Mark 6

6 ¹Ana apam chiwui eina zatphoklaga awui khalattaramli rai, kala awui sākhangatha̱bingna ali shurrai. ²Sabbaththang ana synagogueli tamchitheiphoka. Kashā mi kachungkhana matakhakhaoda hānga, "Mipā hina hi kachiwui eina samphangkhala? Ali mikahai hikathā thangkhamei hi khikhala? Awui pāng eina hikathā matakhak kahai ot khi eina shokhairakhala? ³Hi Marywui naomayara, James, Joses, Judas kala Simonwui achinā, mistry chi maningmala? Azarva̱ngarā ithumli mangasopamalā?" Athumna ali makhuisangthuwa.

⁴Jishuna athumli hānga, "Marān khipālikha awui aramli, awui achinābingli ngachaili, kala ashi shimkhurli maningla khayākashi maleimana."

⁵Ana apam chili kakazānao kateokhawui tungli pāng parrorda raimi kahai maningla, matakhak kahai ot akhala masāshapmana. ⁶Athumwui mashitkasang chili ana matakhakhaowa. Chiwui thili ana kha̱bing kuimareida tamchitheivai.

Jishuna Tharāda Khanili Chihovā

⁷Ana tharāda khani chili phokkhuilaga, makathar manglābingwui tungli pangshap athumli milaga, khani khanida chihoshokphoka. ⁸Ana athumli kasoda hānga, shongfawui vang khāmshui akha maningla khuiphunglu, khamuila, paidula, athumwui lupākhaoli lupāla makhuiphungalu, ⁹kha pheihop ngavailu, kala phahon khani mangavaipaimana.

¹⁰Kala ana athumli hānga, "Nathumna shim akhali vākazang tharan, apam chiwui eina zatshoklakha eina tangda chili pamlu. ¹¹Nathumli zang ngasak, lah nganā khavai mamayā apam chi china, apam chiwui eina zatshoktharan, athumwui tungli shākhi sākhavai nathumwui pheili khalei chifa chi kathantāshoklu." ^a a v11 Pheili khalei chifa kathantāshok hi ngachai khavai theisā kahai machut akhana — keinung akhana pao chi khalanhaira kala ara khalattawui otphun phungki kaji da khami mashun machut akhana.

¹²Chieina athum zatphoklaga, mibingna ningngatei kaji chi hāshoka. ¹³Kameo kachungkha chi athumna kashamshoka, kala thao eina kakazānao kachungkhali neoda raimi.

Ra̱hikme Johnwui Kathi

¹⁴Khamunga Herodna chi shai, kaja Jishuwui ming theisā ngasāhaira. Mi kaikhana hānga, "Ra̱hikme John kathiwui eina ringshokhaira; chiwui vang eina hikathā matakhak kahai pangshapbing awuitungli ot sāda leili." ¹⁵Kha kaikhana hānga, "A Elijahna." Khangatei kaikhana hānga, "A achālakhawui marānbingwui ngachaili akha thāda marān akhana." ¹⁶Kha Herodna chi shālaga hānga, "Ina kui rangkhui John chi ringshokhaira." ¹⁷Kaja Herodna mi shivāta Johnli tukkhuilaga, agato Philipwui apreiva̱, ana ngakumkahai Herodiaswui vang eina, ali khalaphailaga phātopli sanghaisai. ¹⁸Kaja Johnna Herodli, "Nana nagatowui apreiva̱li khangakum hi ain maningmana" da hānghaowa. ¹⁹Chieina Herodiasna ali yangshilākaoda ali shaothatngaisai, kha ana chi masāpaimana, ²⁰Herodna Johnli khangarong kala kathara mipā mina da theilaga ali ngacheehaowa, kala ali mayonmi. Johnwui tui shālaga Herod ning pa̱ngapālakhaowa, chithālala ana ali thangmeihaoda nganāsanga.

²¹Chiwui thili khangayi zimiksho akha rāhaowa. Chi Herodwui kapharā zimikshona; atam chili ana awui khangambing, raithānabing kala Galileewui wungnaobingli zātkhān sāmi. ²²Herodiaswui naongalāva̱ kazanga pheichak sai eina Herod kala awui ngasotnaobing penlakhaowa. Awungana sha̱nao chili hānga, "Nana ngasakngai kapopo chi ili polu, ina nali mira." ²³Ana ali tuingashit sai, "Nana ili kapopo ngahānlala, iwui wungram tangkhai samkaphang eina tangda ina nali mira."

²⁴Ana kayāngli shokta ava̱va̱li hānga, "Ina khi poirakhala?" Chieina ana hānga, "Ra̱hikme Johnwui kui china."

²⁵Ana ngalāngda kashap eina awungawuili zangda poi, "Ra̱hikme Johnwui kui khongpheili sanglaga ara ili milu da ina ngasakngai."

²⁶Awunga wukhananglakhaowa, kha awui tuingashit kala ngasotnaobingwui vang eina ali mahātpaimana. ²⁷Awungana ngalāngda shaokathatapā akha shivātvāda, Johnwui kui khuirā khavai kasoi. Ana vāda phātopli Johnwui kui arangkhuingasaka, ²⁸kala khongphei kahaili akui chi sanglaga khuirai, sha̱nao chili mi, laga sha̱nao china chi ava̱va̱li mihaowa.

²⁹Johnwui sākhangatha̱bingna kashā tharan, rāda awui phasā khuilaga chikhur akhali sanghaowa.

Jishuna Mi Thingphangāli Phazāmi

³⁰Paokazatbingna Jishuli rākazipta, athumna sāhai kala tamchitheihai saikora ali unghāngsera.

³¹Ana athumli hānga, "Nathum khalatta va̱ri kahai pam akhali rāserlu, kala kateokha ngasāmlu." Kaja mi kachungkha rārā kala vāvā leilaga, athumna phazā atamla maleithuwa.

³²Chieina athum khalatta marikhongli kātonglaga ngachakyāng pam akhali vāhaowa. ³³Mi kachungkhana athum vākasā chi theihaoda machutkhuihaowa; keinung saikorawui eina pheina yongvāda athumli rida apam chili vāshunga. ³⁴Ngayipheili kashok eina, ana mi kachungkha chili theilaga lumashanlakhaowa, kaja athum yaokahoma makhalei yaonaobing thāhaowa. Chieina ana athumli thing kachungkha tamchitheiphoka. ³⁵Kazing yinghao kahaiwui thili awui sākhangatha̱bingna ali rāhānga, "Apam hi ngachakyāng kahai apamna, kala kazing yinghaira. ³⁶Athumli chihohaolu, chithākha athum kuikhamareiwui kha̱bing eina keinungbingli vālaga athum khalattawui zākhavai kashakazā aloranu."

³⁷Jishuna ngahānkai, "Nathumna athumli zākhavai milu." Athumna ngahānna, "Ithumna lupā shākhani lang eina khamui alolaga athumli zākhavai milu kajila?"

³⁸Jishuna athumli ngahāna, "Nathumwuili khamui kayākha leikhala? Vālaga yanglu." Athumna theikhuilaga ngahānkai, "Khamui phangā kala khai khani leili."

³⁹Chieina Jishuna athum saikorali matek kahai khawotungli ngaher-ngaher eina pamzang khavai kasoi. ⁴⁰Chieina athumna shāshā kala hangphangāngā, ngaher-ngaher eina pamzanga. ⁴¹Khamui phangā kala khai khani chi khuilaga, kazingramli yangkāda ningkashi seihā sai kala khamui chi serkhaida, mibingli yaovā khavai sākhangatha̱bingli mi, kala khai khani chi athum saikorali ngayarmi. ⁴²Chieina athum saikorana shailaga penlakhaowa. ⁴³Kala athumna shaineng eina khai pemda luk tharāda khani kazipkhui. ⁴⁴Kala khamui kashaibing chi mayarnao thing phangāna.

Jishuna Tara̱tungli Zata

⁴⁵Hengsāda ana yaruili chihohaomahungda leilakha, sākhangatha̱bingli marikhongli kātong ngasaklaga, ngayi lākhavāk Bethsaidashong rida vāngasakhaowa. ⁴⁶Kala ana athumli shiunkup kahaiwui thili, seihā sākhavai kaphungli kāhaowa.

⁴⁷Chithang ngazin marikhong chi shamadru alungli leisai, kala ana ngayiphei kathengli amāng leisai. ⁴⁸Ana athumli marikhong huivā kakhanang samphangkharā chi thei, kaja masi chi athumli ngakaikashe kajina. Ngayawui pung matimaikhali, ana shamadrutungli zatta athumwuivāk rārāsai. Ana athumli makānvai khavai sanga, ⁴⁹kha ana shamadrutungli zatkharā chi kathei eina, athumna mika̱lāna da phaninglaga panglāk eina vaowa,

⁵⁰kaja athum saikorana ali theilaga ngacheenahaowa; kha hengsāda ana athumli hānga, "Ringphālu; ilaka. Mangacheealu."

⁵¹Ana athumli ngasoda marikhongli kātong eina, masi chi maphanthuwa; kala athum khalattawui ngachaili matakhak reikhaida khuiya, ⁵²kaja athumna khamuiwui pongli bhap matāmana, kha athumwui wuklung makanghaowa.

⁵³Athumna kānkahaiwui thili Gennesaret ngaleili vālaga ngayipheili marikhong khuishokhaowa. ⁵⁴Athumna marikhongwui eina shok tharan, mibingna ali ngalāngda machutkhuihaowa. ⁵⁵Athumna ngalei chi apam saikora yongzatlaga, ana khalalei apamli leili da shāda chi apamli kakazānaobingli pet eina khuirai. ⁵⁶Kha̱bing, keinungbing kala luinganai, ana khalalei apamli vāda, athumna kakazānaobingli markli chipethai, kala awui chontheira̱māng maningla sāza̱khui khavai athumna poi. Kala chi sāza̱kakhui mibing saikora chi kharai samphanga.