Davidwui Huikhami Laa
Ngachonkhami kachiva̱wui thili Davidna sakahai awui laa kasa̱: kathiwui khangaphaona ali ngaphum ngasakhaida ana ngakaowa, kala awui Avāna meikhu kala harvāwui ngachaili tāzangda, tara̱ kathukawui eina ali khāngshokra. Awui Avāna awuili ningyāng ungkahaiwui vang ali kanshokhaowa, kala awui Avā awui tangkhamangli thaomei na.
22 1Ithumwui Avāna Davidli awui yangkashe saikorawui pāng eina, kala Saulwui pāng eina kankhui tharan, Davidna laa hiwui tui chi ithumwui Avāli hānga. 2Ana hānga: Iwui Avāna iwui lunghārna, iwui ngaveina, ili kankhamena. 3Iwui Avāna iwui lunghārna, ina awui vangli ngayinkhuisai; ana iwui chāngvei kala iwui huikhamwui angajina, iwui raikānphung kala iwui ngayin khavaina, iwui huikhamena. Nana ili sākashewui eina huimi. 4Songayi kaji iwui Avāli ina ngakaowa, chieina iwui yangkashebingwui eina ina kahui samphanga. 5Kaja kathiwui khangaphaona ili ngaphum ngasaka; kashimānwui kongna ili ngachee ngasaka. 6Kazeiramwui khara̱na ili neishāna; kathiwui khalenbingna iwui mangāli ngasunga. 7Iwui kakhanang tharan iwui Avāli ina ngakaowa; ili ngachonmi khavai ina iwui Vareli vaowa. Awui khorumshimwui eina iwui akhon ana shāmi, kala iwui khavao chi akhanāli vāshunga. 8Chiwui vang eina okathuina nganukta nganinga; kazingramwui shimphungala nganuka kathirkazamda, khikhalajila ana malungvāthaowa. 9Anātangkhur eina meikhut shoka, kala akhamor eina meiwon shoka; awui khalattali eina malingting kahai meithā lingtingda hānshoka. 10Ana kazingram ngalākpakta tāhaowa; awui pheizingli muiyā kashā lei. 11Ana cherub kahai tongda yonshoka; kala masiwui angachāngtung eina thaklākda railuira. 12Ana tangkhamang kala kazingramwui zingrot muiyā kashā chili awui fakham khavai khaya̱lar sai. 13Awui mangāli horchāmri kahai chiwui eina meithā chuishoka. 14Iwui Avāna kazingramwui eina ngashuma; kala Juimataimeikap kajina awui akhon vaowa. 15Ana awui malāthing thaida awui yangkashebingli chaiyāngmi; rikhān ngasheikazamda athumli sākathāna. 16Iwui Avāwui kakharar eina, awui nātangkhur kakathang eina, shamadruwui apongbing samtheihaowa, kala apuk-apagwui shimphungala ngahā eina hangtheihaowa. 17Ngarāntā kazing eina ana ili yonkhui; tara̱ kathukawui eina ana ili khāngshokmi. 18Ana ili iwui yangkashe yangshishun kahai chiwui eina, kala iwui vang pangnāhai iwui yangkashebing chiwui eina thānshokmi. 19Iwui unshimui atamli athumna ili rāngasunga, kha iwui Avāna iwui shaikhavaina. 20Ili khamashā apamli ana thānshokmi; ana ili kanshokmi, khikhalajila iwui vangli ana ningyāng unglaka. 21Iwui khamashung khangarong athishurli iwui Avāna ili sāmi; ipangwui katharwui athishurli ana ili hanmilui. 22Kaja iwui Avāwui shongfa ina mayonrā kahaina; iwui Vare chiwui eina makhayā ot sāda mangareithuimana. 23Awui bichar saikora iwui mangāli lei; awui ain chiwui eina ina mangareithuimana. 24Awui mangāli I shāt makāmana, kala iwui khayonkhamāng eina ikhalatta mazangkhavaida sai. 25Chiwui vang eina awui mikyanli iwui kathar athishurda, iwui khamashung khangarongwui athishurda iwui Avāna ili hanmi. 26Shitkasang khangatarabing chili nana nakhalatta shitkasang khangatarda chitheiya; shāt makakābing chili nana nakhalatta shāt makakāda chitheimi. 27Katharabing chili nana nakhalatta katharda chitheimi; kha makhangarongabing chili nakhalatta makhangarong eina chitheimi. 28Kachota mibingli nana kanmi, kha namikna hiksor kahaibingli yangda, athumli ngakhuntai. 29Kaja na iwui thaomei na, iwui Avā; ana iwui tangkhamang chi kahor onkhangasaka. 30Nawui mangā eina ina raimibingli shimān ngasakshapa; iwui Avāwui mangā eina ina phākhotungli yongkānshapa. 31Iwui Avāwui apong chi ungpei-vāpeiya; iwui Avāwui tui chi chukhara maleimana. Ana ali ngayinkhui saikorabingwui chāngveina. 32Kaja ithumwui Avā maningla, khipā Vare lei? Kala ithumwui Avā maningla, khipā lunghār lei? 33Iwui Avāna iwui kapanga ngayin khavaina; ana iwui apong shāt makā ngasaka. 34Iphei chi ana chaophei thāda sāmi, kala kajujui apamli ana ili ning tāphupda haimira. 35Rai ngarar khavai ana ipāngli tamchitheimira; chiwui vang eina ipāngna pithraiwui malā hunshaptheimara. 36Nawui huikhamwui chāngvei chi nana ili mihaira; kala nawui khangachonna ili reingasaka. 37Nana iwui azingli shongfa pākta sākhui, chieina iwui sheikasha̱ mavānhaimara. 38Iwui yangkashebingli ina kharomda athumli sāshimāna; athum mayumranglakha eina tangda masa̱naungmana. 39Ina athumli sākhayāng sātekmi haida, athum mangakarthuirarmana; athum ipheizingli saosanga. 40Raiwui vang eina nana ili sāri eina pangshapda shaksāmi; nana iwui yangkashebingli iwui azingli mashunzang ngasaka. 41Nana iwui yangkashebingli iwui eina ngareithuida yāmshok ngasaka, kala ili yangkakharinga mibingli ina sāshimāna. 42Athumna yanga, kha athumli huikhame khipā maleimana; athumna iwui Avālila yanga, kha ana mangahānkāmana. 43Athumli ina ngaleiwui chifa thāda shaokazamda sāmi; chānreiwui leipā thāda ina athumli sākachupda naikazamhaora. 44Iwui mibingwui ngarar khangarok eina nana ili khāngshokmi; nana ili yurbing akhavāda haimi; ina makathei yur kahaina ili otram ngatha̱mi. 45Yur kateibingna iwui mangāli ngayumra; athumna shākhaleoda iwui kahāng nganai. 46Yur kateibingna ningsuitai; athumwui raipanwui eina kathirriri rai. 47Iwui Avā theira! Iwui lunghārli soranu! Iwui Avā, iwui huikhamiwui lunghār, khāngchikataranu! 48Ili athut hāngsangkhame chi iwui Avāna, ana mibingli iwui azingli leingasaka. 49Ana iwui yangkashebingwui eina ili khāngshokmi. Nana iwui yangkashebingwuitungli ili maiyā ngasaka; sākashe miwui eina nana ili ngatangmi. 50Hiwui vang eina, iwui Avā, ina nali yur saikorawui alungli sochingra; nawui mingli masotlaa sochingda sāra. 51Awui awungali hakkhamahā khayui chi ana mi, kala awui thao neomi kahaiya awui makhangachei leikashi chitheimi, David kala awui ara̱-azālila, katang mavaila.
