2ይ ሳሙኤል 21 FHB Father's Heart Bible™

21 ¹ኣብ ዘመን ዳዊት ድማ ሰለስተ ዓመት፥ ዓመት ድሕሪ ዓመት፥ ጥሜት ኮነ፤ ዳዊት ከዓ ብዛዕባኡ ንኣቦና ጠየቐ። ኣቦና ድማ “ነቶም ጊብዖናውያን ስለ ዝቐተሎም፥ ኣብ ልዕሊ ሳኦልን ኣብ ልዕሊ ቤቱን ዕዳ ደም ኣሎ” በለ።

²እቲ ንጉስ ድማ ነቶም ጊብዖናውያን ፀዊዑ ተዛረቦም። (እቶም ጊብዖናውያን ኻብ ደቂ እስራኤል ዘይኮኑ፥ ተረፍ ኣሞራውያን እዮም ነይሮም፤ ደቂ እስራኤል ድማ ብህይወት ክሓድግዎም መሓሉ ነይሮም፤ ሳኦል ግና ንእስራኤልን ንይሁዳን ስለ ዝቐንአ፥ ክቐትሎም ደለየ።) ³ዳዊት ድማ ነቶም ጊብዖናውያን “እንታይ ክገብረልኩም? ንህዝቢ ኣቦና ምእንቲ ኽትምርቑ ኸመይ ገይረ ኸተዓሪቕ?” በሎም።

⁴እቶም ጊብዖናውያን ድማ “ኣብ መንጎናን ኣብ መንጎ ሳኦልን ስድራ ቤቱን ዝርከብ ነገር ብሩር ወይ ወርቂ ኣይኮነን፤ ኣብ እስራኤል ድማ ንሓደ ሰብ ክንቀትሎ መሰል የብልናን” በሉ። ዳዊት ከዓ “ዝበልኩምዎ ዘበለ ኽገብረልኩም እየ” በለ።

⁵ንንጉስ ድማ “እቲ ዘጥፍኣናን ኣብ ኵሉ ዶብ እስራኤል ቦታ ምእንቲ ኸይተርፈና ድማ ንምጥፋእና ዝሓሰበን ሰብኣይ፥ ⁶ካብ ደቁ ሸውዓተ ሰባት ይወሃቡና፤ ንሕና ድማ ኣብ ገባዖ ሳኦል ሕሩይ እግዚኣብሄር ኣብ ቅድሚ እግዚኣብሄር ክንሰቕሎም ኢና” በሉ። እቲ ንጉስ ድማ “ክህበኩም እየ” በለ።

⁷እቲ ንጉስ ግና ዳዊትን ዮናታን ወዲ ሳኦልን ኣብ ቅድሚ ኣቦና ንሓድሕዶም ስለ ዝተማሓሓሉ፥ ንሜምፊቦስቴ ወዲ ዮናታን ወዲ ሳኦል ተናሕሰየሉ። ⁸እቲ ንጉስ ግና ነቶም ሪፅጳ ጓል ኣያ ንሳኦል ዝወለደትሎም ክልተ ኣወዳት፥ ኣርሞኒን ሜምፊቦስቴን፥ ምስቶም ሜራብ ጓል ሳኦል ንዓድርኤል ወዲ ቤርዜሊ መሖላታዊ ዝወለደትሎም ሓሙሽተ ኣወዳት ወሰደ። ⁹ንሳቶም ድማ ኣብ ኢድ እቶም ጊብዖናውያን ኣሕሊፉ ሃቦም፤ ንሳቶም ከዓ ኣብ ቅድሚ ኣቦና ኣብቲ እምባ ሰቐልዎም፤ እቶም ሸውዓተ ድማ ብሓንሳእ ወደቑ። ኣብ ቀዳማይ መዓልቲታት ቀውዒ፥ ቀውዒ ስገም ኣብ ዝጅመረሉ ጊዜ ተቐተሉ።

¹⁰ሽዑ ሪፅጳ ጓል ኣያ ወጮ ወሲዳ ኣብ ልዕሊ እቲ ኸውሒ ኣንፀፈቶ፥ ካብ መጀመርታ ቀውዒ ክሳዕ ኣብ ልዕሊ እቶም ሬሳታት ዝናም ዝወርድ፤ ብቐትሪ ነተን ኣዕዋፍ ካብኣቶም ትኽልክል፥ ብለይቲ ኸዓ ነተን ኣራዊት መሮር። ^a a v10 ወጮ፥ ንሓዘንን ጓህን ከም ዝረአ ምልክት ገይሩ ዝልበስ፥ ሐሪን ፀሊምን ዓለባ ነበረ። ¹¹እቲ ሪፅጳ ጓል ኣያ ሰበይቲ ወሰን ሳኦል ዝገበረቶ ንዳዊት ምስ ነገርዎ፥ ¹²ናብ ሰብ ኢያቤስ ገለዓድ ከይዱ፥ ነቲ ፍልስጥኤማውያን ንሳኦል ኣብ ጊልቦዓ ብዝቐተልሉ መዓልቲ ዝሰቐልዎ፥ ካብ ኣደባባይ ቤትሳን ብምስጢር ዘልዓልዎ ኣዕፅምቲ ሳኦልን ዮናታን ወዱን ወሰደ። ¹³ካብኡ ድማ ኣዕፅምቲ ሳኦልን ኣዕፅምቲ ዮናታን ወዱን ኣደየቦ፤ ነቲ ኣዕፅምቲ እቶም ዝተሰቕሉ ሰባት ከዓ ኣከቡ። ¹⁴ነቲ ኣዕፅምቲ ሳኦልን ዮናታን ወዱን ኣብ ፄላ ኣብ ብንያም፥ ኣብ መቓብር ቂስ ኣቦኡ ቀበርዎ፤ ነቲ ንጉስ ዝኣዘዞ ዅሉ ኸዓ ገበሩ። ድሕሪ እዙይ ድማ ኣቦና ምእንቲ እታ ምድሪ ዝቐረበ ፀሎት ሰምዐ።

ጀጋኑ ዳዊት ንዓበይቲ ፍልስጥኤማውያን ሰዓርዎም

¹⁵ደጊም ከዓ ኣብ መንጎ ፍልስጥኤማውያንን እስራኤልን ውግእ ኮነ። ዳዊት ድማ ምስ ሓሻኽሩ ንፍልስጥኤማውያን ክዋጋእ ወረደ፥ ደኸመ ኸዓ። ¹⁶ኢሽቢበኖብ፥ ካብ ዘርኢ ራፋ ዝኾነ፥ ርእሲ ኲናቱ ብነሃስ ዝተሰርሐ ሰለስተ ኪሎ ግራም ምስ ፈረቓ ዝምዘን፥ ሓዱሽ ሰይፊ ዝዓጠቐ ሰብኣይ ንዳዊት ክወግኦ ደለየ። ^b b v16 ራፋ፥ ናይቶም ብዘይ ልሙድ ዓበይቲ ዝነበሩ ጀጋኑ፥ ማለት እቶም ኣብ መንጎ ፍልስጥኤማውያን ዝተዋግኡ ዓበይቲ ሰባት ዓሌት ኣቦ ነበረ። ¹⁷ኣቢሳ ወዲ ፅሩያ ግና ንዳዊት ክሕግዞ መፂኡ፥ ነቲ ፍልስጥኤማዊ ወቒዑ ቀተሎ። ሽዑ ሰብ ዳዊት ከምዙይ ኢሉ መሓለሉ፦ “ደጊም መብራህቲ እስራኤል ከይተጥፍእ፥ ምሳና ናብ ውግእ ኣይትውፃእ።”

¹⁸ድሕሪ እዙይ ድማ ኣብ ጎብ ምስ ፍልስጥኤማውያን ካልእ ውግእ ኮነ። ሽዑ ሲበካይ ኩሳታዊ ንሳፍ፥ ካብ ደቂ ራፋ ንሓደ ዝኾነ፥ ወቒዑ ቀተሎ። ¹⁹ኣብ ጎብ ድማ ምስ ፍልስጥኤማውያን ካልእ ውግእ ኮነ፤ ኣብኡ ኤልያናን ወዲ ያዓረ ኦሬጊም ቤተልሔማዊ ንጐልያድ ጌታዊ፥ ዛቢያ ዅናቱ ኽንዲ መጠቕለሊ ኣላማይ ዝነበረ፥ ቀተሎ። ²⁰ኣብ ጌት ድማ ደጊም ውግእ ኮነ፤ ኣብኡ ሓደ ዓብዪ ሰብኣይ ነበረ፤ ኣብ ነፍሲ ወከፍ ኢዱ ሽዱሽተ ኣፃብዕቲ፥ ኣብ ነፍሲ ወከፍ እግሩ ድማ ሽዱሽተ ኣፃብዕቲ፥ ኵሉ ዕስራን ኣርባዕተን ነበሮ፤ ንሱ ኸዓ ንራፋ ተወሊዱ ነበረ። ²¹ንእስራኤል ምስ ፀረፈ ኸዓ፥ ዮናታን ወዲ ሳሚ ሓው ዳዊት ወቒዑ ቀተሎ። ²²እዞም ኣርባዕተ እዚኣቶም ኣብ ጌት ካብ ራፋ እዮም ተወሊዶም፤ ብኢድ ዳዊትን ሓሻኽሩን ድማ ወደቑ።