Mi eng' bukuit

Mariko 6 FHB Father's Heart Bible™

Kiistoi 15% eng' kiy ne iale korook →
Bukuit

Kiweech eng' Emennyi

Ki beerak piigap emennyi, amu niito koyai tutigin kityo yooto. Ki yookto Taman ak Aeng' koba kobootos ma tinyei kiy. Kingo kagoratyi Herod kayastoet eng' sagut, ki chil metitap Johana. Ki iik Jeso piik eliphuusyek mut ak kobune parak eng' nyanjet, ago ma kongen kasubikyik.

Sura 6.

Ki mong' eng' yooto konyo emennyi, ak koosup kasubikyik ineendet. Ye kibetut ne po sabato, kotoi koneetis eng' sinagogit. Ki kwong'u che chaang' che ki kas, koleen, “Konyoor ano chiichi tuguuchu? Ng'omnateet ne ne, ne kigoochi ineendet? Yoe ano kwang'utik che u chuuto eng' eunekyik? Tos ma chiichi chiito ne yaei poisyetap keetiik, weeriitap Maria, tupchetap Jakobo ak Joses ak Judas ak Simion? Tos ma mi tupchosyekyik che chepto yu kobootech?” Ki beerak amu ineendet.

Koleenji Jeso icheek, “Ma kitinyei maotindet teegisto eng' emennyi kityo, kobooto pogeennyi, ak eng' kaannyi.”

Ma imuuch koyai kwang'utik age tugul eng' yooto, ago kindoi eunekyik eng' piik che myandos che ng'ering', ak kosoop icheek. Ki kwong'u amu ma ki yan icheek. Yeityo kowalwalei komoswek koneetis.

Iyookto Jeso Taman ak Aeng'

Ki kuur `Jeso taman ak aeng', kotoi koiyookto icheek aeng' aeng', ak kogoochi kimnateet eng' tamirmirik che murwonen. Ki ng'at icheek konam kirokto kityo ne po ooreet—ko ma magatiinik, ko ma lolet, ko ma sendeisyek eng' lolotinwekwak, ago kolap kweonik ak koma lap ngoroik aeng'.

Ak koleenji icheek, “Oliin tugul ne ochut koot, otep yooto kot koit ye omande oliindo. Ak oliin age tugul ne ma taachok anan koma gase ng'aleekwok, ye omande oliindo, olelekte temburyek che mi keelyekwok si koek paornateet eng' icheek.” a a v11 Lelekteetap temburyek eng' keelyek ko ki kaboorunet ne kingen ne po teriiteet—kaboorunet ne oo ne booru kole kiga koweech nganaseet ng'olyoot ak nguno kotuch kaarortaennyi ineegei.

Ki mong' anyun koba, ak koamdooti koleenji piik kosigu. Ak ki oonei oik che chaang', ak koilchi piik che chaang' che myandos mwaita, ak kosoop icheek.

Meetap Johana Kabatisanindet

Ki kas Laitoryat Herod agobo niito, amu ki kagonai kainetap Jeso. Ki leen alak, “Kagong'eetyi Johana Kabatisanindet eng' meet; nooto ne booisyei eng' ineendet kimnatosyegap kwang'utik.” Ago ki leen alak, “Ko Elijah.” Ki leen alak, “Ko maotindet, ko uu age eng' maotik che kigoito.” Ago ye kingo kas Herod niito, kole, “Johana, ne ki atil metit, kagong'eetyi.” Amu ki iyookto Herod koname Johana, ak kogimit eng' korgoreet amu Herodias, osotyotap tupchennyi Philipu, ne ki itun Herod. Amu ki leenji Johana Herod kong'eny, “Ma kiyomegei itinye osotyotap tupcheng'ung'.” Ki susei Herodias ng'aal agaigai ineendet ak komachei kobar ineendet, ago ma imuuch, Ki iywei Herod Johana, amu kingen ineendet kole chiitap imanda ne tiliil, ak kirib ineendet. Ye kingo kas Johana, ki kwong'yo miising', ago ki gase eng' boiboindo.

Yeityo konyo peetuut ne teptoi: peetuut ne ki kisige Herod, ye ki yachi igoorto piik che taagunotiin, ak kiptainigap lugeet, ak kandoigap Galilaya. Ye kingo chut chebeetap Herodias ak koureren, ki ipaiboiyi Herod ak toekyik. Koleenji Laitoryat lakwanooto, “Soomwo kiy age tugul ne imache, ak akoonin.” Ki tilji ineendet kole, “Kiy age tugul ne isoomwo, akoonin—kot koit ng'eetap laitornatennyu.”

Ki mong' koba ak koleenji kamennyi, “Asoom nee?” Kole, “Metitap Johana Kabatisanindet.”

Ki chut tyanit eng' chuungindo, konyo laitoryat kosoom koleenji, “Amache ikoono rani metitap Johana Kabatisanindet eng' taabeet.”

Ki iimak laitoryat miising', ago ma machei koeesyo ineendet, amu tilyotiikyik ak toekyik. Ki iyookto Laitoryat tyanit chii ne barei, kong'at koip metit. Ki wo kotil metitap Johana eng' korgoreet, ak koip metitap Johana eng' taabeet, ak kogoochi lakwanooto, ak kogoochi lakweet kamennyi.

Ye kingo kas kasubigap Johana, ki pwa konam poortanyi, ak koip konde eng' kurgeet.

Ibai Jeso Piik Eliphuusyek Muut

Ki tuiyo che kiyooktoi kongeet Jeso, ak komwachi tugul che ki yai ak che ki neet.

Koleenji icheek, “Opune okweek kityo oliin ne mi kaalyeet, ak omuuny kitigin.” Amu ki chaang' che pwanei ak che wendi, ak ma ki kitinyei sait koam.

Ki pa anyun eng' moinget, koba oliin ne meng'ootaat icheegei. Ki geer che chaang' ye kingo pa, ak konai icheek; ki labat eng' keelyek kobun nganasosyek tugul, ak koit yooto kotomo icheek. Ye kingo choorgei, kogeer kurupit ne oo, ak koriirchigei icheek, amu ki uu keechiirek che ma tinyei riibindet, ak kotoi koneet icheek tuguuk che chaang'. Ye ki kagoleny, konyonji kasubikyik ineendet ak koleenji, “Oliinoni ko ne meng'ootaat, ak kagoleny. Iyookto icheek koba emoswek ak komoswek che riirokee, ak koaldagei kiy ne koam.”

Ki wolji koleenji, “Ogoochi okweek kiy ne koam.” Ki le, “Tos keba keal magatiinik che po dinarisyek pogol aeng', ak kegoochi icheek koam?”

Ki teebe icheek koleenji, “Magatiinik ata che otinye? Oba ogeer.” Ye kingo nai, kole, “Muut, ak sigiisyek aeng'.”

Yeityo kong'at icheek tugul kotebee koboorto koboorto eng' susweek che nyalileen. Ki tebee anyun koboorto koboorto, che po pogolwogik ak che po konomusyek. Kingo nam magatiinik muut ak ichoek aeng', kogeer parak kipsengwet, koyai kong'oi ak kotil magatiinik, ak kogoochi kasubikyik si konde taitap piik, ak kochoor ichoek aeng' kwenut icheek tugul. Ak koam tugul ak kobiyong'. Ak koyum sendoik taman ak aeng' che nyiit tilyoosyek ak ichoek. Ak che ki koam magatiinik, ko ki murenik eliphuusyek muut.

Pendi Jeso Parak po Peek

Ye kingo mong' kong'at kasubikyik koip moinget ak kowo tai kolda age, ole mi Bethsaida, kotagan ineendet koisto piik. Ak kingo kagogaakta icheek, kotogosta tulweet si kosa.

Kingo it koimutyet, ki mi moinget kwenutap nyanjet, ago mi ineendet kityo eng' ng'wony. Kogeer icheek koimak koyae kasartaet, amu ki wechei koristo. Karon somok eng' mornet konyoonji icheek, kopendi parak po nyanjet. Ki machei kobata icheek, ago ye kingo keer kopendi parak po nyanjet, kole ko oiyandet, ak kowaach,

amu kogeer tugul ak koaragen; ago eng' yooto kong'alaalji icheek, koleenji, “Oyomagei; ko anee. Amoiywei.”

Ki lany moinget kobooto icheek, ak ki lilaan koristo; ak koiimak miising' eng' kwenugei, amu ki ma koguiyo agobo magatiinik, ago ki uui muguleldanywa.

Kingo kagosir nyanjet, konyo emetap Genesaret ak komooriik eng' ngeguut. Ak kingo mong' eng' moinget, konai piik ineendet eng' yooto. Kirwa emetchooto komugul ak kotoi koip pichu che myandos eng' arwaik, ole kogas kole mi ineendet. Ole tugul kowo—kaanisyek, nganasosyek, anan emotinwek—konde pichu che myandos eng' ole kiyae mung'aaret, kosaaei kotwa legetap ngoryennyi kityo. Ak age tugul ne twaei kosoop.