2 Samuel 19 FHB Father's Heart Bible™

19 ¹Joab ke khobor punchise, “Sabi, raja tu Absalom nimite kandi ase aru shok kori ase.” ²Etu nimite hei din te jeet tu sob manuh khan nimite shok hoi jaise, kilemane hei din te tarkhan pora hunise, “Raja tu nijor putro nimite shok kori ase.”

³Hei din te manuh khan sheher bhitor te chup-chap pora ghusi ahhise, juddho pora polai kene sorom pai lukai ja khan nisena. ⁴Raja tu nijor mukh dhaki kene, jor pora kandise, “Moi laga putro Absalom! Absalom, moi laga putro, moi laga putro!”

⁵Joab raja logot ahhi kene koise, “Aji apuni nijor sob noukar khan ke sorom khuwaise, kun khan pora aji apuni laga jivon, apuni laga putro aru chukri khan laga jivon, aru apuni laga maiki khan aru dusra maiki khan laga jivon bachaise, ⁶apuni ke ghin kora khan ke morom kori kene aru apuni ke morom kora khan ke ghin kori kene. Aji apuni dikhai dise, senapoti khan aru noukar khan apuni nimite eku nohoi. Etiya moi jani jaise, jodi Absalom jinda thakise aru amikhan sob mori jaise, tene hole apuni khushi hobole thakise. ⁷Etiya uthibi, bahar jabi, aru apuni laga noukar khan ke morom laga kotha kobi. Moi amar Pitri laga naam pora kosom khai ase, jodi apuni bahar najai, tene hole aji rati ekjon manuh bhi apuni logot nathakibo—eitu apuni laga jawaani pora loi kene aha sob dukh pora bhi bisi kharap hobo.”

David nijor manuh khan logot ghurai ahhise

⁸Etu nimite raja tu uthi kene dorja te bohise. Jitia manuh khan ke koise, “Sabi, raja tu dorja te bohi ase,” tetiya tarkhan sob raja laga samne ahhise. Etiya Israel manuh khan polai jaise, sob jon nijor ghor te. ⁹Israel laga sob jati khan majot te manuh khan jhagara korise, “Raja pora amikhan ke amikhan laga dushman khan pora bachaise, Philistine khan laga haat pora amikhan ke udhar korise, kintu etiya tai Absalom nimite desh pora polai jaise. ¹⁰Kintu Absalom, kun ke amikhan pora amikhan uporte raj koribole abhishek korise, tai juddho te mori jaise. Tene hole raja ke wapas anibole kilemane kun bhi eku nakoi?”

¹¹David raja pora Zadok aru Abiathar purohit khan ke khobor pathaise, “Judah laga bura manuh khan ke kobi, ‘Jitia sob Israel laga kotha raja laga ghor te punchise, tene hole raja ke tar ghor te wapas anibole tumikhan kilemane sob pora piche hobo?’ ¹²Tumikhan moi laga bhai khan ase, moi laga nijor gau-mangso aru khoon ase. Tene hole raja ke wapas anibole tumikhan kilemane sob pora piche hobo? ¹³Amasa ke kobi, ‘Tumi moi laga nijor gau-mangso aru khoon nohoi na? Jodi tumi Joab laga jagate moi laga hodai nimite senapoti nahoi, tene hole amar Pitri pora moi ke eitu koribi aru iman pora bhi bisi koribi.’” ¹⁴David pora Judah laga sob manuh khan laga mon ekjon manuh nisena jiti loise, aru tarkhan pora raja ke khobor pathaise, “Wapas ahhibi, apuni aru apuni laga sob noukar khan.”

¹⁵Raja tu wapas ahhi kene Jordan te punchise; Judah manuh khan raja ke lok pabole aru tai ke Jordan paar kori dibole Gilgal te ahhise.

David pora Shimei ke doya dikhaise

¹⁶Bahurim pora aha Benjamin jati laga Gera laga putro Shimei, David raja ke lok pabole Judah laga manuh khan logot joldi namikena ahhise. ¹⁷Tar logot te 1,000 Benjamin manuh khan thakise, aru Saul laga ghor laga noukar Ziba, tar pondro putro aru bees noukar logot. Tarkhan raja laga age te Jordan phale joldi ahhise, ¹⁸aru raja laga ghor manuh khan ke paar kori anibole aru tai ke ki bhal lage eitu koribole, taikhan nodi laga halka jagate paar hoise. Gera laga putro Shimei tu, raja Jordan paar koribole thaka somoite, raja laga samne te giri jaise, ¹⁹aru koise, “Moi laga probhu, moi ke etu laga golti nadhoribi, aru moi laga probhu raja Jerusalem pora ula din te apuni laga noukar pora kineka golti korise eitu nabhabibi. Moi laga probhu raja, mon te eitu nalobi. ²⁰Apuni laga noukar moi paap korise koi kene jane. Etu nimite aji moi Joseph laga ghor pora sob pora age te, moi laga probhu raja ke lok pabole ahhise.” ^a a v20 ‘Joseph laga ghor’ mane Israel laga uttor phale laga jati khan ke koi ase, kun khan Joseph laga putro Ephraim aru Manasseh pora ahhise.

²¹Tetiya Zeruiah laga putro Abishai pora koise, “Shimei pora amar Pitri laga abhishek kora jon ke shrap diya nimite tai ke morai dibo nalage na?”

²²David pora koise, “Zeruiah laga putro khan, tumikhan kilemane moi logot te ghusi ahise? Aji tumikhan kilemane moi laga dushman hobo? Aji Israel te kunba ke morai dibo lage na? Aji moi Israel uporte raja ase koi kene moi najane na?” ²³Raja pora Shimei ke koise, “Tumi namoribo,” aru raja pora tar logot kosom khaise.

²⁴Saul laga nati Mephibosheth tu raja ke lok pabole namikena ahhise. Raja ula din pora loi kene tai bhal pora wapas naha tak, tai nijor theng sapha kora nai, nijor dari kata nai, aru nijor kapra bhi dhua nai. ²⁵Jitia tai raja ke lok pabole Jerusalem punchise, tetiya raja pora hudise, “Mephibosheth, tumi kilemane moi logot naja?”

²⁶Tai koise, “Moi laga probhu raja, moi laga noukar pora moi ke thogaise. Apuni laga noukar pora koise, ‘Moi nijor gadha te jin bandhi kene raja logot uthibo,’ kilemane apuni laga noukar lengra ase. ²⁷Tai pora apuni laga noukar ke moi laga probhu raja laga age te ninda korise. Kintu moi laga probhu raja amar Pitri laga sorgodoot nisena ase; apuni ke ki bhal lage eitu koribi. ²⁸Moi laga baba laga sob ghor moi laga probhu raja pora khali mrityu he pabole thakise, hoilebi apuni pora apuni laga noukar ke apuni laga mez te kha khan majot te rakhise. Tene hole raja logot aru kiba mangibole moi laga ki adhikar ase?”

²⁹Raja pora koise, “Tumi laga kotha aru kilemane kobo? Moi faisla kori loise: tumi aru Ziba pora mati bhag kori lobo.”

³⁰Mephibosheth pora raja ke koise, “Etiya moi laga probhu raja bhal pora ghor wapas ahhise, tai ke eitu sob loi lobole dibi.”

³¹Gilead jati laga Barzillai tu Rogelim pora namikena, raja ke bidai dibole raja logot Jordan paar hoise. ³²Barzillai tu bisi bura, assi saal laga thakise, aru raja Mahanaim te thaka somoite tai pora raja ke kha-luwa dise, kilemane tai bisi dhuni manuh thakise. ³³Raja pora Barzillai ke koise, “Moi logot paar hoi ahhibi, aru moi Jerusalem te moi laga usorte tumi ke sob di thakibo.”

³⁴Barzillai pora raja ke koise, “Moi raja logot Jerusalem te jabole, moi laga aru kiman saal baki ase? ³⁵Aji moi assi saal hoise. Bhal aru kharap moi alag koribo pare na? Apuni laga noukar ki kha aru piye eitu laga swad moi lobo pare na? Gana kora mota aru maiki khan laga awaj moi etiya bhi hunibo pare na? Apuni laga noukar pora kilemane moi laga probhu raja ke aru bhar dibo? ³⁶Apuni laga noukar raja logot Jordan olop dur he paar hobo. Raja pora kilemane moi ke eneka inam pora wapas dibo? ³⁷Apuni laga noukar ke nijor sheher te, moi laga baba aru ama laga koboror usorte mori jabole, wapas jabole dibi. Kintu apuni laga noukar Chimham yate ase; tai ke moi laga probhu raja logot paar hoi jabole dibi, aru tai nimite apuni ke ki bhal lage eitu koribi.”

³⁸Raja pora koise, “Chimham moi logot paar hobo, aru tai nimite tumi ke ki bhal lage eitu moi koribo, aru tumi moi logot ki mangibo eitu sob moi tumi nimite koribo.”

³⁹Sob manuh khan Jordan paar hoise, aru raja bhi paar hoise. Raja pora Barzillai ke chuma dise aru tai ke asirbad dise, aru Barzillai nijor ghor wapas jaise. ⁴⁰Raja Gilgal te paar hoi jaise, Chimham tar logot. Judah laga sob manuh khan, aru Israel laga adha manuh khan pora raja ke loi jaise.

⁴¹Tetiya Israel laga sob manuh khan raja logot ahhi kene hudise, “Amar bhai khan, Judah laga manuh khan, kilemane apuni ke chukikena loi jaise aru raja aru tar ghor manuh khan ke, David laga sob manuh khan logot, Jordan paar kori anise?”

⁴²Judah laga sob manuh khan pora Israel laga manuh khan ke jawab dise, “Raja tu amikhan laga usor ghor manuh ase. Tumikhan kilemane eitu nimite khong uthi ase? Amikhan raja laga kha luwa kiba khaise na, nahole tai pora amikhan ke kiba inam dise na?”

⁴³Israel laga manuh khan pora Judah laga manuh khan ke jawab dise, “Amikhan laga raja uporte dosta bhag ase, aru David uporte tumikhan pora bhi bisi amikhan laga haq ase. Tene hole tumikhan kilemane amikhan ke hela korise? Amar raja ke wapas anibole age te kowa amikhan nohoi na?” Kintu Judah laga kotha tu Israel laga kotha pora bhi bisi tez thakise.