2 Samuel 21

21 ¹Chitharan Davidwui atamli zingkum kathum, zingkum akha eina akha, zāt kasak rāhaowa; chieina Davidna chi pongli ithumwui Avāli ngahāna. Kala ithumwui Avāna hānga, "Saul kala awui shimkhurtungli ashee khayon lei, kaja ana Gibeonnaobingli shaothatta."

²Chieina awungana Gibeonnaobingli hokhuilaga athumli hānga. (Gibeonnaobing chi Israelnaobing maningmana, kha Amorwui shākkahaibingna; Israelwui mibingna athumli shivā khavai khangashit sākahai, kha Saulna Israel kala Judahwui vang zikhamari sāda athumli shaothat khavai phāhaowa.). ³Davidna Gibeonnaobingli hānga, "Ina nathumwui vang khi sāra? Ina khathāda pheomi sāda nathumna ithumwui Avāwui mibingli somira?"

⁴Gibeonnaobingna hānga, "Ithum kala Saul lah awui shimkhurwui ngachaili sinā lah lupā maningmana, kala ithumna Israelli mi akhala shaothat khavai khayon maleimana." Davidna hānga, "Nathumna kahahāng chi ina nathumwui vang sāra."

⁵Athumna awungali hānga, "Ithumli sāshimitmi, kala chieina ithum Israelwui leiret kachilikhala mapamluikhavai ithumli sāshimān khavai khangarān sākahai mipā china, ⁶awui ara̱-azāwui ngachaili mi shini ithumwui pāngli horsangmiranu, kala ithumna athumli PROHO Varewui kapangva̱ Saulwui Gibeahli PROHO Varewui mangāli hokthangra." Awungana hānga, "Ina athumli horsangmira."

⁷Kha David kala Saulwui nao Jonathanwui ngachaili ithumwui Avāwui mangāli khalei tuingashitwui vang, awungana Saulwui nao Jonathanwui nao Mephiboshethli shivāmi. ⁸Kha awungana Aiahwui naongalāva̱ Rizpahna Saulli pharā naomayara khani, Armoni kala Mephiboshethli, kala Saulwui naongalāva̱ Merabna Meholathpa Barzillaiwui nao Adrielli pharā naomayara phangāli ngasoda khuiya. ⁹Ana athumli Gibeonnaobingwui pāngli horsangmi, kala athumna kaphungli ithumwui Avāwui mangāli hokthanga; mi shini chi akharumda pitāhaowa. Athumli mā hātkaphok atamli, nāpai hātkaphok tharan shaothata.

¹⁰Chieina Aiahwui naongalāva̱ Rizpahna bora khuilaga lung akhawui tungli hamizata. Mā hātkaphok eina kazing angun chibingtungli matāranglakha eina tangda, ana ngashunli vānaobing, kala ngayāli sāyurbing angun chibingtungli matāluikhavai yangmi. ^a a v10 Bora chi ngachārkasā, amang kachonna, malungring kala chapngachāwui theirar shākhi sāda ngavaikahaina. ¹¹Aiahwui naongalāva̱ Saulwui ashāmva̱ Rizpahna kasā chi Davidli hānghaowa tharan, ¹²ana Jabesh-gileadwui mibingli vālaga Saul kala awui nao Jonathanwui ara̱kuibing chi akhui. Philistinenaobingna Saulli Gilboali shaothat atamli athumli Beth-shanwui kayāngli hokthanghai; kala kayāng chiwui eina Jabesh-gileadwui mibingna ngathum sāda khuikahaina. ¹³Ana Saulwui ara̱kui kala awui nao Jonathanwui ara̱kui chi chiwui eina akhuivai, kala athumna hokthang kahai mibingwui ara̱kuibing chi kazipkhui. ¹⁴Athumna Saul kala awui nao Jonathanwui ara̱kui chi Benjaminli Zelali, awui avāva̱ Kishwui chikhurli chifahaowa, kala awungana kakaso saikora chi tākam eina sai. Chiwui thili, ithumwui Avāna apamwui vang seihā kasā chi ngahānkāmi.

Davidwui raikapingbingna Philistinewui mireitheibingli yuimi

¹⁵Latluida Philistinenaobing kala Israelwui ngachaili rai sāhaowa. Davidna awui raobingli ngasoda Philistinenaobingli ngarar khavai vāhaowa, kala a chotlakhaowa. ¹⁶Raphawui naotunbingwui akha Ishbi-benobwui pithraiwui zeisa̱wui kharit pound shini kala tangkhai sha̱khana. Ana raighai kadhar akha ngavaida Davidli shaothat khavai phaninga. ^b b v16 Rapha chi kajui raikapingbingwui shimkhurwui awona — Philistinenaobingwui ngachaili rai ngararmi mireitheibing china. ¹⁷Kha Zeruiahwui nao Abishaina Davidli khangachon sāmi khavai vālaga Philistinepa chili shaothata. Chieina Davidwui mibingna ali ngashitta hānga, "Na latluida ithumli ngasoda raili mavāluilu, chi maningakha nana Israelwui thaomei sāshimitmira."

¹⁸Chiwui thili Gobli Philistinenaobingli rai saluishita. Chili Hushathpa Sibbecaina mireitheiwui naotun Saphli sāthathaowa. ¹⁹Gobli Philistinenaobingli rai saluishita; kala Jaare-oregimwui naomayara Bethlehempa Elhananna Gitpa Goliathli sāthathaowa. Goliathwui zeipa̱ kapem rikhaya. ²⁰Latluida Gathli rai sāhaowa. Chili akho-arek kajui mi akha leisai; awui apang khaninili pāngmareng tharuruk tharuruk, kala aphei khaninili pheimareng tharuruk tharuruk zangsai; apheimareng pāngmareng saikorada katonga maga̱da mati sāhaowa. Ala Raphawui theisāna. ²¹Ana Israelli mana̱kashi tharan, Davidwui achinā Shime-iwui naomayara Jonathanna ali sāthathaowa. ²²Hi mati Gath ngaleiwui mireitheiwui naotunbing china, David eina awui raobingwui pāngli thisangserhaowa.