ማርቆስ 8

8 ¹በዚያን ወራት እንደ ገና ብዙ ሕዝብ ተሰበሰበ፤ የሚበሉትም ምንም አልነበራቸውም። ኢየሱስም ደቀ መዛሙርቱን ጠርቶ እንዲህ አላቸው፤

²“ለሕዝቡ አዝንላቸዋለሁ፤ ከእኔ ጋር ሦስት ቀን ሆኖአቸዋል፤ የሚበሉትም የላቸውም። ³ተርበው ወደ ቤታቸው ብሰዳቸው በመንገድ ላይ ይዝላሉ፤ አንዳንዶቹም ከሩቅ መጥተዋል።”

⁴ደቀ መዛሙርቱም መልሰው፣ “እዚህ ምድረ በዳ ውስጥ ይህን ሕዝብ በእንጀራ ማን ሊያጠግበው ይችላል?” አሉት።

⁵እርሱም፣ “ስንት እንጀራ አላችሁ?” ብሎ ጠየቃቸው። እነርሱም፣ “ሰባት” አሉ።

⁶ሕዝቡም መሬት ላይ እንዲቀመጥ አዘዘ፤ ሰባቱን እንጀራ ይዞ አመሰገነ፤ ቈርሶም ለሕዝቡ እንዲያቀርቡ ለደቀ መዛሙርቱ ሰጣቸው፤ እነርሱም ለሕዝቡ አቀረቡ። ⁷ጥቂት ታናናሽ ዓሣዎችም ነበሩአቸው፤ እነርሱንም ባርኮ ለሕዝቡ እንዲያቀርቡ ደቀ መዛሙርቱን አዘዘ። ⁸በልተውም ጠገቡ፤ ከተረፈውም ቍርስራሽ ሰባት መሶብ ሰበሰቡ። ⁹በዚያም አራት ሺ የሚያህል ሕዝብ ነበር፤ አሰናበታቸውም።

¹⁰ወዲያውም ከደቀ መዛሙርቱ ጋር ወደ ታንኳ ገብቶ ወደ ድልማኑታ አውራጃ ሄደ።

ምልክት የሚሻ ትውልድ

¹¹ፈሪሳውያንም መጥተው ሊከራከሩት ጀመሩ፤ ሊፈትኑትም ከሰማይ ምልክት ጠየቁት።

¹²በመንፈሱም እጅግ ቃተተና እንዲህ አለ፤ “ይህ ትውልድ ለምን ምልክት ይሻል? እውነት እላችኋለሁ፤ ለዚህ ትውልድ ምንም ምልክት አይሰጠውም።”

¹³ትቷቸውም እንደ ገና ወደ ታንኳ ገብቶ ወደ ማዶ ተሻገረ።

ከፈሪሳውያን እርሾ ተጠንቀቁ

¹⁴ደቀ መዛሙርቱም እንጀራ መያዝ ረስተው ነበር፤ በታንኳውም ውስጥ ከአንዲት እንጀራ በስተቀር አልነበራቸውም።

¹⁵እርሱም፣ “ተጠንቀቁ፤ ከፈሪሳውያን እርሾና ከሄሮድስ እርሾ ተጠበቁ” ብሎ አስጠነቀቃቸው።

¹⁶እነርሱም እንጀራ ስለሌላቸው እርስ በርሳቸው ይነጋገሩ ጀመር።

¹⁷ኢየሱስም ይህን ዐውቆ እንዲህ አለ፤ “እንጀራ ስለሌላችሁ ለምን ትነጋገራላችሁ? እስከ አሁን አታስተውሉም፤ አትረዱምም? ልባችሁ ደንድኖአልን? ¹⁸ዐይን እያላችሁ አታዩምን? ጆሮ እያላችሁ አትሰሙምን? አታስታውሱምን? ¹⁹አምስቱን እንጀራ ለአምስት ሺ በቈረስሁ ጊዜ፣ ስንት ቅርጫት ሙሉ ቍርስራሽ አነሣችሁ?” አላቸው። እነርሱም፣ “ዐሥራ ሁለት” አሉት።

²⁰“ሰባቱንም ለአራት ሺ በቈረስሁ ጊዜ፣ ስንት መሶብ ሙሉ ቍርስራሽ ሰበሰባችሁ?” አላቸው። እነርሱም፣ “ሰባት” አሉት።

²¹እርሱም፣ “እስከ አሁን አታስተውሉምን?” አላቸው።

ዐይነ ስውር ማየት አገኘ

²²ወደ ቤተ ሳይዳም መጡ፤ ሰዎችም ዐይነ ስውር ወደ እርሱ አመጡ፤ እንዲዳስሰውም ኢየሱስን ለመኑት።

²³የዐይነ ስውሩንም እጅ ይዞ ከመንደሩ ውጭ አወጣው፤ በዐይኖቹም ላይ እንትፍ ብሎ እጆቹን ጫነበት፤ “ምን ታያለህ?” ብሎ ጠየቀው።

²⁴እርሱም ቀና ብሎ አየና፣ “ሰዎችን አያለሁ፤ ነገር ግን እንደ ዛፍ ሲመላለሱ ይታዩኛል” አለ።

²⁵ከዚያም ኢየሱስ እንደ ገና እጆቹን በዐይኖቹ ላይ ጫነ፤ እርሱም ትኵር ብሎ አየ፤ ተፈወሰም፤ ሁሉንም ነገር በግልጽ አየ።

²⁶ወደ ቤቱም ሰደደው፤ “ወደ መንደሩ እንኳ አትግባ” አለው።

እኔ ማን ነኝ ትላላችሁ?

²⁷ኢየሱስና ደቀ መዛሙርቱም ወደ ፊልጶስ ቂሳርያ መንደሮች ሄዱ። በመንገድም ላይ፣ “ሰዎች እኔን ማን ይሉኛል?” ብሎ ጠየቃቸው።

²⁸እነርሱም፣ “መጥምቁ ዮሐንስ ይሉሃል፤ ሌሎችም ኤልያስ፤ ሌሎችም ከነቢያት አንዱ ይሉሃል” አሉት።

²⁹እርሱም፣ “እናንተስ እኔን ማን ትሉኛላችሁ?” ብሎ ጠየቃቸው። ጴጥሮስም መልሶ፣ “አንተ ክርስቶስ ነህ” አለው።

³⁰ስለ እርሱም ለማንም እንዳይናገሩ አበክሮ አዘዛቸው።

የሰው ልጅ መከራ ሊቀበል ግድ ነው

³¹የሰው ልጅ ብዙ መከራ ሊቀበል፣ በሽማግሌዎችና በካህናት አለቆችም በጸሐፍትም ተጥሎ ሊገደል፣ ከሦስት ቀንም በኋላ ሊነሣ እንዳለበት ያስተምራቸው ጀመር። ³²ይህንም ነገር በግልጽ ተናገረ። ጴጥሮስም ወደ ጎን ወስዶ ይገሥጸው ጀመር።

³³እርሱ ግን ዘወር ብሎ ደቀ መዛሙርቱን አየና ጴጥሮስን ገሠጸው፤ “ሰይጣን ሆይ፣ ከበኋላዬ ሂድ! አንተ የአባታችንን ነገር ሳይሆን የሰውን ነገር ታስባለህና።”

³⁴ሕዝቡንም ከደቀ መዛሙርቱ ጋር ጠርቶ እንዲህ አላቸው፤ “በኋላዬ ሊመጣ የሚወድድ ራሱን ይካድ፤ መስቀሉንም ተሸክሞ ይከተለኝ። ³⁵ነፍሱን ሊያድን የሚወድድ ሁሉ ያጠፋታል፤ ስለ እኔና ስለ ወንጌል ነፍሱን የሚያጠፋ ሁሉ ግን ያድናታል። ³⁶ሰው ዓለሙን ሁሉ አግኝቶ ነፍሱን ቢያጣ ምን ይጠቅመዋል? ³⁷ወይስ ሰው ስለ ነፍሱ ቤዛ ምን ሊሰጥ ይችላል? ³⁸በዚህ አመንዝራና ኀጢአተኛ ትውልድ መካከል በእኔና በቃሌ የሚያፍር ሁሉ፣ የሰው ልጅም በአባቱ ክብር ከቅዱሳን መላእክት ጋር በሚመጣ ጊዜ በእርሱ ያፍርበታል።”