Tavidi Wafuta Nkanu wa Menga ma Sawulu
Tavidi wáhyula Tata wetu kikuma kya nzala ya mvula tatu, amana bámuzimbula mambu ma Sawulu kuhonda bisi Ngabeyoni; batu nsambwadi ba butuka dyandi bákhokwa. Lisipa wákeba mivimbi mya bawu kwena zinuni yi bibulu tii yi kuna mvula yisa; Tavidi wábazika hakimosi yi mavesi ma Sawulu. Buna mutu wunene wa Bafilisiti kuna kamuhonda.
Tata wetu kisi zonza mu vese 1
21 1Nzala yákala muna bilumbu bya Tavidi mu mvula tatu, mvula ha mvula; buna Tavidi wáhyula Tata wetu kikuma kyakina. Amana Tata wetu wuzimbudi: «Sawulu yi nzu yandi benina yi nkanu wa menga, mukuma yandi káhonda bisi Ngabeyoni.»
2Buna kinga wátedisa bisi Ngabeyoni amana wábazimbwala. (Bisi Ngabeyoni bákalaku bisi Kiseledi, kaasi ndambu ya bisi Amoli; Kiseledi kádya ndefi mu kubahawula, kaasi Sawulu, wuna wakala zakama mu Kiseledi yi Yuta, wákala sanda mu kubahonda.) 3Tavidi wábahyula bisi Ngabeyoni: «Biki yilenda kuluhangila? Abweti yilenda futa hanga lusakumuna batu ba Tata wetu?»
4Bisi Ngabeyoni bamuvutwadini: «Heku fwalanga ho wolu ha kati dya betu yi Sawulu ho nzu yandi, amana twisiku yi lukumu lwa kuhonda mutu mu Kiseledi.» Tavidi wuzimbudi: «Kina lwazímbula, yikúluhangila.»
5Bamuzimbwadini kinga: «Mutu wuna wátuzimbisa amana wátukasila lukanu lwa kuzangana kwetu, hanga twakalaku yi buangu konda mu mulambu wosu wa Kiseledi, 6bana batu nsambwadi ba butuka dyandi bahekwa kwena betu, amana betu tukábakhoka ha thwala ya Pfumu ku Ngabeya ya Sawulu, wuna wásolama kwena Pfumu.» Kinga wuzimbudi: «Yíbaheka.»
7Kaasi kinga wáhawula Mefiboseti, mwana Yonatani, mwana Sawulu, kikuma kya ndefi ya ha thwala ya Tata wetu ha kati dya Tavidi yi Yonatani, mwana Sawulu. 8Kaasi kinga wábonga Alimoni yi Mefiboseti, bana bodi bana kabutila Lisipa, mwana wa Aya, kwena Sawulu, hakimosi yi bana batanu bana kabutila Melabi, mwana wa Sawulu, kwena Adiliyeli, mwana Balizilayi mwisi Meyolati. 9Wábaheka kwena bisi Ngabeyoni, bana bákhoka ha mongu ha thwala ya Tata wetu; bana nsambwadi bábwa kumosi. Báhondolo muna bilumbu bya theti bya kuvela, muna tangwa dyayandiki kuvela odizi.
10Amana Lisipa, mwana wa Aya, wábonga tsaki amana wáyalumuna ha tadi, tukidila luyandiku lwa kuvela tii yi mvula wánoka ha mvumbi; muna muini yakala kebila banuni mu kubasisa, muna phipha bambisi ba mu tseki. a a v10 Tsaki yákala muledi wa mbi wa phipha, wuna bakala vwata kadila kidimbu kya kumonika kya kyadi yi phasi za mbundu. 11Bwosu Tavidi kázimbwadilwa mana káhanga Lisipa, mwana wa Aya, mukhetu wa Sawulu, 12wenda kwena batu ba Yabesi-Ngileyadi amana wábonga mifufwa mya Sawulu yi mya mwana wandi Yonatani, mina bákatula mu kitsweki ku buangu bwa mbanza ya Betesani, kuna bisi Filisiti bákhoka muna kilumbu kina báhonda Sawulu ku Ngiluboya. 13Wátombula mifufwa mya Sawulu yi mifufwa mya mwana wandi Yonatani tuka kuna, amana bátonguna mifufwa mya batu bana bákhoka. 14Bázika mifufwa mya Sawulu yi mya mwana wandi Yonatani ku Zela mu mulambu wa Benzyame, muna dizyamu dya tata wandi Kisi, amana bahanga mana moosu kásenda kinga. Kunima dya bwabuna, Tata wetu wáyuka bisambu kikuma kya tsi.
Bakesa ba Tavidi Babedisa Batu Bambuta ba Bisi Filisiti
15Mbala yikwawu mvita yákala ha kati dya bisi Filisiti yi Kiseledi. Tavidi wátuluka hakimosi yi basadi bandi mu kunwana yi bisi Filisiti, amana wálembwa. 16Isibi-benobi, mwana wa butuka dya Lafa, wuna tsongi ya ngumba yandi ya kyobula yazitika kitesu kya kilo tatu, amana wuna wavwata mbedi ya pha, wákala zola kuhonda Tavidi. b b v16 Lafa kákala nkaka wa kanda dya bakesa ba lawu ba kinana — batu bambuta bana bakala nwana ha kati dya bisi Filisiti. 17Kaasi Abisayi, mwana Seluya, wisa sadisa Tavidi, wábeta mwisi Filisiti amana wámuhonda. Buna batu ba Tavidi bádya ndefi kwena yandi: «Kuvutukaku hika kwenda yi betu ku mvita, ndangu kuzima mwinda wa Kiseledi.»
18Kunima mvita yikwawu yákala yi bisi Filisiti ku Ngobi. Sibekayi mwisi Husa wábeta Safi, mosi wa bana ba butuka dya Lafa. 19Mvita yikwawu yákala yi bisi Filisiti ku Ngobi, kuna Elanani, mwana Yaleyi-olengimi mwisi Betelemi, káhonda Ngoliyati mwisi Ngati, wuna nti wa ngumba yandi wakala bonga mudikita miti mya mutungi wa miledi. 20Mvita yávutuka hika ku Ngati, kuna mutu mosi wa lawu kákala yi milembu sambanu ha kosu koku amana milembu sambanu ha kosu kulu — makumodi yi miya mu mvimba; yandi phi wábutukila kwena Lafa. 21Amana bwosu kátukwana Kiseledi, Yonatani, mwana Simeyi, phangi wa Tavidi, wámubeta. 22Baba baya bábutukila kwena Lafa ku Ngati, amana bábwa mu moku ma Tavidi yi basadi bandi.
