Mark 9

Chapter 9.

9 ¹Ana athumli hānga, "Kachangkhat eina ina nathumli kahāngna, hili nganingda lei mi kaikhana, ithumwui Avā wungram pangshap eina kharā chi matheiranglakha kathi mamazapki."

²Zimiksho tharuk thangwui thili Jishuna Peter, James kala John chi, kaphung kajuiva̱ akhali athum māng kāda thānphungda apama, kala athumwui miktāli Jishu azak onhaowa. ³Awui kachon charshi eina horchamrihai. Okathuili mi akhana ngasa̱sera theiranglakha lāngda charmei. ⁴Kala Elijahna Moses eina ngasoda shokta, Jishuli chān ngazekta khalei athumna thei.

⁵Peterna Jishuli hānga, "Ojā, ithum hili lei chi phālakhaira. Akha nawui vang, akha Moseswui vang, kala akha Elijahwui vang, rāmnao kathum ithumna sākhuisa." ⁶Ana khi hāngra kaji matheimana, kaja athum khakshingakhaowa.

⁷Muiyā akha shokta athumtungli farorhai, kala muiyāwui eina akhon akha rāhānga, "Hi iwui leikashe Anaomayarana. Ali nganālu!"

⁸Athumna kashuirak eina kuimareida yanga tharan, Jishu maningla athumli ngasoda khipākha maleisāthuwa.

⁹Kaphungwui eina katā tharan, ana miwui Naomayarana kathiwui eina ringshokranglakha eina tangda athumna theikahai chi khipālikha mahāngalu da athumli ningmi. ¹⁰Chieina athumna maram chi athum khalatta ngachaili singtita, kathiwui eina ringshok kaji kakhalat khikhala da ngahānngaroka. ¹¹Chieina athumna ali ngahāna, "Chithākha khi sāda ain kathembingna Elijahna rāriphalungra da hāngkhala?"

¹²Ana hānga, "Elijahna rimeikapta rālaga saikora shirinluishitra. Chithākha khi sāda miwui Naomayarana kachot kachāng kachungkha phungra kala mana̱shi samphangra da kapihaida leikhala? ¹³Kha ina nathumli kahāngna, Elijah rāhaira, kala awui maramli kapihaida lei tākam eina, mibingna ali athumwui ningkachāng eina sāhaira." ^a a v13 Jishuna ra̱hikkhame Johnwui maramli hānga, ana Elijahwui manglā kala pangshap eina rāhai.

Avā Akhawui Kakhavao Shitkasang

¹⁴Khangatei sākhangatha̱bingli rā tharan, sākhangatha̱bingwui kuimareida mi kachungkha kahakva̱ athumna thei, kala ain kathembingna athumli ngayāt khangaroka. ¹⁵Mi kachungkha katonga china Jishuli theihaida matakhakhaowa, kala yongrāda ali shālam mi.

¹⁶Ana athumli ngahāna, "Nathumna ain kathembingli khiwui pongli ngayāt khangazekkhala?"

¹⁷Mi kachungkhawui ngachaili mi akhana ali ngahānkai, "Ojā, ina iwui naomayarali nawuili khuirai; ali matui ngasak makasā manglā akha awuili lei. ¹⁸Awuili singhaida tharan, ali ngaleili horkarsanga. Akhamorli aporhop shokta, ahā tarilaga, marar ngasaka. Ina nawui sākhangatha̱bingli chi kashamshokmi khavai poi, kha athum masāmirarthuwa."

¹⁹Jishuna ngahānkai, "He mashitkasang mithot, ina nathumli karankha ngasopamfarakhala? Nathumli karankha ja̱mifarakhala? Ali iwuili khuirālu."

²⁰Athumna naoshinaopā chi awuili khuirai. Jishuli kathei eina, raih china ngalāngda ali nganurkazama; ana ngaleili pilaga, nganurda kala akhamorli aporhop shoka.

²¹Jishuna naoshinaopāwui avāli ngahāna, "Hi awuili karankha eina shokmahungkhala?" "Nganuilakhawui eina," da ana hānga.

²²"Ali sāshimān khavai ra̱ra̱ meili kala tara̱li horkarsanga. Kha nana khikha sāpaiakha, ithumli lumashanmida ngachonmilu."

²³Jishuna ali hānga, "'Nana sāpaiakha' da hāngla? Shitkasanga miwui vanga ot saikora sāpaisera."

²⁴Ngalāngda naoshinaopāwui avā china vaoda hānga, "I shitsanga; iwui mashitkasang chi ngachonmilu!"

²⁵Jishuna mi kachungkha phālak eina rākazipmahung chi kathei eina, makathar manglā chili khararda hānga, "Khak khangasha̱ kala khangakhok manglā, ina nali kakasona, awui eina shokhaolu, kala awuili mazangluialu!"

²⁶Panglāk eina vaoda ali nganurkazamlaga, chi shokhaowa. Ana khamāng kathā sāhaoda, mi kachungkhana "A thihaira" da hānga. ²⁷Kha Jishuna awui pāng singkhuida khāngmathota, kala ana nganinga.

²⁸Jishu shimli zang tharan, awui sākhangatha̱bingna ali ngathumsāda ngahāna, "Kachiwui vang eina ithumna chi makashamshokrarthukhala?"

²⁹Ana athumli hānga, "Hi yur chi seihā eina maningla shokhaopaira."

Miwui Naomayara Thiphalungra

³⁰Athumna chiwui eina thuilaga Galilee ngareivāhaowa. Jishuna athum kali leikhala kachikathā mina theikhavai mangaimana,

³¹kaja ana awui sākhangatha̱bingli tamchitheida leisai, athumli hānga, "Miwui Naomayarali miwui pāngli mikakāra. Athumna ali shaothatra, kala kakathumathangwui thili ana ringshokra."

³²Kha athumna ana kahāng tui chi bhap matārarthuwa, kala ali ngahānkhavai athum ngachee.

Teokhamei China Reimeikap Sāphalungra

³³Athum Capernaumli rai. Shimli ana athumli ngahāna, "Nathumna shongfali khiwui pongli ngayāt khangarok sākhala?"

³⁴Kha athum kasaikha pama, kaja athumna shongfali khipa reimeikapkhala da ngayāt khangarok sāhaira.

³⁵Ana pamda, awui sākhangatha̱ tharāda khani chi hokhuida, athumli hānga, "Kachikathāna khare sāki jiakha, saikorawui khanaowa kala saikorawui raonao sāphalungra."

³⁶Ana naoshinao akha khuida, athumwui ngachaili nganing ngasakta, nao chi vamkhuida, athumli hānga:

³⁷"Kachikathāna hikathā naoshinaobingwui ngachaili akhali iwui mingwui vang khuikasanga china ili khuikasangna; ili khuikasanga china ili maningla, ili kashirāta chili khuikasangna."

Ithumwui Vangna, Ithumli Makhamayā Maningmana

³⁸Johnna Jishuli hānga, "Ojā, nawui ming eina mi akhana kameo kashamshok ithumna thei, kala ithumna ali masāluialu da khāmhaowa, khikhalajila a ithumli mashurmana."

³⁹Kha Jishuna hānga, "Ali mahaphaialu, kaja iwui ming eina matakhak kahai ot sā mi china thākta ili makaphā tui mahāngpaimara. ⁴⁰Kaja kachikathāna ithumli makhamayā maningakha china ithumwui vangna. ⁴¹Kachangkhat eina ina nathumli kahāngna, kachikathāna nathum Khristawuina kaji vang nathumli tara̱ kap akha mang khavai mimangakha, kachilikha awui sāman chi mashimānlakmara.

Naoshinaobingli Morei Masāngasakalu

⁴²Kachikathāna ili shitkasanga hikathā naoshinaobingwui ngachaili morei akhali sāngasakakha, chikathā miwui akahungli lungriham kahaka akha hokthāngmihailaga shamadruli horsang kahaina phāmei. ⁴³Napāngna nali morei sāngasakakha, chi katattāhaolu. Pāng khani kālaga kazeiramli, mamitkharar mei chili, zangki kajile, sheisha̱laga kharingli kazang phāmei. ^b b v43 Khareyang khavai lairikbingli hili verse 44 maleisai; chiwui thili kakapibingna hi sangmisai: "apam chili athumwui kachai mathida, mei chi mamitmana."

⁴⁵Napheina nali morei sāngasakakha, chi katattāhaolu. Phei khani kālaga kazeiramli horsangki kajile, phei teklaga kharingli kazang phāmei. ^c c v45 Khareyang khavai lairikbingli hili verse 46 maleisai; chiwui thili kakapibingna hi sangmisai: "apam chili athumwui kachai mathida, mei chi mamitmana."

⁴⁷Namikna nali morei sāngasakakha, chi latshokkhuilaga horhaolu. Mik akhamāng kālaga ithumwui Avā wungramli kazang chi, mik khani kālaga kazeiramli horsang kahai chila phāmei, ⁴⁸apam chili 'athumwui kachai kachilikha mathida, mei chi kachilikha mamitmana.'

⁴⁹Kaja mi saikorali mei eina tumngasakra. ⁵⁰Machi chi phālaka, kha machina awui katum shimānhaiakha, kathada chi tumngasakluipairakhala? Nathum kapupta machi haichinglu, kala kateikatei ngasoda chingri kahai eina leiranu."