2ይ ሳሙኤል 19 FHB Father's Heart Bible™

19 ¹ናብ ኢዮኣብ ድማ “እንሆ፥ ንጉስ ይበኪ ኣሎ፥ ብዛዕባ ኣቤሴሎም ከዓ ይሓዝን ኣሎ” ኢሉ ተነግሮ። ²በታ መዓልቲ እቲኣ ኸዓ እቲ ዓወት ንዅሉ እቲ ህዝቢ ሓዘን ኮነ፤ በታ መዓልቲ እቲኣ “ንጉስ ብዛዕባ ወዱ ይሓዝን ኣሎ” ዝብል ስለ ዝሰምዑ እዩ።

³እቶም ህዝቢ በታ መዓልቲ እቲኣ ከምቶም ካብ ውግእ ሃዲሞም ዝሓፈሩ፥ ሕሹኽ እናበሉ ናብታ ኸተማ ቀስ ኢሎም ኣተዉ። ⁴ንጉስ ድማ ገፁ ኸዲኑ፥ ዓው ኢሉ “ወደይ ኣቤሴሎም! ኣቤሴሎም፥ ወደይ፥ ወደይ!” እናበለ በኸየ።

⁵ኢዮኣብ ድማ ናብ ንጉስ መፀ እሞ ከምዙይ በሎ፦ “ሎሚ ንህይወትካን ህይወት ኣወዳትካን ኣጓላትካን፥ ህይወት ኣንስትኻን ኣንስቲ ወሰንካን ዘድሓኑ ኵሎም ሓሻኽርካ ሎሚ ኣሕፈርካዮም፤ ⁶ነቶም ዝፀልኡኻ ብምፍቃር፥ ነቶም ዘፍቅሩኻ ኸዓ ብምፅላእ። ሎሚ መኳንንትን ሓሻኽርን ዋጋ ከም ዘይብሎም ኣርኢኻ ኣለኻ። ኣቤሴሎም ብህይወቱ እንተ ዝነብር፥ ኵላትና ኸዓ እንተ ንመውት፥ ከም እትሕጐስ ሕዚ ፈሊጠ ኣለኹ። ⁷ሕዚ ኸዓ ተሲእኻ ውፃእ፥ ንሓሻኽርካ ድማ ፅቡቕ ቃል ተዛረቦም። እንተ ዘይወፂእኻ ሎሚ ለይቲ ሓደ ሰብኣይ እኳ ምሳኻ ኸም ዘይሓድር፥ እዙይ ከዓ ካብቲ ኻብ ንእስነትካ ኣትሒዙ ዝወረደ ዅሉ መከራ ዝገደደ ኸም ዝኸውን፥ ብኣቦና እምሕለልካ ኣለኹ” በሎ።

ዳዊት ናብ ህዝቡ ተመለሰ

⁸ሽዑ ንጉስ ተሲኡ ኣብ ደገ ተቐመጠ። ንዅሉ እቲ ህዝቢ ድማ “እንሆ፥ ንጉስ ኣብ ደገ ተቐሚጡ ኣሎ” ኢሎም ምስ ነገርዎም፥ ኵሎም ናብ ቅድሚኡ መፁ። ሰብ እስራኤል ድማ ነፍሲ ወከፍ ናብ ገዝኡ ሃዲሙ ነበረ። ⁹ኣብ ኵሎም ነገዳት እስራኤል ድማ እቶም ህዝቢ ኸምዙይ እናበሉ ተኻራኸሩ፦ “ንጉስ ካብ ፀላእትና ኣድሓነና፥ ካብ ኢድ ፍልስጥኤማውያን ከዓ ኣናገፈና፤ ሕዚ ግና ብምኽንያት ኣቤሴሎም ካብ ሃገር ሃዲሙ። ¹⁰ኣቤሴሎም ግና እቲ ኽገዝኣና ዝቐባእናዮ፥ ኣብ ውግእ ሞተ። ስለዙይ ንጉስ ምእንቲ ኽምለስ ስለ ምንታይ ሱቕ ኢልኩም?”

¹¹ንጉስ ዳዊት ድማ ናብ ሳዶቅን ኣብያታርን ካህናት ለኣኸ እሞ ከምዙይ በለ፦ “ንዓበይቲ ይሁዳ ኸምዙይ በልዎም፦ ‘ቃል ኵሉ እስራኤል ናብ ንጉስ ኣብ ገዛኡ ኣብ ዝበፅሐሉስ፥ ንስኻትኩም ንጉስ ናብ ገዛኡ ኽትመልስዎ ስለ ምንታይ ዳሕረዎት ትኾኑ?’ ¹²ንስኻትኩም ኣሕዋተይ፥ ዓፅመይን ስጋይን ኢኹም። እሞ ንጉስ ብምምላስ ስለ ምንታይ ዳሕረዎት ትኾኑ? ¹³ንኣሜሳይ ድማ ‘ንስኻ ዓፅመይን ስጋይን ዲኻ ዘይኴንካ? ኣብ ክንዲ ኢዮኣብ ንሓዋሩ ሓለቓ ሰራዊተይ እንተ ዘይኮይንካ፥ ኣቦና ከምዙይ ይግበረኒ፥ ካብዙይ ዝበዝሐ ድማ ይውሰኸለይ’ በልዎ።” ¹⁴ዳዊት ድማ ንልቢ ኵሎም ሰብ ይሁዳ ኸም ሰብ ሓደ ገይሩ ኣዘንበሎ፤ ናብ ንጉስ ድማ “ንስኻን ኵሎም ሓሻኽርካን ተመለሱ” ዝብል መልእኽቲ ሰደዱ።

¹⁵ንጉስ ድማ ተመሊሱ ናብ ዮርዳኖስ መፀ፤ ይሁዳ ኸዓ ንንጉስ ክቕበልዎን ንዮርዳኖስ ከሳግርዎን ናብ ጊልጋል መፁ።

ዳዊት ንሳሚ ምሕረት ገበረሉ

¹⁶ሳሚ ወዲ ጌራ ብንያማዊ፥ በዓል ብራቂም፥ ንጉስ ዳዊት ክቕበል ምስ ሰብ ይሁዳ ቀልጢፉ ወረደ። ¹⁷ምስኡ ድማ ሽሕ ሰብ ብንያምን ሲባ ኣገልጋሊ ቤት ሳኦልን ምስ ዓሰርተን ሓሙሽተን ደቁን ዕስራ ሓሻኽሩን ነበሩ። ቀቅድሚ ንጉስ ድማ ናብ ዮርዳኖስ ቀልጢፎም ወረዱ፤ ¹⁸ቤተ ሰብ ንጉስ ከሳግሩ፥ ባህ ዘብሎውን ኽገብሩ ኢሎም ነቲ መሰጋገሪ ተሳገሩ። ሳሚ ወዲ ጌራ ድማ፥ ንጉስ ንዮርዳኖስ ክሳገር ምስ ቀረበ፥ ኣብ ቅድሚኡ ወደቐ፤ ¹⁹ከምዙይ ከዓ በለ፦ “ጐይታይ፥ በይዛኻ፥ ኣበሳ ኣይትሕዘለይ፤ እቲ ጐይታይ ንጉስ ካብ ኢየሩሳሌም ዝወፀላ መዓልቲ፥ ሓሽከርካ ዝበደለ ኣይትዘክሮ። ኦ ጐይታይ ንጉስ፥ ኣብ ልብኻ ኣይተእትዎ። ²⁰ሓሽከርካ ኸም ዝሓጣእኩ እፈልጥ ኣለኹ፤ ስለዙይ ካብ ኵሉ ቤት ዮሴፍ ፈላማይ ኮይነ፥ ንጐይታይ ንጉስ ክቕበል ሎሚ መፂአ ኣለኹ” በለ። ^a a v20 እቲ “ቤት ዮሴፍ” ዝብል፥ ነቶም ካብ ደቂ ዮሴፍ ካብ ኤፍሬምን ምናሴን ዝወፁ ሰሜናይ ነገዳት እስራኤል ዘመልክት እዩ።

²¹ሽዑ ኣቢሳይ ወዲ ፀሩያ “ሳሚ ንቅቡእ ኣቦና ስለ ዝረገመ፥ ክመውትዶ ኣይግብኦን?” በለ።

²²ዳዊት ድማ “ኣቱም ደቂ ፀሩያ፥ ምሳይ እንታይ ኣለኩም? ሎሚ ፀላእተይ ስለ ምንታይ ትኾኑ? ሎሚ ኣብ እስራኤል ሓደ ሰብ ድዩ ዝመውት? ሎሚ ኣብ ልዕሊ እስራኤል ንጉስ ምዃነይዶ ኣይፈልጥን እየ?” በለ። ²³ንጉስ ድማ ንሳሚ “ኣይትመውትን ኢኻ” በሎ፤ ንጉስ ከዓ መሓለሉ።

²⁴ሜምፊቦስቴ ወዲ ወዲ ሳኦል ድማ ንጉስ ክቕበል ወረደ። ንሱ ኻብታ ንጉስ ዝኸደላ መዓልቲ ኽሳዕ እታ ብደሓን ዝተመለሰላ መዓልቲ፥ ኣእጋሩ ኣይተኸናኸነን፥ ፅሕሙ ኣይቆረፀን፥ ክዳውንቱውን ኣይሓፀበን ነበረ። ²⁵ንጉስ ክቕበል ናብ ኢየሩሳሌም ምስ መፀ፥ ንጉስ “ኦ ሜምፊቦስቴ፥ ስለ ምንታይ ምሳይ ዘይከድካ?” ኢሉ ጠየቖ።

²⁶ንሱ ድማ ከምዙይ በለ፦ “ጐይታይ ንጉስ፥ ኣገልጋሊየይ ኣታሊሉኒ። ሓሽከርካ ‘ኣድገይ ፀይነ ተወጢሐ ምስ ንጉስ ክኸይድ’ ኢሉ ነበረ፤ ሓሽከርካ ሓንካስ እዩ እሞ። ²⁷ንሱ ኸዓ ንሓሽከርካ ናብ ጐይታይ ንጉስ ሐመዮ። ጐይታይ ንጉስ ግና ከም መልኣኽ ኣቦና እዩ፤ ዝፅብቐካ ግበር። ²⁸ኵሉ ቤት ኣቦይ ኣብ ቅድሚ ጐይታይ ንጉስ ሞት እምበር ካልእ ኣይግብኦን ነበረ፤ ንስኻ ግና ንሓሽከርካ ምስቶም ኣብ ማእድኻ ዝበልዑ ኣቐመጥካኒ። እሞ ደጊም ናብ ንጉስ ክጠርዕ እንታይ መሰል ኣለኒ?”

²⁹ንጉስ ድማ “ብዛዕባ ነገርካ ደጊምከ ስለ ምንታይ ትዛረብ? ንስኻን ሲባን ነቲ መሬት ክትማቐልዎ ወሲነ ኣለኹ” በሎ።

³⁰ሜምፊቦስቴ ድማ ንንጉስ “ጐይታይ ንጉስ ብደሓን ናብ ገዛኡ መፂኡ ኣሎ እሞ፥ ንሱ ዅሉ ይውሰዶ” በሎ።

³¹ቤርዜሊ ገለዓዳዊ ድማ ካብ ሮግሊም ወረደ፤ ንንጉስ ከፋንዎ ኸዓ ምስኡ ንዮርዳኖስ ተሳገረ። ³²ቤርዜሊ ኸዓ የመና ኣሪጉ ወዲ ሰማንያ ዓመት ነበረ፤ ንጉስ ኣብ ማሃናይም ኣብ ዝተቐመጠሉ ጊዜ ይምግቦ ነበረ፤ ንሱ የመና ሃብታም ሰብኣይ ነበረ እሞ። ³³ንጉስ ድማ ንቤርዜሊ “ምሳይ ተሳገር፤ ኣብ ኢየሩሳሌም ኣብ ጥቓይ ክቕልበካ እየ” በሎ።

³⁴ቤርዜሊ ድማ ንንጉስ ከምዙይ በሎ፦ “ምስ ንጉስ ናብ ኢየሩሳሌም ክድይብ፥ ክንደይ ዓመት ዕድመ ተሪፉኒ እዩ? ³⁵ሎሚ ወዲ ሰማንያ ዓመት እየ። ፅቡቕን ክፉእንዶ ክፈሊ እኽእል እየ? ሓሽከርካ ዝበልዖን ዝሰትዮንዶ ይምቅሮ እዩ? ድሃይ ደረፍቲ ሰብኡትን ኣንስትንዶ ገና ይሰምዕ እየ? እሞ ሓሽከርካ ንጐይታይ ንጉስ ስለ ምንታይ ደጊም ይኸብዶ? ³⁶ሓሽከርካ ምስ ንጉስ ንዮርዳኖስ ቑሩብ ጥራሕ ክሳገር እየ። ንጉስ ስለ ምንታይ ከምዙይ ዝበለ ዓስቢ ይፈድየኒ? ³⁷በይዛኻ፥ ሓሽከርካ ኣብ ጥቓ መቓብር ኣቦይን እኖይን ኣብ ዓደይ ክመውት ይመለስ። እንሆ ኸዓ ሓሽከርካ ኪምሃም ኣሎ፤ ንሱ ምስ ጐይታይ ንጉስ ይሳገር፤ ዝፅብቐካ ኸዓ ግበረሉ” በለ።

³⁸ንጉስ ድማ “ኪምሃም ምሳይ ክሳገር እዩ፤ እቲ ዘሐጒሰካ ኸዓ ክገብረሉ እየ፤ ካባይ እትደልዮ ዅሉ ድማ ክገብረልካ እየ” በለ።

³⁹ኵሉ እቲ ህዝቢ ድማ ንዮርዳኖስ ተሳገረ፤ ንጉስውን ተሳገረ። ንጉስ ከዓ ንቤርዜሊ ሰዓሞ መረቖውን፤ ቤርዜሊ ድማ ናብ ገዛኡ ተመለሰ። ⁴⁰ንጉስ ድማ ናብ ጊልጋል ተሳገረ፤ ኪምሃም ከዓ ምስኡ ነበረ። ኵሉ ህዝቢ ይሁዳን ፍርቂ ህዝቢ እስራኤልን ድማ ንንጉስ ኣፋነውዎ።

⁴¹ሽዑ ኵሎም ሰብ እስራኤል ናብ ንጉስ መፁ እሞ፥ “ስለ ምንታይ ኣሕዋትና ሰብ ይሁዳ ሰሪቖም፥ ንንጉስን ንቤተ ሰቡን ምስ ኵሎም ሰብ ዳዊት ንዮርዳኖስ ኣሳገርዎ?” በልዎ።

⁴²ኵሎም ሰብ ይሁዳ ድማ ንሰብ እስራኤል “እቲ ንጉስ ቀረባ ዘመድና እዩ። ስለ ምንታይ በዝ ነገር እዙይ ትዀርዩ? ካብ ብልዒ እቲ ንጉስዶ ገለ በሊዕና ኢና? ወይ ህያብዶ ሂቡና?” ኢሎም መለሱሎም።

⁴³ሰብ እስራኤል ድማ ንሰብ ይሁዳ “ኣብ ንጉስ ዓሰርተ ግደ ኣለና፤ ኣብ ዳዊትውን ካባኻትኩም ዝበዝሐ መሰል ኣለና። እምበኣር ስለ ምንታይ ንዒቕኩምና? ንሕና ንጉስና ክንመልሶ ቐዲምና ዝተዛረብናዶ ኣይኮንናን?” ኢሎም መለሱሎም። ግና ዘረባ ሰብ ይሁዳ ካብ ዘረባ ሰብ እስራኤል ዝገደደ ነበረ።