Kabwaan Kwanda Luulen
Kobit Jeso chiito ne ki menyei among kereeriisyek ne tildoigei, ak koyookto ineendet si komwa ne ki kiyai Kwandanyo; ak kosaaei piigap nganaseet si koistoegei. Konam kwony ne ki punei korotiik kenyiisyek taman ak aeng' ngoryennyi ak kosoop. Kong'eetchi weeritap Jairus eng' meet ye kagolilaan piik che riirei.
5 1Ki it komong' aroraeet, eng' emetap Gerahisyek. 2Ye kingo mong' Jeso eng' moinget, kowaakyo ineendet sainooto chii ne tinyei tamirmiryet ne murwoon, ne kibunu kereeriisyek. 3Ki menyei ineendet among kereeriisyek, ak ma kimuuchi chii age korat ineendet kogeny, agot eng' sirimdo. 4Amu ki kirate ineendet konyil che chaang' sirimwek ak ratisyosyek, ago kitoreti ratisyosyek ak koildos sirimwek—ma kota kotinyei chii age kimnateet si konyaliil ineendet. 5Kemout ak peetuut, among kereeriisyek ak tulweet, ki waach masise, kong'etchigei eng' koik. 6Ak ye kingo keer Jeso eng' loo, kolabat ak kogutunyi tainnyi. 7Kiwaach eng' kutit ne oo, kole, “Ki nee ne imache eng' anee, Jeso, Weeriitap Kamuktaindet ne mi Parak Miising'? Asaain eng' Kamuktaindet, ma igengeniena!”
8Amu ki leenji Jeso ineendet, “Mande eng' chiito, inyee tamirmiryet ne murwoon!”
9Ki teebee Jeso kole, “Ng'oo kaineng'ung'?” Kole, “Legion,” amu kole, “kichaang' acheek.” a a v9 Legionit ne po Rom ko kiwech piigap lugeet ko uu elfu lo; kaboori kainet kole ki igeng'eniengei chiini eng' elfusyegap tamirmirik che chaang' che yaacheen.
10Ki saaei ineendet miising' si ma iyookto icheek kobun emonooto. 11Ki mi olooto kurgeetap toorook ne oo ne yaamei eng' tulweet. 12Ak ki saaei ineendet, kole, “Iyooktech toorook, si kechut icheek.”
13Ki chamji icheek. Komanda tamirmirik che murwonen ak kochut toorook; kolabat kurgeet, ne uu elfu aeng', koityo ng'wony eng' ole yamat, kochut aroraeet, ak ki imaluuch eng' aroraeet. 14Ki pwoonei che iyagi toorook ak komwaita eng' nganaseet ak eng' emet; ak ki pwa piik koger kiy ne kagoyai. 15Ki pwa ole mi Jeso ak koger chiito ne ki tinyei oik, ineendet ne ki tinyei Legion, kotebee, kokael ngoroik ak kotinyei kabwaatet ne komyee—ak ki iywei. 16Ki mwachi icheek paorinik che ki keer kiy ne kagoyai chiito ne ki tinyei oik, ak agobo toorook. 17Ak kotoi kosaa Jeso si kobun emennywa.
18Ye kingo chut Jeso eng' moinget, kosaa chiito ne ki tinyei oik si kobiit kobooto ineendet.
19Ago ma cham Jeso, ak koleenji ineendet, “Ui koo ole mi piiguk ak imwachi icheek kiy ne kagoyaiwun Kwandanyo, ak ole kagoriirenin.” b b v19 Yoo kisirei walutik alak kole ‘Kiptaiyat,’ ko koguure FHB Kwandanyo—koyookto Jeso chiito ne kagisoop koo si komwa agobo rireenetap Kwanda, rireenet ne kiger chiito let eng' Jeso ineegei.
20Ki wo ak kotoi koamdooti eng' Dekapoli tugul che ki kagoyaiwyi Jeso, ak ki kwong'yo tugul. c c v20 Dekapoli — ne kole ‘nganasook taman’ eng' ng'olyootap Greek — ko ki emet ne ki tinyei nganasook che chaang' che po piik che ma Yahudik, eng' murot tai ak kong'asiis eng' aroraetap Galilaya.
Kisoop eng' Kayaneet, King'eetyi eng' Chamyet
21Ye kingo lany Jeso kogeny eng' moinget komong', ki yumjigei tuiyet ne oo among ineendet eng' let aroraeet. 22Konyo age eng' kondoigap sinagogit, ne kigoguure Jair, ak koger Jeso, kobutyi eng' keelyekyik, 23ak kosaa ineendet agimgim, kole, “Neegit kome tiibiinnyu ne ming'in. Nyo, inde euneguk eng' ineendet, si kosoop ak kosap.”
24Ki wo anyun Jeso kobooto ineendet. Ak ki supei tuiyet ne oo, ak kopichiin ineendet. 25Ak ki mi kwony age ne ki pwoonei korotiik kenyiisyek taman ak aeng'. 26Ki kinyalil miising' eng' eutap tabibisyek che chaang', ak kobanan tuguukyik tugul, ago ma konyoor kiy, ak koteseiye koek ne siirei kityo. 27Ye kingo kas agobo Jeso, konyo let eng' ineendet among tuiyet, ak koname ngoroindanyi. 28Amu ki leenji, “Ngot ko aname kityo ngoroikyik, ko asoop.” 29Ko koteeny ole rootune korotiikyik sainooto, ak kongen eng' poortanyi kole kagisoop eng' nyalildanyi.
30Sainooto, ki nai Jeso kole kagomanda kimnateet eng' ineendet, ak koweektagei among tuiyet, kole, “Ng'oo ne kanam ngoroikyuk?”
31Ki leenji kasubikyik, “Igeere tuiyet kopichiin, ago ileen, ‘Ng'oo ne kanam?’”
32Ak koweektagei kogeer ng'oo ne kiyai niito. 33Ago kwonyooto, ki iywei ak kobotandos, kongen kiy ne kagoyai ineendet, konyo, kobutyi tainnyi, ak komwachi ineendet imanit tugul.
34Ki leenji ineendet, “Tiibiit, kayaneng'ung' kagisobin. Ui eng' kaalyeet, kagisoobin eng' nyalildang'ung'.”
35Ko ta kong'alaali, kobwa piik kobun kootap kondoindetap sinagogit, kole, “Kagome tiibiing'ung'. Amu nee si itesi iweer Kaneetindet kogeny?”
36Ago ki ngegas Jeso ng'aleek che ki mwa, ak koleenji kondoindetap sinagogit, “Ma iywei, iyan kityo.”
37Ak ma cham chii age kosup ineendet, kobatee Petero, Jakobo, ak Johana tupchennyi Jakobo. 38Ki pwa kootap kondoindetap sinagogit, ak koger Jeso wasetapkei—piik che riirei, kateeiyet eng' kutit ne oo.
39Ye kingo chut, koleenji icheek, “Amu nee wasetapkei ak riirek? Ma kagome lakweet, korue kityo.”
40Ki rorei ineendet. Ago ki istoi icheek tugul, ak koip kwandap lakweet ak kamennyi ak choronokyik, ak kochut ole mi lakweet.
41Ki nam eunnyi ak koleenji, “Talitha koum,” ne mwaei kole, “Chebooto ne ming'in, amwaun ale, ng'eetu!”
42Ki ng'eetu sainooto chebooto ak kowendoot—amu ki tinyei kenyiisyek taman ak aeng'—ak ki kwong'yo tugul miising' sainooto. 43Ki ng'at icheek komyee kole amat komwachi chii age niito, ak koleenji kole kigoochi ineendet kiy ne koam.