Markus 8 FHB Father's Heart Bible™

8 ¹A kwanakin nan, sai babban taro ya sāke taruwa, ba su kuma da abin da za su ci. Yesu ya kira almajiransa ya ce,

²“Ina jin tausayin taron nan, domin ga shi kwana uku ke nan suna tare da ni, ba su kuma da abin da za su ci. ³In na sallame su gida da yunwa, za su suma a hanya, domin waɗansunsu daga nesa suka zo.”

⁴Almajiransa suka amsa masa suka ce, “A ina wani zai sami burodin da zai ƙosar da mutanen nan a nan jeji?”

⁵Sai ya tambaye su ya ce, “Burodi guda nawa kuke da shi?” Suka ce, “Guda bakwai.”

⁶Sai ya umarci taron su zauna a ƙasa, ya ɗauki burodin nan guda bakwai, ya yi godiya, ya kakkarya su, ya ba wa almajiransa su rarraba wa mutane, suka kuwa rarraba wa taron. ⁷Suna kuma da 'yan ƙananan kifaye; bayan ya sa musu albarka, sai ya umarci almajiran su rarraba waɗannan ma wa mutane. ⁸Suka ci suka ƙoshi. Suka kuma tattara gutsattsarin da suka rage, kwando bakwai cike. ⁹Mutane wajen dubu huɗu ne suke a wurin. Sai ya sallame su.

¹⁰Nan da nan sai ya shiga jirgin ruwa tare da almajiransa, suka tafi yankin Dalmanuta.

Zamani Mai Neman Alamu

¹¹Sai Farisiyawa suka zo suka fara yin gardama da shi, suna gwada shi ta wurin neman masa alama daga Sama.

¹²Ya yi ajiyar zuciya mai zurfi a ruhunsa, ya ce, “Me ya sa zamanin nan yake neman alama? Lalle hakika, ina gaya muku, ba za a ba wa zamanin nan wata alama ba.”

¹³Sai ya bar su, ya sāke shiga jirgin ruwa, ya tafi ɗaya gefen.

Ku Yi Hankali da Yistin Farisiyawa

¹⁴Almajiran kuwa sun manta su kawo burodi, sai dai burodi guda ɗaya suke da shi a jirgin ruwa.

¹⁵Sai ya gargaɗe su ya ce, “Ku yi hankali, ku yi lura da yistin Farisiyawa da kuma yistin Hirudus.”

¹⁶Suka fara tattaunawa da juna cewa ba su da burodi.

¹⁷Da Yesu ya san haka, sai ya ce, “Me ya sa kuke tattaunawa cewa ba ku da burodi? Har yanzu ba ku gane ba, ba ku kuma fahimta ba? Zukatanku sun taurare ne? ¹⁸Kuna da idanu, ashe, ba kwa gani? Kuna da kunnuwa, ashe, ba kwa ji? Ba ku kuma tunawa? ¹⁹Sa'ad da na kakkarya burodi guda biyar don mutum dubu biyar, kwando nawa cike da gutsattsari kuka tattara?” Suka ce, “Goma sha biyu.”

²⁰“Sa'ad da kuma na kakkarya guda bakwai don mutum dubu huɗu, kwando nawa cike da gutsattsari kuka tattara?” Suka ce, “Bakwai.”

²¹Sai ya ce musu, “Har yanzu ba ku fahimta ba?”

Wani Makaho Ya Sami Ganin Gari

²²Suka iso Betsaida, inda mutane suka kawo masa wani makaho, suka roƙi Yesu ya taɓa mutumin.

²³Sai ya kama hannun makahon, ya fitar da shi bayan ƙauyen, ya tofa yau a idanunsa, ya ɗibiya hannuwansa a kansa, ya tambaye shi, “Kana ganin wani abu?”

²⁴Ya ɗaga kai ya ce, “Ina ganin mutane, amma suna kama da itatuwa suna tafiya.”

²⁵Sai Yesu ya sāke ɗibiya hannuwansa a idanun mutumin; sai ya zura ido sosai, ya warke, ya ga kome a fili.

²⁶Sai ya sallame shi gida, yana cewa, “Kada ma ka shiga ƙauyen.”

Wane Ne Ni a Cewarku?

²⁷Yesu da almajiransa suka tafi ƙauyukan Kaisariya Filibi. A hanya sai ya tambaye su, “Wane ne ni a cewar mutane?”

²⁸Suka ce masa, “Yohanna Mai Baftisma; waɗansu kuwa suna cewa Iliya; waɗansu kuma, ɗaya daga cikin annabawa.”

²⁹Sai ya tambaye su, “Amma ku, wane ne ni a cewarku?” Bitrus ya amsa ya ce, “Kai ne Almasihu.”

³⁰Sai ya tsananta musu gargaɗi kada su gaya wa kowa game da shi.

Dole Ɗan Mutum Ya Sha Wahala

³¹Sai ya fara koya musu cewa dole Ɗan Mutum ya sha wahala mai yawa, dattawa da manyan firistoci da malaman Attaura kuma su ƙi shi, a kashe shi, bayan kwana uku kuma ya tashi. ³²A fili ya faɗi wannan. Sai Bitrus ya ja shi gefe ya fara tsawata masa.

³³Amma ya juya, ya dubi almajiransa, ya tsawata wa Bitrus ya ce, “Ka koma bayana, Shaiɗan! Gama ba ka kafa tunaninka a kan abubuwan Ubanmu ba, sai dai a kan abubuwan mutum.”

³⁴Sai ya kira taron da almajiransa ya ce musu, “Duk mai son bina, sai ya ƙi kansa, ya ɗauki gicciyensa, ya kuma bi ni. ³⁵Gama duk mai son ceton ransa, zai rasa shi; amma duk wanda ya rasa ransa saboda ni da kuma bishara, zai cece shi. ³⁶Wace riba ce mutum zai samu in ya ci riba ta dukan duniya, amma ya rasa ransa? ³⁷Ko kuwa me mutum zai iya bayarwa a madadin ransa? ³⁸Gama duk wanda ya ji kunyata da kuma kalmomina a cikin zamanin nan na mazinata da masu zunubi, Ɗan Mutum ma zai ji kunyarsa, sa'ad da ya zo cikin ɗaukakar Ubansa tare da mala'iku masu tsarki.”