Marko 8

Sura ya 8.

8 ¹Katika siku hizo, tena mkusanyiko mkubwa ulikusanyika, nao hawakuwa na chakula. Yesu akawaita wanafunzi wake, akawaambia,

²"Nawahurumia mkutano huu—wamekuwa nami sasa siku tatu, wala hawana chakula. ³Nikiwaaga waende zao majumbani mwao wakiwa na njaa, watazimia njiani—kwani baadhi yao wametoka mbali."

⁴Wanafunzi wake wakamjibu, "Awezaje mtu kuwashibisha watu hawa mikate hapa nyikani?"

⁵Akawauliza, "Mna mikate mingapi?" Wakasema, "Saba."

⁶Akauamuru mkutano uketi chini, akaitwaa ile mikate saba, akashukuru, akaimega, akawapa wanafunzi wake ili wawagawie watu; nao wakawagawia mkutano. ⁷Walikuwa pia na visamaki vichache; baada ya kuvibariki, akawaambia wanafunzi wawagawie watu na hivyo. ⁸Wakala, wakashiba. Wakaokota vipande vilivyosalia, vikapatikana vikapu saba. ⁹Nao waliokuwepo walikuwa watu wapatao 4,000. Kisha akawaaga.

¹⁰Mara akaingia katika mashua pamoja na wanafunzi wake, akaenda pande za Dalmanutha.

Kizazi Kinachodai Ishara

¹¹Mafarisayo wakaja, wakaanza kushindana naye, wakimjaribu kwa kumtaka ishara kutoka mbinguni.

¹²Akaugua sana rohoni mwake, akasema, "Mbona kizazi hiki kinatafuta ishara? Amin nawaambia, hakitapewa kizazi hiki ishara yoyote."

¹³Akawaacha, akaingia tena mashuani, akaenda ng'ambo.

Jihadharini na Chachu ya Mafarisayo

¹⁴Nao walikuwa wamesahau kuchukua mikate—hawakuwa na zaidi ya mkate mmoja mashuani.

¹⁵Akawaonya, akasema, "Angalieni—jihadharini na chachu ya Mafarisayo na chachu ya Herode."

¹⁶Nao wakaanza kusemezana wao kwa wao ya kuwa hawana mikate.

¹⁷Yesu, akiyafahamu hayo, akawauliza, "Mbona mnasemezana kwamba hamna mikate? Je, bado hamtambui wala kufahamu? Je, mioyo yenu imekuwa migumu? ¹⁸Mnayo macho, hamwoni? Mnayo masikio, hamsikii? Wala hamkumbuki? ¹⁹Nilipoimega ile mikate mitano kwa ajili ya wale 5,000, mliokota vikapu vingapi vilivyojaa vipande?" Wakasema, "Kumi na viwili."

²⁰"Nami nilipoimega ile saba kwa ajili ya wale 4,000, mliokota vikapu vingapi vilivyojaa vipande?" Wakasema, "Saba."

²¹Akawaambia, "Je, bado hamfahamu?"

Kipofu Apata Kuona

²²Wakafika Bethsaida, watu wakamletea kipofu, wakamsihi Yesu amguse.

²³Akamshika mkono yule kipofu, akamtoa nje ya kijiji, akamtemea mate machoni, akaweka mikono yake juu yake, akamuuliza, "Waona kitu chochote?"

²⁴Akatazama juu, akasema, "Naona watu, lakini wanaonekana kama miti inayotembea."

²⁵Kisha Yesu akaweka tena mikono yake juu ya macho ya yule mtu; naye akatazama sana, akaponywa, akaona vyote waziwazi.

²⁶Akampeleka nyumbani kwake, akisema, "Usiingie hata kijijini."

Ninyi Mwasema Mimi ni Nani?

²⁷Yesu na wanafunzi wake wakaenda katika vijiji vya Kaisaria-Filipi. Walipokuwa njiani akawauliza, "Watu husema mimi ni nani?"

²⁸Wakamwambia, "Yohana Mbatizaji; na wengine husema Eliya; na wengine, mmojawapo wa manabii."

²⁹Ndipo akawauliza, "Lakini ninyi mwasema mimi ni nani?" Petro akamjibu, "Wewe ndiwe Kristo."

³⁰Akawaonya vikali wasimwambie mtu yeyote habari zake.

Mwana wa Adamu Hana Budi Kuteseka

³¹Akaanza kuwafundisha kwamba Mwana wa Adamu hana budi kuteseka mengi, na kukataliwa na wazee, na wakuu wa makuhani, na waandishi, na kuuawa, na baada ya siku tatu kufufuka. ³²Akasema neno hilo waziwazi. Naye Petro akamchukua kando, akaanza kumkemea.

³³Lakini yeye akageuka, akawatazama wanafunzi wake, akamkemea Petro, akisema, "Nenda nyuma yangu, Shetani! Kwa maana mawazo yako si ya mambo ya Baba yetu, bali ya mambo ya wanadamu."

³⁴Akauita mkutano pamoja na wanafunzi wake, akawaambia, "Mtu yeyote akitaka kunifuata, na ajikane mwenyewe, ajitwike msalaba wake, anifuate. ³⁵Kwa maana mtu yeyote atakaye kuiokoa nafsi yake ataipoteza; na mtu yeyote atakayeipoteza nafsi yake kwa ajili yangu na kwa ajili ya habari njema, ataiokoa. ³⁶Kwani yamfaa nini mtu kuupata ulimwengu wote, kisha akapata hasara ya nafsi yake? ³⁷Au mtu atatoa nini badala ya nafsi yake? ³⁸Kwa maana mtu yeyote atakayenionea aibu mimi na maneno yangu katika kizazi hiki cha uzinzi na dhambi—Mwana wa Adamu naye atamwonea aibu, atakapokuja katika utukufu wa Baba yake pamoja na malaika watakatifu."