مرقس 11

11 ¹جب وہ یروشلیم کے قریب پہنچے، زیتون کے پہاڑ کے پاس بیت فگے اور بیت عنیاہ کے نزدیک، تو یسوع نے اپنے دو شاگردوں کو آگے بھیجا،

²اور اُن سے کہا، ”تمہارے سامنے جو گاؤں ہے اُس میں جاؤ، اور جوں ہی تم اُس میں داخل ہو گے، تمہیں ایک بندھا ہوا گدھے کا بچہ ملے گا جس پر کوئی کبھی سوار نہیں ہوا۔ اُسے کھول کر یہاں لے آؤ۔“

³”اور اگر کوئی تم سے پوچھے کہ ’تم یہ کیوں کر رہے ہو؟‘ تو کہنا کہ ’خُداوند کو اِس کی ضرورت ہے اور وہ اِسے فوراً یہاں واپس بھیج دے گا۔‘“

⁴وہ گئے اور اُنہوں نے ایک گدھے کا بچہ باہر گلی میں ایک دروازے کے پاس بندھا ہوا پایا، اور اُسے کھول لیا۔ ⁵وہاں کھڑے کچھ لوگوں نے اُن سے پوچھا، ”یہ کیا کر رہے ہو، اِس گدھے کے بچے کو کیوں کھول رہے ہو؟“ ⁶اُنہوں نے ویسا ہی جواب دیا جیسا یسوع نے اُن سے کہا تھا، اور لوگوں نے اُنہیں جانے دیا۔ ⁷وہ گدھے کے بچے کو یسوع کے پاس لائے اور اپنے کپڑے اُس پر ڈال دیے، اور وہ اُس پر بیٹھ گیا۔ ⁸بہت سوں نے اپنے کپڑے راستے پر بچھا دیے؛ اور اَوروں نے کھیتوں سے کاٹی ہوئی پتوں والی ڈالیاں بچھائیں۔ ⁹جو آگے آگے چل رہے تھے اور جو پیچھے پیچھے آ رہے تھے وہ پکار پکار کر کہہ رہے تھے، ”ہوشعنا! مبارک ہے وہ جو ہمارے باپ کے نام سے آتا ہے! ¹⁰مبارک ہے ہمارے باپ داؤد کی آنے والی بادشاہی! عالمِ بالا پر ہوشعنا!“

¹¹یسوع یروشلیم میں اور ہیکل میں داخل ہوا، اور اُس نے چاروں طرف سب چیزوں پر نظر کی، اور چونکہ اب دیر ہو چکی تھی، اِس لیے وہ بارہ شاگردوں کے ساتھ بیت عنیاہ کو چلا گیا۔

یسوع انجیر کے درخت پر لعنت کرتا ہے

¹²اگلے دن، جب وہ بیت عنیاہ سے نکل رہے تھے، تو یسوع کو بھوک لگی۔ ¹³اُس نے دور سے انجیر کا ایک پتوں سے بھرا درخت دیکھ کر یہ دیکھنے کے لیے اُس کے پاس گیا کہ شاید اُس پر کچھ ہو۔ مگر جب وہ اُس کے پاس پہنچا تو پتوں کے سوا اُسے کچھ نہ ملا، کیونکہ انجیر کا موسم نہ تھا۔

¹⁴تب اُس نے اُس سے کہا، ”اب سے کوئی تجھ سے کبھی پھل نہ کھائے۔“ اور اُس کے شاگردوں نے اُسے یہ کہتے سنا۔

یسوع اپنے باپ کے گھر کو پاک کرتا ہے

¹⁵وہ یروشلیم پہنچے، اور یسوع ہیکل میں داخل ہوا اور اُن کو باہر نکالنے لگا جو وہاں بیچتے اور خریدتے تھے۔ اُس نے سرّافوں کے تختے اور کبوتر بیچنے والوں کی کرسیاں اُلٹ دیں، ¹⁶اور اُس نے کسی کو ہیکل کے صحنوں میں سے کوئی سامان لے جانے نہ دیا۔

¹⁷اور اُس نے اُنہیں تعلیم دیتے ہوئے کہا، ”کیا یہ نہیں لکھا ہے کہ ’میرا گھر سب قوموں کے لیے دعا کا گھر کہلائے گا‘؟ مگر تم نے اِسے ڈاکوؤں کا اڈّا بنا دیا ہے۔“

¹⁸سردار کاہنوں اور فقیہوں نے یہ سنا اور اُسے ہلاک کرنے کی تدبیر ڈھونڈنے لگے، کیونکہ وہ اُس سے ڈرتے تھے، اِس لیے کہ ساری بھیڑ اُس کی تعلیم سے حیران تھی۔

¹⁹اور جب شام ہوئی تو وہ شہر سے باہر چلے گئے۔

²⁰صبح کو جب وہ اُدھر سے گزرے تو اُنہوں نے دیکھا کہ انجیر کا درخت جڑوں سے سوکھ گیا ہے۔ ²¹پطرس کو یاد آیا اور اُس نے اُس سے کہا، ”اے ربّی، دیکھ! جس انجیر کے درخت پر تُو نے لعنت کی تھی وہ سوکھ گیا ہے۔“

²²یسوع نے اُنہیں جواب دیا، ”ہمارے باپ پر ایمان رکھو۔ ²³میں تم سے سچ کہتا ہوں، جو کوئی اِس پہاڑ سے کہے کہ ’اُٹھ جا اور سمندر میں جا پڑ‘ اور اپنے دل میں شک نہ کرے بلکہ یقین رکھے کہ جو وہ کہتا ہے سو ہو جائے گا، تو اُس کے لیے ویسا ہی کیا جائے گا۔ ²⁴اِس لیے میں تم سے کہتا ہوں: جو کچھ تم دعا میں مانگو، یقین رکھو کہ تم نے اُسے پا لیا ہے ۔ وہ تمہارے لیے ہو جائے گا۔ ²⁵اور جب تم کھڑے دعا کرتے ہو، تو جس کسی سے تمہیں کوئی گلہ ہو اُسے معاف کر دو، تاکہ تمہارا باپ بھی جو آسمان پر ہے تمہارے گناہ تمہیں معاف کرے۔“ ^a a v25 قدیم ترین نسخوں میں یہاں آیت ۲۶ نہیں ہے؛ بعد کے نسخے یہ اضافہ کرتے ہیں: ”لیکن اگر تم معاف نہ کرو، تو تمہارا باپ بھی جو آسمان پر ہے تمہارے گناہ معاف نہ کرے گا۔“

کس کے اختیار سے؟

²⁷وہ پھر یروشلیم آئے۔ اور جب یسوع ہیکل میں پھر رہا تھا، تو سردار کاہن، فقیہ اور بزرگ اُس کے پاس آئے، ²⁸اور پوچھا، ”تُو کس اختیار سے یہ کام کرتا ہے؟ یا کس نے تجھے یہ اختیار دیا کہ اِنہیں کرے؟“

²⁹یسوع نے اُن سے کہا، ”میں تم سے ایک بات پوچھتا ہوں۔ تم مجھے جواب دو، تو میں تمہیں بتاؤں گا کہ کس اختیار سے یہ کام کرتا ہوں۔ ³⁰یوحنا کا بپتسمہ آسمان کی طرف سے تھا یا انسان کی طرف سے؟ مجھے جواب دو۔“

³¹اُنہوں نے آپس میں یہ سوچ بچار کی: ”اگر ہم کہیں کہ ’آسمان کی طرف سے‘، تو وہ کہے گا کہ ’پھر تم اُس پر ایمان کیوں نہ لائے؟‘ ³²لیکن اگر ہم کہیں کہ ’انسان کی طرف سے‘“ ۔ وہ بھیڑ سے ڈرتے تھے، کیونکہ سب یوحنا کو سچّا نبی مانتے تھے۔

³³اُنہوں نے یسوع کو جواب دیا، ”ہم نہیں جانتے۔“ یسوع نے کہا، ”تو میں بھی تمہیں نہیں بتاتا کہ کس اختیار سے یہ کام کرتا ہوں۔“