Shouei Jerusalem to setan loukei
Jisuei phenbü gadu shoushou che thüka setan, Hosanna uihinbü laüa Jerusalem to atkei, hek alatbü bunyu che khüklauokkei, hoba seneibü Bou chem ka hek joubü hoba thanbü shuong sepeisai chühkei, khoei ungshedbou shuong hao haitila khangshang ka phokei. Aoeibü sei ei kümda dogo phejinei, haoei haoen to Johan shangabü nyibou phekei.
11 1Jerusalem to atla nyangko loujinei, Oliv Shongh yungkoa kibü Bethphage si Bethania to, Jisuei haoeibü eik müt nyi thedangto hautikei,
2haoen to laukei, “Kan thedanga kibü sang to atashi, hoba kan atsilengko, aoei ong asetbü gadu shoushou che phenan kibü kanei haplabü. Kho sengan hanei leibashi.”
3Aoei ong kan to, “Aila kanei ho kümda?” dogo phealonga, “Bunyubouei kho khamda, hoba tangshaitham hao hanei haan hautilabü,” dogo laushi.
4Haoen hauan, khonga koukhün to phenan kibü gadu shoushou che hapbei, hoba kho sengkei. 5Kaoen loan kibü müt atei haoen to phekei, “Kanei ho gadu shoushou sengan ai kümda?” 6Jisuei lenbü tegü haoenei jongaikei, hoba mütshuongei haoen apyokei. 7Haoenei gadu shoushou Jisu jungto leibakei, hoba haoeneibü nei khüto jinkukei, hoba haoei kho thüka setkei. 8Juongnyu haoeneibü nei khong to phokei; ateije sek ka akbü ik hongmaibü bunyem khong to phokei. 9Thedangto haubü shuong hoba phaito sembü shuongei uihinkei, “Hosanna! seneibü Bou nyena loubou kho haükubü yingshi! 10Louko kibü seneibü bou Dawid Sangle haükubü yingshi! Thükkabou khuthüka Hosanna!”
11Jisuei Jerusalem si lembüchem to atkei, pendou to sepeisai chühkei, hoba tou latetche kian, haoei eik anthüknyi yoa Bethania to koukei.
Jisuei bhuklong to khükkei
12Nyibounyet, haoen Bethania ka koujinei, Jisu mühei haikei. 13Saabüa ik hongmaibü bhuklong che hapan, haoei kho khüto ai ong kilao dogo chühla hau atkei. Lausikei kho jungto atlaje, haoei bunyem ong hapkei, ai lubü ahap, aishanga kho bhuklong sembü jihsiphai akikei.
14Kheijinei haoei kho to laukei, “Touje aoeikei no ka hek ashaulabü.” Hoba haoeibü eikshuongei haoei laubü ditkei.
Jisuei haoeibü Bou chem saopotikei
15Haoen Jerusalem to loukei, hoba Jisu lembüchem to atan, kaoen yaakbü hoba jungbü shuong shian sattikei. Haoei chandinam change shuongeibü shaushang hoba dukutuk yaakbü shuongeibü setshang shuong khüplepan phokei, 16hoba haoei aoyouei lembüchem danko nyaksinam jinla asakkukei.
17Hoba haoei haoen to lenkei, “‘Kü chem kho phang pendou shanga welaubü chem nyenlabü’ dogo adokei lo? Lausikei kanei kho yepeijawebü shuongeibü satshang la yeitikei.”
18Ungshedbou shuong hoba Ngühkhüm lenbou shuongei ho ditan, hao haitilabü hangsilam lambei; aishanga haoenei hao to hatkei, aieilausi mütshang pendouei haoei lenbüa maangpangkei.
19Hoba chasem sühjinei, haoen sangnyu ka koukei.
20Ngeyang enyu, haoen danjung paijinei, haoenei bhuklong kho yomang ka souan pungtibü hapbei. 21Peterei damenan hao to laukei, “Lenbou, chühashi! Nyi khükbü bhuklong kho souan pungtia.”
22Jisuei haoen to jongaikei, “Seneibü Bou to mailemashi. 23Maimaitham ngühmaia ngei kan to lenda, aoei ho shongh to, ‘Tonenan diyao to jinjan,’ dogo lauan, haoeibü maanga atoknokko, lausikei haoei laubü kho loushadlabü dogo mailemalonga, hao shanga kho kümlabü. 24Khoei ngei kan to lenda, kanei welauan hibü pendou, kanei kho hapan apa dogo mailemashi, hoba kho kaneibü kilabü. 25Kanei loan welaujinei, kanei aoyou khulimbo ai ong kibü shedbü apbuashi, khei kaneibü khuthükkabü Boueikei kaneibü shedbü apbulabü.” a a v25 Shaangbü laishiba shuonga hanei verse 26 akiko kikei; phaibü doan laishiba shuongei hai jinkua: "Lausikei kanei üpbua longa, kaneibü khuthükkabü Boueikei kaneibü shedbü üpbulabü."
Aoeibü sei danko?
27Haoen Jerusalem to haan ngaikei. Jisu lembüchem ka paiko kijinei, ungshedbou shuong, Ngühkhüm lenbou shuong, hoba jaishoubou shuongei hao jungto loukei, 28hoba phekei, “Nyi ai sei danko ho kümda? Ayingsi aoei ho sei no la kukei?”
29Jisuei haoen to laukei, “Ngei kan to ngüh che phelabü. Kü to jongaiashi, hoba ngei ai sei danko habü kümda dogo kan to lenlabü. 30Johaneibü baptikubü—kho khuthük ka lou sai, ayingsi müt ka? Kü to jongaiashi.”
31Haoen si haoen kanglanga joyoko laukei, “Künei ‘Khuthük ka’ dogo laualonga, haoei ‘Kholonga ailaibü kanei hao to maialem?’ dogo phelabü. 32Lausikei künei ‘Müt ka’ dogo laualonga”—haoenei mütshuong to hatkei, aishanga pendouei Johan kho tükdebü thuseibou che dogo dambei.
33Haoenei Jisu to jongaikei, “Künei angeda.” Jisuei laukei, “Ngeikei ai sei danko habü kümda dogo kan to alenlabü.”
