ማርቆስ 11

11 ¹ወደ ኢየሩሳሌም በቀረቡ ጊዜ፣ በደብረ ዘይት አጠገብ ወዳሉት ወደ ቤተ ፋጌና ወደ ቢታንያ ሲደርሱ፣ ኢየሱስ ከደቀ መዛሙርቱ ሁለቱን አስቀድሞ ላከ፤

²እንዲህም አላቸው፤ “በፊታችሁ ወዳለችው መንደር ሂዱ፤ እንደ ገባችሁም ማንም ተቀምጦበት የማያውቀውን የታሰረ ውርንጫ ታገኛላችሁ። ፈትታችሁ ወደዚህ አምጡት።”

³ማንም፣ ‘ይህን ለምን ታደርጋላችሁ?’ ብሎ ቢጠይቃችሁ፣ ‘ጌታ ይፈልገዋል፤ ወዲያውም ወደዚህ ይመልሰዋል’ በሉ።

⁴ሄደውም በውጭ በመንገድ ላይ በበር አጠገብ የታሰረ ውርንጫ አገኙ፤ ፈቱትም። ⁵በዚያ ከቆሙት አንዳንዶቹ፣ “ያን ውርንጫ ፈትታችሁ ምን ታደርጋላችሁ?” አሏቸው። ⁶ኢየሱስ እንዳዘዛቸውም መለሱላቸው፤ ሰዎቹም ተዉአቸው። ⁷ውርንጫውንም ወደ ኢየሱስ አመጡ፤ ልብሳቸውንም በላዩ ጣሉ፤ እርሱም ተቀመጠበት። ⁸ብዙዎች ልብሳቸውን በመንገድ ላይ አነጠፉ፤ ሌሎችም ከዕርሻ የቈረጡትን ቅጠላ ቅጠል አነጠፉ። ⁹ቀድመው የሄዱትና የተከተሉት እንዲህ እያሉ ይጮኹ ነበር፤ “ሆሣዕና! በአባታችን ስም የሚመጣ የተባረከ ነው! ¹⁰የምትመጣው የአባታችን የዳዊት መንግሥት የተባረከች ናት! ሆሣዕና በአርያም!”

¹¹ኢየሱስም ወደ ኢየሩሳሌም ገብቶ ወደ ቤተ መቅደስ ገባ፤ ሁሉንም ዙሪያውን ተመለከተ፤ ጊዜው አምሽቶ ስለ ነበር ከዐሥራ ሁለቱ ጋራ ወደ ቢታንያ ወጣ።

ኢየሱስ በለስን ረገማት

¹²በማግሥቱም ከቢታንያ ሲወጡ ኢየሱስ ተራበ። ¹³በሩቅ ቅጠል ያለባትን በለስ አይቶ፣ ነገር ይኖርባት እንደ ሆነ ለማየት ወደ እርስዋ ሄደ። በደረሰባትም ጊዜ ከቅጠል በቀር ምንም አላገኘም፤ የበለስ ወቅት አልነበረምና።

¹⁴ያን ጊዜም፣ “ከእንግዲህ ወዲህ ለዘላለም ማንም ከአንቺ ፍሬ አይብላ” አላት። ደቀ መዛሙርቱም ሲናገር ሰሙ።

ኢየሱስ የአባቱን ቤት አነጻ

¹⁵ወደ ኢየሩሳሌምም ደረሱ፤ ኢየሱስም ወደ ቤተ መቅደስ ገብቶ በዚያ የሚሸጡትንና የሚገዙትን ማስወጣት ጀመረ። የገንዘብ ለዋጮችን ገበታዎችና ርግብ የሚሸጡትን ሰዎች ወንበሮች ገለበጠ፤ ¹⁶ዕቃም ተሸክሞ በቤተ መቅደስ አደባባይ ማንም እንዲያልፍ አልፈቀደም።

¹⁷እያስተማራቸውም እንዲህ አለ፤ “‘ቤቴ ለአሕዛብ ሁሉ የጸሎት ቤት ትባላለች’ ተብሎ አልተጻፈምን? እናንተ ግን የወንበዴዎች ዋሻ አደረጋችኋት።”

¹⁸የካህናት አለቆችና ጸሐፍት ይህን ሰሙ፤ ሕዝቡም ሁሉ በትምህርቱ ይደነቅ ስለ ነበር ይፈሩት ነበር፤ የሚያጠፉበትንም መንገድ ይፈልጉ ነበር።

¹⁹በመሸም ጊዜ ከከተማ ወጡ።

²⁰ጠዋትም ሲያልፉ በለሲቱ ከሥሯ ደርቃ አዩ። ²¹ጴጥሮስም አስታውሶ፣ “ረቢ ሆይ፣ እነሆ የረገምካት በለስ ደርቃለች!” አለው።

²²ኢየሱስም መልሶ፣ “በአባታችን እመኑ። ²³እውነት እላችኋለሁ፣ ማንም ይህን ተራራ፣ ‘ተነሥተህ ወደ ባሕር ተወርወር’ ቢለው፣ በልቡም ሳይጠራጠር የሚለው እንደሚሆን ቢያምን፣ ይሆንለታል። ²⁴ስለዚህ እላችኋለሁ፤ የምትጸልዩትንና የምትለምኑትን ሁሉ እንደ ተቀበላችሁት እመኑ፤ ይሆንላችኋል። ²⁵ለጸሎት በቆማችሁ ጊዜ፣ በማንም ላይ የያዛችሁትን ሁሉ ይቅር በሉ፤ በሰማይ ያለው አባታችሁም ኀጢአታችሁን ይቅር እንዲላችሁ።” ^a a v25 ጥንታዊዎቹ ቅጂዎች እዚህ ላይ ቍጥር ፳፮ የላቸውም፤ የኋለኞቹ ቅጂዎች ግን፣ “ይቅር ባትሉ ግን፣ በሰማይ ያለው አባታችሁ እርሱ ደግሞ በደላችሁን ይቅር አይላችሁም” የሚለውን ይጨምራሉ።

በማን ሥልጣን?

²⁷ዳግመኛም ወደ ኢየሩሳሌም ተመለሱ። ኢየሱስም በቤተ መቅደስ ሲመላለስ፣ የካህናት አለቆችና ጸሐፍት ሽማግሌዎችም ወደ እርሱ መጡ፤ ²⁸“ይህን በማን ሥልጣን ታደርጋለህ? ወይስ ይህን ለማድረግ ይህን ሥልጣን ማን ሰጠህ?” አሉት።

²⁹ኢየሱስም፣ “እኔም አንድ ነገር እጠይቃችኋለሁ፤ መልሱልኝ፤ እኔም ይህን በማን ሥልጣን እንደማደርግ እነግራችኋለሁ። ³⁰የዮሐንስ ጥምቀት ከሰማይ ነበረችን ወይስ ከሰው? መልሱልኝ” አላቸው።

³¹እርስ በርሳቸውም ተመካከሩ፤ “‘ከሰማይ’ ብንል፣ ‘ታዲያ ለምን አላመናችሁትም?’ ይለናል፤ ³²ነገር ግን፣ ‘ከሰው’ ብንል”—ሁሉ ዮሐንስን እውነተኛ ነቢይ አድርገው ይቈጥሩት ስለ ነበር ሕዝቡን ፈሩ።

³³ኢየሱስንም መልሰው፣ “አናውቅም” አሉት። ኢየሱስም፣ “እኔም ይህን በማን ሥልጣን እንደማደርግ አልነግራችሁም” አለ።