ግብሪ ዝገበረ ሰብ ነበረ። ንኽልተ ሓያላት ጀጋኑ ሞኣብ ወቕዖም። ኣብ መዓልቲ በረድ ድማ ናብ ሓደ ጕድጓድ ወሪዱ፥ ኣብኡ ንሓደ ኣንበሳ ቀተለ። ንሓደ ዓብዪ ግብፃዊ ድማ ወቕዖ። እቲ ግብፃዊ ዂናት ሒዙ ነበረ፤ በናያስ ግና ብበትሪ ጥራሕ መፅኦ፥ ነቲ ዂናት ካብ ኢዱ መንጢሉ፥ በቲ ናይ ባዕሉ ዂናት ድማ ቀተሎ። ናይ በናያስ ወዲ ዮዳሄ ግብርታት እዚኣቶም ነበሩ፤ ንሱ ኣብ መንጎ እቶም ሰለስተ ሓያላት ጀጋኑ ዝና ረኸበ። ካብቶም ሰላሳ ዝበለፀ ኽቡር ነበረ፥ ካብቶም ሰለስተ ግና ኣይነበረን። ዳዊት ድማ ኣብ ልዕሊ ሓለውቲ ነፍሱ ሸሞ።

ካብቶም ሰላሳ ድማ እዚኣቶም ነበሩ፦ ኣሳሄል ሓው ኢዮኣብ፤ ኤልያናን ወዲ ዱዲ በዓል ቤተ ልሔም፤ ሳማ ሓሮዳዊ፤ ኤሊቃ ሓሮዳዊ፤ ሔሌፅ ጳልጣዊ፤ ዒራ ወዲ ዒቀስ ተቆዓዊ፤ ኣቢዔዘር ዓናቶታዊ፤ መቡናይ ሑሳታዊ፤ ሰልሞን ኣሖሃዊ፤ ማህራይ ነጦፋታዊ፤ ሔለብ ወዲ በዓና ነጦፋታዊ፤ ኢታይ ወዲ ሪባይ ካብ ጊብዓ ደቂ ብንያም፤ በናያስ ጲርዓቶናዊ፤ ሒዳይ ካብ ለሰታት ጋዓሽ፤ ኣቢኣልቦን ዓርባታዊ፤ ዓዝማወት ባርሁማዊ፤ ኤልያህባ ሻዓልቦናዊ፤ ደቂ ያሸን፤ ዮናታን፤ ሳማ ሓራራዊ፤ ኣሕኣም ወዲ ሻራር ሓራራዊ፤ ኤሊፋላት ወዲ ኣሓስባይ ማዓካታዊ፤ ኤልኣም ወዲ ኣኪጦፌል ጊሎናዊ፤ ሔስራይ ቀርሜላዊ፤ ፓዓራይ ዓርባዊ፤ ይግኣል ወዲ ናታን በዓል ሶባ፤ ባኒ ጋዳዊ፤ ፄሌቅ ኣሞናዊ፤ ናህራይ ብኤሮታዊ፥ ፀዋር ኣፅዋር ኢዮኣብ ወዲ ፅሩያ፤ ዒራ ይትራዊ፤ ጋሬብ ይትራዊ፤ ኦርዮ ኬጢያዊ ድማ፤ ብድምር ሰላሳን ሸውዓተን ኮኑ።