Mark 11

11 ¹Athum Jerusalem vānganaiuda Olive kaphungli khalei Bethphage eina Bethanyli vāshung tharan Jishuna awui sākhangatha̱ khanili rida chihovā,

²anili hānga, "Naniwui khalei mangāshong kha̱ chili vālu, kala chili nanina azangda, matonglakrang mina kaji hokkahai gadhānao akha theira. Chi khalākhuilaga hili khuiunglu."

³Nanili kachikathāna, 'Khisāda hi kasākhala?' da ngahānakha, 'Prohona sāvai khavai lei, kala hengsāda chi hili chihovāhaira' da ngahānkālu.

⁴Anina vāda ayarli chānreili khāmongpheili hokkahai gadhānao akha theilaga, chi khalākhui. ⁵Apam chili khanganing mi kaikhana anili ngahāna, "Gadhānao chi khisāda kakhalākhala?" ⁶Jishuna anili hānghaisai thāda anina ngahānkai, kala mibingna mayāhaowa. ⁷Athumna gadhānao chi Jishuli khuiungmi, kala chiwuitungli athumwui kachon hamihailaga, ana chiwuitungli tongda pama. ⁸Mi kachungkhana athumwui kachon shongfali hamizata; khangateibingna luiwui eina katattā pompa̱ta̱ kahai thingphāng hamizata. ⁹Mangāli vaabing kala khanukli shurabingna panglāk eina vaoda hānga, "Hosanna! Ithumwui Avāwui mingli kharā a chi ka̱lā mahai! ¹⁰Kharā ithumwui avā David wungram chi ka̱lā mahai! Juimeikap kajeli Hosanna!"

¹¹Jishuna Jerusalem kala khorumshimli azanga, ot saikorali kuimareida yanga, kala kazing yinghaira kahaiwui vang katonga chili ngasoda Bethanyli vāhaowa.

Jishuna Khaorārongli Khonshi

¹²Akhama kathā, athum Bethanywui eina thuiuki tharan, Jishu thaihaowa. ¹³Katāda pompa̱ta̱ kahai khaorārong akha theilaga, chiwuitungli khikha lei kajila da yang khavai vāhaowa. Chili vāshung tharan, aphei maningla khikha maleisāthuwa, kaja khaorāthei atam maningthuwa.

¹⁴Chieina ana chili hānga, "Aja eina nawui athei khipānakha katang mashailakranu." Awui sākhangatha̱bingna chi hānga shai.

Jishuna Awui Avāwui Shim Tharngasaka

¹⁵Athumna Jerusalemli vākashung, kala Jishuna khorumshimli azanglaga chili ot khayorbing kala khalobingli kashamshoka. Ana pheisā kakaibingwui tablela kala kha̱na̱ khayorbingwui pamkhongla horkathānmiserhaowa, ¹⁶kala ana khipānakhala khorumshim akāna otyur phungvai khavai mamayāthuwa.

¹⁷Ana athumli tamchitheida hānga, "Hithada kapihaida maleimala: 'Iwui shim chi saikora yurbingwui vang seihā sākhavai shim da hora'? Kha nathumna hi khangaponabingwui akhur sāngasakhaira."

¹⁸Pāngmon akhokabing eina ain kathembingna chi shailaga ali shimān ngasakida apong phai, kaja athumna ali ngacheehaowa; kaja yarui saikorana awui tamkachithei chili matakhakhaowa.

¹⁹Kala ngazin eina athumna keinungwui eina thuihaowa.

²⁰Ngathor athumna kakān tharan khaorārong chi angayung eina thengphoka theihaowa. ²¹Peterna phaningungda ali hānga, "Ojā, yanglu! Nana khonshihaira khaorārong chi thengphohaira."

²²Jishuna athumli ngahānkai, "Ithumwui Avāli shitkasang leilu. ²³Kachangkhat eina ina nathumli kahāngna, khipā akhana kaphung hili 'Khuilaga shamadruli ahorsanghaolu' da hānglaga, awuitungli ningkhamaong maleila, kha awui kahāng chi shokra da shitkasanga a china, chi awui vang eina shokra. ²⁴Chiwui vang eina ina nathumli kahāngna, nathumna seihā sāda kapopo saikora, chi samphanghaira da shitsanglu, chieina chi nathumwui ngasāra. ²⁵Nathumna nganinglaga seihā sā tharan, khipā akhali phen khalei chi pheomilu, chieina kazingramli khalei nathumwui Avānala nathumwui morei pheomira." ^a a v25 Achālakhawui laisikokbingli hili verse 26 maleimana; kharethangwui laisikokbingna hithāda ngasona: "Kha nathumna mapheomiakha, kazingramli khalei nathumwui Avānala nathumwui morei mapheomimara."

Khipāwui Pangshap Eina?

²⁷Athumna Jerusalemli latunga. Jishuna khorumshimli okthuiching leilakha, pāngmon akhokabing, ain kathembing kala ararnaobingna ali rāda, ²⁸kala ngahāna, "Khiwui pangshap eina nana ot hi kasākhala? Kala khipāna nali ot hi sākhavai pangshap hi khamikhala?"

²⁹Jishuna athumli hānga, "Ina nathumli khangahān akha sāga. Ili ngahānkālu, chieina inala khiwui pangshap eina ot hi kasākhala kaji nathumli hāngmira. ³⁰Johnwui ra̱hikkhami hi kazingramwui eina ka, miwui eina khala? Ili ngahānkālu."

³¹Athum akha eina akha ngazek ngaroka, "Ithumna 'Kazingramwui einana' jiakha, ana 'Chithākha khisāda nathumna ali mashitsangthukhala?' da hāngra. ³²Kha 'Mikumowui einana' jisa"—athumna mi kachungkhali ngacheehaowa, kajava saikora mina John chi kachangkhat marān akhana da khuiya.

³³Athumna Jishuli ngahānkai, "Ithum matheimana." Chieina Jishuna hānga, "Inala khiwui pangshap eina ot hi kasākhala kaji nathumli mahāngmara."