Seba Wáhakuka kwena Kyamvu
Seba wáhúmuna phungi amana bikanda bya ku nodi bávutuka. Yowabi wáhonda Amasa ni mbedi yaswekama muna nzila, buna wázingidya Abela. Mukhetu wa ngangu wábokila ha thandu ya kibaka, wáhyula kikuma kya biki kazola kumina swana kya Tata wetu, amana wásila ni baheka mutwa wumosi mu kifulu kya mbanza yosu.
20 1Mutu mosi wakonda mupfunu, khumbu yandi Seba, mwana wa Bikili, mwisi Benyamini, wákala hana. Wáhúmuna phungi amana wábokila: «Tweku homa mwena Tavidi, tweku kimvwama mwena mwana wa Yese! Kosu mutu kwena masombolu menu, benu Kiseledi!»
2Buna bayakala boosu ba Kiseledi bámusisa Tavidi mu kulanda Seba, mwana wa Bikili; kaasi bayakala ba Yuta básimbidila kyamvu wa bawu, tukidila ku Yolutani kuna Yelusalemi.
3Tavidi wátula kuna nzu yandi ku Yelusalemi, amana kyamvu wábonga bakhetu kumi bana kásisa mu kutala nzu, amana wábasya mu nzu ya boloku. Wábavwa bima byosu kaasi kanimbaku yi bawu. Bánanga bakangama nate bafwa, bazinga hanga bafwidi.
4Kyamvu wuzimbudi kwena Amasa: «Tedisa bayakala ba Yuta kwena meni muna bilumbu bitatu, amana ngeyi-meni kala haha.»
5Amasa wenda mu kutela Yuta, kaasi wázyeta kuluta tangwa dina kámuzengila kyamvu. 6Tavidi wuzimbudi kwena Abisayi: «Seba, mwana wa Bikili, kakála kutunatina phasi kuluta Abesalomi. Bonga bayakala ba pfumu waku amana mutsyakula, kaasi keti katula ku mbanza za zyamisa amana katina.»
7Buna bayakala ba Yowabi, Bakeleti, Bapeleti, yi baphumbulu boosu ba ngolu bálubuka kunima dya yandi, tukidila ku Yelusalemi mu kutsyakula Seba, mwana wa Bikili. 8Hana ditadi dya mbuta ku Ngibeyoni, Amasa wábatundakana. Yowabi wávwata muledi wandi wa mvita, amana wákasa mbedi ya phoku, yakala mu kilalu, muna mbunda; buna kábwesuka ku thwala, yábwa. 9Yowabi wuzimbudi kwena Amasa: «Wenina mboti, mphangi wama?» Ni koku dyandi dya kitata, Yowabi wusimbi mwevu wa Amasa mu kumuhana mboti. 10Amasa kámonaku mbedi ya phoku yakala mu koku dya Yowabi. Yowabi wámubeta mu vumu, amana mala mandi mábwa ha tsi. Konda kumubeta mbala ya zodi, Amasa wafwa. Amana Yowabi yi mphangi wandi Abisayi bátsyakula Seba, mwana wa Bikili. 11Mosi muna bana bayakala ba Yowabi wátelama bela-bela yi Amasa amana wuzimbudi: «Wuna wisi zola Yowabi, wuna kenina kwena Tavidi, kalánda Yowabi!» 12Amasa walambalala mu menga mandi hana kati-kati dya nzila. Buna mutu wuna kámona ni baphumbulu boosu bakala telama hana, wákoka Amasa, wámukatula mu nzila, wámutula ku bilanga, amana wámufidinga ni muledi, mukuma kosu mutu wuna wisa vyoka, kakala telama. 13Kunima dya kumukatula mu nzila, bayakala boosu bálanda Yowabi mu kutsyakula Seba, mwana wa Bikili. 14Seba wávyoka muna bikanda byosu bya Kiseledi nate ku Abeli ya Beti-Maaka; bisi Bikili boosu bákutakana amana bámulanda phi. 15Bawu bisa amana bámuzyungila ku Abeli ya Beti-Maaka. Bátunga mbata ya mafu ku thwala ya mbanza, yakala telama ku kibaka kya luphangu lwa ku phenza, buna baphumbulu boosu ba Yowabi bakala tuningisa kibaka ndangu kyabwa.
16Amana nkhetu mosi wa diela wábokila tukidila mu mbanza: «Luyuka! Luyuka! Luzimbwala kwena Yowabi: “Awisa kwaku haha, ndangu yizonza yi ngeyi.”» 17Buna kábwesuka, nkhetu wámuhyula: «Ngeyi Yowabi?» Wuzimbudi: «Yenina.» Wuzimbudi: «Yuka mambu ma musadi waku.» Wuzimbudi: «Yenina kuyuka.»
18Wuzimbudi: «Muna bilumbu bya khulu, bakala zimbulaka: “Lomba kaka dibanza ku Abeli”, amana dyambu dina dyázengama. 19Meni yenina ha kati dya batu ba ngemba yi ba kyedika mu Kiseledi. Ngeyi wisi zola kuzanga mbanza, ngudi mu Kiseledi. Kikuma kya biki wisi mina kimvwama kya Tata wetu?» a a v19 «Mbanza ngudi» yákala mbanza ya mbuta ya kinzunga, yina mahata ma khunda makala singamina mu kutambula dibanza yi lutaninu.
20Yowabi wávutula: «Nkatu, nkatu! Ka yilendaku ku mina ho ku zanga! 21Dyambu dyeku bwabuna. Kaasi Seba, mwana wa Bikili, wisi muna malondi ma Efwayimi, wáhakuka kwena kyamvu, kwena Tavidi. Hana mutu yandu mosi, amana yakatuka ku mbanza.» Nkhetu wuzimbudi kwena Yowabi: «Ntu wandi bakalósa kwena ngeyi, ha thandu ya kibaka.»
22Nkhetu wenda kwena batu boosu ni lukanu lwandi lwa diela. Bázenga ntu wa Seba, mwana wa Bikili, amana bálosa wawu kwena Yowabi. Wáhúmuna phungi, amana bámwangana tukidila mu mbanza, kosu mutu kuna nzu yandi. Yowabi wávutuka kwena kyamvu ku Yelusalemi.
23Yowabi wákala pfumu wa kibuka kyosu kya mvita kya Kiseledi; Benaya, mwana wa Yoyada, wákala pfumu wa Bakeleti yi Bapeleti. 24Adolami wákala pfumu wa kisalu kya kingolu-ngolu; Yosafati, mwana wa Akiludi, wákala musonini wa mambu; 25Seva wákala musoniki wa mikanda; amana Satoki yi Abyatadi bákala banganga Nzambi; 26Amana Ila, mwisi Yayiri, wákala phi nganga Nzambi wa Tavidi.
