ዘፍጥረት 41

41 ¹ሁለት ዓመት ሙሉ ካለፈ በኋላ ፈርዖን ሕልም አለመ፤ በአባይ ወንዝ አጠገብ ቆሞ ነበር። ²ለምለሞችና የወፈሩ ሰባት ላሞች ከአባይ ወንዝ ወጥተው በቄጠማው መካከል ይሰማሩ ነበር። ³ከእነርሱም በኋላ መልካቸው የከፋና የከሱ ሌሎች ሰባት ላሞች ከአባይ ወንዝ ወጥተው በወንዙ ዳር አጠገባቸው ቆሙ። ⁴መልካቸው የከፋውና የከሱ ላሞች ያማሩትንና የወፈሩትን ሰባቱን ላሞች በሉ፤ ፈርዖንም ከእንቅልፉ ነቃ። ⁵ዳግመኛ ተኝቶ ሁለተኛ ሕልም አለመ፤ ፍሬ የሞሉና መልካም የሆኑ ሰባት የእህል ዛላዎች በአንድ አገዳ ላይ በቀሉ። ⁶ከእነርሱም በኋላ ቀጭንና በምሥራቅ ነፋስ የተመቱ ሰባት የእህል ዛላዎች ወጡ። ⁷ቀጭኖቹ ዛላዎች ሰባቱን ፍሬ የሞሉና የወፈሩ ዛላዎች ዋጧቸው። ፈርዖንም ከእንቅልፉ ነቃ፤ ሕልም ሆኖ ነበር። ⁸በማለዳም መንፈሱ ታወከ፤ ልኮ የግብፅን ጠንቋዮች ሁሉና ጠቢባንዋን ሁሉ አስጠራ። ፈርዖንም ሕልሞቹን ነገራቸው፤ ነገር ግን ሊተረጕምለት የሚችል አንድም አልነበረም።

⁹ከዚያም የመጠጥ አሳላፊዎች አለቃ ፈርዖንን እንዲህ አለው፤ “ዛሬ በደሌ ትዝ አለኝ። ¹⁰ፈርዖን በባሪያዎቹ ተቈጥቶ እኔንና የእንጀራ ጋጋሪዎች አለቃን በዘበኞች አለቃ ቤት ውስጥ በእስር አኖረን። ¹¹እኔና እርሱ በአንድ ሌሊት እያንዳንዳችን ሕልም አለምን፤ እያንዳንዱም ሕልም የራሱ ትርጓሜ ነበረው። ¹²በዚያም የዘበኞች አለቃ ባሪያ የሆነ አንድ ዕብራዊ ጎልማሳ ከእኛ ጋር ነበር። ሕልማችንን ነገርነው፤ እርሱም ለእያንዳንዳችን እንደ ሕልማችን ተረጐመልን። ¹³እርሱም እንደ ተረጐመልን ሆነ፤ እኔ ወደ ሥራዬ ተመለስሁ፤ ሌላውም ተሰቀለ።”

¹⁴ፈርዖንም ዮሴፍን አስጠራ፤ ፈጥነውም ከጕድጓድ እስር ቤት አመጡት። ተላጭቶ ልብሱን ቀይሮ ወደ ፈርዖን ቀረበ። ¹⁵ፈርዖንም ዮሴፍን እንዲህ አለው፤ “ሊተረጕመው የሚችል የሌለ ሕልም አልሜአለሁ፤ አንተ ግን ሕልም በሰማህ ጊዜ ልትተረጕመው እንደምትችል ስለ አንተ ሰምቻለሁ።”

¹⁶ዮሴፍም መልሶ፣ “ይህን በራሴ ማድረግ አልችልም፤ አባታችን ለፈርዖን መልካም መልስ ይሰጣል” አለ።

¹⁷ፈርዖንም ዮሴፍን እንዲህ አለው፤ “በሕልሜ በአባይ ወንዝ ዳር ቆሜ ነበር። ¹⁸የወፈሩና ለምለሞች ሰባት ላሞች ከወንዙ ወጥተው በቄጠማው መካከል ይሰማሩ ነበር። ¹⁹ከእነርሱም በኋላ የከሱ፣ መልካቸው እጅግ የከፋና ሥጋቸው የቀጨጨ ሌሎች ሰባት ላሞች ወጡ፤ እንደ እነርሱ ያለ በግብፅ ምድር ሁሉ አይቼ አላውቅም። ²⁰የከሱትና መልካቸው የከፋው ላሞች ፊተኞቹን የወፈሩ ሰባቱን ላሞች በሉ። ²¹ነገር ግን ከበሏቸው በኋላ እንደ በሏቸው የሚያስታውቅ አልነበረም፤ እንደ ቀድሞው መልካቸው የከፋ ሆነው ነበርና። ከዚያም ከእንቅልፌ ነቃሁ። ²²ደግሞም በሕልሜ ፍሬ የሞሉና መልካም የሆኑ ሰባት የእህል ዛላዎች በአንድ አገዳ ላይ ሲበቅሉ አየሁ። ²³ከእነርሱም በኋላ የደረቁ፣ ቀጭኖችና በምሥራቅ ነፋስ የተመቱ ሰባት የእህል ዛላዎች ወጡ። ²⁴ቀጭኖቹ ዛላዎች ሰባቱን መልካም ዛላዎች ዋጧቸው። ለጠንቋዮቹም ነገርኋቸው፤ ነገር ግን ሊገልጥልኝ የሚችል አንድም አልነበረም።”

²⁵ዮሴፍም ፈርዖንን እንዲህ አለው፤ “የፈርዖን ሕልሞች አንድ ናቸው፤ አባታችን ሊያደርግ ያለውን ለፈርዖን ገልጦአል። ²⁶ሰባቱ መልካም ላሞች ሰባት ዓመታት ናቸው፤ ሰባቱ መልካም የእህል ዛላዎችም ሰባት ዓመታት ናቸው፤ ሕልሙ አንድ ነው። ²⁷ከእነርሱ በኋላ የወጡት የከሱትና መልካቸው የከፋው ሰባት ላሞች ሰባት ዓመታት ናቸው፤ በምሥራቅ ነፋስ የተመቱትም ሰባቱ ባዶ ዛላዎች ሰባት የራብ ዓመታት ናቸው። ²⁸ለፈርዖን የነገርሁት ይህ ነው፤ አባታችን ሊያደርግ ያለውን ለፈርዖን አሳይቶታል። ²⁹በግብፅ ምድር ሁሉ ታላቅ ጥጋብ ያለባቸው ሰባት ዓመታት ይመጣሉ። ³⁰ከዚያም በኋላ ሰባት የራብ ዓመታት ይከተላሉ፤ በግብፅ የነበረውም ጥጋብ ሁሉ ይረሳል፤ ራቡም ምድሪቱን ይበላታል። ³¹ከዚያ በኋላ የሚመጣው ራብ እጅግ የጸና ስለሚሆን ጥጋቡ በምድሪቱ ይረሳል። ³²ሕልሙ ለፈርዖን ሁለት ጊዜ የተደገመበት ምክንያት አባታችን ነገሩን አጽንቶ ስለ ወሰነውና አባታችንም ፈጥኖ ስለሚፈጽመው ነው።

³³እንግዲህ ፈርዖን አስተዋይና ጠቢብ ሰው ይፈልግ፤ በግብፅ ምድርም ላይ ይሹመው። ³⁴ፈርዖን ይህን ያድርግ፤ በምድሪቱ ላይ ተቈጣጣሪዎች ይሹም፤ በሰባቱ የጥጋብ ዓመታትም ከግብፅ ፍሬ አንድ አምስተኛውን ይውሰድ። ³⁵እነዚህን የሚመጡ መልካም ዓመታት ምግብ ሁሉ ይሰብስቡ፤ እህሉንም በፈርዖን እጅ ሥር በከተሞች ውስጥ ለምግብ ያከማቹ፤ ይጠብቁትም። ³⁶ያም ምግብ በግብፅ ምድር ለሚመጡት ሰባት የራብ ዓመታት ለምድሪቱ መጠባበቂያ ይሆናል፤ ምድሪቱም በራብ አትጠፋም።”

ለሚመጡት ዓመታት ጥበብ የተሞላበት ዕቅድ

³⁷ይህም ነገር ፈርዖንንና ባሪያዎቹን ሁሉ ደስ አሰኘ። ³⁸ፈርዖንም ባሪያዎቹን እንዲህ አላቸው፤ “እንደዚህ ያለ ሰው፣ የእግዚአብሔር መንፈስ ያለበትን ሰው እናገኝ ይሆንን?” ³⁹ፈርዖንም ዮሴፍን እንዲህ አለው፤ “እግዚአብሔር ይህን ሁሉ ስላሳየህ፣ እንዳንተ አስተዋይና ጠቢብ ማንም የለም። ⁴⁰አንተ በቤቴ ላይ ትሆናለህ፤ ሕዝቤም ሁሉ ለትእዛዝህ ይታዘዛሉ፤ እኔ ከአንተ የምበልጠው በዙፋኑ ብቻ ነው።” ⁴¹ፈርዖንም ዮሴፍን፣ “እነሆ፣ በግብፅ ምድር ሁሉ ላይ ሾሜሃለሁ” አለው።

⁴²ፈርዖንም የማኅተም ቀለበቱን ከእጁ አውልቆ በዮሴፍ እጅ ላይ አደረገው፤ ከቀጭን በፍታ የተሠራ ልብስ አለበሰው፤ በአንገቱም ላይ የወርቅ ሐብል አደረገለት። ⁴³ፈርዖን ዮሴፍን በራሱ ሁለተኛ ሰረገላ ላይ አስቀመጠው፤ በፊቱም፣ “ተንበርከኩ!” እያሉ እንዲጮኹ አደረገ፤ በግብፅም ምድር ሁሉ ላይ ሾመው። ⁴⁴ፈርዖንም ዮሴፍን እንዲህ አለው፤ “እኔ ፈርዖን ነኝ፤ ያለ አንተ ፈቃድ በግብፅ ምድር ሁሉ ማንም እጁን ወይም እግሩን አያነሣም።” ⁴⁵ፈርዖንም ዮሴፍን ጸፍናት ጳዕናህ ብሎ ሰየመው፤ የኦን ካህን የጲጥፋራ ልጅ አስናትን ሚስት አድርጎ ሰጠው። ዮሴፍም በግብፅ ምድር ሁሉ ላይ ወጣ። ^a a v45 ኦን ትልቅ የግብፅ ከተማና የፀሓይ አምልኮ ማዕከል ነበረች፤ በግሪኮች ዘንድ ሄሊዮፖሊስ ተብላ ትታወቅ ነበር፤ ከዛሬዋ ካይሮ አጠገብ ትገኝ ነበር።

⁴⁶ዮሴፍም በግብፅ ንጉሥ በፈርዖን ፊት በቆመ ጊዜ ዕድሜው ሠላሳ ዓመት ነበር። ከፈርዖንም ፊት ወጥቶ በግብፅ ምድር ሁሉ ተዘዋወረ። ⁴⁷በሰባቱ የጥጋብ ዓመታትም ምድሪቱ በእጅጉ አፈራች። ⁴⁸በግብፅ ውስጥ የነበረውን የሰባቱን ዓመታት ምግብ ሁሉ ሰብስቦ በከተሞች ውስጥ አከማቸ፤ በእያንዳንዱም ከተማ በዙሪያዋ ያሉትን እርሻዎች ምግብ አኖረ። ⁴⁹ዮሴፍም እንደ ባሕር አሸዋ እጅግ ብዙ እህል አከማቸ፤ ከመቍጠርም እስኪተው ድረስ፣ ስፍር ቍጥር አልነበረውም። ⁵⁰የራብ ዓመታት ሳይመጡ የኦን ካህን የጲጥፋራ ልጅ አስናት ለዮሴፍ ሁለት ወንዶች ልጆች ወለደችለት። ⁵¹ዮሴፍም የበኵር ልጁን ምናሴ ብሎ ሰየመው፤ “አባታችን መከራዬን ሁሉና የአባቴን ቤት ሁሉ አስረስቶኛልና” አለ። ^b b v51 ምናሴ የሚለው ስም “ማስረሳት” ማለት ነው። ⁵²ሁለተኛውንም ኤፍሬም ብሎ ሰየመው፤ “አባታችን በመከራዬ ምድር ፍሬያማ አድርጎኛልና” አለ። ^c c v52 ኤፍሬም የሚለው ስም “ፍሬያማ” ማለት ነው።

⁵³በግብፅ ምድር የነበሩት ሰባቱ የጥጋብ ዓመታት አለቁ። ⁵⁴ዮሴፍም እንደ ተናገረ ሰባቱ የራብ ዓመታት ጀመሩ። ራብም በየአገሩ ሁሉ ሆነ፤ በግብፅ ምድር ሁሉ ግን እንጀራ ነበረ። ⁵⁵ግብፅ ሁሉ በተራበች ጊዜ ሕዝቡ ስለ እንጀራ ወደ ፈርዖን ጮኹ። ፈርዖንም ግብፃውያንን ሁሉ፣ “ወደ ዮሴፍ ሂዱ፤ የሚላችሁን ሁሉ አድርጉ” አላቸው። ⁵⁶ራቡም በምድሪቱ ሁሉ ላይ በተስፋፋ ጊዜ ዮሴፍ ጎተራዎቹን ሁሉ ከፍቶ ለግብፃውያን እህል ሸጠ፤ በግብፅ ራቡ የጸና ነበርና። ⁵⁷ራቡ ምድርን ሁሉ ስለ ያዘ፣ ምድር ሁሉ ከዮሴፍ እህል ይገዙ ዘንድ ወደ ግብፅ መጡ።