2 Samuẹli 19

19 ¹Ọ̀rọ̀ dé ọ̀dọ̀ Joabu pé, “Wò ó, ọba ń sọkún, ó sì ń ṣọ̀fọ̀ Absalomu.” ²Nítorí náà, ní ọjọ́ náà ìṣẹ́gun di ọ̀fọ̀ fún gbogbo àwọn ènìyàn, nítorí pé wọ́n gbọ́ ní ọjọ́ náà pé, “Ọba ń banújẹ́ nítorí ọmọ rẹ̀.”

³Àwọn ènìyàn yọ́ wọ ìlú ní ọjọ́ náà, bí àwọn tí ojú tì, tí wọ́n ń yọ́ lọ lẹ́yìn tí wọ́n sá kúrò nínú ogun. ⁴Ọba bo ojú rẹ̀, ó ń kígbe sókè pé, “Absalomu ọmọ mi! Absalomu, ọmọ mi, ọmọ mi!”

⁵Joabu wá sọ́dọ̀ ọba, ó sì wí pé, “Lónìí ẹ ti dójútì gbogbo àwọn ìránṣẹ́ yín, àwọn tí wọ́n gba ẹ̀mí yín là ní òní, àti ẹ̀mí àwọn ọmọkùnrin àti ọmọbìnrin yín, àti ẹ̀mí àwọn aya àti àlè yín, ⁶nípa fífẹ́ràn àwọn tí ó kórìíra yín, àti kíkórìíra àwọn tí ó fẹ́ràn yín. Lónìí ẹ ti fihàn pé àwọn balógun àti àwọn ìránṣẹ́ kò jẹ́ nǹkan kan lójú yín. Nísinsìnyí mo mọ̀ pé bí Absalomu bá wà láàyè tí gbogbo wa sì kú, inú yín ì bá dùn. ⁷Nísinsìnyí, ẹ dìde, ẹ jáde, kí ẹ sì bá àwọn ìránṣẹ́ yín sọ̀rọ̀ pẹ̀lẹ́. Mo fi Baba wa búra, bí ẹ kò bá jáde, kò sí ọkùnrin kan tí yóò bá yín dúró lálẹ́ òní—èyí yóò sì burú fún yín ju gbogbo wàhálà tí ó ti dé bá yín láti ìgbà èwe yín wá.”

Dafidi Padà Sọ́dọ̀ Àwọn Ènìyàn Rẹ̀

⁸Nítorí náà, ọba dìde, ó sì jókòó ní ẹnu ibodè. Nígbà tí a sọ fún àwọn ènìyàn pé, “Wò ó, ọba jókòó ní ẹnu ibodè,” gbogbo wọn wá síwájú rẹ̀. Àwọn ọmọ Israẹli sì ti sá, olúkúlùkù sí ilé rẹ̀. ⁹Jákèjádò àwọn ẹ̀yà Israẹli, àwọn ènìyàn ń jiyàn pé, “Ọba gbà wá lọ́wọ́ àwọn ọ̀tá wa, ó sì yọ wá kúrò lọ́wọ́ àwọn Filistini, ṣùgbọ́n nísinsìnyí ó ti sá kúrò ní ilẹ̀ náà nítorí Absalomu. ¹⁰Ṣùgbọ́n Absalomu, ẹni tí a fi òróró yàn láti ṣàkóso wa, kú nínú ogun. Èéṣe nígbà náà tí ẹ kò fi sọ ohunkóhun nípa mímú ọba padà wá?”

¹¹Ọba Dafidi ránṣẹ́ sí Sadoku àti Abiatari àwọn àlùfáà pé, “Ẹ sọ fún àwọn àgbà Juda pé, ‘Èéṣe tí ẹ̀yin yóò fi jẹ́ ẹni ìkẹyìn láti mú ọba padà sí ilé rẹ̀, nígbà tí ọ̀rọ̀ gbogbo Israẹli ti dé ọ̀dọ̀ ọba ní ilé rẹ̀?’ ¹²Ẹ̀yin ni arákùnrin mi, ẹran-ara mi àti ẹ̀jẹ̀ mi. Èéṣe nígbà náà tí ẹ̀yin yóò fi jẹ́ ẹni ìkẹyìn láti mú ọba padà wá? ¹³Ẹ sọ fún Amasa pé, ‘Ìwọ kì í ha ṣe ẹran-ara mi àti ẹ̀jẹ̀ mi bí? Kí Baba wa ṣe bẹ́ẹ̀ sí mi àti jù bẹ́ẹ̀ lọ, bí ìwọ kò bá di balógun ọmọ ogun mi pípẹ́, tí yóò rọ́pò Joabu.’” ¹⁴Dafidi sì fa ọkàn gbogbo àwọn ọkùnrin Juda mọ́ra bí ẹni kan, wọ́n sì ránṣẹ́ sí ọba pé, “Ẹ padà wá, ẹ̀yin àti gbogbo àwọn ìránṣẹ́ yín.”

¹⁵Ọba sì padà, ó dé odò Jordani; Juda sì wá sí Gilgali láti pàdé ọba, àti láti mú un rékọjá odò Jordani.

Dafidi Ṣàánú fún Ṣimei

¹⁶Ṣimei ọmọ Gera, ará Benjamini láti Bahurimu, sáré sọ̀kalẹ̀ pẹ̀lú àwọn ọkùnrin Juda láti pàdé Ọba Dafidi. ¹⁷Ẹgbẹ̀rún àwọn ará Benjamini wà pẹ̀lú rẹ̀, àti Siba, ìránṣẹ́ ilé Saulu, pẹ̀lú àwọn ọmọkùnrin rẹ̀ mẹ́ẹ̀ẹ́dógún àti ogún ìránṣẹ́. Wọ́n sáré lọ sí odò Jordani ṣáájú ọba, ¹⁸wọ́n sì rékọjá ìwọ̀dò náà láti mú agbo ilé ọba rékọjá, àti láti ṣe ohun tí ó wù ú. Ṣimei ọmọ Gera sì wólẹ̀ níwájú ọba bí ó ti ń fẹ́ rékọjá odò Jordani, ¹⁹ó sì wí pé, “Jọ̀ọ́, olúwa mi, ẹ má ṣe ka èyí sí mi lọ́rùn, kí ẹ má sì ṣe rántí bí ìránṣẹ́ yín ti ṣẹ̀ ní ọjọ́ tí olúwa mi ọba kúrò ní Jerusalemu. Jọ̀ọ́, olúwa mi ọba, ẹ má ṣe fi sọ́kàn. ²⁰Ìránṣẹ́ yín mọ̀ pé mo ti dẹ́ṣẹ̀. Nítorí náà, lónìí mo ti wá ní ẹni àkọ́kọ́ nínú gbogbo ilé Josẹfu láti pàdé olúwa mi ọba.” ^a a v20 ‘Ilé Josẹfu’ ń tọ́ka sí àwọn ẹ̀yà àríwá Israẹli, tí wọ́n wá láti ara àwọn ọmọ Josẹfu, Efraimu àti Manasse.

²¹Nígbà náà ni Abiṣai ọmọ Seruiah wí pé, “A kò ha ní pa Ṣimei nítorí tí ó ti ṣẹ́pè lé ẹni àmì òróró Baba wa?”

²²Dafidi sì wí pé, “Èéṣe tí ẹ̀yin fi dá sí ọ̀rọ̀ mi, ẹ̀yin ọmọ Seruiah? Èéṣe tí ẹ̀yin yóò fi di ọ̀tá mi lónìí? A ha lè pa ẹnikẹ́ni ní Israẹli lónìí bí? Èmi kò ha mọ̀ pé lónìí èmi ni ọba lórí Israẹli?” ²³Ọba sì wí fún Ṣimei pé, “Ìwọ kì yóò kú,” ọba sì búra fún un.

²⁴Mefiboṣeti, ọmọ-ọmọ Saulu, sọ̀kalẹ̀ wá láti pàdé ọba. Kò tọ́jú ẹsẹ̀ rẹ̀, kò gé irùngbọ̀n rẹ̀, bẹ́ẹ̀ ni kò fọ aṣọ rẹ̀, láti ọjọ́ tí ọba ti lọ títí ó fi padà wá ní àláfíà. ²⁵Nígbà tí ó dé Jerusalemu láti pàdé ọba, ọba béèrè pé, “Èéṣe tí ìwọ kò fi bá mi lọ, Mefiboṣeti?”

²⁶Ó sì dáhùn pé, “Olúwa mi ọba, ìránṣẹ́ mi tàn mí jẹ. Ìránṣẹ́ yín wí pé, ‘Èmi yóò di kẹ́tẹ́kẹ́tẹ́ mi ní gàárì, kí n sì gun un bá ọba lọ,’ nítorí ìránṣẹ́ yín yarọ. ²⁷Ó fi ìránṣẹ́ yín sùn ní ibi búburú fún olúwa mi ọba. Ṣùgbọ́n olúwa mi ọba dàbí angẹli Baba wa; ẹ ṣe ohun tí ó dára lójú yín. ²⁸Gbogbo ilé baba mi kò tọ́ sí nǹkan kan bí kò ṣe ikú lọ́wọ́ olúwa mi ọba, síbẹ̀ ẹ fi ìránṣẹ́ yín sí àárín àwọn tí ń jẹun ní orí tábìlì yín. Ẹ̀tọ́ wo ni mo ní láti tún ké pe ọba?”

²⁹Ọba sì wí pé, “Èéṣe tí ìwọ ń sọ̀rọ̀ sí i nípa ọ̀ràn rẹ? Mo ti pinnu pé: ìwọ àti Siba ni ẹ ó pín ilẹ̀ náà.”

³⁰Mefiboṣeti sì wí fún ọba pé, “Jẹ́ kí ó gbà gbogbo rẹ̀, níwọ̀n bí olúwa mi ọba ti padà sí ilé ní àláfíà.”

³¹Barsillai ará Gileadi sọ̀kalẹ̀ láti Rogelimu, ó sì bá ọba rékọjá odò Jordani, láti sìn ín lọ. ³²Barsillai jẹ́ arúgbó gidigidi, ẹni ọgọ́rin ọdún, òun ni ó ti ń bọ́ ọba nígbà tí ó dúró sí Mahanaimu, nítorí ọlọ́rọ̀ ńlá ni. ³³Ọba sì wí fún Barsillai pé, “Bá mi rékọjá, èmi yóò sì pèsè fún ọ ní ẹ̀gbẹ́ mi ní Jerusalemu.”

³⁴Barsillai sì wí fún ọba pé, “Ọdún mélòó ni ó kù fún mi, tí èmi yóò fi bá ọba gòkè lọ sí Jerusalemu? ³⁵Ẹni ọgọ́rin ọdún ni mí lónìí. Ṣé mo lè fi ìyàtọ̀ sáàrin rere àti búburú? Ṣé ìránṣẹ́ yín lè tọ́ ohun tí ó jẹ tàbí tí ó mu wò? Ṣé mo tún lè gbọ́ ohùn àwọn ọkùnrin àti obìnrin akọrin? Èéṣe tí ìránṣẹ́ yín yóò fi tún di ẹrù wíwúwo fún olúwa mi ọba? ³⁶Ìránṣẹ́ yín yóò bá ọba rékọjá odò Jordani ní ọ̀nà kúkúrú. Èéṣe tí ọba yóò fi fi irú èrè báyìí san án fún mi? ³⁷Jọ̀ọ́, ẹ jẹ́ kí ìránṣẹ́ yín padà lọ kú ní ìlú ara mi, nítòsí ibojì baba àti ìyá mi. Ṣùgbọ́n Kimhamu ìránṣẹ́ yín nìyí; ẹ jẹ́ kí ó bá olúwa mi ọba rékọjá, kí ẹ sì ṣe fún un ohun tí ó dára lójú yín.”

³⁸Ọba sì wí pé, “Kimhamu yóò bá mi rékọjá, èmi yóò sì ṣe fún un ohun tí ó wù ọ́, àti ohunkóhun tí ìwọ bá béèrè lọ́wọ́ mi, èmi yóò ṣe fún ọ.”

³⁹Gbogbo àwọn ènìyàn sì rékọjá odò Jordani, ọba náà sì rékọjá. Ọba fẹnukò Barsillai ní ẹnu, ó sì súre fún un, Barsillai sì padà sí ilé rẹ̀. ⁴⁰Ọba sì rékọjá lọ sí Gilgali, Kimhamu sì wà pẹ̀lú rẹ̀. Gbogbo àwọn ènìyàn Juda, àti ìdajì àwọn ènìyàn Israẹli, ni wọ́n sìn ọba lọ.

⁴¹Nígbà náà ni gbogbo àwọn ọkùnrin Israẹli wá sọ́dọ̀ ọba, wọ́n sì béèrè pé, “Èéṣe tí àwọn arákùnrin wa, àwọn ọkùnrin Juda, fi jí yín lọ, tí wọ́n sì mú ọba àti agbo ilé rẹ̀ rékọjá odò Jordani, pẹ̀lú gbogbo àwọn ọkùnrin Dafidi?”

⁴²Gbogbo àwọn ọkùnrin Juda sì dá àwọn ọkùnrin Israẹli lóhùn pé, “Ọba jẹ́ ìbátan wa tí ó súnmọ́. Èéṣe tí inú yín fi bàjẹ́ nípa èyí? Àwa ha ti jẹ nínú oúnjẹ ọba bí, tàbí ó ti fún wa ní ẹ̀bùn?”

⁴³Àwọn ọkùnrin Israẹli sì dá àwọn ọkùnrin Juda lóhùn pé, “Àwa ni ìpín mẹ́wàá nínú ọba, àwa sì ní ẹ̀tọ́ tí ó pọ̀ sí Dafidi ju ẹ̀yin lọ. Èéṣe nígbà náà tí ẹ fi gàn wá? Àwa kọ́ ha ni ẹni àkọ́kọ́ tí ó sọ̀rọ̀ nípa mímú ọba wa padà wá?” Ṣùgbọ́n ọ̀rọ̀ àwọn ọkùnrin Juda le ju ti àwọn ọkùnrin Israẹli lọ.