Uba Ya Bayyana Ɗansa

A kan dutse tufafinsa suka yi fari fat suna haske, muryar Ubansa kuma ta kira shi Ɗa ƙaunatacce. A ƙasa, wani uba wanda almajiran suka kasa taimakon ɗansa ya ce ya gaskata, ya kuma roƙi taimako game da rashin bangaskiyarsa. Sha Biyun suka yi gardama a kan wanene mafi girma; Yesu ya sa ɗan yaro a tsakiyarsu.

Babi na 9.

Ya ce musu, “Lalle hakika, ina gaya muku, waɗansu daga cikin waɗanda suke tsaye a nan ba za su ɗanɗana mutuwa ba sai sun ga Mulkin Ubanmu ya zo da iko.”

Bayan kwana shida, sai Yesu ya ɗauki Bitrus da Yaƙubu da Yahaya, ya kai su kan wani dutse mai tsawo su kaɗai, sai aka canja kamanninsa a gabansu. Tufafinsa suka zama masu haske, farare ƙwarai—farare fiye da yadda kowane mai wanki a duniya zai iya wanke su fari. Sai Iliyasu ya bayyana musu tare da Musa, suna magana da Yesu.

Bitrus ya ce wa Yesu, “Mallam, ya yi kyau da muke nan. Bari mu yi bukkoki uku—ɗaya dominka, ɗaya domin Musa, ɗaya kuma domin Iliyasu.” Bai san abin da zai ce ba, gama tsoro ya kama su ƙwarai.

Sai wani girgije ya bayyana ya rufe su, sai murya ta fito daga girgijen, “Wannan Ɗana ne ƙaunataccena. Ku saurare shi!”

Nan da nan, da suka waiwaya, ba su ƙara ganin kowa tare da su ba sai Yesu kaɗai.

Da suna saukowa daga dutsen, sai ya umarce su kada su gaya wa kowa abin da suka gani, sai Ɗan Mutum ya tashi daga matattu. Saboda haka suka riƙe maganar a zuciyarsu, suna tambayar junansu ko mene ne ma'anar tashi daga matattu. Suka tambaye shi, “Me ya sa malaman Attaura suke cewa dole Iliyasu ya zo da farko?”

Ya ce, “Hakika Iliyasu zai zo da farko ya kuma gyara kome. To, don me aka rubuta cewa dole Ɗan Mutum ya sha wahala mai yawa a kuma rena shi? Amma ina gaya muku, Iliyasu ya riga ya zo, suka kuwa yi masa duk abin da suka ga dama, kamar yadda aka rubuta game da shi.” ^a

Matsananciyar Bangaskiyar Wani Uba

Da suka dawo wurin sauran almajiran, sai suka ga wani babban taro kewaye da almajiran, da malaman Attaura suna gardama da su. Nan da nan da dukan taron suka ga Yesu, sai suka yi mamaki ƙwarai, suka ruga don su gaishe shi.

Ya tambaye su, “Kan me kuke gardama da malaman Attaura?”

Wani daga cikin taron ya amsa masa ya ce, “Mallam, na kawo maka ɗana; yana da wani ruhu da ya hana shi magana. Duk sa'ad da ya kama shi, sai ya buga shi ƙasa. Yana fitar da kumfa a baki, yana cizon haƙora, jikinsa kuma yana sandarewa. Na roƙi almajiranka su fitar da shi, amma suka kāsa.”

Ya amsa ya ce, “Ya ku zamani marar bangaskiya, har yaushe zan kasance tare da ku? Har yaushe zan jure muku? Ku kawo mini shi.”

Suka kawo masa yaron. Da ruhun ya ga Yesu, nan da nan sai ya murɗa yaron; ya faɗi ƙasa, yana birgima yana fitar da kumfa a baki.

Yesu ya tambayi mahaifin yaron, “Tun yaushe wannan yake faruwa da shi?” Ya ce, “Tun yana ƙarami.”

“Sau da yawa yakan jefa shi cikin wuta da ruwa domin ya hallaka shi. Amma in za ka iya yin wani abu, ka ji tausayinmu, ka taimake mu.”

Yesu ya ce masa, “‘In za ka iya’? Kome mai yiwuwa ne ga wanda ya gaskata.”

Nan da nan mahaifin yaron ya yi ihu ya ce, “Na gaskata; ka taimaki rashin bangaskiyata!”

Da Yesu ya ga taron suna ruga wuri ɗaya, sai ya tsawata wa ƙazamin ruhun ya ce, “Kai ruhu kurma kuma bebe, na umarce ka—ka fito daga gare shi, kada ka ƙara shiga cikinsa!”

Da ruhun ya yi ihu ya kuma murɗa shi ƙwarai, sai ya fito. Yaron ya yi kama da gawa, har mutane da yawa suka ce, “Ya mutu.” Amma Yesu ya kama hannunsa ya tashe shi, sai ya tsaya.

Da Yesu ya shiga gida, sai almajiransa suka tambaye shi a ɓoye, “Me ya sa muka kāsa fitar da shi?”

Ya ce musu, “Irin wannan ba ya fita sai ta wurin addu'a.”

Dole Ɗan Mutum Ya Mutu

Suka bar wurin suka ratsa cikin Galili. Yesu bai so kowa ya san inda suke ba,

gama yana koya wa almajiransa, yana ce musu, “Za a ba da Ɗan Mutum ga hannun mutane. Za su kashe shi, kuma bayan kwana uku zai tashi.”

Amma ba su gane abin da yake nufi ba, suna kuma jin tsoron tambayarsa.

Mafi Ƙanƙanta Zai Zama Mafi Girma

Suka iso Kafarnahum. Da suna cikin gida, sai ya tambaye su, “Kan me kuke gardama a hanya?”

Amma suka yi shiru, don a hanya sun yi gardama a kan ko wa ya fi girma.

Sai ya zauna, ya kira Sha Biyun, ya ce musu, “Duk mai son zama na farko, dole ya zama na ƙarshe ga kowa, bawan kowa kuma.”

Sai ya ɗauki wani ƙaramin yaro, ya tsai da shi a tsakiyarsu, ya rungume yaron, sai ya ce musu,

“Duk wanda ya karɓi ɗaya daga cikin ƙananan yara irin waɗannan da sunana, ni ya karɓa; duk kuma wanda ya karɓe ni, ba ni ya karɓa ba, sai dai wanda ya aiko ni.”

Tare da Mu, Ba Gāba da Mu Ba

Yahaya ya ce masa, “Mallam, mun ga wani yana fitar da aljanu da sunanka, muka kuwa yi ƙoƙari mu hana shi, don ba ya bin mu.”

Amma Yesu ya ce, “Kada ku hana shi—babu wanda zai yi mu'ujiza da sunana, sa'an nan da sauri ya iya faɗar mugun abu game da ni. Gama duk wanda ba ya gāba da mu, yana tare da mu ne. Lalle hakika, ina gaya muku, duk wanda ya ba ku kwaf ruwa ku sha domin ku na Almasihu ne, lalle ba zai rasa ladarsa ba.

Kada Ku Ɓatar da Ƙananan Yara

Duk wanda ya sa ɗaya daga cikin ƙananan nan da suka gaskata da ni ya yi tuntuɓe—gara a rataya masa babban dutsen niƙa a wuya a jefa shi cikin teku. In hannunka ya sa ka yi tuntuɓe, ka yanke shi. Gara ka shiga rai da nakasasshen hannu, da ka shiga jahannama da hannuwa biyu, cikin wutar da ba a kashewa. ^b

In ƙafarka ta sa ka yi tuntuɓe, ka yanke ta. Gara ka shiga rai da gurguntaka, da a jefa ka cikin jahannama da ƙafafu biyu. ^c

In idonka ya sa ka yi tuntuɓe, ka ƙwaƙule shi. Gara ka shiga Mulkin Ubanmu da ido ɗaya, da a jefa ka cikin jahannama da idanu biyu, inda ‘tsutsarsu ba ta mutuwa, wutar kuma ba ta taɓa mutuwa.’

Gama za a yi wa kowa gishiri da wuta. Gishiri yana da kyau, amma in gishiri ya rasa daɗinsa, da me za a sāke sa masa daɗi? Ku kasance da gishiri a cikinku, ku kuma zauna lafiya da juna.”