2 Samuẹli 20

20 ¹Ọkùnrin yẹpẹrẹ kan tí orúkọ rẹ̀ ń jẹ́ Ṣeba ọmọ Bikri, ará Benjamini, wà níbẹ̀. Ó fọn ìpè, ó sì kígbe pé, “Àwa kò ní ìpín kankan nínú Dafidi, a kò sì ní ogún nínú ọmọ Jese! Olúkúlùkù yín padà sí àgọ́ rẹ̀, ẹ̀yin Israẹli!”

²Nítorí náà gbogbo àwọn ọkùnrin Israẹli fi Dafidi sílẹ̀ láti tẹ̀lé Ṣeba ọmọ Bikri; ṣùgbọ́n àwọn ọkùnrin Juda rọ̀ mọ́ ọba wọn, láti Jọdani dé Jerusalemu.

³Dafidi dé ilé rẹ̀ ní Jerusalemu, ọba sì mú àwọn àlè mẹ́wàá tí ó ti fi sílẹ̀ láti ṣọ́ ilé, ó sì fi wọ́n sí abẹ́ ìṣọ́. Ó pèsè fún wọn ṣùgbọ́n kò bá wọn sùn. Wọ́n wà ní àtìmọ́lé títí di ọjọ́ ikú wọn, wọ́n sì ń gbé bí opó.

⁴Ọba sì sọ fún Amasa pé, “Pe àwọn ọkùnrin Juda sọ́dọ̀ mi láàrin ọjọ́ mẹ́ta, kí ìwọ pẹ̀lú sì wà níhìn-ín.”

⁵Amasa sì lọ láti pe Juda jọ, ṣùgbọ́n ó lọ́ra ju àkókò tí ọba ti dá fún un lọ. ⁶Dafidi sì sọ fún Abiṣai pé, “Ṣeba ọmọ Bikri yóò pa wá lára ní báyìí ju Absalomu lọ. Mú àwọn ọkùnrin olúwa rẹ, kí o sì lépa rẹ̀, kí ó má baà rí àwọn ìlú olódi, kí ó sì bọ́ lọ́wọ́ wa.”

⁷Nítorí náà àwọn ọkùnrin Joabu, àwọn ará Kereti, àwọn ará Peleti, àti gbogbo àwọn akíkanjú ológun jáde tẹ̀lé e láti Jerusalemu láti lépa Ṣeba ọmọ Bikri. ⁸Nígbà tí wọ́n dé ibi òkúta ńlá tí ó wà ní Gibeoni, Amasa pàdé wọn. Joabu wọ aṣọ ológun rẹ̀, ó sì fi àmùrè di idà kan sí ìdí rẹ̀ nínú àkọ̀ rẹ̀; bí ó ṣe ń tẹ̀ síwájú, idà náà bọ́ sílẹ̀. ⁹Joabu sì sọ fún Amasa pé, “Àlàáfíà ni fún ọ, arákùnrin mi?” Joabu sì fi ọwọ́ ọ̀tún rẹ̀ di irùngbọ̀n Amasa mú láti fẹnukò ó lẹ́nu. ¹⁰Amasa kò kíyèsí idà tí ó wà ní ọwọ́ Joabu. Joabu sì fi gún un ní ikùn, ìfun rẹ̀ sì tú jáde sórí ilẹ̀. Kò sì lù ú nígbà kejì mọ́, Amasa sì kú. Nígbà náà ni Joabu àti Abiṣai arákùnrin rẹ̀ lépa Ṣeba ọmọ Bikri. ¹¹Ọ̀kan nínú àwọn ọ̀dọ́mọkùnrin Joabu dúró lẹ́gbẹ̀ẹ́ Amasa, ó sì wí pé, “Ẹnikẹ́ni tí ó bá fẹ́ràn Joabu, àti ẹnikẹ́ni tí ó bá wà fún Dafidi—kí ó tẹ̀lé Joabu!” ¹²Amasa sì ń yíjú nínú ẹ̀jẹ̀ rẹ̀ ní àárín ọ̀nà. Nígbà tí ọkùnrin náà rí i pé gbogbo àwọn ọmọ ogún dúró síbẹ̀, ó wọ́ Amasa kúrò lójú ọ̀nà sí inú pápá, ó sì da aṣọ bò ó, nítorí gbogbo ẹni tí ó bá ń kọjá ń dúró. ¹³Lẹ́yìn tí a ti kó o kúrò lójú ọ̀nà, gbogbo àwọn ọkùnrin náà tẹ̀lé Joabu láti lépa Ṣeba ọmọ Bikri. ¹⁴Ṣeba sì la gbogbo ẹ̀yà Israẹli kọjá lọ sí Abeli-Beti-Maaka; gbogbo àwọn ará Bikri sì péjọ, wọ́n sì tẹ̀lé e pẹ̀lú. ¹⁵Wọ́n sì wá, wọ́n sì dó tì í ní Abeli-Beti-Maaka. Wọ́n mọ òkìtì ìdótì tì ìlú náà, tí ó dúró sí ẹ̀gbẹ́ odi ìta, nígbà tí gbogbo àwọn ọmọ ogún Joabu ń lu ògiri láti wó o lulẹ̀.

¹⁶Nígbà náà ni obìnrin ọlọ́gbọ́n kan kígbe láti inú ìlú náà pé, “Ẹ gbọ́! Ẹ gbọ́! Ẹ sọ fún Joabu pé, ‘Wá síhìn-ín, kí n lè bá ọ sọ̀rọ̀.’” ¹⁷Nígbà tí ó súnmọ́ ọn, obìnrin náà béèrè pé, “Ìwọ ni Joabu?” Ó dáhùn pé, “Èmi ni.” Ó wí pé, “Gbọ́ ọ̀rọ̀ ìránṣẹ́bìnrin rẹ.” Ó wí pé, “Mò ń gbọ́.”

¹⁸Ó sì wí pé, “Ní ayé àtijọ́ wọ́n máa ń wí pé, ‘Ẹ kàn béèrè ìmọ̀ràn ní Abeli,’ bẹ́ẹ̀ ni ọ̀ràn náà á sì parí. ¹⁹Èmi wà lára àwọn onílàjà àti olóòótọ́ ní Israẹli. Ìwọ ń wá ọ̀nà láti pa ìlú kan run, ìyá kan ní Israẹli. Èéṣe tí ìwọ yóò fi gbé ogún Baba wa mì?” ^a a v19 “Ìlú ìyá” jẹ́ àárín gbùngbùn ẹkùn pàtàkì kan tí àwọn ìlú kéékèèké gbára lé fún ìtọ́sọ́nà àti ààbò.

²⁰Joabu dáhùn pé, “Kí a má rí i, kí a má rí i! Èmi kì yóò gbé e mì, bẹ́ẹ̀ ni èmi kì yóò pa á run! ²¹Kì í ṣe bẹ́ẹ̀. Ṣùgbọ́n Ṣeba ọmọ Bikri, láti òkè Efraimu, ti ṣọ̀tẹ̀ sí ọba, sí Dafidi. Ẹ fi ọkùnrin kan yìí lé mi lọ́wọ́, èmi yóò sì yẹsẹ̀ kúrò ní ìlú náà.” Obìnrin náà sì sọ fún Joabu pé, “A ó ju orí rẹ̀ sí ọ ní orí odi.”

²²Obìnrin náà sì tọ gbogbo àwọn ènìyàn lọ pẹ̀lú ète ọgbọ́n rẹ̀. Wọ́n sì gé orí Ṣeba ọmọ Bikri, wọ́n sì jù ú sí Joabu. Ó sì fọn ìpè, wọ́n sì túká kúrò ní ìlú náà, olúkúlùkù sí ilé rẹ̀. Joabu sì padà sọ́dọ̀ ọba ní Jerusalemu.

²³Joabu ni olórí gbogbo ọmọ ogún Israẹli; Benaiah ọmọ Jehoiada sì ni olórí àwọn ará Kereti àti àwọn ará Peleti. ²⁴Adoramu ni ó ń bójútó iṣẹ́ àṣẹ; Jehoṣafati ọmọ Ahiludu ni akọ̀wé ìrántí; ²⁵Ṣefa ni akọ̀wé; Sadoku àti Abiatari sì ni àlùfáà; ²⁶Ira ará Jairi pẹ̀lú sì ni àlùfáà Dafidi.