Mark 7

7 ¹Phariseebing eina Jerusalemwui eina rākahai ain kathembing kaikhana Jishuli kuinamda rākazipa, ²kala awui sākhangatha̱bing kaikhana pāng mamazikla, makathar pāng eina kashakazā zāda leiwui chi athumna thei. ³(Kaja Phariseebing eina Jihudi saikorana awo-ayibingwui khangachā yonda, khangarang kathā pāng mamazikakha mazāmana. ⁴Sāshimwui eina rā tharan, mapheokahai eina mazāmana. Kala khong, khorām, kala pithraiwui khorkhong pheokhui kathā, khangachā kachungkha khangatei samphangkahai chi athumna singtitta lei.). ⁵Chieina Phariseebing eina ain kathembingna ali ngahāna, "Khisāda nawui sākhangatha̱bingna awo-ayibingwui khangachā mashurla, makathar pāng eina kashakazā zālala?"

⁶Ana ngahānkai, "Phākakhaningbing, nathumwui pongli Isaiahna kayākha phongkhamarān mashunghao, hithada kapihaida lei: 'Miyur hina morchai eina ili khayāshiya, kha awui wuklunga iwui eina katāva̱li lei.' ⁷'Arema eina athumna ili khoruma, mibingwui ningkhami chi tamkachitheina da tamchithei.'

⁸Nathumna ithumwui Avāwui ningkhami horhailaga mibingwui khangachā singtitta lei." ⁹Ana athumli hānga, "Nathumna nathumwui khangachā mayonkida, ithumwui Avāwui ningkhami mathālak eina sākhaihaokhala!" ¹⁰Kaja Mosesna hānga, 'Navā nava̱li khayāshilu,' kala 'Kasā a avāva̱li lah ava̱va̱li sui, chili thingasak phalungra.' ¹¹Kha nathumna kahāng, 'kachikathāna avāva̱ lah ava̱va̱li, "Nana iwui eina ngachon khavai leisā chi Korbanna" da hāngakha' (chi ithumwui Avāli tharchigat kahai lemmetna), ^a a v11 Korban chiya pheisā lah lan chi Varewui shimli tharchigat khavai ngashit akhana, chi khangatei otsakwui vang—khalattawui avā ava̱li khangachonwui vang tang—makhuizā ngasak khavaina. ¹²chithākha nathumna ali avāva̱ lah ava̱va̱li vang khikha sākhavai maphālengluimana. ¹³Chithāda nathumna athishurda masotchikat kahai nathumwui khangachā chi eina ithumwui Avāwui tui sākhaimi. Kala nathumna hikathā ot kachungkha sāda leili."

¹⁴Ana yarui chi latluida hokhuida athumli hānga, "Nathum saikora, ili nganāda bhap tālu: ¹⁵Mi akhawui ayarwui eina alungli zang kahai khikhakha ali makhao ngasakshapmana; kha mi akhawui alungwui eina kashok chi kana ali makhao ngasaka. ^b b v15 Haokaphok kahai kapikahaibingli hili verse 16 maleimana; thili kagapkahaibingna hithada zangsera: "Shākhavai khanā kakā a china nganākhuiranu."

¹⁷Ana yarui chi horhailaga shimli azang tharan, awui sākhangatha̱bingna ali chānjam chiwui maramli ngahāna.

¹⁸Ana athumli hānga, "Nathumlila hikathā matheishingkhuiranglā? Ayarwui eina mi akhawui alungli zang kahai khikhakha ali makhao ngasakshapmana kaji nathumna bhap matāranglā, ¹⁹kaja chi awui wuklungli mazangmana, kha awui paiphonli zangda, chieina phasāwui eina shokhaowa?" (Hi hānglaga, ana kashakazā saikora tharhaora da hānga.). ²⁰Ana hānga, "Miwui eina kashok china ali makathar ngasaka. ²¹Kaja alungwui eina, miwui wuklungwui eina, makaphā kaphaning, shāmkasā, khaleekasa̱, shaokathat, ²²phokaphā, kākharām, makaphā-makhayā, kakapik, sopkhamasāp, yuikashina, khamashāt, langkaso, kala mangkhama̱ otsak shoka. ²³Hi makhayā otsak saikora alungwui eina shoklaga mili makathar ngasaka."

Gentile Sha̱naowui Sāchingda Shitkasang

²⁴Jishuna apam chiwui eina Tyrewui ngaleili vāhaowa. Ana shim akhali vāzangda, khipānakha matheiranu da ngarāna, kha a ngathumda leirarthuwa. ²⁵Chithālala, awui naongalāva̱ kateoli makathar mangla kazanga sha̱nao akhana, awui maramli ngalāngda shālaga, rāda awui pheizingli mashunzanghaowa. ²⁶Sha̱nao chiya Greeknaona, Syrophoenician sāda pharai. Ana awui naongalāva̱wui eina kameo chi kashamshokmi khavai poi.

²⁷Ana ali hānga, "Naoshinaobingna rida phazāranu, kaja athumwui zāt khuilaga fali hormi kahai mangachāmana."

²⁸Kha ana ali ngahānkai, "Amei, table azingli khalei fabing eina tangda naoshinaobingwui zāneng ngamuizai."

²⁹Ana ali hānga, "Hi ngahānkā chiwui vang eina, vālu. Kameo chi nawui naongalāva̱wui eina phāhaira."

³⁰Chieina ana shimli unglaga, nao chi pettungli pikazang kala kameo chi phāhairakasā thei.

Jishuna Khangakhokwui Khanā Rak Ngasaka

³¹Chiwui thili Jishuna Tyrewui ngaleiwui eina zatthuihailaga, Sidonwui eina ngareivāda Galilee yireili, Decapolis ngaleili vāhaowa. ^c c v31 Decapolis hi Galilee yirewui nasi kahokshong kala tamung tamvāshong khalei Greek keinung tara̱wui ngalei akhana. ³²Athumna khangakhok kala tui hang khavai saklaka mi akha awuili khuirālaga, awui pāng chi ali sangmi khavai poi. ³³Jishuna ali yaruiwui eina ngathumsāda thānkhuilaga, awui pāngmareng chi miwui khanāli sangda, machora̱ shoklaga, awui male sākaza̱.

³⁴Chieina, kazingramshong munlak eina yanglaga, a thukda khaksui khuilaga, ali hānga, "Ephphatha!" (kaji, "Raklu!").

³⁵Hengsāda awui khanā rakhaowa, awui male chihohaowa, kala a shenglak eina hang wukhaowa. ³⁶Jishuna athumli mi khipālikha mahānglakalu da kasoi; kha ana kasomeikharda, athumna pao hāshokmeikhaowa. ³⁷Athum katonga matakhakhaida hānga, "Ana ot saikora mathālak eina sāhaira. Ana khangakhokbing shāngasaka kala khangasha̱bingli matui ngasaka."