Kongelelji Sheba Laitoryat
Ki koo Sheba tunoot ak kobagaakta ortinwek che po murot kaataam. Ki bar Joab Amasa eng' rotweet ne ki kiguut eng' ooreet, yeityo koyiem Abel. Ki waach kwondo age ne ng'oom kobun irimeet, koteebe amune si koing'em poroteetap Kwandanyo, ak kolewen metit agenge kosiir nganaseet.
20 1Ki mi yooto chiito age ne ma karaaran, ne ki kiguure Sheba weeriitap Bikri, chiito ne po ooreetap Benjamin. Ki koo tunoot ak kowaach, kole, “Ma ketinye acheek kebeberta eng' Daudi, ak ma ketinye lagoinotet eng' weeriitap Jesse! Oba chii tugul emennyi, Israel!”
2Ki pagaakta murenik tugul che po Israel Daudi kosup Sheba weeriitap Bikri; ago ki sup murenik che po Judah laitoryannywa, kobooch Jordan agoi Jerusalem.
3Ki nyo Daudi koonnyi eng' Jerusalem, ak ki nam laitoryat chebaigeinik taman che ki pagaakta koriip koot, ak konde ole kiriibei. Ki igoochi icheek amitwogik ago ma ipkei ak icheek. Ki menye icheek koratyin agoi kome, kosabei ko uu mosoogik.
4Ki leenji laitoryat Amasa, “Iguure murenik che po Judah eng' peetuusyek somok, ak itononi inyee eng' yu.”
5Ki wo Amasa koguur Judah, ago kigagei kosiir sait ne ki king'atchi laitoryat. 6Ki leenji Daudi Abisai, “Yachech nguno Sheba weeriitap Bikri kosiir Absalom. Nam murenik che po kiptaiyandeng'ung' ak ioon ineendet, si ma koit nganasosyek che nyigiis ak kochililech.”
7Ki mang'une murenigap Joab, Keretik, Peletik, ak murenik tugul che kimnotin, kosupkei ineendet, kobunu Jerusalem, koon Sheba weeriitap Bikri. 8Ye ki mi rwandet ne oo eng' Gibeon, kotuiye Amasa icheek. Ki ilaachi Joab ngoryennyi ne po lugeet, ak ki rategei rotweet ne mi choget eng' muitonyi; ak ye kiriik tai, kobut rotweet. 9Ki leenji Joab Amasa, “Imi komyee, tupchennyu?” Ki nam Joab eunnyi ne po tai tamnetap Amasa, si kotorooch ineendet. 10Ma epchi iit Amasa rotweet ne ki mi eutap Joab. Ki toor Joab moennyi, ak kimandae tuguugap moennyi ng'wony. Ama kobar kong'eta aeng', kome Amasa. Yeityo koon Joab ak tupchennyi Abisai Sheba weeriitap Bikri. 11Ki tonone age eng' neranigap Joab ole mi Amasa, ak kole, “Ne chamei Joab, ak ne po Daudi—osup Joab!” 12Ki rubei Amasa korotiikyik eng' kwenutap ooreet. Ye ki keer chiichooto kole kagotonon piik tugul yooto, ki irir Amasa kong'et eng' ooreet koba mbareet, ak konde ineendet ngoryeet, amu ki tonon chii tugul ne nyonei. 13Ye ki kagogoito eng' ooreet, ki sup murenik tugul Joab, koon Sheba weeriitap Bikri. 14Ki pa Sheba ortinwek tugul che po Israel agoi Abel ne po Beth Maaka; kotuiyogei Bikrik tugul ak kosup ineendet agine. 15Ki pwa ak koyiem ineendet eng' Abel ne po Beth Maaka. Ki teech irimeet koigeny ak nganaseet, kotononi inatet ne po saang'; ak ki machei piik tugul che po Joab kolal inateet si koluul.
16Yeityo koguur kwonyi ne ng'om kobunu nganaseet, kole, “Ogas! Ogas! Oleenji Joab, ‘Nyoo yu, si ang'alaal ak inyee.’” 17Ye ki neegit, koteebe kwonyi, kole, “Ii Joab inyee?” Kole ineendet, “Anee.” Kole, “Igas ng'aleegap otwogindeng'ung'.” Kole, “Aebei iit.”
18Kole, “Eng' kasarta che kiboi, ki cham komwa, ‘Teep kityo ng'olyoo eng' Abel,’ ak kagolet ng'olyoondonooto. 19Aa anee eng' kwenutap che chamei kaalyeet ak che po iman eng' Israel. Imache inyee kolal nganaseet, ne kamet eng' Israel. Amu nee si ilugu lagoinotetap Kwandanyo?” a a v19 Nganaseet ne 'kamet' ko ki nganaseet ne oo ne kitononchini nganasosyek che meng'echen si konyoor kaneetiset ak riptaet.
20Ki wol Joab, kole, “Ingolooit, ingolooit alugu anan alal! 21Ma uu nooto. Ago Sheba weeriitap Bikri, ne po tulwaagap Ephraim, ki kongelelji laitoryat, Daudi. Igoochi acheek chiito age ni, ak abagaakte nganaseet.” Ki leenji kwonyi Joab, kole, “Kiwirtakwok metinnyi kosiir inateet.”
22Ki wo kwonyi piik tugul eng' ng'omnatennyi. Ki til metitap Sheba weeriitap Bikri ak kowiirchi Joab. Ki koo tunoot, ak komang'une nganaseet chii tugul koba koonnyi. Ki week Joab ole mi laitoryat eng' Jerusalem.
23Ki pou Joab lugeet komugul che po Israel; ki pou Benaiah weeriitap Jehoiada lugeetap Keretik ak Peletik. 24Ki pou Adoram aisuruut; ago ki siriindetap tuguuk che piitu Jehoshaphat weeriitap Ahilud; 25Ki siriindet Sheva; ak ki tisiik Zadok ak Abiathar; 26ak ki tisiindetap Daudi agine Ira Jairindet.