Yoab motam tutgan podshoni koyitadi

Dovud uni ovlagan o'g'li uchun motam tutib, jonini qutqargan odamlarni sharmanda qilmoqda. Yo'ab buning uchun uni yuziga aytadi. Shoh darvoza oldida o'tiradi, qabilalar uni uyiga qaytaradi. Shimayning joni omon qoladi, Mefiboshetning yeri bo'linadi, Barzillay hurmat bilan uyiga jo'natiladi. So'ng Isroil bilan Yahudo shoh uchun janjallashadi.

19-bob.

Yoabga xabar yetib keldi: “Mana, podsho Absalom uchun yigʻlab, motam tutyapti.” Shunday qilib, oʻsha kuni gʻalaba butun xalq uchun motamga aylandi, chunki ular oʻsha kuni: “Podsho oʻgʻli uchun qaygʻurmoqda”, deb eshitdilar.

Oʻsha kuni xalq, jangdan qochib uyatga qolgach, yashirincha sipib ketayotgan odamlar kabi, shaharga oʻgʻrincha kirib keldi. Podsho yuzini yopib, baland ovozda: “Oʻgʻlim Absalom! Absalom, oʻgʻlim, oʻgʻlim!” deb nola qildi.

Yoab podsho oldiga kelib dedi: “Bugun sen barcha xizmatkorlaringni uyatga qoldirding. Holbuki, ular bugun sening joningni, oʻgʻil-qizlaringning jonini, xotinlaring va joriyalaringning jonini qutqarishdi, sen senga nafrat qilganlarni sevib, seni sevganlarga nafrat qilyapsan. Bugun sen sardorlaru xizmatkorlar sen uchun hech narsa emasligini koʻrsatding. Endi bilib turibman: agar Absalom tirik qolib, biz hammamiz oʻlgan boʻlsak edi, sen mamnun boʻlar eding. Endi oʻrningdan tur, tashqariga chiqib, xizmatkorlaringga mehr bilan gapir. Otamiz haqqi qasam ichamanki, agar chiqmasang, bu kecha sening yoningda birorta ham odam qolmaydi. Bu esa yoshligingdan beri boshingga tushgan barcha kulfatlardan ham ogʻirroq boʻladi.”

Dovud oʻz xalqi oldiga qaytadi

Shunday qilib, podsho oʻrnidan turib, darvoza oldida oʻtirdi. Xalqqa: “Mana, podsho darvoza oldida oʻtiribdi”, deyilganda, hammasi uning oldiga keldi. Isroil xalqi esa har biri oʻz uyiga qochib ketgan edi. Isroil qabilalari orasida xalq bahslashardi: “Podsho bizni dushmanlarimizdan qutqargan, filistlar qoʻlidan xalos qilgan edi, ammo endi Absalom tufayli bu yurtdan qochib ketdi. Bizni boshqarishi uchun moy surtib tayinlagan Absalom esa jangda halok boʻldi. Xoʻsh, nega podshoni qaytarib keltirish haqida churq etmaymiz?”

Dovud podsho Zadoq va Abiyatar ruhoniylarga xabar yubordi: “Yahudo oqsoqollariga aytinglar: «Butun Isroilning gapi oʻz uyida turgan podshoga yetib kelgan ekan, nega podshoni uyiga qaytarib keltirishda eng oxirgi boʻlasizlar?» Sizlar mening birodarlarimsiz, mening oʻz qonim va tanimsiz. Xoʻsh, nega podshoni qaytarishda eng oxirgi boʻlasizlar? Amasoga ayting: «Sen mening oʻz qonim va tanim emasmisan? Agar Yoab oʻrniga doimiy qoʻshin sardorim boʻlmasang, Otamiz menga shu jazoni bersin, bundan ham battarini qilsin.»” Dovud butun Yahudo erkaklarining koʻnglini bir odamdek oʻziga qaratdi, va ular podshoga xabar yuborishdi: “Sen va barcha xizmatkorlaring qaytib kelinglar.”

Podsho qaytib, Iordan daryosiga keldi. Yahudo xalqi esa podshoni kutib olib, uni Iordandan oʻtkazish uchun Gilgalga keldi.

Dovud Shimayga rahm qiladi

Bahurimlik, Benyamin qabilasidan boʻlgan Gera oʻgʻli Shimay Yahudo erkaklari bilan birga Dovud podshoni kutib olish uchun shoshilib tushdi. U bilan birga ming nafar Benyaminlik, hamda Shoul xonadonining xizmatkori Zibo oʻzining oʻn besh oʻgʻli va yigirma xizmatkori bilan bor edi. Ular podshodan oldin Iordanga shoshilib bordilar, podshoning xonadonini oʻtkazish va unga maʼqul boʻlgan ishni qilish uchun kechuvdan oʻtdilar. Gera oʻgʻli Shimay podsho Iordandan oʻtmoqchi boʻlganda, uning oldida yiqildi va dedi: “Iltimos, hazratim, buni menga aybga buyurmang va hazratim podsho Quddusdan chiqib ketgan kuni xizmatkoringiz qilgan gunohni yodingizga olmang. Iltimos, hazratim podsho, buni dilingizga tugmang. Xizmatkoringiz gunoh qilganini biladi. Shuning uchun bugun butun Yusuf xonadonidan birinchi boʻlib, hazratim podshoni kutib olgani keldim.” ^a

Shunda Zeruyo oʻgʻli Abishay dedi: “Otamiz moy surtgan zotni laʼnatlagani uchun Shimay oʻlimga mahkum etilmasligi kerakmi?”

Dovud dedi: “Ey Zeruyo oʻgʻillari, nega ishimga aralashasizlar? Nega bugun menga dushman boʻlmoqchisizlar? Bugun Isroilda biror kishi oʻlimga mahkum etilishi kerakmi? Bugun Isroil ustidan podsho ekanimni bilmaymanmi?” Podsho Shimayga: “Sen oʻlmaysan”, dedi va podsho unga qasam ichdi.

Shoulning nabirasi Mefiboshet podshoni kutib olgani tushib keldi. U podsho ketgan kundan to eson-omon qaytib kelgunicha oyoqlarini parvarish qilmagan, soqolini olmagan va kiyimlarini yuvmagan edi. U podshoni kutib olgani Quddusga yetib kelganda, podsho soʻradi: “Nega men bilan bormading, Mefiboshet?”

U dedi: “Hazratim podsho, xizmatkorim meni aldadi. Xizmatkoringiz: «Eshagimni egarlab, podsho bilan minib boraman», degan edi, chunki xizmatkoringiz oqsoqdir. U hazratim podsho oldida xizmatkoringizga tuhmat qildi. Ammo hazratim podsho Otamizning farishtasiga oʻxshaydi. Oʻzingizga maʼqul boʻlgan ishni qiling. Otamning butun xonadoni hazratim podshodan faqat oʻlimga loyiq edi, shunga qaramay, siz xizmatkoringizni dasturxoningizda ovqatlanadiganlar qatoriga qoʻshdingiz. Podshoga yana iltijo qilishga mening qanday haqqim bor?”

Podsho dedi: “Ishlaring haqida nega yana gapirasan? Men qaror qildim: sen va Zibo yerni boʻlib olasizlar.”

Mefiboshet podshoga dedi: “Hazratim podsho eson-omon uyiga qaytib kelgan ekan, mayli, hammasini oʻzi olsin.”

Giladlik Barzillay podshoni kuzatib qoʻyish uchun Rogelimdan tushib, podsho bilan birga Iordandan oʻtdi. Sakson yoshli, juda keksa boʻlgan Barzillay podsho Maxanayimda turgan paytida uni boqqan edi, chunki u juda badavlat odam edi. Podsho Barzillayga dedi: “Men bilan birga oʻt, men Quddusda seni yonimda saqlab, taʼminlab turaman.”

Barzillay podshoga dedi: “Podsho bilan birga Quddusga chiqishim uchun umrimdan yana qancha yil qoldi? Men bugun sakson yoshdaman. Yaxshini yomondan ajrata olamanmi? Xizmatkoringiz yeb-ichgan narsasining taʼmini sezadimi? Hamon ashula aytuvchi erkagu ayollarning ovozini eshita olamanmi? Nega xizmatkoringiz hazratim podshoga yana yuk boʻlsin? Xizmatkoringiz podsho bilan Iordandan ozgina nariga oʻtib qoʻyadi, xolos. Nega podsho menga bunday katta mukofot bilan evaz qaytarsin? Iltimos, xizmatkoringiz oʻz shahrimga, ota-onamning qabri yoniga qaytib borib, oʻlsin. Ammo mana, xizmatkoringiz Kimham shu yerda; u hazratim podsho bilan birga oʻtsin, siz esa unga oʻzingizga maʼqul boʻlgan ishni qiling.”

Podsho dedi: “Kimham men bilan birga oʻtadi, men unga senga maʼqul boʻlgan ishni qilaman, sen mendan nima soʻrasang, sen uchun shuni bajaraman.”

Butun xalq Iordandan oʻtdi, podsho ham oʻtdi. Podsho Barzillayni oʻpib, unga duoyi fotiha berdi, Barzillay esa oʻz uyiga qaytib ketdi. Podsho Gilgalga oʻtdi, Kimham ham u bilan birga oʻtdi. Butun Yahudo xalqi va Isroilning yarmi podshoni kuzatib bordi.

Shunda barcha Isroil erkaklari podsho oldiga kelib soʻradilar: “Nega birodarlarimiz — Yahudo erkaklari sizni oʻgʻirlab olib, podsho bilan uning xonadonini, Dovudning barcha odamlari bilan birga Iordandan oʻtkazib qoʻyishdi?”

Barcha Yahudo erkaklari Isroil erkaklariga javob berdilar: “Podsho bizning yaqin qarindoshimiz. Nega bundan gʻazablanyapsizlar? Biz podshoning taomidan yeganmizmi yoki u bizga biror sovgʻa berganmi?”

Isroil erkaklari Yahudo erkaklariga javob berdilar: “Bizning podshoda oʻn ulushimiz bor, Dovudga boʻlgan haqqimiz ham sizlarnikidan kattaroq. Xoʻsh, nega bizni mensimadingizlar? Oʻz podshomizni qaytarib keltirish haqida birinchi boʻlib biz gapirmaganmidik?” Ammo Yahudo erkaklarining gaplari Isroil erkaklarinikidan ham qattiqroq edi.