Marko 11

11 ¹Walipokaribia Yerusalemu, wakifika Bethfage na Bethania karibu na Mlima wa Mizeituni, Yesu akawatuma wanafunzi wake wawili watangulie,

²akawaambia, "Nendeni katika kijiji kilicho mbele yenu, na mara tu mtakapoingia ndani yake, mtamkuta mwana-punda amefungwa, ambaye hajapandwa na mtu yeyote. Mfungueni, mkamlete hapa."

³Kama mtu yeyote akiwauliza, 'Mbona mnafanya hivi?' semeni, 'Bwana anamhitaji, naye atamrudisha hapa mara moja.'

⁴Wakaenda, wakamkuta mwana-punda amefungwa mlangoni nje barabarani, wakamfungua. ⁵Baadhi ya watu waliokuwa wamesimama pale wakawauliza, "Mnafanya nini, mkimfungua mwana-punda huyo?" ⁶Wakawajibu kama Yesu alivyokuwa amewaambia, nao watu wakawaacha waende. ⁷Wakamleta mwana-punda kwa Yesu, wakatandika mavazi yao juu yake, naye akaketi juu yake. ⁸Watu wengi wakatandaza mavazi yao njiani; wengine wakatandaza matawi yenye majani waliyoyakata mashambani. ⁹Wale waliotangulia na wale waliofuata wakapaza sauti, "Hosana! Amebarikiwa yeye ajaye kwa jina la Baba yetu! ¹⁰Umebarikiwa ufalme ujao wa baba yetu Daudi! Hosana juu mbinguni!"

¹¹Yesu akaingia Yerusalemu na hekaluni, akatazama pande zote kila kitu, na kwa kuwa ilikuwa tayari jioni, akatoka akaenda Bethania pamoja na wale Kumi na Wawili.

Yesu Aulaani Mtini

¹²Siku iliyofuata, walipokuwa wakitoka Bethania, Yesu akaona njaa. ¹³Akiona mtini wenye majani kwa mbali, akaenda kuona kama ulikuwa na kitu juu yake. Alipoufikia, hakuona kitu ila majani tu, kwa sababu haikuwa msimu wa tini.

¹⁴Ndipo akauambia, "Mtu yeyote asile tena tunda kwako milele." Nao wanafunzi wake wakamsikia akisema hayo.

Yesu Aitakasa Nyumba ya Baba yake

¹⁵Wakafika Yerusalemu, naye Yesu akaingia hekaluni, akaanza kuwafukuza wale waliokuwa wakiuza na kununua humo. Akazipindua meza za wabadilishaji fedha na viti vya wale waliouza njiwa, ¹⁶wala hakumruhusu mtu yeyote kuchukua bidhaa kupitia nyua za hekalu.

¹⁷Naye akawafundisha, akisema, "Je, haikuandikwa: 'Nyumba yangu itaitwa nyumba ya sala kwa mataifa yote'? Lakini ninyi mmeifanya kuwa pango la wanyang'anyi."

¹⁸Wakuu wa makuhani na waandishi wakasikia haya, wakatafuta njia ya kumwangamiza, kwa maana walimwogopa, kwa sababu umati wote ulishangazwa na mafundisho yake.

¹⁹Na ilipokuwa jioni, wakatoka nje ya mji.

²⁰Asubuhi, walipokuwa wakipita, wakauona ule mtini umenyauka toka mizizini. ²¹Petro akakumbuka, akamwambia, "Rabi, tazama! Ule mtini ulioulaani umenyauka."

²²Yesu akawajibu, "Mwaminini Baba yetu. ²³Amin, nawaambia, mtu yeyote atakayeuambia mlima huu, 'Ng'oka ukatupwe baharini,' pasipo kuwa na shaka moyoni mwake, bali akiamini kwamba hayo asemayo yatatendeka—atatendewa hayo. ²⁴Kwa hiyo nawaambia: kila kitu mnachoomba na kutaka, aminini kwamba mmekipokea—nacho kitakuwa chenu. ²⁵Nanyi kila msimamapo kuomba, sameheni lolote mlilo nalo dhidi ya mtu yeyote, ili Baba yenu wa mbinguni naye awasamehe ninyi dhambi zenu." ^a a v25 Hati za kale zaidi hazina mstari wa 26 hapa; nakala za baadaye zinaongeza: "Lakini msiposamehe, wala Baba yenu wa mbinguni hatawasamehe ninyi makosa yenu."

Kwa Mamlaka ya Nani?

²⁷Wakarudi Yerusalemu. Yesu alipokuwa akitembea hekaluni, wakuu wa makuhani, waandishi na wazee wakamjia, ²⁸wakamuuliza, "Unafanya haya kwa mamlaka gani? Au ni nani aliyekupa mamlaka haya ya kuyafanya?"

²⁹Yesu akawaambia, "Nitawauliza swali moja. Nijibuni, nami nitawaambia ni kwa mamlaka gani nayafanya mambo haya. ³⁰Ubatizo wa Yohana—je, ulitoka mbinguni, au ulitoka kwa wanadamu? Nijibuni."

³¹Wakajadiliana wao kwa wao: "Tukisema, 'Ulitoka mbinguni,' atatuuliza, 'Basi mbona hamkumwamini?' ³²Lakini tukisema, 'Ulitoka kwa wanadamu'"—wakauogopa umati, kwa sababu wote walimhesabu Yohana kuwa nabii wa kweli.

³³Wakamjibu Yesu, "Hatujui." Yesu akawaambia, "Wala mimi sitawaambia ni kwa mamlaka gani nayafanya mambo haya."