Ng'alaaljin Joab Laitoryat ne Riiroti
Chiilji Joab laitoryat amu kaiteweeri otwogik che kisar saboondanyi, ye kariir weeriinnyi ne ki chaam saboondanyi. Tebee laitoryat kurgeet, ak koibu pororyosyek ineendet koonnyi: kisar Shimei, kigeep emetap Mephibosheth, ak kiyookto Barzillai koonnyi eng' toroornatet. Yeityo kowaachei Israel ak Judah agobo laitoryat.
19 1Koit ng'olyoot Joab, kole, “Keero, riirei laitoryat ak koteechini Absalom.” 2Ki egu anyun katerteeret peetuunooto koek kateet eng' piik tugul, amu ki kas peetuunooto, kole, “Teechei laitoryat agobo weeriinnyi.”
3Ki chut piik nganaseet peetuunooto eng' ung'oot, ko uu piik che kaek toroor che mwei eng' lugeet. 4Ki tuch laitoryat tainnyi, koriir eng' kutit ne oo, kole, “Weeriinnyu Absalom! Absalom, weeriinnyu, weeriinnyu!”
5Ki nyo Joab ole mi laitoryat ak koleenji, “Kaiteweeri ra otwogiguk tugul, che kaisaru saboondang'ung' rani, ak saboonwegap weeriiguk ak tiibiiguk, ak saboonwegap osotiguk ak chebaigeiniguk, 6amu ichame che wechin ak iweche che chamin. Kaiboor ra kole ma po kutit eng' inyee kandoik ak otwogik. Angen anyun ale ngot kosaboot Absalom ak kibegu echeek tugul, ko ki iboiboitos. 7Ng'eet anyun nguno, imanda, ak ing'alaalji otwogiguk eng' kaalyeet. Ayosyechi eng' Kwandanyo, ngot ma imanda, ko mamuuchi koteep chiito agenge kobooten inyee kemutinoni—ne ya eng' inyee kosiir nyigiisindo tugul ne kiiguchin kobooch murenyonweng'ung'.”
Koweek Daudi ole mi Piikyik
8Ki ng'eet anyun laitoryat ak kotebee kurgeet. Ye ki kileenji piik, kole, “Keero, tebee laitoryat kurgeet,” kobwa tugul eng' tainnyi. Ki kagomwei Israel, chii tugul komwechi koonnyi. 9Kibolyo piik eng' ortinwegap Israel tugul, komwaei koleen, “Ki isarwech laitoryat eng' eutap puunikyok, ak ki inyolech eng' eutap Philistiik, ago nguno kagomwei eng' emet agobo Absalom. 10Ago Absalom, ne ki kiyiili si koboiywech, ko ki kome eng' lugeet. Amu nee si ma omwa kiy age tugul agobo kiweekyi laitoryat?”
11Ki iyooktoe laitoryat Daudi ng'olyoot Zadok ak Abiathar tisiik, koleenji, “Omwachi poisyegap Judah, ‘Amu nee si ogeek che let che weekyi laitoryat koonnyi, kingo kagiit ng'olyootap Israel tugul laitoryat ole mi koonnyi?’ 12Okweek tupchennyu, uundonnyu ak korotiinnyu. Amu nee si ogeek che let che weekyi laitoryat? 13Mwachi Amasa, ‘Tos ma ii uundonnyu ak korotiinnyu? Ingoyachi Kwandanyo uu ni, ak kotes kosiir, ngot ma iegu kandoindetap kiplugotinik koigeny, ne weekyi Joab.’ ” 14Ki iwal Daudi mugulelwegap murenigap Judah tugul ko uu chiito agenge, ak ki iyooktoe ng'olyoot laitoryat, koleenji, “Iweektegei, inyee ak otwogiguk tugul.”
15Ki week laitoryat ak konyo Jordan; ki nyo Judah Gilgal si korookto laitoryat ak kolandaisye Jordan.
Koriiree Daudi Shimei
16Ki chaakta Shimei weeriitap Gera, Benjaminindet ne po Baurim, koba kobooto murenigap Judah korookto Laitoryat Daudi. 17Ki mi kobooten ineendet Benjaminik eliphuut agenge, ak Siba otwogindetap kap Saulo, kobooto weeriikyik taman ak muut ak otwogikyik tiptem. Ki chaakta koba Jordan eng' taitap laitoryat, 18ak ki landa tabarta si korootiisye piigap kap laitoryat ak koyai ne myee eng' tainnyi. Ki puch Shimei weeriitap Gera eng' taitap laitoryat ye kitom kolanda Jordan, 19ak koleenji, “Soomin, kiptaiyandennyu, amanamwo ni, ak amabwaat ole ki kiyaei ne ya otwogindeng'ung' eng' peetuut ne ki manda kiptaiyandennyu laitoryat Jerusalem. Soomin, kiptaiyandennyu laitoryat, amande niito eng' muguleldanyu. 20Angen otwogindeng'ung' ale kaayai tengek. Si amu nooto, kanyo ra tai eng' kap Joseph tugul anyoon korookto kiptaiyandennyu laitoryat.” a a v20 Ng'olyoot ne le ‘kaap Joseph’ ko boorunei ortinwegap Israel che po murot ne kaataam, che punu weeriigap Joseph, Ephraim ak Manasseh.
21Ki le anyun Abisai weeriitap Zeruiah, “Tos ma nyolu kebar Shimei amu ki chubo ne ki iilaat Kwandanyo?”
22Ki le Daudi, “Kiting'egei nee ak anee, weeriigap Zeruiah? Amu nee si ogeek puunikyuk ra? Tos nyolu kebar chiito age tugul eng' Israel ra? Tos mangen ale aa laitoryat eng' Israel ra?” 23Ki leenji laitoryat Shimei, “Mobetos,” ak ki yosyechi laitoryat ineendet.
24Ki nyo Mephibosheth, weeriitap weeriitap Saulo, korookto laitoryat. Ma ki rib keldennyi, ak ma ki til tamnennyi, ak ma ki un ngorweguk, kobooch peetuut ne ki manda laitoryat agoi koweek ineendet karaaran. 25Ye ki it Jerusalem korookto laitoryat, ki teebee laitoryat, kole, “Amu nee si ma ki iwo kobooten anee, Mephibosheth?”
26Kowol kole, “Kiptaiyandennyu laitoryat, ki iimwo otwogindennyu. Ki le otwogindeng'ung', ‘Aitoi sigiryennyu, alaany kobooten laitoryat,’ amu otwogindeng'ung' ko ng'olol. 27Ki chotji otwogindeng'ung' eng' kiptaiyandennyu laitoryat. Ago kiptaiyandennyu laitoryat ko uu angeet ne po Kwandanyo; iyai ne myee eng' taing'ung'. 28Piik tugul che po kap kwandanyu ki nyoljin meet kityo eng' kiptaiyandennyu laitoryat, ago ki inde otwogindeng'ung' among icheek che amisye meseng'ung'. Tos nyolu anyun anee awaach kogeny eng' laitoryat?”
29Ki le laitoryat, “Amu nee si imwae kogeny agobo ng'aleeguk? Kaatil ale: obek emet inyee ak Siba.”
30Ki leenji Mephibosheth laitoryat, “Ingonam tugul ineendet, amu kagoweek kiptaiyandennyu laitoryat koonnyi karaaran.”
31Ki nyo Barsilai Gileadindet kobunu Rogelim ak kolanda Jordan kobooten laitoryat, si koikony ineendet. 32Ki poiyot ne oo miising' Barsilai, ne ki tinye kenyiisyek tamanwogik sisiit, ak ki ipchi laitoryat amitwogik ye ki meny Mahanaim, amu ki chii ne mogoryo miising'. 33Ki leenji laitoryat Barsilai, “Landa kobooten anee, si abook kobooten anee Jerusalem.”
34Ki leenji Barsilai laitoryat, “Ata kenyiisyek che taata anee, si atogoste kobooten laitoryat Jerusalem? 35Ki po anee kenyiisyek tamanwogik sisiit ra. Tos amuuchi ang'eny ne myee ak ne ya? Tos muuchi otwogindeng'ung' konai anyinyindo ne amei anan ne eei? Tos amuuchi agase murenik ak kwonyiik che tyendos? Amu nee si konyigiisyechi otwogindeng'ung' kiptaiyandennyu laitoryat kogeny? 36Nyi landa otwogindeng'ung' Jordan kobooten laitoryat komoswek che ming'in. Amu nee si korepaiywo laitoryat eng' kagoochinet ne oo ne uu ni? 37Soomin, ingoweek otwogindeng'ung' kome eng' nganasennyu ole neegit ak keengetap kwandanyu ak kamennyu. Ago mii yu otwogindeng'ung' Kimham; ingolanda kobooten kiptaiyandennyu laitoryat, ak iyachi ne myee eng' taing'ung'.”
38Ki le laitoryat, “Nyi landa Kimham kobooten anee, si ayachi ne myee eng' taing'ung', ak kiy age tugul ne isoom ko ayachini inyee.”
39Ki landa Jordan piik tugul, ak kolanda agine laitoryat. Ki moot laitoryat Barsilai ak koberuur ineendet, ak ki weektegei Barsilai koonnyi. 40Ki landa laitoryat Gilgal, kobooten ineendet Kimham. Ki ikonu piik tugul che po Judah, ak nuusan ne po Israel, laitoryat.
41Ki pwa anyun piik tugul che po Israel ole mi laitoryat, ak koteebee koleen, “Amu nee si kochoor tupchosyekyok, piigap Judah, inyee ak koip laitoryat ak koonnyi kolandae Jordan, kobooto piigap Daudi tugul?”
42Ki wolji piik tugul che po Judah piigap Israel koleen, “Laitoryat ko chiitap ooreennyo ne neegit. Amu nee si onereech agobo ni? Tos kiga kiam amitwogigap laitoryat, anan ko kagoochi kagoochinet?”
43Ki wolji piik che po Israel piigap Judah koleen, “Kitinye bebertanik taman eng' laitoryat, ak kitinye beberta ne oo eng' Daudi kosiir okweek. Amu nee si ouseech? Tos ma acheek che ki tai komwa agobo kiweekyi laitoryannyo?” Ago ki karaaran ng'aleegap Judah kosiir che po Israel.