2 Samweli 22

22 ¹Daudi alimwambia Baba yetu maneno ya wimbo huu wakati Baba yetu alipomwokoa kutoka mkononi mwa adui zake wote na kutoka mkononi mwa Sauli. ²Akasema: Baba yangu ndiye mwamba wangu, ngome yangu, mwokozi wangu. ³Baba yangu, mwamba wangu, ambaye kwake ninakimbilia, ngao yangu na nguvu ya wokovu wangu, boma langu na kimbilio langu, mwokozi wangu—wewe unaniokoa kutoka udhalimu. ⁴Ninamwita Baba yangu, anayestahili kusifiwa, nami ninaokolewa kutoka kwa adui zangu. ⁵Kwa maana mawimbi ya mauti yalinizunguka; mafuriko ya uharibifu yalinitisha. ⁶Kamba za kaburi zilinizonga; mitego ya mauti ilinikabili. ⁷Katika dhiki yangu nilimwita Baba yangu; nilimlilia Mungu wangu ili anisaidie. Kutoka hekaluni mwake aliisikia sauti yangu, na kilio changu kilifika masikioni mwake. ⁸Ndipo dunia ikatetemeka na kutikisika; misingi ya mbingu ilitetemeka na kutikisika, kwa sababu alikuwa na hasira. ⁹Moshi ulipanda kutoka puani mwake, na moto uteketezao ukatoka kinywani mwake; makaa yaliyowaka yaliwaka kutoka kwake. ¹⁰Alizipasua mbingu na kushuka chini, na mawingu meusi yalikuwa chini ya miguu yake. ¹¹Alipanda juu ya kerubi na kuruka; aliruka juu juu ya mabawa ya upepo. ¹²Alifanya giza kuwa hema lake kumzunguka— mawingu meusi ya mvua ya angani. ¹³Kutoka mng'ao uliokuwa mbele yake yaliwaka makaa ya moto. ¹⁴Baba yangu alinguruma kutoka mbinguni; Aliye Juu Sana aliipaza sauti yake. ¹⁵Alizituma mishale yake na kuwatawanya adui zake, akatupa umeme na kuwakimbiza. ¹⁶Mifereji ya bahari ilionekana, misingi ya ulimwengu ilifunuliwa kwa kukemea kwa Baba yangu, kwa mvumo wa pumzi ya puani mwake. ¹⁷Alinyoosha mkono kutoka juu na kunishika; alinitoa katika maji yenye kina kirefu. ¹⁸Aliniokoa kutoka kwa adui yangu mwenye nguvu, kutoka kwa watesi wangu waliokuwa na nguvu kunizidi. ¹⁹Walinikabili katika siku ya msiba wangu, lakini Baba yangu alikuwa tegemeo langu. ²⁰Alinitoa nje mahali penye nafasi; aliniokoa kwa sababu alipendezwa nami. ²¹Baba yangu alinitendea sawasawa na haki yangu; sawasawa na usafi wa mikono yangu alinilipa. ²²Kwa maana nimezishika njia za Baba yangu; sikumwacha Mungu wangu kwa uovu. ²³Hukumu zake zote ziko mbele yangu; sikuziacha amri zake. ²⁴Nilikuwa mkamilifu mbele yake, nami nilijilinda nisiwe na hatia yangu. ²⁵Kwa hiyo Baba yangu alinilipa sawasawa na haki yangu, sawasawa na usafi wangu mbele ya macho yake. ²⁶Kwa mwaminifu unajionyesha kuwa mwaminifu; kwa mkamilifu unajionyesha kuwa mkamilifu. ²⁷Kwa msafi unajionyesha kuwa msafi, lakini kwa mkaidi unajionyesha kuwa mwerevu. ²⁸Unawaokoa watu walioteswa, lakini macho yako yako juu ya wenye kiburi, ili kuwashusha chini. ²⁹Kwa maana wewe ndiwe taa yangu, Baba yangu; hulibadilisha giza langu kuwa nuru. ³⁰Kwa msaada wako naweza kushambulia jeshi; pamoja na Baba yangu naweza kuruka ukuta. ³¹Kwa habari ya Baba yangu, njia yake ni kamilifu; neno la Baba yangu halina dosari. Yeye ni ngao kwa wote wanaokimbilia kwake. ³²Kwa maana ni nani aliye Mungu ila Baba yetu? Na ni nani aliye mwamba isipokuwa Baba yetu? ³³Baba yangu ni kimbilio langu lenye nguvu; huifanya njia yangu kuwa kamilifu. ³⁴Huifanya miguu yangu kuwa kama miguu ya kulungu na kunisimamisha imara mahali pa juu. ³⁵Huizoeza mikono yangu kwa vita, hata mikono yangu iweze kupinda upinde wa shaba. ³⁶Umenipa ngao ya wokovu wako, na upole wako umenifanya kuwa mkuu. ³⁷Unaipanua njia chini yangu, hata vifundo vya miguu yangu visiteleze. ³⁸Niliwafuatia adui zangu na kuwaangamiza; sikurudi nyuma hata walipomalizika. ³⁹Niliwateketeza na kuwaponda hata wasiweze kuinuka; walianguka chini ya miguu yangu. ⁴⁰Ulinivika nguvu kwa ajili ya vita; uliwafanya wapinzani wangu wainame chini yangu. ⁴¹Uliwafanya adui zangu wanigeuzie visogo katika kukimbia, nami niliwaangamiza wale walionichukia. ⁴²Walitazama, lakini hakuna aliyekuwapo wa kuwaokoa— hata kwa Baba yangu, lakini hakuwajibu. ⁴³Niliwasaga wawe laini kama mavumbi ya nchi; niliwaponda na kuwakanyaga kama matope ya barabarani. ⁴⁴Uliniokoa kutoka mabishano ya watu wangu; ulinihifadhi niwe kichwa cha mataifa; watu nisiowajua sasa wananitumikia. ⁴⁵Wageni wananyenyekea mbele yangu; mara wasikiapo, wananitii. ⁴⁶Wageni wanavunjika moyo; wanatoka wakitetemeka katika ngome zao. ⁴⁷Baba yangu yu hai! Ahimidiwe Mwamba wangu! Atukuzwe Baba yangu, Mwamba wa wokovu wangu! ⁴⁸Ni Baba yangu anipatiaye haki na kuwashusha mataifa chini yangu. ⁴⁹Ananitoa kutoka kwa adui zangu. Ulininyanyua juu ya watesi wangu; uliniokoa kutoka kwa mtu mkatili. ⁵⁰Kwa hiyo nitakusifu kati ya mataifa, Baba yangu; nitaliimbia jina lako sifa. ⁵¹Yeye humpa mfalme wake ushindi mkuu na humwonyesha upendo wa agano mpakwa mafuta wake, kwa Daudi na wazao wake milele.