ማርቆስ 8 FHB Father's Heart Bible™

8 ¹በቲ መዓልቲታት እቲ፥ ከም ብሓድሽ ብዙሕ ህዝቢ ተኣከበ፤ ዝበልዕዎ ድማ ኣይነበሮምን። ኢየሱስ ከዓ ንደቀ መዛሙርቱ ፀዊዑ ከምዙይ በሎም፦

²“ነዝ ህዝቢ እዙይ ይርህርሀኒ ኣሎ፤ ሕዚ ሰለስተ መዓልቲ ኾይኑ ምሳይ ኣለዉ፤ ዝበልዕዎ ድማ የብሎምን። ³ጥሙዮም ናብ ገዛኦም እንተ ሰዲደዮም፥ ኣብ መንገዲ ክሕለሉ እዮም፤ ገሊኣቶም ከዓ ካብ ርሑቕ መፂኦም እዮም።”

⁴ደቀ መዛሙርቱ ድማ “ኣብዝ በረኻ እዙይ ነዞም ሰባት እዚኣቶም መን ብእንጀራ ከፅግቦም ይኽእል?” ኢሎም መለሱሉ።

⁵ንሱ ድማ “ክንደይ እንጀራ ኣለኩም?” ኢሉ ጠየቖም። ንሳቶም ከዓ “ሸውዓተ” በሉ።

⁶ነቲ ህዝቢ ኣብ ምድሪ ክቕመጡ ኣዘዞም፤ ነቲ ሸውዓተ እንጀራ ኣልዒሉ ድማ ኣመስጊኑ ቆረሶ፤ ነቲ ህዝቢ ኸቕርቡሎም ከዓ ንደቀ መዛሙርቱ ሃቦም፤ ንሳቶም ድማ ነቲ ህዝቢ ኣቕረቡሎም። ⁷ቁሩብ ኣናእሽቱ ዓሳ ድማ ነበሮም፤ ባሪኹ ኸዓ ነዚኣቶም ነቲ ህዝቢ ኸቕርቡሎም ንደቀ መዛሙርቱ ኣዘዞም። ⁸በሊዖም ድማ ፀገቡ፤ ካብቲ ዝተረፈ ቍርስራስ ከዓ ሸውዓተ መሶብ ኣልዓሉ። ⁹እቶም ዝበልዑ ኸዓ ኣስታት ኣርባዕተ ሽሕ ሰብ ነበሩ፤ ንሱ ድማ ሰደዶም።

¹⁰ሽዑ ንሽዑ ድማ ምስ ደቀ መዛሙርቱ ናብ ጃልባ ኣትዩ ናብ ሃገር ዳልማኑታ ኸደ።

ምልክት ዝደሊ ትውልዲ

¹¹ፈሪሳውያን መፂኦም ድማ፥ ክፍትንዎ፥ ካብ ሰማይ ምልክት እናደለዩ ኽማጐትዎ ጀመሩ።

¹²ብመንፈሱ ዓሚቑ እናስተንፈሰ ድማ “እዝ ትውልዲ እዙይ ስለ ምንታይ ምልክት ይደሊ? ብሓቂ እብለኩም ኣለኹ፥ ነዝ ትውልዲ እዙይ ምልክት ኣይወሃቦን እዩ” በለ።

¹³ሓዲግዎም ድማ መሊሱ ናብ ጃልባ ኣትዩ ናብ ማዕዶ ኸደ።

ካብ ማይ ብሒቝ ፈሪሳውያን ተጠንቀቑ

¹⁴እንጀራ ምሓዝ ረሲዖም ነበሩ፤ ኣብ ጃልባ ሓንቲ እንጀራ ጥራሕ ነበረቶም።

¹⁵ንሱ ድማ “ተጠንቀቑ፤ ካብ ማይ ብሒቝ ፈሪሳውያንን ካብ ማይ ብሒቝ ሄሮድስን ተዓቀቡ” ኢሉ ኣጠንቀቖም።

¹⁶ንሳቶም ድማ እንጀራ ስለ ዘይብሎም ንስንሳቶም ክዘራረቡ ጀመሩ።

¹⁷ኢየሱስ ከዓ እዙይ ፈሊጡ “ስለ ምንታይ እንጀራ ብዘይ ምሓዝኩም ትዘራረቡ? ገናዶ ኣይትርእዩን ኣይተስተውዕሉን ኢኹም? ልብኹም ተሪሩዶ? ¹⁸ኣዒንቲ እናሃለወኩም ኣይትርእዩንዶ? ኣእዛን እናሃለወኩም ኣይትሰምዑንዶ? ኣይትዝክሩንዶ? ¹⁹ነቲ ሓሙሽተ እንጀራ ንሓሙሽተ ሽሕ ሰብ ምስ ቆረስኩ፥ ክንደይ መሶብ ዝመልአ ቁርስራስ ኣከብኩም?” ንሳቶም ድማ “ዓሰርተ ኽልተ” በሉ።

²⁰“ነቲ ሸውዓተ ድማ ነርባዕተ ሽሕ ሰብ ምስ ቆረስኩ፥ ክንደይ መሶብ ዝመልአ ስብርባር ኣከብኩም?” ንሳቶም ከዓ “ሸውዓተ” በሉ።

²¹ንሱ ድማ “ገናዶ ኣይተስተውዕሉን ኢኹም?” በሎም።

ሓደ ዕዉር ምርኣይ ረኸበ

²²ናብ ቤተ ሳይዳ ድማ መፁ፤ ሰባት ከዓ ሓደ ዕዉር ናብኡ ኣምፂኦም ክትንክፎ ንኢየሱስ ለመንዎ።

²³ነቲ ዕዉር ኢዱ ሒዙ ድማ ናብ ወፃኢ እታ ዓዲ ኣውፅኦ፤ ኣብ ኣዒንቱ እንትፍ ኢሉ ኢዱ ኣንቢሩሉ “ገለ ትርኢዶ?” ኢሉ ጠየቖ።

²⁴ንሱ ኸዓ ኣንቃዕሪሩ ጠሚቱ “ሰባት እርኢ ኣለኹ፤ ግና ከም ኣእዋም ኮይኖም እናኸዱ እርእዮም ኣለኹ” በለ።

²⁵ሽዑ ኢየሱስ መሊሱ ኣእዳዉ ኣብ ኣዒንቱ ኣንበረ፤ ንሱ ድማ ኣፅቢቑ ጠመተ፤ ሓወየ፤ ኵሉ ነገርውን ብንፁር ረአየ።

²⁶ንሱ ድማ ናብ ገዛኡ ሰደዶ፤ “ናብ ዓዲ እኳ ኣይትእቶ” ድማ በሎ።

ኣነ መን ትብሉኒ?

²⁷ኢየሱስን ደቀ መዛሙርቱን ናብ ዓድታት ናይ ፊልጶስ ቂሳርያ ከዱ፤ ኣብ መንገዲ ድማ “ሰባት ንኣይ መን ይብሉኒ?” ኢሉ ጠየቖም።

²⁸ንሳቶም ድማ “መጥምቕ ዮሃንስ፤ ገሊኣቶም ከዓ ‘ኤልያስ’ ገሊኣቶም ድማ ‘ሓደ ኻብ ነቢያት’ ይብሉ” በልዎ።

²⁹ንሱ ድማ “ንስኻትኩምከ ንኣይ መን ትብሉኒ?” ኢሉ ጠየቖም። ጴጥሮስ ከዓ “ንስኻ ክርስቶስ ኢኻ” ኢሉ መለሰሉ።

³⁰ብዛዕባኡ ንሓደ እኳ ኸይነግሩ ድማ ኣጥቢቑ ኣጠንቀቖም።

ወዲ ሰብ መከራ ኽቕበል ይግብኦ

³¹ወዲ ሰብ ብዙሕ መከራ ኽቕበል፥ ብሽማግለታትን ብሊቃነ ካህናትን ብመምህራን ሕግን ክንፀግ፥ ክቕተል፥ ድሕሪ ሰለስተ መዓልቲ ድማ ክትስእ ከም ዝግብኦ ኽምህሮም ጀመረ። ³²ነዝ ነገር እዙይ ድማ ኣግሂዱ ተዛረቦ። ጴጥሮስ ከዓ ንበይኑ ወሲዱ ኽገስፆ ጀመረ።

³³ንሱ ግና ግልፅ ኢሉ ንደቀ መዛሙርቱ ጠሚቱ ንጴጥሮስ ገሰፆ፤ “ኦ ሰይጣን፥ ናብ ድሕረይ ኺድ! ንስኻ ናይ ኣቦና ነገር ዘይኮነስ፥ ናይ ሰብ ነገር ኢኻ እትሓስብ ዘለኻ እሞ” በሎ።

³⁴ነቲ ህዝብን ንደቀ መዛሙርቱን ፀዊዑ ድማ ከምዙይ በሎም፦ “ደድሕረይ ክስዕብ ዝደሊ ንነፍሱ ይኽሓድ፥ መስቀሉ ኣልዒሉ ድማ ይስዓበኒ። ³⁵እቲ ንህይወቱ ኸድሕና ዝደሊ ኸጥፍኣ እዩ፤ እቲ ንህይወቱ ምእንታይን ምእንቲ ወንጌልን ዘጥፍኣ ግና ኸድሕና እዩ። ³⁶ሓደ ሰብ ንምሉእ ዓለም ረኺቡ፥ ነፍሱ ግና እንተ ኸሲሩ፥ እንታይ ይጠቕሞ? ³⁷ሰብከ ቤዛ ነፍሱ እንታይ ምሃበ? ³⁸እቲ ኣብዝ ዘማዊን ሓጥእን ትውልዲ ብኣይን ብቓላተይን ዝሓፍር፥ ወዲ ሰብ ድማ ምስ ቅዱሳን መላእኽቲ ብኽብሪ ኣቦኡ ምስ መፀ፥ ብእኡ ኽሓፍር እዩ።”