2 Samuel 19

19 ¹Naabot kang Joab ang balita, “Tan-awa, ang hari naghilak ug nagbangotan alang kang Absalom.” ²Busa niadtong adlawa ang kadaogan nahimong pagbangotan alang sa tanang katawhan, kay nadungog nila niadtong adlawa, “Ang hari nagsubo tungod sa iyang anak.”

³Misulod nga nagtago ang katawhan sa siyudad niadtong adlawa, sama sa mga naulawan nga nagpalusot human mokalagiw gikan sa gubat. ⁴Gitabonan sa hari ang iyang nawong, nga nagtuaw ug kusog, “Akong anak nga Absalom! Absalom, akong anak, akong anak!”

⁵Miadto si Joab sa hari ug miingon, “Karong adlawa gipakaulawan nimo ang tanan nimong mga sulugoon, nga niining adlawa nagluwas sa imong kinabuhi, sa kinabuhi sa imong mga anak nga lalaki ug babaye, ug sa kinabuhi sa imong mga asawa ug mga puyopuyo, ⁶pinaagi sa paghigugma sa mga nagdumot kanimo ug sa pagdumot sa mga nahigugma kanimo. Karong adlawa gipakita nimo nga ang mga pangulo ug mga sulugoon walay bili alang kanimo. Karon nasayod ako nga kon buhi pa si Absalom ug kaming tanan nangamatay, malipay ka unta. ⁷Karon bangon, gumawas, ug sultihi sa maayo ang imong mga sulugoon. Manumpa ako pinaagi sa atong Amahan, kon dili ka mogawas, walay bisan usa ka tawo nga magpabilin uban kanimo karong gabhiona—labing daotan kini alang kanimo kaysa tanang kasamok nga nasinati nimo sukad sa imong pagkabatan-on.”

Mibalik si David sa Iyang Katawhan

⁸Busa mibangon ang hari ug milingkod sa ganghaan. Sa dihang gisultihan ang katawhan, “Tan-awa, ang hari naglingkod sa ganghaan,” silang tanan miduol kaniya. Karon ang Israel mikalagiw na, ang matag usa ngadto sa iyang balay. ⁹Sa tibuok mga tribo sa Israel naglalis ang katawhan, “Ang hari nagluwas kanato gikan sa atong mga kaaway, nagluwas kanato gikan sa mga Filistehanon, apan karon mikalagiw siya gikan sa yuta tungod kang Absalom. ¹⁰Apan si Absalom, nga atong gidihogan aron maghari kanato, namatay sa gubat. Busa nganong wala man kitay gisulti mahitungod sa pagpabalik sa hari?”

¹¹Si Haring David nagpadalag balita ngadto kang Zadok ug kang Abiatar nga mga pari, “Sultihi ang mga katigulangan sa Juda, ‘Nganong kamo pa man ang kataposan sa pagpabalik sa hari sa iyang balay, nga ang pulong sa tibuok Israel miabot na sa hari sa iyang balay?’ ¹²Kamo akong mga igsoon, akong kaugalingong unod ug dugo. Busa nganong kamo pa man ang kataposan sa pagpabalik sa hari? ¹³Sultihi si Amasa, ‘Dili ba ikaw akong kaugalingong unod ug dugo? Hinaut nga ang atong Amahan mobuhat niini kanako ug labaw pa kon dili ka mahimong permanenteng pangulo sa akong kasundalohan, puli kang Joab.’” ¹⁴Nadani ni David ang tanang kalalakin-an sa Juda ingon nga usa ka tawo, ug nagpadala silag balita ngadto sa hari, “Balik, ikaw ug ang tanan nimong mga sulugoon.”

¹⁵Mibalik ang hari ug miabot sa Jordan; ang Juda miadto sa Gilgal aron sugaton ang hari ug tabangan siya sa pagtabok sa Jordan.

Nagpakita si David ug Kaluoy kang Shimei

¹⁶Si Shimei nga anak ni Gera, ang Benjaminhon gikan sa Bahurim, midali paglugsong uban sa kalalakin-an sa Juda aron sugaton si Haring David. ¹⁷Uban kaniya ang 1,000 ka Benjaminhon, ug si Ziba, ang sulugoon sa panimalay ni Saul, uban sa iyang napulog lima ka anak nga lalaki ug kawhaan ka sulugoon. Midali sila paingon sa Jordan una sa hari, ¹⁸ug mitabok sa labanganan aron patabukon ang panimalay sa hari ug buhaton ang nakapahimuot kaniya. Mihapa si Shimei nga anak ni Gera atubangan sa hari samtang hapit na siya motabok sa Jordan, ¹⁹ug miingon, “Palihog, akong agalon, ayaw kini ibutang batok kanako, ug ayaw hinumdomi ang pagkadaotan nga gibuhat sa imong sulugoon niadtong adlawa nga ang akong agalon nga hari mibiya sa Jerusalem. Palihog, akong agalon nga hari, ayaw kini itipig sa imong kasingkasing. ²⁰Nasayod ang imong sulugoon nga nakasala ako. Busa karong adlawa mianhi ako nga una sa tibuok panimalay ni Jose aron sugaton ang akong agalon nga hari.” ^a a v20 Ang ‘panimalay ni Jose’ nagtumong sa amihanang mga tribo sa Israel, nga mga kaliwat sa mga anak ni Jose nga si Efraim ug si Manases.

²¹Unya miingon si Abisai nga anak ni Zeruia, “Dili ba angayng patyon si Shimei tungod sa pagtunglo sa dinihogan sa atong Amahan?”

²²Miingon si David, “Nganong manghilabot man kamo kanako, mga anak ni Zeruia? Nganong mahimo man kamong akong mga kaaway karong adlawa? Angay bang patyon si bisan kinsa sa Israel karong adlawa? Wala ba ako masayod nga karong adlawa ako ang hari sa Israel?” ²³Miingon ang hari kang Shimei, “Dili ka mamatay,” ug ang hari nanumpa kaniya.

²⁴Si Mefiboset, ang apo ni Saul, milugsong aron sugaton ang hari. Wala niya atimana ang iyang mga tiil, wala kuloti ang iyang bungot, o labhi ang iyang mga bisti sukad sa adlaw nga mibiya ang hari hangtod sa luwas niyang pagbalik. ²⁵Sa pag-abot niya sa Jerusalem aron sugaton ang hari, nangutana ang hari, “Nganong wala ka man mouban kanako, Mefiboset?”

²⁶Miingon siya, “Akong agalon nga hari, gilimbongan ako sa akong sulugoon. Miingon ang imong sulugoon, ‘Sakangan ko ang akong asno ug mosakay uban sa hari,’ kay ang imong sulugoon bakol. ²⁷Gibutangbutangan niya ang imong sulugoon ngadto sa akong agalon nga hari. Apan ang akong agalon nga hari sama sa anghel sa atong Amahan; buhata ang imong gihunahunang maayo. ²⁸Ang tibuok panimalay sa akong amahan angay lamang sa kamatayon gikan sa akong agalon nga hari, apan gibutang mo ang imong sulugoon uban sa mga mokaon sa imong lamesa. Unsa pay akong katungod sa paghangyo pag-usab sa hari?”

²⁹Miingon ang hari, “Nganong magsulti pa man ug dugang mahitungod sa imong mga kalihokan? Nakahukom na ako: ikaw ug si Ziba magbahin sa yuta.”

³⁰Miingon si Mefiboset sa hari, “Tuguti siya nga kuhaon ang tanan, karon nga ang akong agalon nga hari luwas nga nakauli.”

³¹Si Barzilai nga Gileadnon milugsong gikan sa Rogelim ug mitabok sa Jordan uban sa hari, aron ihatod siya. ³²Si Barzilai, tigulang na kaayo sa kawaloan ka tuig, nagpakaon sa hari panahon sa iyang pagpuyo sa Mahanaim, kay siya usa ka tawong dato kaayo. ³³Miingon ang hari kang Barzilai, “Tabok uban kanako, ug ako ang mohatag sa imong mga panginahanglan diha sa akong kiliran sa Jerusalem.”

³⁴Miingon si Barzilai sa hari, “Pila na may tuig nga nahibilin kanako, nga motungas pa ako uban sa hari sa Jerusalem? ³⁵Kawaloan na ako ka tuig karong adlawa. Mailhan pa ba nako ang maayo gikan sa daotan? Matilawan pa ba sa imong sulugoon ang iyang ginakaon o ginainom? Madungog pa ba nako ang mga lalaki ug babaye nga nag-awit? Nganong pabug-atan pa man sa imong sulugoon ang akong agalon nga hari? ³⁶Ang imong sulugoon motabok sa Jordan uban sa hari sa mubong gilay-on lamang. Nganong balosan man ako sa hari ug ingon niana ka dako nga ganti? ³⁷Palihog tuguti ang imong sulugoon nga mobalik aron mamatay sa akong kaugalingong siyudad duol sa lubnganan sa akong amahan ug inahan. Apan ania ang imong sulugoon nga si Kimham; tuguti siya nga motabok uban sa akong agalon nga hari, ug buhata alang kaniya ang imong gihunahunang maayo.”

³⁸Miingon ang hari, “Si Kimham motabok uban kanako, ug buhaton ko alang kaniya ang makapahimuot kanimo, ug bisan unsa pay imong pangayoon kanako buhaton ko alang kanimo.”

³⁹Mitabok ang tanang katawhan sa Jordan, ug mitabok ang hari. Gihalokan sa hari si Barzilai ug gipanalanginan siya, ug si Barzilai mibalik sa iyang balay. ⁴⁰Mitabok ang hari paingon sa Gilgal, si Kimham uban kaniya. Ang tanang katawhan sa Juda, ug ang katunga sa katawhan sa Israel, naghatod sa hari.

⁴¹Unya ang tanang kalalakin-an sa Israel miduol sa hari ug nangutana, “Nganong gikawat ka man sa among mga igsoon, ang kalalakin-an sa Juda, ug gipatabok ang hari ug ang iyang panimalay sa Jordan, uban sa tanang mga tawo ni David?”

⁴²Mitubag ang tanang kalalakin-an sa Juda sa kalalakin-an sa Israel, “Ang hari among suod nga paryente. Nganong nasuko man kamo niini? Nakakaon ba kami bisan unsa sa pagkaon sa hari, o naghatag ba siya kanamog gasa?”

⁴³Mitubag ang kalalakin-an sa Israel sa kalalakin-an sa Juda, “Aduna kamiy napulo ka bahin sa hari, ug mas dako ang among katungod kang David kaysa kaninyo. Busa nganong gitamay man ninyo kami? Dili ba kami ang una nga nagsulti sa pagpabalik sa among hari?” Apan ang mga pulong sa Juda mas bug-at kaysa sa Israel.