Mark 8

8 ¹Atam chitharan, mi kachungkha rākazipluihaida, zākhavai chi athumli khi maleimana. Jishuna awui sākhangatha̱bing hokhuida hānga,

²"Ina yarui hili lumashanlakhaira, kaja kathumthang hi athumna ili ngasokapam kāhaira, kha zākhavai chi athumli khi maleimana. ³Ina athumli kakhum eina shimli chihovākha, shongfali athum vānhaora, kaja kaikhana katāva̱li eina kharāhaira."

⁴Kala awui sākhangatha̱bingna ali ngahānkai, "Lamhāng hili khipāna hibingli khamui eina kathada zākhavai khamishaprakhala?"

⁵Chieina ana athumli ngahāna, "Nathumwuili khamui kayākha leilikhala?" Athumna, "Khamui shini," da hānga.

⁶Jishuna yaruili ngaleili pamzang khavai kasoi, kala khamui shini chi khuilaga ningkashi seihā sāhailaga serkhaida, yaovā khavai sākhangatha̱bingli mi; chieina athumna yaruili yaowa. ⁷Athumwuili khai kateokhala leisai; chi somihailaga, hibingla yaovā khavai sākhangatha̱bingli kasoi. ⁸Chieina athum saikorana shai kala ningyāng unglakhaowa. Kala athumna shaineng chi luk shini kazipkhuiya. ⁹Apam chili mi thingmati sha̱khana. Kala ana athumli vāngasakhaowa.

¹⁰Chiwui thili ngalāngda ana awui sākhangatha̱bingli ngasoda marikhongli kātonglaga Dalmanutha luiramli vai.

Machut Poda Leikahai Thot

¹¹Phariseebing china rālaga ali khalatta hāngngaroka, ali chāng yangkida kazingramwui eina machut akha poi.

¹²Awui manglāli soso khangahuina ana hānga, "Khisāda thot hina machut kahai pomikhala? Kachangkhat eina ina nathumli kahāngna, thot hili machut akhala mimaimira."

¹³Kala ana athumli horhailaga marikhongli kātongkhuida lakhashong huikāluishita.

Phariseebingwui Khawok Chili Ningngasharlu

¹⁴Athumna khamui khuiphungki kaji malaihaowa. Marikhongli athumwui khalei khamuitang akhamāng leisai.

¹⁵Kala ana athumli kasoi, "Ning ngasharlu. Phariseebingwui khawok eina Herodwui khawok chili ningngasharlu."

¹⁶Chieina athum khalatta khamui maleikahaiwui vang ngazek ngaroka.

¹⁷Jishuna chi theihaoda ngahāna, "Khisāda khamui makhuikaphungwui vang ngazek ngarokhala? Aruila nathumna mayangla, mabhaptā matheila? Nathumwui ning makanghairala?" ¹⁸Mik kailakha, nathum matheimala? Khanā kailakha, manganāmala? Kala nathum maphaningungmala? ¹⁹Ina mi thing phangāwui vang khamui phangā serkhaida tharan, nathumna shaineng pemda luk kayākha kazipkhuikhala?" Athumna, "Tharāda khanina" da ngahānkai."

²⁰"Kala ina khamui shini eina mi thingmatiwui vang serkhaida tharan, nathumna shaineng luk kayākha kazipkhuikhala?" Athumna, "Shinina" da ngahānkai.

²¹Ana athumli hānga, "Nathum aruila bhap matāranglā?"

Mik Ngapeo Mi Akhana Kathei Samphanga

²²Athum Bethsaidali rai. Apam chili mibingna mik ngapeo mi akha ali khuirai kala mipa chili sāza̱ khavai Jishuli poi.

²³Ana mik ngapeo mipawui pāng singlaga, kha̱lung chiwui eina thānshoklaga, amikli machora̱ mashorrorlaga, awuitungli pāng parrorlaga ngahāna, "Nana khikha theila?"

²⁴Ana yangkakā eina hānga, "Ina mibingli theili, kha athum thingrong zatmamānda thai."

²⁵Chiwui thili Jishuna mipawui mikli apāng latluida parza̱ya; ana mik taringda yanga, hankhuiluishit, kala ot saikora tharzā eina thei.

²⁶Kala ana ali shimli chihovāda hānga, "Kha̱lung chili tangda mavālu."

Nathumna I Khipāna Da Hāngkhala?

²⁷Jishu kala awui sākhangatha̱bing Caesarea Philippiwui kha̱bingli vai. Shongfali ana athumli ngahāna, "Mibingna I khipāna da hāngkhala?"

²⁸Athumna ngahānkai, "Ra̱hikme Johnna ji; kala kaikhana Elijahna ji; kala khangatei kaikhana marānbingwui ngachaili akhana ji."

²⁹Chiwui thili ana athumli ngahāna, "Kha nathumna I khipāna da hāngkhala?" Peterna ngahānkai, "Na Khrista china."

³⁰Kala ana awui pongli khipālikha mahāng khavai saklak eina athumli kasoi.

Miwui Naomayarana Kachotkachāng Phungphalungra

³¹Ana athumli, miwui Naomayarana kachotkachāng kachungkha samphangra, ararbing, pāngmon akhokabing, kala ain kathembingna makhuisangmara, shaothatra, kala kathumthangwui thili ringshokluishitra da tamchitheiphoka. ³²Ana hi meisā eina hānga. Kala Peterna ali ngateida hokhuilaga ali kaharphoka.

³³Kha ana ngareiungda awui sākhangatha̱bingli yanglaga, Peterli kaharda hānga, "Iwui khanukshong unghaolu, Satan! Kaja na ithumwui Avāwui pongli naning mahaimana, kha mikumowui pongli naning haimi."

³⁴Ana yarui kala awui sākhangatha̱bingli hokhuilaga athumli hānga, "Kachina ithi shurga jiakha, awui khalattali malaihailaga, awui krush chi phungda ili shurranu. ³⁵Kachikathāna awui mirin kankhuiga jiakha chi shimānra; kha iwui vang kala paokaphāwui vang eina kachikathāna awui mirin shimānkha china kankhuira. ³⁶Mi akhana okathui saikora samphanglaga awui mirin chi shimānhaiakha, akhali tongkaza khi leikhala? ³⁷Kaja mi akhana khi eina awui mirin chi ngatha̱khuikapai leikhala? ³⁸Kaja kachikathā mina phokaphā kala morei kasā thot hili iwui vang kala iwui tuiwui vang khayakakha, kathara kazingraobingli ngasoda Avāwui tekhamatei eina rāthanghon miwui Naomayaranala ali khayakhaora."