Mark 10

Chapter 10.

10 ¹E comot from there go di Judea area and di side wey pass Jordan; crowd gather come meet am again, and as e dey do, e teach dem again.

²Some Pharisee come wan test am, dey ask, “Di law gree make man divorce im wife?”

³E answer dem, “Wetin Moses command una?”

⁴Dem talk say, “Moses allow man to write divorce paper give am and send am comot.”

⁵Jesus tell dem, “Na because una heart hard make e write dis command give una. ⁶But from di beginning wey our Papa create everything, our Papa make dem man and woman. ⁷‘Na dis reason make man go leave im papa and mama join imsef to im wife, ⁸and di two go turn one flesh.’ So dem no be two again, but one flesh. ⁹So wetin our Papa don join together, make nobody separate am.”

¹⁰Wen dem don enter house, di disciple dem ask am about dis matter again.

¹¹E tell dem, “Anybody wey divorce im wife go marry another woman don commit adultery against am, ¹²and if she divorce her husband go marry another man, she don commit adultery.”

Di Papa Welcome Small Pikin Dem

¹³People dey bring small pikin dem come meet am make e touch dem, but di disciple dem tokwe dem.

¹⁴Wen Jesus see dis thing, vex catch am and e talk say, “Allow di small pikin dem come meet me; no stop dem, because di kingdom of our Papa na for people wey be like dem. ¹⁵I dey tell una true-true, anybody wey no receive our Papa kingdom like small pikin no go ever enter am.”

¹⁶And e carry dem for im hand, put im hand on dem, and bless dem.

Di Man wey Get Plenty but One Thing Still Dey Miss Am

¹⁷As e dey start go for road, one man run come, kneel down for im front, and ask, “Good Teacher, wetin I go do make I inherit life wey no dey end?”

¹⁸Jesus ask, “Why you dey call me good? Nobody good except our Papa alone. ¹⁹You sabi di commandments: ‘no kill person, no commit adultery, no thief, no talk lie against person; no cheat person; respect your papa and your mama.’”

²⁰E tell am, “Teacher, all dis ones I don keep since I be small.”

²¹Jesus look am and love am. “One thing still dey miss you: go, sell everything wey you get, give di poor people—you go get treasure for heaven—den come follow me.”

²²As e hear dis word, im face fall, and e comot dey grieve, because e get plenty property.

²³Jesus look around and tell im disciple dem, “E go hard well-well for rich people to enter di kingdom of our Papa!”

²⁴Di word shock di disciple dem. Jesus talk to dem again, “My pikin dem, e hard well-well to enter di kingdom of our Papa! ²⁵Camel fit pass for needle eye easy pass wey rich person go enter our Papa kingdom.”

²⁶Dem shock more well and dem dey talk to each other, “Den who fit be saved?”

²⁷Jesus look dem and talk, “For man side, e no possible; but no be so for our Papa side, because everything possible for our Papa.”

²⁸Peter begin tell am, “See, we don leave everything follow you.”

²⁹Jesus talk, “I dey tell una true-true, nobody wey don leave house or brother or sister or mama or papa or pikin or farm because of me and because of di gospel,

³⁰wey no go receive hundred times now, for dis time—house, brother, sister, mama, pikin, farm, with persecution—and for di age wey dey come, life wey no dey end. ³¹But plenty wey dey first go be last, and di last go be first.”

Jesus Talk about Im Death di Third Time

³²For di road wey dem dey climb go Jerusalem, Jesus waka dey front of dem. Dem shock, and di ones wey dey follow dey fear. E carry di twelve go one side again, and begin tell dem wetin dey about to happen to am:

³³“See, we dey go up go Jerusalem. Dem go hand di Pikin of Man over give di chief priest dem and di scribe dem, wey go condemn am to death and hand am over give di Gentile dem. ³⁴Dem go mock am, spit for am, flog am, and kill am; after three days e go rise.”

To Be Big Pass, Na to Serve

³⁵James and John, Zebedee im pikin dem, come meet am and talk, “Teacher, we want make you do for us whatever we ask.”

³⁶E tell dem, “Wetin una want make I do for una?”

³⁷Dem tell am, “Allow us sidon for your glory, one for your right hand, one for your left hand.”

³⁸Jesus tell dem, “Una no sabi wetin una dey ask. Una fit drink di cup wey I dey drink, or make dem baptize una with di baptism wey dem dey baptize me?”

³⁹“We fit,” dem talk. Jesus tell dem, “Di cup wey I dey drink, una go drink; di baptism wey dem dey baptize me, dem go baptize una, ⁴⁰but to sidon for my right or left no be my own to give - na for di people wey dem don prepare am for.”

⁴¹Wen di other ten hear dis thing, vex catch dem for James and John.

⁴²Jesus call dem come together and talk, “Una sabi say di people wey dem take as ruler of di Gentile dem dey lord over dem, and dem big people dey use power on dem. ⁴³But e no be so among una. Instead, anybody wey want be big among una must be una servant, ⁴⁴and anybody wey want be first among una must be slave of everybody. ⁴⁵Because even di Pikin of Man no come make dem serve am, but to serve, and to give im life as ransom for plenty people.”

Bartimaeus Begin See Again

⁴⁶Dem reach Jericho. As Jesus and im disciple dem dey comot with big crowd, blind Bartimaeus, Timaeus im pikin, sidon dey beg for road side. ⁴⁷Wen e hear say na Jesus of Nazareth, e begin dey shout, “Jesus, Pikin of David, take mercy on me!” ⁴⁸Plenty people tokwe am make e keep quiet, but e shout even louder, “Pikin of David, take mercy on me!”

⁴⁹Jesus stop and talk, “Call am.” So dem call di blind man: “Take heart! Stand up—e dey call you.”

⁵⁰E throway im cloth, jump up, and come meet Jesus.

⁵¹Jesus tell am, “Wetin you want make I do for you?” Di blind man tell am, “Rabboni, make I see again.” ^a a v51 “Rabboni” na deep, personal way to call Jesus — “my teacher,” wey person dey talk with plenty trust.

⁵²Jesus tell am, “Go; your faith don heal you.” Sharp-sharp e begin see again, and e follow Jesus for road.