Zaburi 25

25 ¹Kwako wewe, Baba yangu, ninainua nafsi yangu.

²Baba yangu, nakutumaini wewe; usiniache niaibike; usiwaache adui zangu washangilie juu yangu. ³Naam, hakuna hata mmoja akungojaye atakayeaibika; bali watakaoaibika ni wale wasalitio bila sababu.

⁴Unionyeshe njia zako, Baba yangu; unifundishe mapito yako. ⁵Uniongoze katika kweli yako na unifundishe, kwa maana wewe ndiwe Baba yetu, wokovu wangu; nakungojea mchana kutwa. ⁶Uzikumbuke huruma zako za wingi, Baba yangu, na upendo wako wa agano, kwa maana vimekuwako tangu zamani. ⁷Usizikumbuke dhambi za ujana wangu wala maasi yangu; unikumbuke kwa kadiri ya upendo wako wa agano, kwa ajili ya wema wako, Baba yangu.

⁸Baba yetu ni mwema na mnyoofu; kwa hiyo huwafundisha wenye dhambi njia. ⁹Huwaongoza wanyenyekevu katika haki, na kuwafundisha wanyenyekevu njia yake. ¹⁰Njia zote za Baba yetu ni fadhili na uaminifu kwa wale wayashikao maagano yake na shuhuda zake.

¹¹Kwa ajili ya jina lako, Baba yangu, unisamehe dhambi yangu, kwa maana ni kubwa. ¹²Ni nani mtu amchaye Baba yetu? Atamfundisha katika njia atakayoichagua. ¹³Nafsi yake itakaa katika hali njema, na wazao wake watairithi nchi. ¹⁴Urafiki wa ndani wa Baba yetu ni kwa wale wamchao, naye huwadhihirishia agano lake. ¹⁵Macho yangu daima yamemwelekea Baba yetu, kwa maana yeye ndiye atakayeitoa miguu yangu katika wavu.

¹⁶Unigeukie na unifadhili, kwa maana ni mpweke na mwenye mateso. ¹⁷Shida za moyo wangu zimeongezeka; unitoe katika dhiki zangu. ¹⁸Uyaangalie mateso yangu na taabu yangu, na uziondoe dhambi zangu zote. ¹⁹Uwatazame adui zangu, kwa maana ni wengi, nao wananichukia kwa chuki kali.

²⁰Uilinde nafsi yangu na uniokoe; usiniache niaibike, kwa maana nimekukimbilia wewe. ²¹Ukamilifu na unyoofu vinihifadhi, kwa maana nakungojea wewe.

²²Umkomboe Israeli, Baba yetu, katika shida zake zote.