Mark 10

Chapter 10.

10 ¹Ana apam chiwui eina shokta Judeawui ngalei kala Jordan kānda vai; mi kachungkhana awui ngalemli latluida rākazipa, kala awui khangachā athishurda ana athumli latluida tamchithei.

²Phariseebing kaikhana ali chāng tamyang khavai rālaga, "Mi akhana apreiva̱li pānghai hi ainlā?" da ngahāna.

³Ana athumli ngahānkai, "Mosesna nathumli khi ningmihaikhala?"

⁴Athumna hānga, "Mosesna mayarnaoli kapāngwui lairik kapisanglaga apreiva̱li chiho khavai mayāhaowa."

⁵Jishuna athumli hānga, "Nathumwui ning khamararwui vang eina ana nathumli ningkhami hi kapisanghai. ⁶Kha sākahaiwui haokaphokwui eina ithumwui Avāna athumli mayarnao kala sha̱nao sāhaira. ⁷'Maram hiwui vang eina mayarnao akhana ava̱ eina avāli horhaida apreiva̱li ngarumhaora, ⁸kala ani khani asā akha ngasāhaora.' Chiwui vang athum ani khani maningluimana; asā akhamāngna. ⁹Chithākha ithumwui Avāna ngakummi kahai chili mi khipānakha masākhaiaranu."

¹⁰Athum shimli ungkashung tharan awui sākhangatha̱bingna hiwui pongli ali latluida ngahāna.

¹¹Ana athumli hānga, "Kachikathāna apreiva̱li pānghailaga sha̱nao khangateili khuiakha, ana awuitungli phophāhaira, ¹²kala anala agaharali pānghailaga khangatei akhali khuiakha, ana phokaphāna."

Avāna Naoshinaobingli Zangngasaka

¹³Mibingna naoshinaobingli ali sāza̱ ngasak khavai awui ngalemli khuirā, kha sākhangatha̱bingna athumli kahara.

¹⁴Jishuna hi theida malungvāthaoda hānga, "Naoshinaobing chili iwui ngalemli rāngasaklu, kala athumli mahaphaialu, kaja ithumwui Avā wungram chi athum kathāwuina. ¹⁵Kachangkhat eina ina nathumli kahāngna, naoshinao thada ithumwui Avā wungram hi makhuikasanga mi china kachilikha chili mazangrarlakmara."

¹⁶Chieina ana athumli avamli vamkhuida, athumwuitungli awui pāng parrorlaga somi.

Kachungkha Khaleida Thing Akha Makhalei Mi

¹⁷Ana shongfali tunvāmamānlakha, mi akhana yongvālaga awui mangali khuktizangta, "Kaphā Ojā, katang makhavai kharing mathunkhui khavai ina khi sārakhala?" da ngahāna.

¹⁸Jishuna ngahāna, "Khisāda ili kaphā da kahokhala? Ithumwui Avā mānga maningla khipākha kaphā maleimana. ¹⁹Nana ningkhamibing thei: 'Mi mashaothatpaimana, maphophāpaimana, maleepaimana, lah makhamayāwui shakhi masāpaimana; khalāng ot masāpaimana; nashāvā eina nava̱va̱li khayāshilu.'"

²⁰Ana ali hānga, "Ojā, ina saikora hi nganuilakhawui eina thuida mayonrā kahaina."

²¹Jishuna ali yangkālaga leishihaowa. "Nawui khavāt akha leifaya: vālu, nawui khalalei chi saikora yorhailaga kachāmnaobingli yaohaolu, chithākha na kazingramli lan samphangra; chiwui thili rāda ithi shurlu."

²²Hi tui chi shālaga amai chothaowa, kala ana wukkhananglak eina thuihaowa, khikhalajila awuili lan kachungkha leisai.

²³Jishuna kuimareida yangkālaga awui sākhangatha̱bingli hānga, "Ithumwui Avā wungramli zangkida lan kachungkha khaleinaobingwui vang kayākha sakrakhala!"

²⁴Sākhangatha̱bing china awui tui chili matakhakhaowa. Jishuna athumli hāngluishita, "Inaongarā, ithumwui Avā wungramli zangkida kayākha sakrakhala! ²⁵Kashānga mina ithumwui Avā wungramli zangki kachiliva utna kapimkhurli ngara̱kashokna paimei."

²⁶Athumna matai eina matakhakhaida akha eina akhali hānga, "Chithākha khipā kahui samphangrakhala?"

²⁷Jishuna athumli yangkālaga hānga, "Mibingwui vang hi masākapaina; kha ithumwui Avāwui vang maningmana, kaja ithumwui Avāwui vang ot saikora sapaisera."

²⁸Peterna ali hāngphokuwa, "Yanglu, ithumna saikora horhailaga nali shurhaira."

²⁹Jishuna hānga, "Kachangkhat eina ina nathumli kahāngna, iwui vang eina paokaphāwui vang shim, gato, gatuiva̱, ava̱va̱, ashāvā, nao, lah lui horkasana,

³⁰khalei thotli, ara, shim, gato, gatuiva̱, ava̱va̱bing, nao, lui shākha thada, rekakharekla ngasoda kala aruihonwui thotli katang makhavai kharing masamphangki kaji khipākha maleimana. ³¹Kha khare kachungkha china naora, kala khanaowa china rira."

Jishuna Awui Kathiwui pong Kathumathang Sāngngarānda Hānga

³²Jerusalemli kāhao shongfali, Jishuna athumli rida zata. Athum matakhakhai, kala shurkazatabing ngacheehaowa. Katonga chi latluida hokhuilaga, awuili shokki kaji chi athumli hāngphokuwa:

³³"Yanglu, ithum Jerusalemli kāhoki jiura. Miwui Naomayarali pāngmon akhokabing eina ain kathembingwui pāngli horsangmira, kala athumna ali kathiwui khayon mihaida Gentilebingwui pāngli horsangmira. ³⁴Athumna ali mana̱shira, machora̱la mashorrorra, ngaphita ngaphitra, kala ali shaothatra; kathumthangwui thili ana ringshokra."

Otram Ngatha̱mi Eina Reikhamatai

³⁵Zebedeewui naomayara James eina Johnna Jishuwuili rālaga hānga, "Ojā, inina kapopo chi nana iniwui vang sāmi da ini ningchāng."

³⁶Chieina ana athumli hānga, "Ina naniwui vang khi sāmi da nani ningchāngkhala?"

³⁷Anina ali hānga, "Nawui tekhamateili, akhana nawui yāshong kala akhana nawui uishong, ini pamkhavai kasamilu."

³⁸Jishuna anili hānga, "Nani kapo sāmi chi khikhala, nanina matheimana. Ina mangki tengkot chi nanina mang khavai shapa, lah ina ra̱hikmi kaji ra̱kahik eina nani ra̱hikmi khavai shapa?"

³⁹"Ini shapa" da anina hānga. Jishuna anili hānga, "Ina mangki kaji tengkot chi nanina mangra; ina ra̱hikmi kaji ra̱kahik eina nani ra̱hikmira, ⁴⁰kha iwui yāshongli lah uishongli pamki chi I chigatmi kaji maningmana, chiya ngarān sākahaibingwui vangna."

⁴¹Hi shālaga sākhangatha̱ tharā china James eina Johnli malungvāthaowa.

⁴²Jishuna athumli hokhuida hānga, "Gentilebingwui khamungabing thada shānkhuibingna athumwuitungli khayaiya, kala athumwui khangam khareibingna athumwuitungli pangshap lei kaji nathumna thei. ⁴³Kha nathumwui ngachaili chithāda maleimana. Nathum ngachaili hakki kaje chi nathumwui otram ngatha̱me sāphalungra, ⁴⁴Kala nathum ngachaili khare sāki hakki kaje chi, saikora mibingwui raonao sāphalungra. ⁴⁵Kaja tangda miwui Naomayarana ali otram ngatha̱mi ngasakmi khavai kharā maningla, kha ana mibingli otram ngatha̱mi khavaina, kala kachungkha mibingwui vang awui mirin ngatangmanwui lan sāda chigatmi khavai kharāna."

Bartimaeusna Awui Mik Theikhui Samphang

⁴⁶Athumna Jericho vai. Jishu eina awui sākhangatha̱bing mi kachungkha eina zatthui tharan, Timaeuswui naomayara, mik khangapeoa Bartimaeus, shongfapheili zāt popamsai. ⁴⁷Chi Nazarethwui Jishu jira da shālaga, ana panglāk eina vaoda hānga, "Jishu, Davidwui naomayara, ili khalumashanmilu!" ⁴⁸Mi kachungkhana ali kasaikha pamlu da khararra; kha ana pangmeikhar vaoda hānga, "Davidwui naomayara, ili khalumashanmilu!"

⁴⁹Jishuna nganingda hānga, "Ali holu." Chieina athumna mik khangapeoa mipa chili hokhuida hānga, "Malung pingmeilu! Ngakarthuilu—ana nali hoi."

⁵⁰Ana awui kachon khayitta ngalāngthuida Jishuwuili rai.

⁵¹Jishuna ali hānga, "Ina nawui vang khi sāmi da na ningchāngkhala?" Mik khangapeoa mipa china ali hānga, "Rabboni, ili mik theihailuishitmilu." ^a a v51 "Rabboni" hi Jishuli malung tāzak eina kala ikhalatta ningkachāng eina hokhuiwui shongfa akhana—"iwui Ojā," shitsang reikhamatai eina hāngkahai tuina.

⁵²Jishuna ali hānga, "Ungulu; nawui shitkasang china nali raingasakhaira." Chieina ana ngalāngda kathei samphangda shongfali Jishuli shurvai.