2 Samuel 20

20 ¹Apam chili Benjaminwui mi Bichriwui naomayara Sheba hoda makānkhanā makaphā mi akha leisai. Ana talla̱ kakhong eina panglāk eina vaoda hānga, "Ithumna Davidli yar maleimana, Jessewui naomayarali shimluila maleimana! O Israel, nathum kachichāshi kachonshimli hanungthuilu!"

²Chieina Israelwui mi saikorana Davidli horhailaga Bichriwui naomayara Sheba shurthuwa; kha Judahwui mibingna Jordanwui eina Jerusalemli eina tangda awungali ngashiktit.

³Davidna Jerusalemli awui shimli unguwa, kala awungana shim mayon khavai haihai angashirva̱ tharā chi khuida khamayona chihovai. Ana athumli mizāi, kha athumli mangasomimana. Athumna ra̱meiva̱ ngarā thāda ringlaga thipai eina tangda khamayona sāda pamsanga.

⁴Awungana Amasali hānga, "Zimiksho kathumthang alungli Judahwui mibingli ili hokhuimilu, kala nakhalattala hili nganinglu."

⁵Amasana Judahli hokhui khavai vāhaowa, kha awungana awui vang sāngasak pung eina reikharida huihaowa. ⁶Davidna Abishaili hānga, "Aja Bichriwui naomayara Shebana Absalom eina ithumli reimei sākashi sāra. Ana raipan sākahai keinungbingli samphangda ithumwui eina latshokpaishina, nawui akhavāwui mibingli khuilaga ali kharomlu."

⁷Chieina Joabwui mibing, Cherethnaobing, Pelethnaobing, kala kapingabing saikora Bichriwui naomayara Sheba kharom khavai Jerusalemwui eina awui thi shokuwa. ⁸Gibeonli khalei ngalung reikhamei chili, Amasana athumli samphanga. Joabna awui raiwui phahon ngavai, kala awui kashānli ahonli sanghai raighai shānneira̱ eina neihaisai; kala ana rida zatlakha, raighai chi tunhaowa. ⁹Joabna Amasali hānga, "Igato, na chingrihaira?" Joabna Amasali khamaya̱ khavai yāshong pāng eina awui morhā yonkhuiya. ¹⁰Amasana Joabwui pāngli khalei raighai chi matheimana. Joabna awui wukli ngaphitlaga awui akharibing ngaleili ngawokphā ngasaka. Kakhane kashao maleila, Amasa thihaowa. Chiwui thili Joab eina awui achinā Abishaina Bichriwui naomayara Sheba kharomvai. ¹¹Joabwui yaronnaobingwui ngachaili akhana Amasawui ngalemli nganinglaga hānga, "Joabli khuisang khipālong kala Davidwui vang khalei khipālong, Joabli shurlu!" ¹²Amasa shongfa alungli awui ashee eina yumda pamsai. Mipā china mi saikora apam chili nganingsai chi kathei eina, ana Amasali shongfawui eina luili tukvāhaowa kala awui mangāli kachon akha farormihaowa; kaja rākakān saikora apam chili nganinghaowa. ¹³Ali shongfawui eina thahaikupchang eina, mi saikora Bichriwui naomayara Sheba kharom khavai Joabli shurthuwa. ¹⁴Shebana Israelwui shang saikorali kānkāda Abel-beth-maacahli vāhaowa; kala Bichrinaobing saikora kazipkharālaga athumla ali shurthuwa. ¹⁵Athumna vālaga Abel-beth-maacahli ali kuinamhaowa. Athumna keinung chili kuimareida shongfa ngarānphina, atungshong raipanli kuimareida nganinga; kala Joabwui raimi saikorana phākho chi tunga khavai shaokhaowa.

¹⁶Chieina keinungwui eina thangkhamei preiva̱ akhana panglāk eina hānga, "Nganālu! Nganālu! Joabli hānglu, 'Ina nali tui hāng khavai hili rālu.'" ¹⁷Ana nganaimeida vātlakha, preiva̱ china hānga, "Na Joabla?" Ana, "I hina" da hānga. Preiva̱ china hānga, "Narao tui hi nganālu." Ana, "I nganāda lei" da hānga.

¹⁸Preiva̱ china hānga, "Achālakhawui atam chi mibingna, 'Abelli hāngkachithei ngahānphalu,' da hānglaksa, kala chithāda mang chi kuphaowa. ¹⁹I hi Israelli khalei chingri kala chisin kahaibingwui ngachaili leira. Nana Israelwui alungli keinung akha, ava̱va̱ akha sāshimān khavai phāra. Khisāda ithumwui Avāwui shimluili yuisanghaokhala?" ^a a v19 'Ava̱va̱ keinung' hiya keinung naonaobingna hāngkachithei kala makārwui vang chihānmi kahai keinung khare akhana sai.

²⁰Joabna ngahānkai, "Ina katang, katang mayuisangmara lah masāshimānmara! ²¹Chi maningmana. Kha Ephraim phungrāwui Bichriwui naomayara Shebana awunga Davidli thuingakaishihaowa. Mi akha hili horsangmilu, kala ina keinung chiwui eina latungra." Preiva̱ china Joabli hānga, "Awui akui chi phākho tungwui eina nawui pāngli horrorhaora."

²²Chieina preiva̱ china awui thangkhameiwui hāngkachithei eina mibing saikorali vai. Athumna Bichriwui naomayara Shebawui akui rangda Joabwui pāngli horrorhaowa. Ana talla̱ khonga, kala raimibingna keinung chiwui eina ngapha̱ da mi kachiva̱ kachichā shimli ungserhaowa. Joabna Jerusalemli khalei awungali latunga.

²³Joabna Israelwui raimi saikorawui atungli yanga; Jehoiadawui naomayara Benaiahna Cherethnaobing eina Pelethnaobingwui atungli yanga. ²⁴Adoramna thoukainao saikorawui kashina sai; Ahiludwui naomayara Jehoshaphatna kapime sai; ²⁵Shevana kapime sai; kala Zadok eina Abiatharna pāngmon sai; ²⁶kala Jairwui Irana Davidwui pāngmon sai.