2 Samuẹli 22

22 ¹Dafidi sọ ọ̀rọ̀ orin yìí fún Baba wa nígbà tí Baba wa gbà á sílẹ̀ kúrò lọ́wọ́ gbogbo àwọn ọ̀tá rẹ̀ àti kúrò lọ́wọ́ Saulu. ²Ó sì wí pé: Baba mi ni àpáta mi, odi mi, olùdáǹdè mi. ³Baba mi, àpáta mi, ẹni tí mo sá di, asà mi àti agbára ìgbàlà mi, ibi agbára mi àti ibi ìsádi mi, olùgbàlà mi—ìwọ ni ó ń gbà mí là kúrò nínú ìwà ipá. ⁴Mo ké pe Baba mi, ẹni tí ó yẹ fún ìyìn, a sì gbà mí là lọ́wọ́ àwọn ọ̀tá mi. ⁵Nítorí àwọn ìgbì ikú yí mi ká; àgbàrá ìparun dẹ́rù bà mí. ⁶Okùn isà òkú rọ̀ mọ́ mi; ìdẹkùn ikú dojú kọ mí. ⁷Nínú ìpọ́njú mi mo ké pe Baba mi; mo kígbe sí Ọlọ́run mi fún ìrànlọ́wọ́. Láti inú tẹ́mpìlì rẹ̀ ó gbọ́ ohùn mi, igbe mi sì dé etí rẹ̀. ⁸Nígbà náà ni ayé mì tìtì, ó sì wárìrì; àwọn ìpìlẹ̀ ọ̀run wárìrì, wọ́n sì mì tìtì, nítorí tí inú bí i. ⁹Èéfín ta sókè láti ihò imú rẹ̀, iná ajónirun sì jáde láti ẹnu rẹ̀; ẹ̀yín iná ràn jáde láti ọ̀dọ̀ rẹ̀. ¹⁰Ó pín ọ̀run, ó sì sọ̀kalẹ̀, pẹ̀lú àwọsánmà dúdú ní abẹ́ ẹsẹ̀ rẹ̀. ¹¹Ó gun orí kérúbù, ó sì fò lọ; ó rábàbà lórí ìyẹ́ apá afẹ́fẹ́. ¹²Ó fi òkùnkùn ṣe àgọ́ tí ó yí i ká—àwọn àwọsánmà òjò dúdú ní ojú ọ̀run. ¹³Nínú ìmọ́lẹ̀ tí ó wà níwájú rẹ̀ ni ẹ̀yín iná ti ràn. ¹⁴Baba mi sán àrá láti ọ̀run wá; Ẹni Gíga Jùlọ gbé ohùn rẹ̀ sókè. ¹⁵Ó ta àwọn ọfà rẹ̀, ó sì tú àwọn ọ̀tá rẹ̀ ká, ó sọ mànàmáná, ó sì lé wọn sá. ¹⁶Àwọn ọ̀gbun Òkun farahàn, a sì tú ìpìlẹ̀ ayé síta nípa ìbáwí Baba mi, nípa ìfẹ́ èémí láti ihò imú rẹ̀. ¹⁷Ó na ọwọ́ rẹ̀ láti òkè wá, ó sì gbá mi mú; ó fà mí jáde kúrò nínú omi jíjìn. ¹⁸Ó gbà mí sílẹ̀ lọ́wọ́ ọ̀tá mi tí ó lágbára, lọ́wọ́ àwọn akọnimọ̀ọ́gbà mi tí wọ́n lágbára jù mí lọ. ¹⁹Wọ́n dojú kọ mí ní ọjọ́ ìyọnu mi, ṣùgbọ́n Baba mi ni ó ṣe ìtìlẹ́yìn fún mi. ²⁰Ó mú mi jáde wá sí ibi gbígbòòrò; ó gbà mí là nítorí tí ó nídùnnú sí mi. ²¹Baba mi ṣe sí mi gẹ́gẹ́ bí òdodo mi; gẹ́gẹ́ bí mímọ́ ọwọ́ mi ni ó san ẹ̀san fún mi. ²²Nítorí mo ti pa ọ̀nà Baba mi mọ́; èmi kò sì fi ìwà búburú yà kúrò lọ́dọ̀ Ọlọ́run mi. ²³Gbogbo ìdájọ́ rẹ̀ ń bẹ níwájú mi; èmi kò sì yà kúrò nínú àṣẹ rẹ̀. ²⁴Mo jẹ́ aláìlẹ́gàn níwájú rẹ̀, mo sì pa ara mi mọ́ kúrò nínú ẹ̀ṣẹ̀ mi. ²⁵Nítorí náà Baba mi san ẹ̀san fún mi gẹ́gẹ́ bí òdodo mi, gẹ́gẹ́ bí mímọ́ mi níwájú rẹ̀. ²⁶Sí olóòótọ́ ìwọ a fi ara rẹ hàn ní olóòótọ́; sí aláìlẹ́gàn ìwọ a fi ara rẹ hàn ní aláìlẹ́gàn. ²⁷Sí ẹni mímọ́ ìwọ a fi ara rẹ hàn ní mímọ́, ṣùgbọ́n sí ẹni wíwọ́ ìwọ a fi ara rẹ hàn ní ọlọ́gbọ́n. ²⁸Ìwọ a gba àwọn ènìyàn tí a ni lára là, ṣùgbọ́n ojú rẹ ń bẹ lára àwọn agbéraga, láti rẹ̀ wọn sílẹ̀. ²⁹Nítorí ìwọ ni fìtílà mi, Baba mi; ó sọ òkùnkùn mi di ìmọ́lẹ̀. ³⁰Pẹ̀lú rẹ ni mo lè sáré lu ọ̀wọ́ ọmọ ogun; pẹ̀lú Baba mi ni mo lè fò ré ògiri kọjá. ³¹Ní ti Baba mi, ọ̀nà rẹ̀ pé; ọ̀rọ̀ Baba mi jẹ́ aláìlábùkù. Òun ni asà fún gbogbo àwọn tí ó sá di i. ³²Nítorí ta ni Ọlọ́run bí kò ṣe Baba wa? Ta sì ni àpáta bí kò ṣe Baba wa? ³³Baba mi ni ibi ìsádi mi tí ó lágbára; ó sọ ọ̀nà mi di aláìlẹ́gàn. ³⁴Ó ṣe ẹsẹ̀ mi bí ẹsẹ̀ àgbọ̀nrín, ó sì mú mi dúró ṣinṣin ní ibi gíga. ³⁵Ó kọ́ ọwọ́ mi fún ogun, tó bẹ́ẹ̀ tí apá mi fi lè fa ọrun idẹ. ³⁶Ìwọ ti fi asà ìgbàlà rẹ fún mi, ìwà tútù rẹ sì ti sọ mí di ẹni ńlá. ³⁷Ìwọ ti sọ ọ̀nà di gbígbòòrò ní abẹ́ mi, tó bẹ́ẹ̀ tí kókó ẹsẹ̀ mi kò fi yẹ̀. ³⁸Mo lé àwọn ọ̀tá mi, mo sì run wọn; èmi kò padà sẹ́yìn títí tí wọ́n fi parí. ³⁹Mo jẹ wọ́n run, mo sì fọ́ wọn túútúú tó bẹ́ẹ̀ tí wọn kò fi lè dìde; wọ́n ṣubú lábẹ́ ẹsẹ̀ mi. ⁴⁰Ìwọ fi agbára dì mí lámùrè fún ogun; ìwọ mú kí àwọn ọ̀tá mi tẹríba lábẹ́ mi. ⁴¹Ìwọ mú kí àwọn ọ̀tá mi pẹyìndà sá, àwọn tí ó kórìíra mi ni mo sì run. ⁴²Wọ́n wò, ṣùgbọ́n kò sí ẹni tí yóò gbà wọ́n là—àní sí Baba mi, ṣùgbọ́n kò dá wọn lóhùn. ⁴³Mo lọ̀ wọ́n kúnná bí erùpẹ̀ ilẹ̀; mo fọ́ wọn, mo sì tẹ̀ wọn mọ́lẹ̀ bí ẹrẹ̀ ní ìgboro. ⁴⁴Ìwọ gbà mí sílẹ̀ kúrò nínú ìjà àwọn ènìyàn mi; ìwọ pa mí mọ́ ní orí àwọn orílẹ̀-èdè; àwọn ènìyàn tí èmi kò mọ̀ ń sìn mí báyìí. ⁴⁵Àwọn àjèjì tẹríba níwájú mi; bí wọ́n bá ti gbọ́, wọ́n a tẹ̀lé mi. ⁴⁶Àwọn àjèjì rẹ̀wẹ̀sì; wọ́n fi ìwàrìrì jáde láti inú àwọn ibi agbára wọn. ⁴⁷Baba mi wà láàyè! Ìbùkún ni fún àpáta mi! Kí a gbé Baba mi ga, àpáta ìgbàlà mi! ⁴⁸Baba mi ni ẹni tí ń gbẹ̀san mi, tí ó sì ń rẹ àwọn ènìyàn sílẹ̀ lábẹ́ mi. ⁴⁹Ó mú mi jáde kúrò lọ́dọ̀ àwọn ọ̀tá mi. Ìwọ gbé mi ga ju àwọn akọnimọ̀ọ́gbà mi lọ; ìwọ gbà mí sílẹ̀ lọ́wọ́ ọkùnrin oníwà ipá. ⁵⁰Nítorí náà èmi yóò yìn ọ́ láàrin àwọn orílẹ̀-èdè, Baba mi; èmi yóò kọrin ìyìn sí orúkọ rẹ. ⁵¹Ó fi ìṣẹ́gun ńlá fún ọba rẹ̀, ó sì fi ìfẹ́ májẹ̀mú hàn sí ẹni àmì òróró rẹ̀, sí Dafidi àti irú-ọmọ rẹ̀ títí láéláé.