Marku 11

11 ¹Bí wọ́n ṣe ń súnmọ́ Jerusalemu, ní Bẹtfagi àti Bẹtani ní ẹ̀bá Òkè Olifi, Jesu rán méjì nínú àwọn ọmọ-ẹ̀yìn rẹ̀ síwájú,

²ó sọ fún wọn pé, “Ẹ lọ sí abúlé tí ó wà níwájú yín, bí ẹ bá sì wọ inú rẹ̀ tán, ẹ ó rí ọmọ kẹ́tẹ́kẹ́tẹ́ kan tí a dè mọ́lẹ̀, tí ẹnìkẹ́ni kò tíì gùn rí. Ẹ tú u, kí ẹ sì mú un wá síbí.”

³Bí ẹnikẹ́ni bá sì bi yín pé, ‘Èéṣe tí ẹ fi ń ṣe èyí?’ ẹ wí pé, ‘Olúwa nílò rẹ̀, yóò sì rán an padà síbí lẹ́sẹ̀kẹsẹ̀.’

⁴Wọ́n lọ, wọ́n sì rí ọmọ kẹ́tẹ́kẹ́tẹ́ kan tí a dè mọ́lẹ̀ ní ẹnu-ọ̀nà kan lóde ní ojú-pópó, wọ́n sì tú u. ⁵Àwọn kan nínú àwọn tí ó dúró níbẹ̀ bi wọ́n pé, “Kí ni ẹ̀ ń ṣe tí ẹ fi ń tú ọmọ kẹ́tẹ́kẹ́tẹ́ náà?” ⁶Wọ́n dáhùn gẹ́gẹ́ bí Jesu ti sọ fún wọn, àwọn ènìyàn náà sì jẹ́ kí wọ́n lọ. ⁷Wọ́n mú ọmọ kẹ́tẹ́kẹ́tẹ́ náà wá sọ́dọ̀ Jesu, wọ́n sì da aṣọ wọn bò ó, ó sì jókòó lórí rẹ̀. ⁸Ọ̀pọ̀lọpọ̀ ènìyàn tẹ́ aṣọ wọn ní ojú ọ̀nà; àwọn mìíràn sì tẹ́ ẹ̀ka igi oníwé tí wọ́n gé láti inú oko. ⁹Àwọn tí ó ń lọ síwájú àti àwọn tí ó ń tẹ̀lé e ń kígbe pé, “Hosana! Ìbùkún ni fún ẹni tí ó ń bọ̀ ní orúkọ Baba wa! ¹⁰Ìbùkún ni fún ìjọba baba wa Dafidi tí ń bọ̀! Hosana ní ibi gíga jùlọ!”

¹¹Jesu wọ Jerusalemu àti tẹ́mpìlì, ó wo ohun gbogbo yí ká, nígbà tí ó sì ti pẹ́ tán, ó jáde lọ sí Bẹtani pẹ̀lú àwọn Méjìlá.

Jesu Ré Igi Ọ̀pọ̀tọ́

¹²Ní ọjọ́ kejì, bí wọ́n ṣe ń kúrò ní Bẹtani, ebi ń pa Jesu. ¹³Nígbà tí ó rí igi ọ̀pọ̀tọ́ kan tí ó rúwé lókèèrè, ó lọ wò ó bóyá ó ní nǹkan kan lórí. Nígbà tí ó dé ọ̀dọ̀ rẹ̀, kò rí ohun kankan bí kò ṣe ewé, nítorí kì í ṣe àkókò ọ̀pọ̀tọ́.

¹⁴Nígbà náà ni ó wí fún un pé, “Kí ẹnìkẹ́ni má ṣe jẹ èso lára rẹ mọ́ láéláé.” Àwọn ọmọ-ẹ̀yìn rẹ̀ sì gbọ́ tí ó wí i.

Jesu Wẹ Ilé Baba Rẹ̀ Mọ́

¹⁵Wọ́n dé Jerusalemu, Jesu sì wọ tẹ́mpìlì, ó bẹ̀rẹ̀ sí lé àwọn tí ń tà àti àwọn tí ń rà níbẹ̀ jáde. Ó dojú àwọn tábìlì àwọn olùpààrọ̀ owó dé, àti àwọn ìjókòó àwọn tí ń ta àdàbà, ¹⁶kò sì jẹ́ kí ẹnìkẹ́ni gbé ẹrù ọjà kọjá ní àgbàlá tẹ́mpìlì.

¹⁷Ó sì kọ́ wọn pé, “Ǹjẹ́ a kò ha ti kọ ọ́ pé: ‘A ó pe ilé mi ní ilé àdúrà fún gbogbo orílẹ̀-èdè’? Ṣùgbọ́n ẹ̀yin ti sọ ọ́ di ihò àwọn ọlọ́ṣà.”

¹⁸Àwọn olórí àlùfáà àti àwọn akọ̀wé gbọ́ èyí, wọ́n sì ń wá ọ̀nà láti pa á run, nítorí wọ́n bẹ̀rù rẹ̀, nítorí tí ẹnu ya gbogbo ìjọ ènìyàn sí ẹ̀kọ́ rẹ̀.

¹⁹Nígbà tí alẹ́ sì lẹ́, wọ́n jáde kúrò nínú ìlú náà.

²⁰Ní òwúrọ̀, bí wọ́n ṣe ń kọjá lọ, wọ́n rí igi ọ̀pọ̀tọ́ náà tí ó ti rọ gbẹ láti gbòngbò rẹ̀. ²¹Peteru rántí, ó sì wí fún un pé, “Rabbi, wò ó! Igi ọ̀pọ̀tọ́ tí ẹ ré ti rọ gbẹ.”

²²Jesu dá wọn lóhùn pé, “Ẹ ní ìgbàgbọ́ nínú Baba wa. ²³Lóòótọ́ ni mo wí fún yín, ẹnikẹ́ni tí ó bá wí fún òkè yìí pé, ‘Gbéra sókè, kí a sì jù ọ́ sínú òkun,’ tí kò bá sì ṣiyèméjì nínú ọkàn rẹ̀, ṣùgbọ́n tí ó gbàgbọ́ pé ohun tí ó wí yóò ṣẹ—a ó ṣe é fún un. ²⁴Nítorí náà mo wí fún yín pé: ohunkóhun tí ẹ bá ń gbàdúrà tí ẹ sì ń béèrè fún, ẹ gbàgbọ́ pé ẹ ti gbà á—yóò sì jẹ́ tiyín. ²⁵Nígbà tí ẹ bá dúró láti gbàdúrà, ẹ dáríjì ohunkóhun tí ẹ bá dì mú sí ẹnikẹ́ni lọ́kàn, kí Baba yín tí ń bẹ ní ọ̀run lè dárí ẹ̀ṣẹ̀ yín jì yín pẹ̀lú.” ^a a v25 Àwọn ìwé àfọwọ́kọ àkọ́kọ́ kò ní ẹsẹ 26 níbí; àwọn ẹ̀dà tí ó tẹ̀lé e fi kún un pé: “Ṣùgbọ́n bí ẹ kò bá dáríjì, Baba yín tí ń bẹ ní ọ̀run kì yóò dárí àwọn ìrékọjá yín jì yín pẹ̀lú.”

Pẹ̀lú Àṣẹ Ta Ni?

²⁷Wọ́n padà sí Jerusalemu. Bí Jesu ṣe ń rìn nínú tẹ́mpìlì, àwọn olórí àlùfáà, àwọn akọ̀wé, àti àwọn àgbàgbà tọ̀ ọ́ wá, ²⁸wọ́n sì bi í pé, “Pẹ̀lú àṣẹ wo ni ìwọ fi ń ṣe èyí? Tàbí ta ni ó fún ọ ní àṣẹ yìí láti ṣe é?”

²⁹Jesu wí fún wọn pé, “Èmi yóò bi yín ní ìbéèrè kan. Ẹ dá mi lóhùn, èmi yóò sì sọ fún yín pẹ̀lú àṣẹ wo ni mo fi ń ṣe nǹkan wọ̀nyí. ³⁰Ìtẹ̀bọmi Johanu—ọ̀run ni ó ti wá, àbí láti ọwọ́ ènìyàn? Ẹ dá mi lóhùn.”

³¹Wọ́n jíròrò rẹ̀ láàrín ara wọn pé: “Bí a bá wí pé, ‘Láti ọ̀run,’ yóò bi wá pé, ‘Èéṣe tí ẹ kò fi gbà á gbọ́?’ ³²Ṣùgbọ́n bí a bá wí pé, ‘Láti ọ̀dọ̀ ènìyàn’”—wọ́n bẹ̀rù ìjọ ènìyàn, nítorí gbogbo wọn ka Johanu sí wòlíì tòótọ́.

³³Wọ́n dá Jesu lóhùn pé, “Àwa kò mọ̀.” Jesu sì wí pé, “Bẹ́ẹ̀ ni èmi náà kì yóò sọ fún yín pẹ̀lú àṣẹ wo ni mo fi ń ṣe nǹkan wọ̀nyí.”