2ይ ሳሙኤል 22 FHB Father's Heart Bible™

22 ¹ዳዊት፥ ኣቦና ካብ ኢድ ኵሎም ፀላእቱን ካብ ኢድ ሳኦልን ምስ ኣድሓኖ፥ ቃላት እዝ መዝሙር እዙይ ንኣቦና ተዛረቦ። ²ከምዙይ ድማ በለ፦ ኣቦይ ከውሔይ፥ ዕርደይ፥ መድሓኒየይ እዩ። ³ኣቦይ፥ ዝዕቘበሉ ከውሔይ፥ ዋልታይን ሓይሊ ምድሓነይን፥ ፅኑዕ ቦታይን መዕቘብየይን፥ መድሕንየይ፥ ንስኻ ካብ ዓመፃ ተድሕነኒ። ⁴ነቲ ዝምስገን ኣቦይ እፅውዕ፥ ካብ ፀላእተይውን እድሕን። ⁵ማዕበል ሞት ከቢቡኒ ነይሩ እዩ፤ ወሓይዝ ጥፍኣት ኣፍሪሁኒ። ⁶ኣግማድ መቓብር ኣሲሩኒ ነይሩ፤ መፈንጠር ሞት ተጓኒፉኒ። ⁷ኣብ ፅበተይ ንኣቦይ ፀዋዕክዎ፤ ናብ ኣምላኸይ ረዲኤት ተማህለልኩ። ካብ መቕደሱ ድምፀይ ሰምዐ፥ ኣውያተይ ድማ ናብ እዝኑ በፅሐ። ⁸ሽዑ እታ ምድሪ ተነቓነቐትን ተናወፀትን፤ መሰረት ሰማያት ተንቀጥቀጠ ተናወፀውን፥ ንሱ ተቘጢዑ ነይሩ እዩ እሞ። ⁹ካብ ኣፍንጫኡ ትኪ ዓረገ፥ ካብ ኣፉ ዝባላዕ ሓዊ ወፀ፤ ካብኡ ጓህሪ ነደደ። ¹⁰ንሰማያት መቒሉ ወረደ፥ ፀሊም ደመና ኸዓ ኣብ ትሕቲ እግሩ ነበረ። ¹¹ኣብ ኪሩቤል ተወጢሑ በረረ፤ ኣብ ክንፊ ንፋስ ተንሳፈፈ። ¹²ንፀልማት ኣብ ዙርያኡ ገበላ ገበሮ፥ ፀሊም ደመና ዝናም ሰማያት ከዓ ነበረ። ¹³ካብቲ ኣብ ቅድሚኡ ዘሎ ብርሃን ጓህሪ ሓዊ ነደደ። ¹⁴ኣቦይ ካብ ሰማይ ኣንጐድጐደ፤ እቲ ልዑል ድማ ድምፁ ኣስምዐ። ¹⁵ፍላፃታት ወርዊሩ ንፀላእቱ በተኖም፥ መብረቕ ወርዊሩ ኸዓ ኣሸበሮም። ¹⁶መትረባት ባሕሪ ተራእዩ፥ ብግስፀት ኣቦይ፥ ብእስትንፋስ ኣፍንጫኡ ኸዓ መሰረት ዓለም ተቐልዐ። ¹⁷ካብ ላዕሊ ኢዱ ዘርጊሑ ሓዘኒ፤ ካብ ዓሚቝ ማያት ኣውፅአኒ። ¹⁸ካብ ሓያል ፀላእየይ ኣድሓነኒ፥ ካብቶም ዝሓይሉኒ ፀላእተይ። ¹⁹ብመዓልቲ መከራይ ተጓነፉኒ፥ ኣቦይ ግና መደገፊየይ ነበረ። ²⁰ናብ ገፋሕ ቦታ ኣውፅአኒ፤ ብኣይ ስለ ዝተሓጐሰ ኣድሓነኒ። ²¹ኣቦይ ከም ፅድቀይ ገበረለይ፤ ከም ንፅህና ኣእዳወይ ከዓ ዓሰየኒ። ²²መንገዲ ኣቦይ ሓሊወ እየ እሞ፤ ካብ ኣምላኸይ ክፉእ ገይረ ኣይረሓቕኩን። ²³ኵሉ ፍርድታቱ ኣብ ቅድመይ ኣሎ፤ ካብ ስርዓታቱ ድሕር ኣይበልኩን። ²⁴ኣብ ቅድሚኡ ፍፁም ነበርኩ፥ ካብ ኣበሳይ ድማ ንባዕለይ ሓለኹ። ²⁵ስለዙይ ኣቦይ ከም ፅድቀይ ዓሰየኒ፥ ከም ንፅህና ኣብ ቅድሚኡ ዝኾነ ከዓ። ²⁶ነቲ እሙን እሙን ትኾኖ፤ ነቲ ፍፁም ፍፁም ትኾኖ። ²⁷ነቲ ንፁህ ንፁህ ትኾኖ፥ ነቲ ቄናዊ ግና ጐራሕ ትኾኖ። ²⁸ነቲ ዝተጨነቐ ህዝቢ ተድሕኖ፥ ኣዒንትኻ ግና ኣብ ልዕሊ ትዕቢተኛታት ኣሎ፥ ከተትሕቶም። ²⁹ንስኻ መብራህተይ ኢኻ እሞ፥ ኦ ኣቦይ፤ ንፀልማተይ ናብ ብርሃን ይልውጦ። ³⁰ብኣኻ ንሰራዊት ክወርር እኽእል፤ ብኣቦይ ከዓ መንደቕ ክዘል እኽእል። ³¹ኣቦይ፥ መንገዱ ፍፁም እዩ፤ ቃል ኣቦይ ድማ ንፁህ እዩ። ንሱ ነቶም ኣብኡ ዝዕቘቡ ዅሎም ዋልታ እዩ። ³²ብዘይ ኣቦና መን እዩ እግዚኣብሄር? ብጀካ ኣቦና መን እዩ ከውሒ? ³³ኣቦይ ፅኑዕ መዕቘብየይ እዩ፤ ንሱ ንመንገደይ ፍፁም ይገብሮ። ³⁴ንሱ ኣእጋረይ ከም ኣእጋር እራብ ይገብረን፤ ኣብ በረኽቲ ቦታታት ድማ ብድሕንነት የቕውመኒ። ³⁵ኣእዳወይ ንውግእ የላምደን፤ ኣእዳወይ ከዓ ቀስቲ ነሓስ ከፅምዳ ይኽእል። ³⁶ዋልታ ምድሓንካ ሃብካኒ፤ ህድኣትካ ድማ ዓብዪ ገበረኒ። ³⁷ኣብ ትሕተይ ንመንገዲ ኣግፋሕካዮ፤ ኣእጋረይ ከዓ ኣይተንሸራተታን። ³⁸ንፀላእተይ ሰጒጐ ኣጥፋእኹዎም፤ ክሳዕ ዝውድኡ ድማ ንድሕሪት ኣይተመለስኩን። ³⁹ወዲአ ሰባበርክዎም፥ ክትስኡ ድማ ኣይከኣሉን፤ ኣብ ትሕቲ ኣእጋረይ ወደቑ። ⁴⁰ንውግእ ሓይሊ ኣዕጠቕካኒ፤ ንተፃረርተይ ኣብ ትሕተይ ኣምበርከኽካዮም። ⁴¹ንፀላእተይ ዝባኖም ኣቢልካ ኣህደምካዮም፤ ነቶም ዝፀልኡኒ ድማ ኣጥፋእኹዎም። ⁴²ጠመቱ፥ ዘድሕኖም ግና ኣይነበረን፤ ናብ ኣቦይ እውን ጠመቱ፥ ንሱ ግና ኣይመለሰሎምን። ⁴³ከም ሓመድ ምድሪ ደቒቐ ጠሓንክዎም፤ ከም ጭቃ ኣደባባያት ጨፍሊቐ ረገፅክዎም። ⁴⁴ካብ ባእሲ ህዝበይ ኣድሓንካኒ፤ ርእሲ ኣህዛብ ገይርካ ሓሎኻኒ፤ ዘይፈለጥኹዎ ህዝቢ ድማ ሕዚ የገልግለኒ ኣሎ። ⁴⁵ጓኖት ኣብ ቅድመይ ይምብርከኹ፤ ምስ ሰምዑ ቐልጢፎም ይእዘዙኒ። ⁴⁶ጓኖት ልቦም ይመክኽ፤ እናንቀጥቀጡ ካብ ዕርዶም ይወፅእ። ⁴⁷ኣቦይ ህያው እዩ! ከውሐይ ቡሩኽ ይኹን! ኣቦይ፥ ከውሒ ምድሓነይ፥ ልዑል ይኹን! ⁴⁸ኣቦይ እዩ ፍትሒ ዝህበኒ፥ ንህዝብታት ድማ ኣብ ትሕተይ ዘንበርክኽ። ⁴⁹ካብ ፀላእተይ የውፅኣኒ። ካብ ተፃረርተይ ልዕል ኣበልካኒ፤ ካብቲ ገፋዒ ሰብ ኣናገፍካኒ። ⁵⁰ስለዙይ ኦ ኣቦይ፥ ኣብ ማእኸል ኣህዛብ ከመስግነካ እየ፤ ንስምካ ድማ ክዝምር እየ። ⁵¹ንንጉሱ ዓብዪ ዓወት ይህቦ፤ ንቅቡኡ፥ ንዳዊትን ንዘርኡን ድማ ንዘለኣለም ምሕረት የርኢ።