2ይ ሳሙኤል 24 FHB Father's Heart Bible™

24 ¹ቍጥዓ ኣቦና ድማ ኣብ ልዕሊ እስራኤል ደጊሙ ነደደ፤ ንዳዊት ድማ “ኪድ፥ ንእስራኤልን ንይሁዳን ቝፀር” ኢሉ ኣብ ልዕሊኦም ኣለዓዓሎ።

²እቲ ንጉስ ድማ ነቲ ምስኡ ዝነበረ ሓለቓ ሰራዊት ኢዮኣብ ከምዙይ በሎ፦ “ሕዚ ብዅሎም ነገዳት እስራኤል፥ ካብ ዳን ክሳዕ ቤርሳቤህ ዙር እሞ፥ ብዝሒ እቶም ህዝቢ ምእንቲ ኽፈልጥ ነቶም ህዝቢ ቝፀሮም።”

³ኢዮኣብ ግና ነቲ ንጉስ ከምዙይ በሎ፦ “ኣቦኻ ነዞም ህዝቢ ከም ዘለዉ ሚእቲ ኻዕ ይወስኸሎም፤ ኣዒንቲ ጐይታይ ንጉስ ድማ ይርኣያኦ። ጐይታይ ንጉስ ግና ስለምንታይ ነዝ ነገር እዙይ ክገብር ይደሊ?”

⁴ትእዛዝ እቲ ንጉስ ግና ኣብ ልዕሊ ኢዮኣብን ኣብ ልዕሊ ኣሕሉቕ ሰራዊትን በርትዐ። ኢዮኣብን እቶም ኣሕሉቕ ሰራዊትን ድማ ነቶም ህዝቢ እስራኤል ክቝፀሩ ኻብ ቅድሚ እቲ ንጉስ ወፁ። ⁵ፈለግ ዮርዳኖስ ተሳጊሮም ድማ፥ ኣብ ጥቓ ዓሮዔር፥ ብደቡብ እታ ኣብ ማእኸል እቲ ሽንጥሮ ዘላ ኸተማ ሰፈሩ፤ ናብ ጋድ ገፅ ጌሮም ከዓ ክሳዕ ኢያዜር ኸዱ። ⁶ሽዑ ናብ ገለዓድን ናብ ዞባ ታሕቲም ሖድሺን መፁ፤ ናብ ዳንያዓን መፂኦም ድማ ናብ ሲዶን ዞሩ፥ ⁷ናብ ዕርዲ ጢሮስን ናብ ኵለን ከተማታት ኤዋውያንን ከነዓናውያንን ድማ መፁ፤ ናብ ነጌብ ይሁዳ፥ ናብ ቤርሳቤህ ድማ ወፁ። ⁸ንዅሉ እታ ምድሪ ዞሮም ምስ ወድኡ ድማ፥ ኣብ መወዳእታ ትሽዓተ ወርሕን ዕስራ መዓልትን ናብ ኢየሩሳሌም መፁ። ⁹ኢዮኣብ ድማ ቍፅሪ እቲ ህዝቢ ነቲ ንጉስ ነገሮ፦ ኣብ እስራኤል ሸሞንተ ሚእቲ ሽሕ ሰይፊ ዝመዝዙ ጀጋኑ ሰባት ነበሩ፤ ሰብ ይሁዳ ድማ ሓሙሽተ ሚእቲ ሽሕ ነበሩ።

¹⁰ድሕሪ ነቶም ህዝቢ ምቝፃሩ ግና ልቢ ዳዊት ወቕዖ። ዳዊት ድማ ንኣቦና ከምዙይ በለ፦ “በቲ ዝገበርክዎ የመና ሓጢአ። ሕዚ ኦ ኣቦ፥ የመና ዓሽየ እየ እሞ፥ በጃኻ ኣበሳ ባርያኻ ኣርሕቐለይ።”

¹¹ዳዊት ንግሆ ምስ ተሲኡ ድማ፥ ቃል ኣቦና ናብቲ ነቢይ፥ ረኣዪ ዳዊት ዝኾነ ጋድ መፀ፦

¹²“ኪድ እሞ ንዳዊት ከምዙይ በሎ፦ ‘ኣቦና ከምዙይ ይብል ኣሎ፦ “ኣነ ሰለስተ ነገር የቕርበልካ ኣለኹ፤ ካብኣቶም ሓደ ምረፅ፥ ኣነ ድማ ኣብ ልዕሌኻ ክፍፅሞ እየ።”’”

¹³ጋድ ድማ ናብ ዳዊት መፂኡ ነገሮ፤ ከምዙይ ኢሉ ኸዓ ጠየቖ፦ “ሰለስተ ዓመት ጥሜት ኣብ ምድርኻ ይምፃእዶ? ወይ ፀላእትኻ ክሳዕ ዝሰጉኻ ሰለስተ ወርሒ ካብ ቅድሚኦም ክትሃድም ዲኻ? ወይ ኣብ ምድርኻ ሰለስተ መዓልቲ መቕሰፍቲ ይኹንዶ? ሕዚ ነቲ ዝለኣኸኒ እንታይ መልሲ ኸም ዘምፅኣሉ ሕሰበሉ እሞ ፍለጥ።”

¹⁴ዳዊት ድማ ንጋድ ከምዙይ በሎ፦ “ኣዝየ ተፀጊመ ኣለኹ። ርህራሄኡ የመና ብዙሕ እዩ እሞ፥ ናብ ኢድ ኣቦና ንውደቕ፤ ናብ ኢድ ሰብ ግና ኣይትሕደገኒ።”

¹⁵ኣቦና ድማ ኻብ ንግሆ ክሳዕ እታ ዝተቐፀረት ጊዜ ኣብ ልዕሊ እስራኤል መቕሰፍቲ ሰደደ፤ ካብ ዳን ክሳዕ ቤርሳቤህ ድማ ካብቶም ህዝቢ ሰብዓ ሽሕ ሞቱ። ^a a v15 ‘እታ ዝተቐፀረት ጊዜ’ ምናልባሽ ነታ ናይ ምሸት መስዋእቲ እትስውኣላ ዝተወሰነት ሰዓት እያ እተመልክት።

¹⁶እቲ መልኣኽ ንኢየሩሳሌም ከጥፍኣ ኢዱ ምስ ዘርግሐ ግና፥ ኣቦና ኻብቲ መዓት ተመለሰ፤ ነቲ ነቶም ህዝቢ ዘጥፍእ ዝነበረ መልኣኽ ድማ “ይኣክል! ሕዚ ኢድካ ኣቑም” በሎ። እቲ መልኣኽ ኣቦና ድማ ሽዑ ኣብ ጥቓ ዓውዲ ኣራውና እቲ ኢያቡሳዊ ነበረ።

¹⁷ዳዊት ነቲ ነቶም ህዝቢ ዝወቅዕ ዝነበረ መልኣኽ ምስ ረአየ ድማ፥ ንኣቦና ከምዙይ ኢሉ ተዛረቦ፦ “እንሆ፥ ዝሓጥአ ኣነ እየ፤ ዝበደለ ኸዓ ኣነ እየ። እዞም ኣባጊዕ እዚኣቶም ግና እንታይ ገይሮም? በጃኻ ኢድካ ኣብ ልዕለይን ኣብ ልዕሊ ቤት ኣቦይን ትውደቕ።”

ዳዊት መሰውኢ ይሰርሕ

¹⁸ጋድ ድማ በታ መዓልቲ እቲኣ ናብ ዳዊት መፂኡ፥ “ደይብ እሞ ኣብ ዓውዲ ኣራውና እቲ ኢያቡሳዊ ንኣቦና መሰውኢ ኣቑም” በሎ። ¹⁹ዳዊት ድማ ከምቲ ኣቦና ዝኣዘዞ፥ ከም ቃል ጋድ ደየበ። ²⁰ኣራውና ቁልቁል ጠሚቱ ነቲ ንጉስን ባሮቱን ናብኡ ክመፁ ምስ ረአየ ድማ፥ ወፂኡ ኣብ ቅድሚ እቲ ንጉስ ብገፁ ናብ ምድሪ ተደፊኡ ሰገደ። ²¹ኣራውና ድማ “ጐይታይ ንጉስ ስለምንታይ ናብ ባርያኡ መፂኡ?” በለ። ዳዊት ከዓ “እቲ መቕሰፍቲ ካብቶም ህዝቢ ምእንቲ ክእገድ፥ ንኣቦና መሰውኢ ክሰርሕ፥ ነቲ ዓውዲ ካባኻ ኽዕድጎ” ኢሉ መለሰ።

²²ኣራውና ድማ ንዳዊት ከምዙይ በሎ፦ “ጐይታይ ንጉስ ደስ ዝበሎ ወሲዱ የዕርግ። እንሆ፥ ነቲ ዚሓርቕ መስዋእቲ ኣብዑር እዚኣቶም ኣለዉ፤ ንዕንፀይቲ ድማ መኻፍእትን ኣርዑት ኣብዑርን እንሆ። ²³ኦ ንጉስ፥ እዝ ዅሉ ኣራውና ነቲ ንጉስ ይህብ።” ኣራውና ድማ ነቲ ንጉስ “እግዚኣብሄር ኣምላኽካ ይቀበለልካ” በሎ።

²⁴እቲ ንጉስ ግና ንኣራውና ከምዙይ በሎ፦ “ኣይፋሉን፥ ብዋጋ ደኣ ካባኻ ኽዕድጎ እየ እምበር። ዋጋ ዘይከፈልክሉ ዚሓርቕ መስዋእቲ ንኣቦይ ኣይስውእን እየ።” ዳዊት ድማ ነቲ ዓውድን ነቶም ኣብዑርን ብኣስታት ክልተ ፓውንድ ብሩር ዓደጎም። ²⁵ዳዊት ድማ ኣብኡ ንኣቦና መሰውኢ ሰሪሑ፥ ዚሓርቕ መስዋእትን መስዋእቲ ሰላምን ኣዕረገ። ኣቦና ድማ ነቲ ምእንቲ እታ ምድሪ ዝቐረበ ምህለላ ሰምዖ፤ እቲ መቕሰፍቲ ኸዓ ካብ እስራኤል ተኣገደ።